Asianet News Malayalam

ആൻഡ്രോയിഡ് ഫോൺ ഉപയോഗിക്കുന്നവർ ജാഗ്രത; ഒടിപി ചോർത്തും, വാട്‍സാപ്പ് ചാറ്റുകൾ ചോർത്തും, ഫോൺ പൂട്ടും ഈ മാൽവെയർ

Prashobh Prasannan — Mon, 14 Sep 2026 15:34:13 +0530

ആൻഡ്രോയിഡ് ഫോൺ ഉപയോക്താക്കൾ ജാഗ്രത പാലിക്കണമെന്ന് സൈബർ സുരക്ഷാ ഗവേഷകരുടെ മുന്നറിയിപ്പ്. ഫോണിലെ ഒടിപി സന്ദേശങ്ങൾ ചോർത്താനും വാട്‍സാപ്പ്, ടെലിഗ്രാം ചാറ്റുകൾ നിരീക്ഷിക്കാനും ഫോൺ ഉപയോക്താവിന്റെ നിയന്ത്രണത്തിൽ നിന്ന് മാറ്റാനും കഴിയുന്ന പുതിയ മാൽവെയറാണ് കണ്ടെത്തിയിരിക്കുന്നത്. ‘മാൻടാക്സ് ഒറ്റാക്സ്’ എന്ന് പേരിട്ടിരിക്കുന്ന മാൽവെയർ വഴി ഉപയോക്താക്കളെ ശല്യപ്പെടുത്തുന്ന പോപ്-അപ്പുകളും വീഡിയോകളും ഓഡിയോ സന്ദേശങ്ങളും പ്രദർശിപ്പിക്കാനും ഹാക്കർമാർക്ക് സാധിക്കും. മൊബൈൽ സുരക്ഷാ സ്ഥാപനമായ സിംപീരിയമാണ് മാൽവെയർ കണ്ടെത്തിയത്. ഗൂഗിൾ പ്ലേ സ്റ്റോറിന് പുറത്തുള്ള അപകടകരമായ എപികെ ഫയലുകൾ വഴിയാണ് മാൽവെയർ പ്രചരിക്കുന്നതെന്നാണ് ഗവേഷകരുടെ കണ്ടെത്തൽ.

എങ്ങനെ ഫോണിലെത്തും?

തേർഡ് പാർട്ടി ഫയൽ പങ്കിടൽ പ്ലാറ്റ്ഫോമുകളിൽ ലഭിക്കുന്ന അപകടകരമായ എപികെ ഫയലുകൾ വഴിയാണ് മാൽവെയർ പ്രധാനമായും പ്രചരിക്കുന്നത്. ഫിഷിങ് ലിങ്കുകൾ, സന്ദേശമയയ്ക്കൽ ആപ്പുകൾ, സാമൂഹിക എഞ്ചിനീയറിങ് തന്ത്രങ്ങൾ എന്നിവ വഴിയും ഉപയോക്താക്കളെ കബളിപ്പിച്ച് മാൽവെയർ ഇൻസ്റ്റാൾ ചെയ്യിക്കുന്നതായി ഗവേഷകർ കണ്ടെത്തി. ഫോണിൽ ഇൻസ്റ്റാൾ ചെയ്ത ശേഷം മാൽവെയർ ആക്സസിബിലിറ്റി അനുമതിയും ഉപകരണ അഡ്‍മിനിസ്ട്രേറ്റർ അനുമതിയും പോലുള്ള ശക്തമായ അനുമതികൾ ആവശ്യപ്പെടും. ഇവ ലഭിച്ചാൽ ഉപയോക്താവിന്റെ അറിവില്ലാതെ ഫോണിൽ വിവിധ പ്രവർത്തനങ്ങൾ നടത്താൻ മാൽവെയറിന് കഴിയും.

ഒടിപിയും സ്വകാര്യ വിവരങ്ങളും ചോർത്തും

മാൻടാക്സ് ഒറ്റാക്സിന്റെ സ്പൈവെയർ സംവിധാനമാണ് ഏറ്റവും ആശങ്കയുണ്ടാക്കുന്നതെന്ന് ഗവേഷകർ പറയുന്നു. ഒറ്റത്തവണ ഉപയോഗിക്കുന്ന പാസ്‌വേഡ് അഥവാ ഒടിപി ഉൾപ്പെടെയുള്ള സന്ദേശങ്ങൾ വായിക്കാൻ മാൽവെയറിന് സാധിക്കും. കോൾ വിവരങ്ങൾ, കോൺടാക്ടുകൾ, ബ്രൗസർ ഹിസ്റ്റി, ഫോണിൽ ഇൻസ്റ്റാൾ ചെയ്ത ആപ്പുകളുടെ വിവരങ്ങൾ, ലൊക്കേഷൻ, ഗൂഗിൾ അക്കൗണ്ട് വിവരങ്ങൾ എന്നിവയും ചോർത്താൻ കഴിയുമെന്ന് ഗവേഷകർ വ്യക്തമാക്കി.

വാട്‍സാപ്പ്, ടെലിഗ്രാം ചാറ്റുകളും നിരീക്ഷിക്കും

ആൻഡ്രോയിഡിലെ ആക്സസിബിലിറ്റി സംവിധാനത്തെ ദുരുപയോഗം ചെയ്ത് ഉപയോക്താവിനെപ്പോലെ പ്രവർത്തിക്കാനും മാൻടാക്സ് ഒറ്റാക്സിന് കഴിയും. ഇതുവഴി വാട്‍സാപ്പ് പ്രൊഫൈൽ വിവരങ്ങളും സന്ദേശങ്ങളും ടെലിഗ്രാം ചാറ്റുകളും ചോർത്താൻ സാധിക്കും. മാത്രമല്ല, മീഡിയ പ്രൊജക്ഷൻ സംവിധാനം ഉപയോഗിച്ച് സ്ക്രീൻഷോട്ടുകൾ എടുക്കാനും സ്ക്രീൻ റെക്കോർഡ് ചെയ്യാനും ഫോണിലെ തത്സമയ പ്രവർത്തനങ്ങൾ ഹാക്കർമാർക്ക് കൈമാറാനും മാൽവെയറിന് കഴിയും.

ക്യാമറയും രഹസ്യമായി ഉപയോഗിക്കും

ഫോണിന്റെ മുൻ ക്യാമറയും പിൻ ക്യാമറയും ഉപയോക്താവിന്റെ അറിവില്ലാതെ പ്രവർത്തിപ്പിച്ച് ചിത്രങ്ങൾ പകർത്താനും അവ ആക്രമികൾക്ക് അയയ്ക്കാനും മാൽവെയറിന് കഴിയുമെന്ന് ഗവേഷകർ കണ്ടെത്തി. മാൻടാക്സ് ഒറ്റാക്സിന്റെ രണ്ടാം പതിപ്പിന് ഉപയോക്താക്കളെ ഭയപ്പെടുത്തുന്നതിനും ശല്യപ്പെടുത്തുന്നതിനുമുള്ള സംവിധാനങ്ങളും ഉണ്ടെന്നാണ് റിപ്പോർട്ട്. തുടർച്ചയായി പോപ്-അപ്പ് സന്ദേശങ്ങൾ പ്രദർശിപ്പിക്കാനും പൂർണ സ്ക്രീനിൽ വീഡിയോകൾ കാണിക്കാനും അപ്രതീക്ഷിത ചിത്രങ്ങൾ പ്രദർശിപ്പിക്കാനും ഫോണിന്റെ സ്പീക്കറിലൂടെ ശബ്‍ദസന്ദേശങ്ങൾ പ്ലേ ചെയ്യാനും ഇതിന് കഴിയും.

പഴയ ആൻഡ്രോയിഡ് ഫോണുകൾക്ക് കൂടുതൽ ഭീഷണി

ആൻഡ്രോയിഡ് 9 അല്ലെങ്കിൽ അതിന് മുമ്പുള്ള പതിപ്പുകൾ ഉപയോഗിക്കുന്ന പഴയ ഫോണുകളെയാണ് മാൽവെയറിന്റെ റാൻസംവെയർ സംവിധാനം പ്രധാനമായും ബാധിക്കുന്നത്. ഫോണിലെ ചിത്രങ്ങൾ, വീഡിയോകൾ, രേഖകൾ തുടങ്ങിയ ഫയലുകൾ എൻക്രിപ്റ്റ് ചെയ്യാൻ ഇതിന് കഴിയും. ആൻഡ്രോയിഡ് 10 മുതലുള്ള പതിപ്പുകളിൽ സ്റ്റോറേജ് നിയന്ത്രണങ്ങൾ ശക്തമായതിനാൽ ഫയലുകൾ എൻക്രിപ്റ്റ് ചെയ്യാനുള്ള മാൽവെയറിന്റെ ശേഷി കുറയും. എന്നാൽ പുതിയ ആൻഡ്രോയിഡ് ഫോണുകളും സ്പൈവെയർ ആക്രമണത്തിന് ഇരയാകാൻ സാധ്യതയുണ്ടെന്ന് ഗവേഷകർ മുന്നറിയിപ്പ് നൽകി.

എങ്ങനെ സുരക്ഷിതരാകാം?

അപരിചിത വെബ്സൈറ്റുകളിൽ നിന്നോ സന്ദേശങ്ങളിലെ സംശയാസ്പദമായ ലിങ്കുകളിൽ നിന്നോ എപികെ ഫയലുകൾ ഡൗൺലോഡ് ചെയ്ത് ഇൻസ്റ്റാൾ ചെയ്യരുതെന്ന് വിദഗ്ധർ മുന്നറിയിപ്പ് നൽകി. പ്രത്യേകിച്ച് ആക്സസിബിലിറ്റി, ഉപകരണ അഡ്മിനിസ്ട്രേറ്റർ തുടങ്ങിയ അനുമതികൾ ആവശ്യപ്പെടുന്ന ആപ്പുകൾ ഉപയോഗിക്കുമ്പോൾ ജാഗ്രത പാലിക്കണം. മാൻടാക്സ് ഒറ്റാക്സിനെ ഗൂഗിൾ പ്ലേ പ്രൊട്ടക്ട് കണ്ടെത്തുന്നുണ്ടെന്നാണ് സിംപീരിയം വ്യക്തമാക്കുന്നത്. അതിനാൽ ഗൂഗിൾ പ്ലേ പ്രൊട്ടക്ട് പ്രവർത്തനക്ഷമമായി നിലനിർത്തുകയും ഫോൺ സോഫ്റ്റ്‌വെയർ കൃത്യമായി അപ്ഡേറ്റ് ചെയ്യുകയും ചെയ്യുന്നത് സുരക്ഷ വർധിപ്പിക്കും.

ഉപഗ്രഹങ്ങളോട് നേരിട്ട് സംവദിക്കുന്ന എഐ കാലാവസ്ഥാ സംവിധാനം; മണിക്കൂറിൽ പുതിയ പ്രവചനം

Prashobh Prasannan — Tue, 08 Sep 2026 13:01:57 +0530

കാലാവസ്ഥാ പ്രവചനങ്ങൾ പുതുക്കാൻ കഴിയുന്ന പുതിയ എഐ സംവിധാനം ഗൂഗിൾ അവതരിപ്പിച്ചു. ‘വെതർനെക്സ്റ്റ് 3’ എന്ന് പേരിട്ടിരിക്കുന്ന ഈ സംവിധാനമാണ് ഇതുവരെ വികസിപ്പിച്ചിട്ടുള്ളതിൽ ഏറ്റവും നൂതനവും കൃത്യതയേറിയതുമായ ആഗോള കാലാവസ്ഥാ മോഡൽ എന്നാണ് ഗൂഗിൾ ഡീപ്‌മൈൻഡും ഗൂഗിൾ റിസർച്ചും അവകാശപ്പെടുന്നത്. ഗൂഗിൾ സെർച്ചിലും ജെമിനിയിലും ഗൂഗിൾ മാപ്‍സിലും ഗൂഗിൾ മാപ്‍സ് പ്ലാറ്റ്‌ഫോമിലും ഗൂഗിൾ എർത്ത് എൻജിനിലും കാലാവസ്ഥാ വിവരങ്ങൾ നൽകാൻ വെതർനെക്സ്റ്റ് 3 ഉപയോഗിക്കുമെന്നും കമ്പനി വ്യക്തമാക്കി.

അഞ്ച് കിലോമീറ്റർ വരെ കൃത്യത

പുതിയ സംവിധാനത്തിന്റെ പ്രധാന പ്രത്യേകത പ്രവചനങ്ങളുടെ കൂടുതൽ ഉയർന്ന കൃത്യതയാണ്. താപനില, ഈർപ്പം തുടങ്ങിയ ഉപരിതല കാലാവസ്ഥാ ഘടകങ്ങൾ അഞ്ച് കിലോമീറ്റർ വരെ സൂക്ഷ്മതയിൽ പ്രവചിക്കാൻ വെതർനെക്സ്റ്റ് 3ന് കഴിയും. മറ്റ് ഉപരിതല ഘടകങ്ങൾ 10 കിലോമീറ്റർ പരിധിയിലും കാറ്റിന്റെ വേഗത പോലുള്ള അന്തരീക്ഷ ഘടകങ്ങൾ 25 കിലോമീറ്റർ പരിധിയിലും പ്രവചിക്കാൻ സാധിക്കും.

മുൻ മോഡലായ വെതർനെക്സ്റ്റ് 2നെ അപേക്ഷിച്ച് ആഗോള കാലാവസ്ഥയുടെ ഏകദേശം അഞ്ച് മടങ്ങ് കൂടുതൽ വ്യക്തമായ ചിത്രം നൽകാൻ പുതിയ സംവിധാനത്തിന് കഴിയുമെന്നാണ് ഗൂഗിളിന്റെ അവകാശവാദം. വെതർനെക്സ്റ്റ് 2 ആറ് മണിക്കൂർ ഇടവേളയിലാണ് 25 കിലോമീറ്റർ ഗ്രിഡിൽ പ്രവചനങ്ങൾ നൽകിയിരുന്നത്.

തത്സമയ ഉപഗ്രഹ വിവരങ്ങൾ

തത്സമയ കാലാവസ്ഥാ വിവരങ്ങളാണ് പുതിയ സംവിധാനത്തിന്റെ പ്രധാന കരുത്ത്. പരമ്പരാഗത കാലാവസ്ഥാ പ്രവചന മോഡലുകളെ മാത്രം ആശ്രയിക്കുന്നതിന് പകരം ആഗോള ജിയോസ്റ്റേഷനറി ഉപഗ്രഹങ്ങളിൽ നിന്നുള്ള തത്സമയ വിവരങ്ങളുടെ വിപുലമായ ശേഖരം വെതർനെക്സ്റ്റ് 3 ഉപയോഗിക്കുന്നു.

ഇതുവഴി അന്തരീക്ഷത്തിലെ മാറ്റങ്ങൾ തുടർച്ചയായി നിരീക്ഷിക്കാനും ഓരോ മണിക്കൂറിലും പുതിയ പ്രവചനങ്ങൾ നൽകാനും സാധിക്കും. കൊടുങ്കാറ്റുകൾ, മഴമേഖലകൾ, കാലാവസ്ഥാ മുന്നണികൾ തുടങ്ങിയ അതിവേഗം മാറുന്ന സാഹചര്യങ്ങൾ കൂടുതൽ കൃത്യമായി പിന്തുടരാനും ഇത് സഹായിക്കും.

മഴ പ്രവചനത്തിലും മുന്നേറ്റം

മഴയുടെ അളവ് പ്രവചിക്കുന്നതിലും വെതർനെക്സ്റ്റ് 3 കൂടുതൽ കൃത്യത കൈവരിച്ചതായി ഗൂഗിൾ പറയുന്നു. നാസയുടെ ഉപഗ്രഹ വിവരങ്ങളും ആഗോള മഴാ വിവരശേഖരങ്ങളും ഉപയോഗിച്ചാണ് സംവിധാനം പരിശീലിപ്പിച്ചത്. പരിശോധനകളിൽ ചില സാഹചര്യങ്ങളിൽ നിലവിലെ സംവിധാനങ്ങളുമായി താരതമ്യം ചെയ്യുമ്പോൾ മഴ പ്രവചനത്തിൽ 60 ശതമാനം വരെ മെച്ചപ്പെട്ട കൃത്യത രേഖപ്പെടുത്തിയതായും ഗൂഗിൾ വ്യക്തമാക്കി.

സൗരോർജ, കാറ്റ് ഊർജ മേഖലകൾക്കും സഹായം

പുനരുപയോഗ ഊർജ മേഖലയുടെ ആസൂത്രണത്തിനും പുതിയ എഐ സംവിധാനം പ്രയോജനപ്പെടും. കാറ്റാടിയന്ത്രങ്ങളുടെ ഉയരത്തിന് സമാനമായ 100 മീറ്റർ ഉയരത്തിലെ കാറ്റിന്റെ വേഗത, മേഘാവരണം, സൗരവികിരണം എന്നിവ പ്രവചിക്കാൻ സംവിധാനത്തിന് കഴിയും. ദിവസങ്ങൾക്കുമുമ്പ് തന്നെ മഴയുടെ സാധ്യത കൂടുതൽ കൃത്യമായി മനസിലാക്കാൻ ഉപയോക്താക്കൾക്ക് സാധിക്കുമെന്നും ഗൂഗിൾ അറിയിച്ചു. കാലാവസ്ഥാ പ്രവചനങ്ങൾ കുറച്ചുകൂടി ബുദ്ധിമുട്ടായിരുന്ന മേഖലകളിലാണ് ഇതിന്റെ പ്രയോജനം ഏറ്റവും കൂടുതൽ ലഭിക്കുകയെന്നും കമ്പനി വ്യക്തമാക്കി.

റോബോട്ടുകളെ നിർമിക്കാൻ റോബോട്ടുകൾ; ചൈനയിലെ പുതിയ വിപ്ലവം

Prashobh Prasannan — Thu, 17 Sep 2026 11:50:45 +0530

റോബോട്ടുകൾ മറ്റ് റോബോട്ടുകളെ നിർമിക്കുന്ന കാലം എത്തിയിരിക്കുകയാണ്. സയൻസ് ഫിക്ഷൻ സിനിമകളിലെ രംഗമെന്ന് തോന്നുമെങ്കിലും സംഭവം യാഥാർഥ്യമാണ്. ചൈനയിൽ വ്യാവസായിക ഹ്യൂമനോയിഡ് റോബോട്ടുകളുടെ വൻതോതിലുള്ള നിർമാണത്തിനായി പുതിയ ഫാക്ടറി പ്രവർത്തനം ആരംഭിച്ചു. ഉബിടെക് റോബോട്ടിക്സാണ് ലിയുഷൗവിൽ പുതിയ നിർമാണകേന്ദ്രം തുറന്നത്. ഗ്വാങ്‌സി ഷുവാങ് സ്വയംഭരണ മേഖലയിലാണ് ഫാക്ടറി സ്ഥിതി ചെയ്യുന്നത്. നിർമാണപ്രക്രിയയുടെ വിവിധ ഘട്ടങ്ങളിൽ റോബോട്ടുകളെ തന്നെ ഉപയോഗിക്കുന്നതാണ് ഈ ഫാക്ടറിയുടെ പ്രധാന പ്രത്യേകത. ഓരോ 10 മിനിറ്റിലും ഒരു വ്യാവസായിക ഹ്യൂമനോയിഡ് റോബോട്ട് നിർമിക്കാൻ ഇവിടെ സാധിക്കും.

വർഷം 10,000 റോബോട്ടുകൾ

കമ്പനി പുറത്തുവിട്ട വിവരങ്ങൾ പ്രകാരം പുതിയ ഫാക്ടറിക്ക് പ്രതിവർഷം 10,000 റോബോട്ടുകൾ നിർമിക്കാനുള്ള ശേഷിയുണ്ട്. 14,000 ചതുരശ്രമീറ്റർ വിസ്‍തൃതിയുള്ള കെട്ടിടത്തിന് 13.8 മീറ്റർ ഉയരമുണ്ട്. ഉബിടെക്കിന്റെ വാക്കർ എസ്, ക്രൂസർ ശ്രേണിയിലുള്ള വ്യാവസായിക ഹ്യൂമനോയിഡ് റോബോട്ടുകളാണ് പ്രധാനമായും ഇവിടെ നിർമിക്കുന്നത്. ഉബിടെക്കും സീമെൻസ് ഡിജിറ്റൽ ഇൻഡസ്ട്രീസ് സോഫ്റ്റ്‌വെയറും ചേർന്നാണ് ഫാക്ടറി ഒരുക്കിയത്.

നിയന്ത്രിക്കുന്നത് 'സ്‍മാർട്ട് ബ്രെയിൻ'

'സ്‍മാർട്ട് ബ്രെയിൻ' എന്ന് ഉബിടെക് വിശേഷിപ്പിക്കുന്ന ഡിജിറ്റൽ സംവിധാനം വഴിയാണ് ഫാക്ടറിയുടെ പ്രവർത്തനങ്ങൾ നിയന്ത്രിക്കുന്നത്. എന്താണ് നിർമിക്കേണ്ടത്, ആവശ്യമായ ഭാഗങ്ങൾ എവിടേക്ക് മാറ്റണം, നിർമിച്ച റോബോട്ടുകളുടെ ഗുണനിലവാരം എങ്ങനെ പരിശോധിക്കണം തുടങ്ങിയ കാര്യങ്ങൾ ഈ സംവിധാനം നിയന്ത്രിക്കുന്നു. നിർമിക്കുന്ന ഓരോ റോബോട്ടിനും പ്രത്യേക സീരിയൽ നമ്പറും നൽകുന്നുണ്ട്. ഇതുവഴി നിർമാണത്തിന്റെ ഓരോ ഘട്ടത്തിലും റോബോട്ടിന്റെ വിവരങ്ങൾ പിന്തുടരാൻ സാധിക്കും.

റോബോട്ടുകൾക്ക് എന്താണ് ജോലി?

ക്രൂസർ വൈ1, ക്രൂസർ എസ്2 എന്നീ റോബോട്ടുകളാണ് ഫാക്ടറിയിലെ വിവിധ ജോലികളിൽ ഉപയോഗിക്കുന്നത്. നിർമാണത്തിനാവശ്യമായ വസ്തുക്കൾ ഇറക്കുക, അവ അടുക്കിവയ്ക്കുക, ഉൽപ്പാദന കേന്ദ്രത്തിലേക്ക് എത്തിക്കുക, വിവിധ ഭാഗങ്ങളിലേക്ക് മാറ്റുക തുടങ്ങിയ ജോലികൾ ഇവ ചെയ്യുന്നു. റോബോട്ടുകളെ നിർമിക്കാൻ ആവശ്യമായ ഘടകങ്ങൾ തയ്യാറാക്കുന്നതിലും റോബോട്ടുകൾക്ക് പങ്കാളിത്തമുണ്ട്. സഹകരണ റോബോട്ടിക് കൈകൾ, ഡ്രൈവറില്ലാത്ത ചരക്ക് വാഹനങ്ങൾ, വൈദ്യുത സഹായമുള്ള യന്ത്രങ്ങൾ, കറങ്ങുന്ന ജോലിമേശകൾ തുടങ്ങിയവയും അന്തിമ അസംബ്ലിയിൽ ഉപയോഗിക്കുന്നു. ഒരേ ഉൽപ്പാദന നിരയിൽ തന്നെ വ്യത്യസ്ത മോഡലുകളിലുള്ള റോബോട്ടുകൾ നിർമിക്കാൻ ഈ സംവിധാനത്തിലൂടെ സാധിക്കും. ഓരോ മോഡലിനും പ്രത്യേകം നിർമാണ സംവിധാനം ഒരുക്കേണ്ടതില്ല എന്നതാണ് ഇതിന്റെ നേട്ടം.

റോബോട്ടുകൾക്കും ആരോഗ്യ പരിശോധന

ഫാക്ടറിയിൽ നിർമിക്കുന്ന ഒരു ഹ്യൂമനോയിഡ് റോബോട്ടും പരിശോധനകൾ പൂർത്തിയാക്കാതെ പുറത്തേക്ക് പോകില്ല. ഓരോ റോബോട്ടിനും 4 മണിക്കൂറിലധികം നീളുന്ന സമഗ്ര യന്ത്ര പരിശോധന നടത്തുന്നു. ഇതിന് പിന്നാലെ 360 ഡിഗ്രി ദൃശ്യ പരിശോധനയും നടക്കും. റോബോട്ടിന്റെ പുറംഭാഗം എല്ലാ കോണുകളിൽനിന്നും പരിശോധിച്ചാണ് ഗുണനിലവാരം ഉറപ്പാക്കുന്നത്.

65 ചതുരശ്രമീറ്ററിൽ 112 റോബോട്ടുകൾ

നിർമാണം പൂർത്തിയായ ശേഷവും പ്രവർത്തനങ്ങൾ സ്വയം നിയന്ത്രിതമായി തുടരുന്നു. ഫാക്ടറിയിലെ യാന്ത്രിക സംഭരണകേന്ദ്രത്തിൽ വെറും 65 ചതുരശ്രമീറ്റർ സ്ഥലത്ത് 112 ഹ്യൂമനോയിഡ് റോബോട്ടുകളെ സൂക്ഷിക്കാൻ കഴിയുമെന്ന് ഉബിടെക് പറയുന്നു. സ്വയം നിയന്ത്രിത വാഹനങ്ങൾ, ഡ്രൈവറില്ലാത്ത ഫോർക്ക്ലിഫ്റ്റുകൾ, മറ്റ് ചരക്ക് നീക്ക സംവിധാനങ്ങൾ എന്നിവ ഉപയോഗിച്ചാണ് റോബോട്ടുകളെയും ഘടകങ്ങളെയും നിർമാണം, പരിശോധന, സംഭരണം എന്നിവയ്ക്കിടയിൽ മാറ്റുന്നത്.

റോബോട്ടിക്സിൽ മുന്നേറി ചൈന

ചൈന റോബോട്ടിക്സ് വ്യവസായം അതിവേഗം വികസിപ്പിക്കുകയും ഗവേഷണശാലകളിൽ നിന്നുള്ള സാങ്കേതികവിദ്യകളെ യഥാർഥ വ്യാവസായിക ഉപയോഗത്തിലേക്ക് മാറ്റുകയും ചെയ്യുന്ന ഘട്ടത്തിലാണ് പുതിയ ഫാക്ടറിയുടെ പ്രവർത്തനം ആരംഭിച്ചിരിക്കുന്നത്. ചൈനയുടെ നാഷണൽ ബ്യൂറോ ഓഫ് സ്റ്റാറ്റിസ്റ്റിക്സിന്റെ കണക്കുകൾ പ്രകാരം ജൂലൈയിൽ രാജ്യത്ത് 98,677 വ്യാവസായിക റോബോട്ടുകളാണ് നിർമിച്ചത്. മുൻവർഷത്തെ ജൂലൈയെ അപേക്ഷിച്ച് 30.2 ശതമാനമാണ് വർധന. വർഷത്തിലെ ആദ്യ 7 മാസങ്ങളിൽ ചൈനയിലെ വ്യാവസായിക റോബോട്ട് ഉൽപ്പാദനം 635,056 യൂണിറ്റിലെത്തി. മുൻവർഷത്തെ ഇതേ കാലയളവിനെ അപേക്ഷിച്ച് 28.5 ശതമാനം വർധനവാണ് രേഖപ്പെടുത്തിയത്.

ഇനി ജെമിനിയോട് പറഞ്ഞാൽ മതി; ജിമെയിലും ഡോക്സും കീപ്പും നിയന്ത്രിക്കാം, പുതി ഫീച്ച‍‌ർ അവതരിപ്പിച്ചു

Sangeetha KS — Mon, 07 Sep 2026 17:19:55 +0530

ടൈപ്പ് ചെയ്യാതെ സംസാരിച്ചുകൊണ്ട് ഇമെയിലുകൾ തിരയാനും രേഖകൾ തയ്യാറാക്കാനും കുറിപ്പുകൾ ക്രമീകരിക്കാനും കഴിയുന്ന പുതിയ വോയിസ് ഫീച്ചറുമായി ഗൂഗിൾ. ജിമെയിൽ, ഡോക്സ്, കീപ്പ് എന്നിവയിൽ ജെമിനിയുടെ ശബ്‍ദ അധിഷ്‍ഠിത സൗകര്യങ്ങളാണ് കമ്പനി അവതരിപ്പിച്ചത്.

ഗൂഗിൾ വർക്ക്‌സ്‌പേസിൽ ജെമിനിയുടെ പുതിയ എഐ വോയിസ് ഫീച്ചറുകൾ ലഭ്യമാകുന്നതായി കമ്പനി ബ്ലോഗ് കുറിപ്പിലൂടെ അറിയിച്ചു. ആശയങ്ങൾ കുറിച്ചുവയ്ക്കുന്നത് മുതൽ ഇമെയിലിലെ വിവരങ്ങൾ കണ്ടെത്തുന്നതും പുതിയ രേഖകൾ തയ്യാറാക്കുന്നതും വരെ ശബ്‍ദം ഉപയോഗിച്ച് ചെയ്യാനാകുമെന്നാണ് ഗൂഗിൾ പറയുന്നത്. ഗൂഗിൾ സിഇഒ സുന്ദർ പിച്ചൈയും സോഷ്യൽ മീഡിയ പ്ലാറ്റ്ഫോമായ എക്സിലൂടെ പുതിയ ഫീച്ചറുകളെക്കുറിച്ച് പ്രതികരിച്ചു. ജിമെയിൽ ഇൻബോക്സ് തിരയാനും ഗൂഗിൾ കീപ്പിലെ ചിന്തകളും ജോലികളും ക്രമീകരിക്കാനും പുതിയ ഡോക്സ് തയ്യാറാക്കാനും ഇനി ജെമിനിയുമായി സംസാരിച്ചാൽ മതിയാകുമെന്ന് അദ്ദേഹം അറിയിച്ചു.

മൂന്ന് പുതിയ വോയിസ് ഫീച്ചറുകൾ

ഗൂഗിൾ വർക്ക്‌സ്‌പേസിലാണ് പ്രധാനമായും മൂന്ന് പുതിയ വോയിസ് ഫീച്ചറുകൾ എത്തിയിരിക്കുന്നത്. ജിമെയിൽ ലൈവ്, ഡോക്സ് ലൈവ്, കീപ്പ് ലൈവ് എന്നിവയാണ് അവ. ഓരോന്നും വ്യത്യസ്‍ത ആവശ്യങ്ങൾക്കായാണ് രൂപകൽപ്പന ചെയ്തിരിക്കുന്നത്. എന്നാൽ ഇവയുടെ പ്രവർത്തന രീതി ഒന്നുതന്നെയാണ്. അതായത്, ഉപയോക്താവ് സംസാരിക്കുന്നു, ജെമിനി ജോലി ചെയ്യുന്നു.

ജിമെയിൽ ലൈവ്: ഇമെയിൽ സെർച്ചിന് സംസാരിച്ചാൽ മതി

ജിമെയിൽ ലൈവിലൂടെ ഇൻബോക്സിലെ വിവരങ്ങൾ സംസാരിച്ച് കണ്ടെത്താം. നിരവധി ഇമെയിലുകൾ തുറന്ന് പരിശോധിക്കുകയോ ദൈർഘ്യമേറിയ സന്ദേശങ്ങളിലൂടെ താഴേക്ക് നീങ്ങുകയോ വേണ്ട. എയ‍‌ർപോ‌ർട്ടിൽ “വിമാനത്തിന്റെ ഗേറ്റ് നമ്പർ എത്രയാണ്?”, “ഈ ആഴ്ച കുട്ടിയുടെ സ്‍കൂളിൽ എന്തൊക്കെയാണ് നടക്കുന്നത്?” തുടങ്ങിയ ചോദ്യങ്ങൾ ജെമിനിയോട് ചോദിച്ചാൽ ഇൻബോക്സിലെ വിവരങ്ങൾ പരിശോധിച്ച് ആവശ്യമായ മറുപടി നൽകും.

ഡോക്സ് ലൈവ്: ആശയങ്ങൾ ഡോക്യുമെന്‍റാക്കാം

കൃത്യമായ രൂപമില്ലാത്ത ഒരു ആശയം പോലും സംസാരിച്ചുകൊണ്ട് ഡോക്സ് ലൈവിലൂടെ ഡോക്യുമെന്‍റാക്കി മാറ്റാം. ഉപയോക്താവ് പറയുന്ന കാര്യങ്ങൾ ജെമിനി ക്രമപ്പെടുത്തി സാഹചര്യത്തിന് അനുയോജ്യമായ ഡോക്യുമെന്‍റാക്കി മാറ്റും. അനുമതി നൽകിയാൽ ജിമെയിൽ, ഡ്രൈവ്, ചാറ്റ്, വെബ് എന്നിവയിൽ നിന്നുള്ള പ്രസക്തമായ വിവരങ്ങളും ജെമിനിക്ക് ഉപയോഗിക്കാൻ സാധിക്കും. ആശയരൂപീകരണം, രൂപരേഖ തയ്യാറാക്കൽ, എഴുത്തിന്റെ ശൈലി മെച്ചപ്പെടുത്തൽ തുടങ്ങിയ കാര്യങ്ങളിലും ഇത് സഹായിക്കും.

കീപ്പ് ലൈവ്: ചിന്തകൾ കുറിപ്പുകളാക്കാം

പെട്ടെന്ന് മനസിൽ വരുന്ന ആശയങ്ങളും കാര്യങ്ങളും ക്രമപ്പെടുത്തി സൂക്ഷിക്കാനാണ് കീപ്പ് ലൈവ് സഹായിക്കുന്നത്. സംസാരിച്ചുപോകുന്ന രീതിയിൽ കാര്യങ്ങൾ പറഞ്ഞാൽ അവയെ ജെമിനി ക്രമീകരിച്ച കുറിപ്പുകൾ, ലിസ്റ്റുകൾ, ചെയ്യേണ്ട കാര്യങ്ങൾ എന്നിവയായി മാറ്റും.

ആർക്കൊക്കെ ലഭിക്കും?

പുതിയ വോയ്സ് ഫീച്ചറുകൾ ഈ ആഴ്ച മുതൽ ലഭ്യമാകുന്നുണ്ട് എന്നാണ് റിപ്പോർട്ടുകൾ. ജിമെയിൽ ലൈവും കീപ്പ് ലൈവും ഗൂഗിൾ എഐ പ്ലസ്, പ്രോ, അൾട്രാ വരിക്കാർക്ക് ലഭിക്കും. ഡോക്സ് ലൈവ് പ്രോ, അൾട്രാ വരിക്കാർക്കാണ് നിലവിൽ ലഭിക്കുക. ഗൂഗിൾ വർക്ക്‌സ്‌പേസ് ഉപയോഗിക്കുന്ന സ്ഥാപനങ്ങളിലേക്കും ഈ ഫീച്ചറുകൾ ഉടൻ എത്തിക്കുമെന്ന് ഗൂഗിൾ അറിയിച്ചു.

ജെമിനി ഉപയോഗിക്കുന്നവർ ശ്രദ്ധിക്കുക! ഒക്ടോബർ 9 മുതൽ വലിയ മാറ്റം, സൗജന്യ ഉപയോക്താക്കൾക്ക് തിരിച്ചടി

Prashobh Prasannan — Tue, 06 Oct 2026 10:50:43 +0530

ഗൂഗിൾ ജെമിനി ഉപയോഗിക്കുന്നവർക്കായി പുതിയ നിയന്ത്രണങ്ങൾ പ്രഖ്യാപിച്ച് ഗൂഗിൾ. ഒക്ടോബർ 9 മുതൽ സൗജന്യമായി ജെമിനി ഉപയോഗിക്കുന്നവർക്ക് ‘ഫ്ലാഷ്-ലൈറ്റ്’ മോഡൽ മാത്രമേ ലഭ്യമാകൂ. നിലവിൽ സൗജന്യ ഉപയോക്താക്കൾക്ക് ലഭിക്കുന്ന ‘ഫ്ലാഷ്’, ‘പ്രോ’ മോഡലുകളിലേക്കുള്ള പ്രവേശനം ഇതോടെ അവസാനിക്കും.

സൗജന്യ ഉപയോക്താക്കൾക്ക് നിയന്ത്രണം

ഗൂഗിൾ പുറത്തിറക്കിയ പുതിയ വിവരങ്ങൾ പ്രകാരം, ഗൂഗിൾ എഐ സബ്‌സ്‌ക്രിപ്ഷൻ ഇല്ലാത്ത ഉപയോക്താക്കൾക്ക് ഒക്ടോബർ 9 മുതൽ ഫ്ലാഷ്-ലൈറ്റ് മാത്രമായിരിക്കും ലഭിക്കുക. കൂടുതൽ ശേഷിയുള്ള ഫ്ലാഷ്, പ്രോ മോഡലുകൾ സൗജന്യ ശ്രേണിയിൽ നിന്ന് ഒഴിവാക്കും. പ്രതിമാസം 4.99 ഡോളർ, ഏകദേശം 500 രൂപ, നിരക്കുള്ള എഐ പ്ലാനിലും മാറ്റമുണ്ട്. ഈ പ്ലാൻ ഉപയോഗിക്കുന്നവർക്ക് ഫ്ലാഷ്-ലൈറ്റ്, ഫ്ലാഷ് മോഡലുകൾ തുടർന്നും ലഭിക്കും. എന്നാൽ പ്രോ മോഡലിന്‍റെ സൗകര്യം ഇനി ലഭിക്കില്ല. മാറ്റം ഏതുതീയതി മുതൽ തങ്ങളുടെ അക്കൗണ്ടിൽ ബാധകമാകുമെന്ന് ഗൂഗിൾ ബന്ധപ്പെട്ട ഉപയോക്താക്കളെ ഇമെയിൽ വഴി അറിയിക്കും.

സങ്കീർണമായ ചോദ്യങ്ങൾക്ക് കൂടുതൽ ഉപയോഗം

ജെമിനിയുടെ ഉപയോഗപരിധി നിർണയിക്കുന്ന രീതിയിലും ഗൂഗിൾ നേരത്തെ മാറ്റം വരുത്തിയിരുന്നു. ഓരോ ചോദ്യത്തിനും ആവശ്യമായ കംപ്യൂട്ടിങ് ശേഷിയുടെ അടിസ്ഥാനത്തിലാണ് ഉപയോഗം കണക്കാക്കുന്നത്. സങ്കീർണമായ ചോദ്യങ്ങൾ, ദൈർഘ്യമേറിയ സംഭാഷണങ്ങൾ, കൂടുതൽ ശേഷിയുള്ള മാതൃകകളുടെ ഉപയോഗം എന്നിവ കൂടുതൽ ഉപയോഗ പരിധി ചെലവഴിക്കാൻ കാരണമാകും.

പ്രോ ഉപയോക്താക്കൾക്ക് ‘ഡീപ് തിങ്ക്’

അതേസമയം, ഇതുവരെ ഏറ്റവും ഉയർന്ന എഐ അൾട്രാ പ്ലാനിൽ മാത്രമുണ്ടായിരുന്ന ‘ഡീപ് തിങ്ക്’ ഫീച്ചർ ഇനി എഐ പ്രോ ഉപയോക്താക്കൾക്കും ലഭിക്കും. പ്രതിമാസം 19.99 ഡോളർ, ഏകദേശം 1,900 രൂപ, നിരക്കുള്ള എഐ പ്രോ പ്ലാനിലാണ് ഈ സൗകര്യം എത്തുന്നത്. കൂടുതൽ സങ്കീർണമായ ചോദ്യങ്ങൾ പരിഹരിക്കുന്നതിനായി ഒരേസമയം ഒന്നിലധികം റീസണിങ് പ്രക്രിയകൾ ഉപയോഗിക്കുന്ന സാങ്കേതികവിദ്യയാണ് ഡീപ് തിങ്ക്. പ്രോ മാതൃകയുടെ സഹായത്തോടെയാണ് ഇത് പ്രവർത്തിക്കുന്നത്.

ചിന്താശേഷി തിരഞ്ഞെടുക്കാൻ പുതിയ ഓപ്ഷനുകൾ

ജെമിനി ആപ്പിൽ ചോദ്യങ്ങൾക്ക് ഉത്തരം നൽകാൻ എത്രത്തോളം കംപ്യൂട്ടിങ് ശേഷി ഉപയോഗിക്കണമെന്ന് ഉപയോക്താക്കൾക്ക് തീരുമാനിക്കാനാകുന്ന പുതിയ സൗകര്യവും ഗൂഗിൾ പരീക്ഷിക്കുന്നുണ്ട്. ‘ലോ’, ‘മീഡിയം’, ‘ഹൈ’ എന്നിങ്ങനെ മൂന്ന് ചിന്താശേഷി ക്രമീകരണങ്ങൾ അവതരിപ്പിക്കാനാണ് നീക്കം. ഉയർന്ന നിലവാരം തിരഞ്ഞെടുക്കുമ്പോൾ കൂടുതൽ കംപ്യൂട്ടിങ് ശേഷി ഉപയോഗിക്കേണ്ടിവരുമെന്നതിനാൽ ഉപയോക്താവിന്റെ ഉപയോഗപരിധിയും വേഗത്തിൽ കുറയാൻ സാധ്യതയുണ്ട്.

ജെമിനി 4 അർഗോണിലും പരീക്ഷണം

ഇതിനിടെ, ഗൂഗിൾ അടുത്ത തലമുറയിലെ ജെമിനി 4 അർഗോൺ മാതൃകയിലും പരീക്ഷണം നടത്തുകയാണ്. ‘ഫെയർവിൻഡ്’ പദ്ധതിയുടെ ഭാഗമായി തിരഞ്ഞെടുത്ത സൈബർ സുരക്ഷാ വിദഗ്ധർക്കാണ് നിലവിൽ ഇത് പരീക്ഷണാടിസ്ഥാനത്തിൽ ലഭ്യമാക്കിയിരിക്കുന്നത്. പിന്നീട് പണമടച്ച് ഉപയോഗിക്കുന്ന എപിഐ ഉപയോക്താക്കൾക്കും എഐ അൾട്രാ ഉപയോക്താക്കൾക്കും അർഗോൺ ലഭ്യമാക്കാനാണ് ഗൂഗിളിന്റെ നീക്കം. എന്നാൽ ഇത് എഐ പ്രോ പ്ലാനിന്റെ ഭാഗമാകുമോ, അതോ അതിന് മുകളിലുള്ള പുതിയ ശ്രേണിയായി അവതരിപ്പിക്കുമോ എന്ന കാര്യത്തിൽ ഗൂഗിൾ ഇതുവരെ വ്യക്തത നൽകിയിട്ടില്ല.

വാട്‍സാപ്പിൽ ഇനി തേർഡ് പാർട്ടി എഐ ഏജന്റുകളുമായും ചാറ്റ് ചെയ്യാം; പുതിയ ഫീച്ചർ പരീക്ഷണത്തിൽ

Sangeetha KS — Sat, 05 Sep 2026 17:34:02 +0530

ഉപയോക്താക്കൾക്ക് തേർഡ് പാർട്ടി എഐ ഏജന്‍റുകളെയും ബോട്ടുകളെയും നേരിട്ട് വാട്‍സാപ്പുമായി ബന്ധിപ്പിച്ച് ഉപയോഗിക്കാൻ കഴിയുന്ന പുതിയ ഫീച്ചർ പരീക്ഷിക്കുന്നതായി റിപ്പോർട്ട്. ഇതുവഴി വാട്‍സാപ്പ് ആപ്പ് വിട്ടുപോകാതെ തന്നെ വിവിധ എഐ സേവനങ്ങളുമായി ആശയവിനിമയം നടത്താൻ സാധിച്ചേക്കും. ഓരോ എഐ ഏജന്റിനും പ്രത്യേകം ചാറ്റ് ലഭിക്കുന്ന രീതിയിലായിരിക്കും പുതിയ ഫീച്ചർ. നിലവിൽ പരിമിതമായ എണ്ണം ആൻഡ്രോയിഡ് ഉപയോക്താക്കൾക്കിടയിലാണ് ഫീച്ചർ പരീക്ഷിക്കുന്നത് എന്നാണ് വിവരം. വരും മാസങ്ങളിൽ കൂടുതൽ അക്കൗണ്ടുകളിലേക്ക് ഇത് വ്യാപിപ്പിച്ചേക്കും. എന്നാൽ ഫീച്ചർ എല്ലാവർക്കുമായി എപ്പോൾ ലഭ്യമാക്കുമെന്ന് വാട്സ്ആപ്പ് ഇതുവരെ സ്ഥിരീകരിച്ചിട്ടില്ല.

എഐ ഏജന്റുകളെ ചേർക്കാം

വാട്‍സാപ്പ് ഫീച്ചറുകൾ നിരീക്ഷിക്കുന്ന വാബീറ്റാഇൻഫോയാണ് പുതിയ സംവിധാനത്തെക്കുറിച്ചുള്ള വിവരങ്ങൾ പുറത്തുവിട്ടത്. ആൻഡ്രോയിഡിനായുള്ള വാട്‍സാപ്പ് ബീറ്റ പതിപ്പ് 2.26.35.3-ൽ ഫീച്ചർ കണ്ടെത്തിയതായാണ് റിപ്പോർട്ട്. ആപ്പ് സെറ്റിംഗ്‍സിൽ പുതിയ ‘ഏജന്റ്സ്’ വിഭാഗം ലഭിച്ചേക്കും. ഇതിലൂടെ അനുയോജ്യമായ എഐ സേവനങ്ങൾ ചേർക്കാനും ക്രമീകരിക്കാനും കഴിയും. ഓരോ ഏജന്റിനും പ്രത്യേക പേരും പ്രൊഫൈൽ ചിത്രവും നൽകാൻ സാധിച്ചേക്കും. ഒരു അക്കൗണ്ടിൽ പരമാവധി അഞ്ച് എഐ ഏജന്റുകളെ വരെ ചേർക്കാൻ വാട്സ്ആപ്പ് അനുവദിച്ചേക്കുമെന്നാണ് സൂചന.

പ്രത്യേക ചാറ്റിൽ പ്രവർത്തനം

ഏജന്റിനെ ക്രമീകരിച്ച ശേഷം വാട്‍സാപ്പ് ഒരു എപിഐ കീ സൃഷ്ടിച്ചേക്കും. ഈ കീ ഏജന്റിനെ നൽകുന്ന സേവനത്തിൽ നൽകിയാൽ അത് വാട്‍സാപ്പ് ചാറ്റുമായി ബന്ധിപ്പിക്കാനാകും. ഓരോ സേവനത്തിന്റെയും ക്രമീകരണ രീതി വ്യത്യസ്തമായിരിക്കാം. കണക്ഷൻ പുനഃസജ്ജമാക്കുന്നതിനായി പുതിയ എപിഐ കീ സൃഷ്ടിക്കാനും സാധിച്ചേക്കും. ബന്ധിപ്പിച്ചുകഴിഞ്ഞാൽ എഐ ഏജന്റ് സ്വന്തം വാട്‍സാപ്പ് ചാറ്റിലായിരിക്കും പ്രവർത്തിക്കുക. ഉപയോക്താവിന്റെ മറ്റ് ചാറ്റുകൾ, കോൺടാക്ടുകൾ, മീഡിയ ഫയലുകൾ എന്നിവ ഏജന്റിന് കാണാൻ കഴിയില്ലെന്നാണ് റിപ്പോർട്ട്. ഗ്രൂപ്പ് ചാറ്റുകളിലും കമ്മ്യൂണിറ്റികളിലും എഐ ഏജന്റുകളെ ചേർക്കാനും സാധിക്കില്ല.

ചാറ്റുകൾക്ക് എൻഡ്-ടു-എൻഡ് എൻക്രിപ്ഷൻ ഇല്ല

എഐ ഏജന്റുകളുമായുള്ള ചാറ്റുകൾക്ക് വാട്‍സാപ്പിന്‍റെ എൻഡ്-ടു-എൻഡ് എൻക്രിപ്ഷൻ ബാധകമായിരിക്കില്ലെന്നാണ് റിപ്പോർട്ട്. ഏജന്റിന്റെ ഡെവലപ്പർക്കുവേണ്ടി മെറ്റയുടെ സേവനത്തിലൂടെയായിരിക്കും സന്ദേശങ്ങൾ കൈമാറുക. അതിനാൽ സേവനം നൽകുന്ന ഡെവലപ്പർക്ക് ഈ സന്ദേശങ്ങൾ ലഭ്യമാകാൻ സാധ്യതയുണ്ട്. അതേസമയം, സാധാരണ വാട്സ്ആപ്പ് ഉപയോക്താക്കൾ തമ്മിലുള്ള വ്യക്തിഗത ചാറ്റുകളും കോളുകളും നിലവിലുള്ള എൻഡ്-ടു-എൻഡ് എൻക്രിപ്ഷനിൽ തന്നെ തുടരും.

പരിമിതമായ ഉപയോക്താക്കൾക്ക് മാത്രം

നിലവിൽ തിരഞ്ഞെടുത്ത ആൻഡ്രോയിഡ് ഉപയോക്താക്കൾക്കിടയിലാണ് പുതിയ ഫീച്ചർ പരീക്ഷിക്കുന്നത്. ഭൂരിഭാഗം ഉപയോക്താക്കൾക്കും സെറ്റിംഗ്‍സിൽ ‘ഏജന്റ്സ്’ വിഭാഗം ഇപ്പോഴും കാണാനിടയില്ല. എല്ലാവർക്കുമായി ഫീച്ചർ എത്തിക്കുന്ന തീയതി വാട്‍സാപ്പ് ഇതുവരെ പ്രഖ്യാപിച്ചിട്ടില്ല.

പുതിയ ഐഫോൺ വാങ്ങുന്നുണ്ടോ? ആപ്പിൾ ഉൽപ്പന്നങ്ങൾക്ക് 15,000 രൂപ വരെ ക്യാഷ്ബാക്ക്; ഐഫോൺ 18 പ്രോ, മാക്ബുക്ക് പ്രോക്കും വിലക്കിഴിവ്

Sangeetha KS — Thu, 01 Oct 2026 15:27:11 +0530

ഇന്ത്യയിലെ ഉപഭോക്താക്കൾക്കായി പുതിയ സീസണൽ ഓഫറുകൾ പ്രഖ്യാപിച്ച് ആപ്പിൾ. ഏറ്റവും പുതിയ ഐഫോണുകൾ, മാക് കമ്പ്യൂട്ടറുകൾ ഉൾപ്പെടെയുള്ള തിരഞ്ഞെടുത്ത ഉൽപ്പന്നങ്ങൾ വാങ്ങുമ്പോൾ 15,000 രൂപ വരെ ലാഭിക്കാം. എന്നാൽ ഇത് ഉൽപ്പന്നങ്ങളുടെ നേരിട്ടുള്ള വിലക്കുറവല്ല. യോഗ്യമായ ബാങ്ക് കാർഡുകൾ ഉപയോഗിച്ച് വാങ്ങുമ്പോൾ ലഭിക്കുന്ന ഇൻസ്റ്റന്റ് ക്യാഷ്ബാക്കിലൂടെയാണ് ഈ ആനുകൂല്യം ലഭിക്കുക.

ആപ്പിളിന്റെ ഇന്ത്യയിലെ ഔദ്യോഗിക വെബ്സൈറ്റിലൂടെയാണ് ഓഫറുകൾ ലഭ്യമാകുന്നത്. അമേരിക്കൻ എക്സ്പ്രസ്, ആക്സിസ് ബാങ്ക്, ഐസിഐസിഐ ബാങ്ക് കാർഡുകൾ ഉപയോഗിക്കുന്നവർക്ക് ഇൻസ്റ്റന്റ് ക്യാഷ്ബാക്ക് ലഭിക്കും. പ്രമുഖ ബാങ്കുകളുടെ കാർഡുകൾ ഉപയോഗിച്ച് 6 മാസം വരെ നോ കോസ്റ്റ് ഇഎംഐ സൗകര്യവും തിരഞ്ഞെടുക്കാം.

ഐഫോൺ 18 പ്രോയ്ക്ക് 7,000 രൂപ വരെ ക്യാഷ്ബാക്ക്

ഏറ്റവും പുതിയ ഐഫോൺ 18 പ്രോ, ഐഫോൺ 18 പ്രോ മാക്സ് മോഡലുകൾക്ക് 7,000 രൂപ വരെ ഇൻസ്റ്റന്റ് ക്യാഷ്ബാക്കാണ് ലഭിക്കുക. 256GB സ്റ്റോറേജുള്ള ഐഫോൺ 18 പ്രോയ്ക്ക് ഇന്ത്യയിലെ പ്രാരംഭ വില 1,64,900 രൂപയാണ്. ഐഫോൺ 18 പ്രോ മാക്സിന്റെ പ്രാരംഭ വില 1,79,900 രൂപയാണ്. 7,000 രൂപയുടെ പൂർണ ക്യാഷ്ബാക്ക് ലഭിച്ചാൽ ഐഫോൺ 18 പ്രോയുടെ ഫലപ്രദമായ വില 1,57,900 രൂപയായും ഐഫോൺ 18 പ്രോ മാക്സിന്റേത് 1,72,900 രൂപയായും കുറയും.

പഴയ ഫോൺ മാറ്റി നൽകാനും അവസരം

പഴയ ഉപകരണം കൈമാറുമ്പോൾ 81,500 രൂപ വരെ എക്സ്ചേഞ്ച് ആനുകൂല്യവും ആപ്പിൾ നൽകുന്നുണ്ട്. എന്നാൽ പഴയ ഫോണിന്റെ പ്രായം, ഉപയോഗിച്ച നില, മറ്റ് ഘടകങ്ങൾ എന്നിവ അനുസരിച്ചായിരിക്കും എക്സ്ചേഞ്ച് മൂല്യം കണക്കാക്കുക. പുതിയ ഐഫോൺ വാങ്ങുന്നവർക്ക് 3 മാസത്തേക്ക് ആപ്പിൾ മ്യൂസിക്, ആപ്പിൾ ടിവി പ്ലസ്, ആപ്പിൾ ആർക്കേഡ് എന്നിവ സൗജന്യമായി ലഭിക്കുമെന്നും കമ്പനി വ്യക്തമാക്കുന്നു.

മറ്റ് ഐഫോണുകൾക്കും ക്യാഷ്ബാക്ക്

ഐഫോൺ എയറിന് 5,000 രൂപ വരെ ക്യാഷ്ബാക്ക് ലഭിക്കും. ഐഫോൺ 17, ഐഫോൺ 17ഇ മോഡലുകൾക്ക് 1,000 രൂപ വരെ ക്യാഷ്ബാക്കും ലഭിക്കും.

മാക്ബുക്ക് പ്രോയ്ക്ക് 15,000 രൂപ വരെ ലാഭം

ആപ്പിളിന്റെ പുതിയ ഓഫറുകളിൽ ഏറ്റവും ഉയർന്ന ക്യാഷ്ബാക്ക് ലഭിക്കുന്നത് ഏറ്റവും പുതിയ മാക്ബുക്ക് പ്രോ മോഡലുകൾക്കാണ്. 15,000 രൂപ വരെയാണ് ഇൻസ്റ്റന്റ് ക്യാഷ്ബാക്ക് ലഭിക്കുക. എം5 പ്രോ ചിപ്പുള്ള 14 ഇഞ്ച് മാക്ബുക്ക് പ്രോയ്ക്ക് ഇന്ത്യയിലെ പ്രാരംഭ വില 2,49,900 രൂപയാണ്. 16 ഇഞ്ച് മോഡലിന്റെ വില 2,99,900 രൂപയിൽ ആരംഭിക്കുന്നു. എം5 ചിപ്പുള്ള 14 ഇഞ്ച് മാക്ബുക്ക് പ്രോയുടെ പ്രാരംഭ വില 1,89,900 രൂപയാണ്. 15,000 രൂപയുടെ പൂർണ ക്യാഷ്ബാക്ക് ലഭിച്ചാൽ 14 ഇഞ്ച് എം5 പ്രോ മോഡലിന്റെ ഫലപ്രദമായ വില 2,34,900 രൂപയും 16 ഇഞ്ച് എം5 പ്രോ മോഡലിന്റേത് 2,84,900 രൂപയും 14 ഇഞ്ച് എം5 മോഡലിന്റേത് 1,74,900 രൂപയുമായി കുറയും.

മാക് എയറിനും മാക് സ്റ്റുഡിയോയ്ക്കും ഓഫർ

മറ്റ് മാക് മോഡലുകൾക്കും ആപ്പിൾ ക്യാഷ്ബാക്ക് നൽകുന്നുണ്ട്. മാക്ബുക്ക് എയർ വാങ്ങുന്നവർക്ക് 9,000 രൂപ വരെ ക്യാഷ്ബാക്ക് ലഭിക്കും. മാക് സ്റ്റുഡിയോയ്ക്ക് 10,000 രൂപ വരെയും മാക്ബുക്ക് നിയോ, ഐമാക്, മാക് മിനി മോഡലുകൾക്ക് 5,000 രൂപ വരെയും ക്യാഷ്ബാക്ക് ലഭിക്കും. മാക് വാങ്ങുമ്പോൾ പഴയ കമ്പ്യൂട്ടർ കൈമാറി അതിന്റെ മൂല്യം പുതിയ ഉപകരണത്തിന്റെ വിലയിൽ കുറയ്ക്കാനുള്ള എക്സ്ചേഞ്ച് സൗകര്യവും ലഭ്യമാണ്. യോഗ്യമായ വാങ്ങലുകൾക്കൊപ്പം 3 മാസത്തേക്ക് ആപ്പിൾ ടിവി പ്ലസ്, ആപ്പിൾ ആർക്കേഡ് സേവനങ്ങളും സൗജന്യമായി ലഭിക്കും.

ഇനി വസ്ത്രങ്ങൾ വാങ്ങും മുൻപ് ധരിച്ചുനോക്കാം; ചാറ്റ്ജിപിടിയിൽ പുതിയ ഫീച്ചർ

Prashobh Prasannan — Fri, 02 Oct 2026 11:43:20 +0530

ഓൺലൈൻ ഷോപ്പിങ് കൂടുതൽ എളുപ്പമാക്കാൻ പുതിയ ഫീച്ചറുമായി ചാറ്റ്ജിപിടി. ഇനി ഓൺലൈനിൽ വസ്ത്രങ്ങൾ വാങ്ങുന്നതിന് മുമ്പ് അവ ധരിച്ചുനോക്കിയാൽ എങ്ങനെയുണ്ടാകുമെന്ന് ചാറ്റ്ജിപിടിയിലൂടെ തന്നെ കാണാം. പുതിയ വെർച്വൽ ട്രൈ-ഓൺ സംവിധാനമാണ് ഓപ്പൺഎഐ അവതരിപ്പിച്ചിരിക്കുന്നത്. ഒരു ഷർട്ടോ ജാക്കറ്റോ മറ്റ് വസ്ത്രങ്ങളോ വാങ്ങുന്നതിന് മുമ്പ് അത് സ്വന്തം ശരീരത്തിൽ എങ്ങനെയായിരിക്കും കാണപ്പെടുകയെന്ന് മനസിലാക്കാൻ പുതിയ സംവിധാനം സഹായിക്കും. ഇതിനൊപ്പം ഇഷ്ടപ്പെട്ട ഉൽപ്പന്നങ്ങൾ പിന്നീട് പരിശോധിക്കുന്നതിനായി സൂക്ഷിച്ചുവയ്ക്കാനുള്ള പുതിയ ഫേവറിറ്റ്സ് സൗകര്യവും ചാറ്റ്ജിപിടിയിൽ എത്തിയിട്ടുണ്ട്.

ഫോട്ടോ നൽകിയാൽ വസ്ത്രം ധരിച്ചുനോക്കാം

വെർച്വൽ ട്രൈ-ഓൺ സംവിധാനം ഉപയോഗിക്കാൻ ഉപയോക്താക്കൾ ചാറ്റ്ജിപിടിയിൽ സ്വന്തം സെൽഫിയോ പൂർണ ശരീരത്തിന്റെ ഫോട്ടോയോ അപ്‌ലോഡ് ചെയ്യണം. തുടർന്ന് വാങ്ങാൻ ഉദ്ദേശിക്കുന്ന വസ്ത്രമോ ആക്സസറിയോ തിരഞ്ഞെടുത്താൽ അത് ധരിച്ചാൽ എങ്ങനെയുണ്ടാകുമെന്ന് കാണിക്കുന്ന ചിത്രം ചാറ്റ്ജിപിടി തയ്യാറാക്കും. ചാറ്റ്ജിപിടിയിലെ ഷോപ്പിങ് ഫലങ്ങളിൽ പുതിയ ട്രൈ ഓൺ ബട്ടണിലൂടെയാണ് ഈ സൗകര്യം ലഭിക്കുക. വസ്ത്രത്തിന്റെ ചിത്രം നേരിട്ട് അപ്‌ലോഡ് ചെയ്തും അത് ധരിച്ചുനോക്കുന്ന ചിത്രം തയ്യാറാക്കാൻ ചാറ്റ്ജിപിടിയോട് ആവശ്യപ്പെടാം.

കൂടുതൽ സ്വാഭാവിക ചിത്രങ്ങൾ

ഓപ്പൺഎഐയുടെ ചാറ്റ്ജിപിടി ഇമേജസ് 2.5 മോഡലാണ് പുതിയ സംവിധാനത്തിന് പിന്നിൽ പ്രവർത്തിക്കുന്നത്. കൂടുതൽ സ്വാഭാവികമായ ലൈറ്റിങ്ങും മികച്ച ടെക്സ്ചറുകളും നൽകുന്നതിനൊപ്പം ഉപയോക്താക്കളുടെ നിർദേശങ്ങൾ കൂടുതൽ കൃത്യമായി പാലിക്കാനും ഈ മോഡലിന് കഴിയുമെന്ന് കമ്പനി പറയുന്നു. ചിത്രങ്ങൾ തയ്യാറാക്കുന്നതിനുള്ള സമയം കുറയ്ക്കാനും പുതിയ മോഡലിലൂടെ സാധിക്കും. ഇതുവഴി വസ്ത്രങ്ങൾ ധരിച്ചുനോക്കുന്ന ചിത്രങ്ങൾ കൂടുതൽ സ്വാഭാവികവും യാഥാർഥ്യത്തോട് അടുത്തതുമാക്കുകയാണ് ലക്ഷ്യമെന്ന് ഓപ്പൺഎഐ വ്യക്തമാക്കി.

ഇഷ്ടപ്പെട്ട ഉൽപ്പന്നങ്ങൾ സൂക്ഷിക്കാം

ഫേവറിറ്റ്സ് എന്നതാണ് മറ്റൊരു പുതിയ സൗകര്യം. ഷോപ്പിങ്ങിനിടെ കണ്ടെത്തുന്ന ഉൽപ്പന്നങ്ങൾ ചാറ്റ്ജിപിടിയിലെ ലൈബ്രറിയിൽ പിന്നീട് കാണുന്നതിനായി സൂക്ഷിച്ചുവയ്ക്കാൻ ഇതിലൂടെ സാധിക്കും. സേവ് ചെയ്യുന്ന ഉൽപ്പന്നങ്ങളും വെർച്വൽ ട്രൈ-ഓൺ ചിത്രങ്ങളും ഒരേ ഇൻ-ആപ്പ് ഇടത്ത് കാണാൻ സാധിക്കും. ഇതുവഴി ഇഷ്ടപ്പെട്ട വസ്ത്രങ്ങൾ പിന്നീട് എളുപ്പത്തിൽ കണ്ടെത്താനും പരിശോധിക്കാനും കഴിയും.

സെലിബ്രിറ്റികളുടെ വസ്ത്രങ്ങളും കണ്ടെത്താം

വസ്ത്രങ്ങൾ ധരിച്ചുനോക്കുന്നതിന് പുറമെ ഷോപ്പിങ്ങുമായി ബന്ധപ്പെട്ട മറ്റ് ആവശ്യങ്ങൾക്കും ചാറ്റ്ജിപിടി ഉപയോഗിക്കാം. ഉപയോക്താവിന് പരീക്ഷിക്കാനാഗ്രഹിക്കുന്ന ഒരു പ്രത്യേക സ്റ്റൈൽ വിവരിച്ചാൽ അതിന് അനുയോജ്യമായ വസ്ത്രങ്ങൾ കണ്ടെത്താൻ ചാറ്റ്ജിപിടിക്ക് കഴിയും. സെലിബ്രിറ്റികൾ ധരിച്ച വസ്ത്രങ്ങളുടെ ചിത്രങ്ങൾ അപ്‌ലോഡ് ചെയ്ത് അവയിൽ ഉൾപ്പെട്ടിരിക്കുന്ന വാങ്ങാൻ ലഭ്യമായ വസ്ത്രങ്ങളും കണ്ടെത്താം.

ചിത്രങ്ങൾ അപ്‌ലോഡ് ചെയ്യുമ്പോൾ ശ്രദ്ധ വേണം

ഗൂഗിൾ സെർച്ചിൽ 2025ൽ അവതരിപ്പിച്ച വെർച്വൽ ട്രൈ-ഓൺ സംവിധാനത്തിന് സമാനമാണ് ചാറ്റ്ജിപിടിയിലെയും പുതിയ ഫീച്ചർ. അതേസമയം, വ്യക്തിഗത അക്കൗണ്ടിൽ നിന്ന് അപ്‌ലോഡ് ചെയ്യുന്ന ചിത്രങ്ങൾ ഡിഫോൾട്ടായി പരിശീലന ആവശ്യങ്ങൾക്കായി ഉപയോഗിക്കപ്പെടാമെന്ന് ഓപ്പൺഎഐ മുന്നറിയിപ്പ് നൽകുന്നു. ഉപയോക്താക്കൾക്ക് ഇതിൽ നിന്ന് ഒഴിവാകാനുള്ള ഓപ്ഷനുമുണ്ട്. പുതിയ വെർച്വൽ ട്രൈ-ഓൺ, ഫേവറിറ്റ്സ് എന്നീ രണ്ട് ഫീച്ചറുകളും ആഗോളതലത്തിൽ ചാറ്റ്ജിപിടി ഉപയോക്താക്കൾക്കായി ലഭ്യമാക്കിത്തുടങ്ങിയതായി ഓപ്പൺഎഐ അറിയിച്ചു.

എക്‌സ്, ഗ്രോക്ക്, കർസർ ഇനി ഒറ്റ കുടക്കീഴിൽ; പുതിയ സബ്‌സ്‌ക്രിപ്ഷൻ പ്ലാനുകളുമായി ഇലോൺ മസ്‌ക്; നിരക്കുകൾ അറിയാം

Sangeetha KS — Thu, 15 Oct 2026 12:57:20 +0530

സോഷ്യൽ മീഡിയ പ്ലാറ്റ്ഫോമായ എക്‌സ്, എഐ ചാറ്റ്ബോട്ടായ ഗ്രോക്ക്, കോഡിങ് ടൂളായ കർസർ എന്നിവയെ ഒരൊറ്റ സബ്‌സ്‌ക്രിപ്ഷൻ പദ്ധതിക്ക് കീഴിലാക്കി സ്‌പേസ് എക്‌സ്. മൂന്ന് സേവനങ്ങൾക്കും പ്രത്യേകം പണം നൽകേണ്ട സാഹചര്യം ഒഴിവാക്കുന്നതാണ് പുതിയ എക്‌സ് സബ്‌സ്‌ക്രിപ്ഷൻ പദ്ധതിയുടെ പ്രധാന ലക്ഷ്യം. ഇതോടെ ഒരൊറ്റ അംഗത്വത്തിലൂടെ സാമൂഹിക മാധ്യമ സേവനങ്ങൾക്കും നിർമിതബുദ്ധി സംവിധാനങ്ങൾക്കും കോഡിങ് സൗകര്യങ്ങൾക്കും ആക്സസ് ലഭിക്കും.

എട്ട് ഡോളർ മുതൽ പ്ലാനുകൾ

പുതിയ പദ്ധതിയിലെ ഏറ്റവും കുറഞ്ഞ നിരക്കിലുള്ള പ്ലസ് പ്ലാനിന് പ്രതിമാസം എട്ട് ഡോളറാണ്. അതായത് ഏകദേശം 767 രൂപ. ഗ്രോക്കിന്റെ ചാറ്റ്, വോയ്സ് ചാറ്റ്, ചിത്രനിർമാണം, ആപ്പ് നിർമാണം തുടങ്ങിയ സൗകര്യങ്ങൾ ഇതിൽ ഉൾപ്പെടുന്നു. ഗ്രോക്ക് എപിഐ ഉപയോഗിക്കാനും കർസർ വഴി കോഡിങ് നടത്താനും കഴിയും. എക്‌സിലെ വെരിഫിക്കേഷൻ മാർക്ക്, പരസ്യങ്ങളുടെ എണ്ണം കുറയ്ക്കുന്ന സൗകര്യം, കണ്ടന്‍റ് ക്രിയേറ്റർമാർക്കുള്ള വിവിധ ടൂളുകൾ തുടങ്ങിയ പ്രീമിയം ഫീച്ചറുകളും ലഭ്യമാകും.

30 ഡോളറിന്റെ പ്രീമിയം പ്ലാൻ

കൂടുതൽ സൗകര്യങ്ങൾ ആവശ്യമുള്ളവർക്കായി പ്രതിമാസം 30 ഡോളർ, ഏകദേശം 2,855 രൂപ നിരക്കിൽ പ്രീമിയം പ്ലാനുമുണ്ട്. ഗ്രോക്ക് ബോട്ട്, ഏറ്റവും പുതിയ ഗ്രോക്ക് എഐ മോഡലുകളിലേക്കുള്ള ആക്സസ്, വേഗത്തിലുള്ള മറുപടികൾ, എഐ ഉപയോഗിച്ചുള്ള ചിത്ര- വീഡിയോ നിർമാണം എന്നിവയാണ് പ്രധാന സവിശേഷതകൾ. കർസർ ഉപയോക്താക്കൾക്ക് കോഡ് ഹോസ്റ്റിങ്, ക്ലൗഡ് ഏജന്റുകൾ, ഓട്ടോമേഷൻ സംവിധാനങ്ങൾ തുടങ്ങിയ സൗകര്യങ്ങളും ലഭിക്കും.

സൂപ്പർ, അൾട്രാ പ്ലാനുകൾക്ക് ഉയർന്ന നിരക്ക്

പ്രതിമാസം 100 ഡോളർ, ഏകദേശം 9,516 രൂപ നിരക്കിലുള്ള സൂപ്പർ പ്ലാനിൽ തിരക്കേറിയ സമയങ്ങളിൽ ഗ്രോക്ക് മോഡലുകൾക്ക് മുൻഗണനയോടെ പ്രവേശനം ലഭിക്കും. ഏറ്റവും ഉയർന്ന നിരക്കിലുള്ള അൾട്രാ പ്ലാനിന് പ്രതിമാസം 200 ഡോളറാണ്, ഏകദേശം 19,031 രൂപ. പുതിയ ഉൽപ്പന്നങ്ങളും എഐ മോഡലുകളും മറ്റുള്ളവർക്കു മുമ്പ് പരീക്ഷിക്കാനുള്ള അവസരമാണ് ഈ പ്ലാനിന്റെ പ്രധാന ആകർഷണം.

പഴയ സംവിധാനം കൂടുതൽ സങ്കീർണം

നേരത്തേ എക്‌സിനും ഗ്രോക്കിനും വ്യത്യസ്‍ത സബ്‌സ്‌ക്രിപ്ഷൻ പദ്ധതികളായിരുന്നു ഉണ്ടായിരുന്നത്. എക്‌സിൽ പ്രതിമാസം മൂന്ന് ഡോളറിന്റെ ബേസിക്, എട്ട് ഡോളറിന്റെ പ്രീമിയം, 40 ഡോളറിന്റെ പ്രീമിയം പ്ലസ് എന്നീ പദ്ധതികളുണ്ടായിരുന്നു. ഗ്രോക്കിന് സൗജന്യ പതിപ്പിനൊപ്പം 30 ഡോളറിന്റെ സൂപ്പർഗ്രോക്ക്, 100 ഡോളറിന്റെ സൂപ്പർഗ്രോക്ക് പ്ലസ്, 300 ഡോളറിന്റെ സൂപ്പർഗ്രോക്ക് ഹെവി എന്നീ പദ്ധതികളും ലഭ്യമായിരുന്നു. ഇത്തരത്തിൽ ഏഴ് വ്യത്യസ്ത ഓപ്ഷനുകൾ ഉണ്ടായിരുന്നത് ഉപയോക്താക്കൾക്ക് ആശയക്കുഴപ്പമുണ്ടാക്കാൻ സാധ്യതയുണ്ടായിരുന്നു.

സ്ഥാപനങ്ങളെയും ലക്ഷ്യമിട്ട് പുതിയ നീക്കം

വ്യക്തിഗത ഉപയോക്താക്കൾക്കു പുറമെ ബിസിനസ് സ്ഥാപനങ്ങളെയും ലക്ഷ്യമിട്ടാണ് പുതിയ പദ്ധതി അവതരിപ്പിച്ചിരിക്കുന്നത്. പ്രീമിയം, സൂപ്പർ, അൾട്രാ പ്ലാനുകൾ ടീമുകൾക്കും ലഭ്യമാകും. വൻകിട സ്ഥാപനങ്ങൾക്ക് ആവശ്യാനുസൃതമായ സബ്‌സ്‌ക്രിപ്ഷൻ പദ്ധതികളും നൽകും.

എക്‌സിൽ പണം നൽകി സേവനങ്ങൾ ഉപയോഗിക്കുന്നവരെ ഗ്രോക്കിലേക്കും കർസറിലേക്കും ആകർഷിക്കുകയാണ് ഈ സംയോജനത്തിലൂടെ കമ്പനി ലക്ഷ്യമിടുന്നതെന്നാണ് വിലയിരുത്തൽ. നിർമിതബുദ്ധി സേവനങ്ങളും സോഫ്റ്റ്‌വെയർ വികസനത്തിനുള്ള ടൂളുകളും ഒരൊറ്റ സംവിധാനത്തിലൂടെ ലഭ്യമാക്കുന്നത് സ്ഥാപനങ്ങൾക്കും കൂടുതൽ സൗകര്യപ്രദമായേക്കും.

മാൻഹോളുകളിൽ നിന്നും ബഹിരാകാശത്തേക്ക്; തൊഴിലാളികളുടെ അന്തസുയർത്തിയ ജെൻറോബോട്ടിക്സിന് ഐഎസ്ആർഒ കരാർ, കേരളത്തിന് അഭിമാനനേട്ടം

Prashobh Prasannan — Thu, 15 Oct 2026 16:00:16 +0530

മാൻഹോളുകളിലെ അപകടകരമായ ശുചീകരണ ജോലികൾക്കും തോട്ടിപ്പണിക്കും പരിഹാരമായി റോബോട്ടുകളെ വികസിപ്പിച്ച് തൊഴിലാളികളുടെ അന്തസ് വാനോളം ഉയർത്തിയ കേരളത്തിന്‍റെ സ്വന്തം സ്റ്റാർട്ടപ്പ് ഇനി ബഹിരാകാശത്തേക്കും. ശുചീകരണ ജോലികൾക്കായി വികസിപ്പിച്ച റോബോട്ടുകളിലൂടെ ശ്രദ്ധ നേടിയ ജെൻറോബോട്ടിക്സ് ഇന്നൊവേഷൻസാണ് ഇപ്പോൾ ഐഎസ്ആർഒയുമായി സുപ്രധാന കരാർ ഒപ്പിട്ടിരിക്കുന്നത്. ഐഎസ്ആർഒയുടെ യു.ആർ. റാവു സാറ്റലൈറ്റ് സെന്ററിൽ (യുആർഎസ്‌സി) നിന്ന് റോബോട്ടിക്സ് വികസന കരാർ നേടിയ ജെൻറോബോട്ടിക്സ് ഇന്നൊവേഷൻസ്, ഈ നേട്ടം കൈവരിക്കുന്ന കേരളത്തിലെ ആദ്യ സ്റ്റാർട്ടപ്പായി. ഉപഗ്രഹങ്ങളിൽ റിഫ്ലക്ടറുകൾ വിന്യസിക്കാനും അവയുടെ ദിശ ക്രമീകരിക്കാനുമുള്ള അത്യാധുനിക റോബോട്ടിക് സംവിധാനം രൂപകൽപ്പന ചെയ്ത് നിർമിക്കുകയാണ് കമ്പനിയുടെ പുതിയ ദൗത്യം. ഭൂമിക്കടിയിലെ അപകടകരമായ സാഹചര്യങ്ങളിൽ നിന്നും ബഹിരാകാശത്തിന്റെ വെല്ലുവിളികളിലേക്ക് വളരുന്ന കേരളത്തിന്റെ സാങ്കേതിക മികവിന്റെ പുതിയ അധ്യായം കൂടിയാണിത്.

ഉപഗ്രഹങ്ങൾക്കായി അത്യാധുനിക റോബോട്ടിക് സംവിധാനം

ഉപഗ്രഹങ്ങളിലെ റിഫ്ലക്ടറുകൾ വിന്യസിക്കാനും അവയുടെ ദിശ ക്രമീകരിക്കാനുമുള്ള ഉയർന്ന കൃത്യതയുള്ള ആർട്ടിക്കുലേറ്റഡ് ബൂം ആം സിസ്റ്റം വികസിപ്പിക്കുകയാണ് പദ്ധതിയുടെ ലക്ഷ്യം. സംവിധാനത്തിന്റെ രൂപകൽപ്പനയും വികസനവും നിർമാണവും തദ്ദേശീയമായി നിർവഹിക്കും. വിക്ഷേപണ സമയത്തെ കടുത്ത സമ്മർദം അതിജീവിക്കുന്നതിനൊപ്പം ഭ്രമണപഥത്തിലെ തെർമോ-വാക്വം, മൈക്രോഗ്രാവിറ്റി സാഹചര്യങ്ങളിലും പ്രവർത്തിക്കാൻ കഴിയുന്ന മൾട്ടി-ലിങ്ക് ബൂം ആം സംവിധാനമാണ് ജെൻറോബോട്ടിക്സിന്റെ സ്പേസ് ആൻഡ് അഡ്വാൻസ്ഡ് റോബോട്ടിക്സ് വിഭാഗം വികസിപ്പിക്കുന്നത്. ബഹിരാകാശത്തെ ആശയവിനിമയ റിഫ്ലക്ടറുകളുടെയും പേലോഡ് ഉപകരണങ്ങളുടെയും സ്ഥാനവും ദിശയും മൈക്രോൺ തലത്തിലുള്ള കൃത്യതയോടെ ക്രമീകരിക്കാൻ സംവിധാനത്തിന് കഴിയും.

ബാൻഡിക്കൂട്ട് മുതൽ ബഹിരാകാശം വരെ

അപകടകരമായ മാനുവൽ ജോലികൾ ഒഴിവാക്കുകയെന്ന ലക്ഷ്യത്തോടെ 2017-ൽ സ്ഥാപിതമായ കമ്പനിയാണ് ജെൻറോബോട്ടിക്സ്. ശുചീകരണ തൊഴിലാളികൾ അപകടകരമായ ഭൂഗർഭ അറകളിൽ നേരിട്ട് ഇറങ്ങുന്നത് ഒഴിവാക്കാൻ വികസിപ്പിച്ച 'ബാൻഡിക്കൂട്ട്' റോബോട്ടിലൂടെയാണ് കമ്പനി ശ്രദ്ധ നേടിയത്. വിഷവാതകങ്ങൾ നിറഞ്ഞതും ഇടുങ്ങിയതും അപകടകരമായ സാഹചര്യങ്ങളുള്ളതുമായ ഇടങ്ങളിൽ പ്രവർത്തിക്കുന്ന റോബോട്ടുകൾ വികസിപ്പിച്ചതിലൂടെ കഠിനമായ പരിസ്ഥിതികളിൽ ഉപയോഗിക്കാവുന്ന സാങ്കേതികവിദ്യകളിൽ കമ്പനി വൈദഗ്ധ്യം നേടി. ആക്യുവേറ്റർ നിയന്ത്രണം, മെറ്റീരിയൽസ് എൻജിനീയറിങ്, റീഇൻഫോഴ്സ്മെന്റ് ലേണിങ്, ഫിസിക്കൽ എഐ തുടങ്ങിയ മേഖലകളിലെ ഈ പരിചയമാണ് ബഹിരാകാശ റോബോട്ടിക്സിലേക്കുള്ള ചുവടുവയ്പ്പിന് കരുത്തായത്.

ആരോഗ്യരംഗത്തും പ്രതിരോധ മേഖലയിലും സാന്നിധ്യം

ശുചീകരണ മേഖലയിലെ റോബോട്ടിക്സിൽ നിന്ന് ആരംഭിച്ച കമ്പനി പിന്നീട് വിവിധ മേഖലകളിലേക്ക് പ്രവർത്തനം വ്യാപിപ്പിച്ചു. ആരോഗ്യരംഗത്തെ റോബോട്ടിക് പുനരധിവാസത്തിനായി 'ജി-ഗെയ്റ്റർ' സംവിധാനവും ഭാരമേറിയ ജോലികൾക്കും ദുർഘട പ്രദേശങ്ങളിലെ പ്രവർത്തനങ്ങൾക്കുമായി 'ജെൻബോട്ട്' സംവിധാനവും വികസിപ്പിച്ചു. ഫിസിക്കൽ എഐയും റീഇൻഫോഴ്സ്മെന്റ് ലേണിങ്ങും റോബോട്ടിക് പ്ലാറ്റ്ഫോമുകളിൽ പ്രയോജനപ്പെടുത്തുന്നതിലൂടെ സാഹചര്യങ്ങൾക്കനുസരിച്ച് പൊരുത്തപ്പെടാനും ചലനങ്ങൾ മുൻകൂട്ടി കണക്കാക്കാനും കൃത്യമായി നിയന്ത്രിക്കാനുമുള്ള ശേഷി മെച്ചപ്പെടുത്താനാണ് കമ്പനി ലക്ഷ്യമിടുന്നത്. പ്രതിരോധം, എണ്ണ-വാതകം, വ്യവസായം തുടങ്ങിയ മേഖലകളിലും കമ്പനിയുടെ സാങ്കേതികവിദ്യ ഉപയോഗിക്കുന്നുണ്ട്.

തുമ്പയിൽ ബഹിരാകാശ റോബോട്ടിക്സ് കേന്ദ്രം

പുതിയ ബഹിരാകാശ വിഭാഗത്തിന്റെ പ്രവർത്തനങ്ങൾക്കായി തിരുവനന്തപുരത്തെ തുമ്പയിലുള്ള കിൻഫ്രയിൽ ആധുനിക ബഹിരാകാശ റോബോട്ടിക്സ് നിർമാണ-ഗവേഷണ കേന്ദ്രം കമ്പനി സ്ഥാപിച്ചിട്ടുണ്ട്. ബഹിരാകാശ ഉപകരണങ്ങളുടെ നിലവാരം പരിശോധിക്കുന്നതിനുള്ള സംവിധാനങ്ങൾ, ക്ലീൻറൂം അസംബ്ലി മേഖലകൾ, എൻജിനീയറിങ് ലാബുകൾ എന്നിവ കേന്ദ്രത്തിലുണ്ട്. യുഎഇ, ദക്ഷിണാഫ്രിക്ക, സിംഗപ്പൂർ, മലേഷ്യ എന്നിവിടങ്ങളിലും ജെൻറോബോട്ടിക്സിന് സാന്നിധ്യമുണ്ട്. ദക്ഷിണാഫ്രിക്കൻ പ്രതിരോധ ഏജൻസിയായ ആംസ്കോറുമായി സഹകരിക്കുന്ന കമ്പനി, ദുബായ് സ്പേസ് ഏജൻസി ഉൾപ്പെടെയുള്ള അന്താരാഷ്ട്ര ബഹിരാകാശ സ്ഥാപനങ്ങളുമായും ചർച്ചകൾ നടത്തിവരികയാണ്.

ഐഎസ്ആർഒയുടെ അംഗീകാരം നിർണായകം

ഭൂമിക്കടിയിലെ അപകടകരമായ സാഹചര്യങ്ങളിൽ മനുഷ്യജീവൻ സംരക്ഷിക്കാനും തൊഴിലാളികളുടെ അന്തസ്സ് വീണ്ടെടുക്കാനുമുള്ള ശ്രമങ്ങളിൽ നിന്നാണ് കമ്പനി ആരംഭിച്ചതെന്ന് സഹസ്ഥാപകനും സിഇഒയുമായ എം കെ വിമൽ ഗോവിന്ദ് പറഞ്ഞു. നാശകാരിയായ അന്തരീക്ഷത്തിലും ഉയർന്ന ടോർക്കിലും കടുത്ത സമ്മർദത്തിലും പ്രവർത്തിക്കാൻ കഴിയുന്ന യന്ത്രങ്ങൾ വികസിപ്പിച്ച അനുഭവം ബഹിരാകാശ സംവിധാനങ്ങളുടെ നിർമാണത്തിലേക്കുള്ള മാറ്റം സ്വാഭാവികമാക്കിയെന്നും അദ്ദേഹം വ്യക്തമാക്കി.

പരാജയം അനുവദിക്കാനാകാത്ത സാഹചര്യങ്ങളിൽ പ്രവർത്തിക്കുന്ന റോബോട്ടിക് സംവിധാനങ്ങൾ വികസിപ്പിച്ചതിലൂടെ നേടിയ പരിചയം ബഹിരാകാശ ഉപകരണങ്ങളുടെ നിർമാണത്തിലും പ്രയോജനപ്പെടുത്താനാകുമെന്ന് സഹസ്ഥാപകനും സിടിഒയുമായ പി ജലീഷ് പറഞ്ഞു. കേരളത്തിൽത്തന്നെ അത്യാധുനിക ബഹിരാകാശ ഉപകരണങ്ങൾ വികസിപ്പിക്കാനും നിർമിക്കാനുമുള്ള സാധ്യതകൾക്ക് കരാർ വഴിതുറക്കുമെന്നാണ് കമ്പനി പ്രതീക്ഷിക്കുന്നത്. ഇന്ത്യയുടെ വാണിജ്യ ബഹിരാകാശ മേഖലയിലെ കേരളത്തിന്റെ സാന്നിധ്യം ശക്തിപ്പെടുത്തുന്നതിനൊപ്പം ഫ്ലൈറ്റ്-ഗ്രേഡ് ഉപഗ്രഹ സംവിധാനങ്ങൾ നിർമിക്കാനുള്ള സംസ്ഥാനത്തിന്റെ സാങ്കേതിക ശേഷി ഉയർത്തിക്കാട്ടാനും ഈ നേട്ടം സഹായിക്കുമെന്നാണ് വിലയിരുത്തൽ.

വീഡിയോ ഇല്ലാത്ത ആപ്പിൾ ക്യാമറ; പിന്നിലെ രഹസ്യം എന്ത്?

Prashobh Prasannan — Sun, 04 Oct 2026 17:10:27 +0530

സാധാരണ സുരക്ഷാ ക്യാമറകളിൽ നിന്ന് വ്യത്യസ്തമായ പുതിയ സ്മാർട്ട് ഹോം ക്യാമറയുമായി ആപ്പിൾ എത്തുന്നതായി റിപ്പോർട്ട്. വീട്ടിൽ നടക്കുന്ന കാര്യങ്ങളുടെ വീഡിയോ പകർത്തുകയോ തുടർച്ചയായി സംപ്രേഷണം ചെയ്യുകയോ ചെയ്യുന്നതിന് പകരം, എഐയുടെ സഹായത്തോടെ സംഭവങ്ങൾ മനസിലാക്കി ഉപയോക്താവിന് ടെക്സ്റ്റ് സന്ദേശമായി വിവരിക്കുന്ന സംവിധാനമായിരിക്കും പുതിയ ക്യാമറയെന്നാണ് സൂചന. സിരി എഐയുടെ സഹായത്തോടെ സമഗ്രമായ സ്മാർട്ട് ഹോം സംവിധാനമൊരുക്കാനുള്ള ആപ്പിളിന്റെ പദ്ധതിയുടെ ഭാഗമാണ് പുതിയ ക്യാമറയെന്നാണ് റിപ്പോർട്ടുകൾ. ജെ450 എന്ന കോഡ് നാമത്തിലാണ് ഉപകരണം വികസിപ്പിക്കുന്നതെന്നും ബ്ലൂംബെർഗിലെ മാർക്ക് ഗുർമാൻ വ്യക്തമാക്കി.

വീഡിയോ ഇല്ലാതെ എങ്ങനെ നിരീക്ഷിക്കും?

ക്യാമറയിൽ സാധാരണ സുരക്ഷാ ക്യാമറകളിലേതുപോലെ ഉയർന്ന ഫ്രെയിം റേറ്റ് ഉണ്ടാകില്ലെന്നാണ് വിവരം. പകരം, കുറഞ്ഞ ഫ്രെയിം റേറ്റിൽ പ്രവർത്തിക്കുന്ന ഇമേജ് സെൻസർ ഉപയോഗിച്ച് വീടിനുള്ളിലും പരിസരത്തും നടക്കുന്ന കാര്യങ്ങൾ തിരിച്ചറിയാനാകും. ക്യാമറ പകർത്തുന്ന ദൃശ്യങ്ങൾ ക്ലൗഡിലേക്ക് അയയ്ക്കാതെ ഉപകരണത്തിൽ തന്നെയുള്ള എഐ സംവിധാനത്തിലൂടെ വിശകലനം ചെയ്യാനാണ് ആപ്പിൾ ലക്ഷ്യമിടുന്നതെന്നാണ് റിപ്പോർട്ട്. സോണിയുടെ ഐഎംഎക്സ്500 പോലുള്ള ഇമേജ് സെൻസറുകളിൽ കാണുന്ന സാങ്കേതികവിദ്യയുമായി ഇതിന് സാമ്യമുണ്ടാകാം. ഉപകരണത്തിൽ തന്നെ ദൃശ്യങ്ങൾ വിശകലനം ചെയ്യുന്നത് സ്മാർട്ട് ഹോം ക്യാമറകളുമായി ബന്ധപ്പെട്ട പ്രധാന ആശങ്കകളിലൊന്നായ സ്വകാര്യതയ്ക്ക് കൂടുതൽ സംരക്ഷണം നൽകാനും സഹായിച്ചേക്കും.

വീഡിയോ കാണാനാകില്ല; പകരം ലഭിക്കുക ടെക്സ്റ്റ്

മുഖം തിരിച്ചറിയൽ സാങ്കേതികവിദ്യ ഉപയോഗിച്ച് മുറിയിൽ പ്രവേശിച്ച വ്യക്തിയെ തിരിച്ചറിയാനും വീട്ടിലെ വിവിധ പ്രവർത്തനങ്ങൾ മനസിലാക്കാനും ക്യാമറയ്ക്ക് കഴിയുമെന്നാണ് റിപ്പോർട്ട്. എന്നാൽ ഇവിടെ പ്രധാനപ്പെട്ടൊരു വ്യത്യാസമുണ്ട്. പിന്നീട് കാണാനായി വീഡിയോ റെക്കോർഡിങ് ലഭിക്കില്ല. സംഭവങ്ങളെക്കുറിച്ചുള്ള ടെക്സ്റ്റ് വിവരണങ്ങൾ മാത്രമായിരിക്കും ലഭിക്കുക. ഉദാഹരണത്തിന്, ആരെങ്കിലും വീട്ടിലെ സ്വീകരണമുറിയിൽ പ്രവേശിച്ചാൽ ആ വ്യക്തിയുടെ വീഡിയോ കാണുന്നതിന് പകരം, “ഒരാൾ സ്വീകരണമുറിയിൽ പ്രവേശിച്ചു” എന്ന തരത്തിലുള്ള സന്ദേശം ഉപയോക്താവിന് ലഭിച്ചേക്കും. അതായത്, വീട്ടിലെ കാര്യങ്ങൾ മനസിലാക്കുന്ന ഉപകരണമായിരിക്കും ക്യാമറ; എന്നാൽ നിരന്തരം വീഡിയോ റെക്കോർഡ് ചെയ്യുന്ന മറ്റൊരു ഉപകരണമായി ഇത് പ്രവർത്തിക്കില്ല.

സ്മാർട്ട് ഹോം പദ്ധതിക്ക് പിന്നിൽ വലിയ നീക്കം

ആപ്പിളിന്റെ വിശാലമായ സ്മാർട്ട് ഹോം പദ്ധതിയുടെ ഭാഗമാണ് ഈ ക്യാമറയെന്നും റിപ്പോർട്ടുകൾ പറയുന്നു. ഏകദേശം 6 ഇഞ്ച് ഡിസ്പ്ലേയുള്ള ഒരു സ്മാർട്ട് ഹോം ഹബ്ബും കമ്പനി വികസിപ്പിക്കുന്നതായി നേരത്തെ റിപ്പോർട്ടുകളുണ്ടായിരുന്നു. മേശപ്പുറത്ത് വയ്ക്കാനോ ചുമരിൽ ഘടിപ്പിക്കാനോ കഴിയുന്ന രീതിയിലായിരിക്കും ഹബ്ബിന്റെ രൂപകൽപ്പനയെന്നാണ് സൂചന. എഐ അടിസ്ഥാനമാക്കിയുള്ള സിരിയ്ക്കായിരിക്കും ഇതിൽ പ്രധാന സ്ഥാനം. സ്മാർട്ട് ഹോം ഉപകരണങ്ങൾ നിയന്ത്രിക്കുന്നതിന് പുറമെ സംഗീതം കേൾക്കാനും വീഡിയോ കോളുകൾ നടത്താനും ചിത്രങ്ങൾ പ്രദർശിപ്പിക്കാനും ഹബ്ബിന് കഴിയുമെന്നാണ് പ്രതീക്ഷിക്കുന്നത്.

ഹോംപോഡ് മിനിയും പുതിയ ആപ്പിൾ ടിവിയും?

പുതിയ സ്മാർട്ട് ഹോം ഹബ്ബിനൊപ്പം പുതുക്കിയ ഹോംപോഡ് മിനിയും നവീകരിച്ച ആപ്പിൾ ടിവിയും അവതരിപ്പിച്ചേക്കുമെന്നും റിപ്പോർട്ടുകളുണ്ട്. ഒക്ടോബർ 13ന് നടക്കുന്നുവെന്ന് റിപ്പോർട്ട് ചെയ്യപ്പെടുന്ന ആപ്പിൾ ഇവന്റ് സ്മാർട്ട് ഹോം മേഖലയിലേക്കുള്ള കമ്പനിയുടെ വലിയ നീക്കത്തിന് തുടക്കമാകുമെന്നാണ് സൂചന. എന്നാൽ ക്യാമറയെയും മറ്റ് സ്മാർട്ട് ഹോം ഉൽപ്പന്നങ്ങളെയും കുറിച്ച് ആപ്പിൾ ഇതുവരെ ഔദ്യോഗിക സ്ഥിരീകരണം നൽകിയിട്ടില്ല. കമ്പനി ഔദ്യോഗികമായി വിവരങ്ങൾ പുറത്തുവിടുന്നതുവരെ റിപ്പോർട്ടുകളെ സ്ഥിരീകരിക്കാത്ത വിവരങ്ങളായി മാത്രം പരിഗണിക്കണമെന്നാണ് വിദഗ്ധരുടെ നിർദേശം.

ഡോക്ടർമാരെക്കാൾ മിടുക്കനോ മൈക്രോസോഫ്റ്റിന്‍റെ എഐ? രോഗനിർണയത്തിൽ ഞെട്ടിക്കുന്ന നേട്ടം

Prashobh Prasannan — Sun, 25 Oct 2026 08:51:15 +0530

രോഗം എന്താണെന്ന് കണ്ടെത്താൻ ഡോക്ടർമാർക്ക് ചിലപ്പോൾ നിരവധി പരിശോധനകളും വിദഗ്ധരുടെ അഭിപ്രായങ്ങളും ആവശ്യമായി വരാറുണ്ട്. എന്നാൽ, ഇത്തരം സങ്കീർണമായ രോഗാവസ്ഥകൾ തിരിച്ചറിയുന്നതിൽ ഡോക്ടർമാരെക്കാൾ മികച്ച പ്രകടനം കാഴ്ചവെച്ച് മൈക്രോസോഫ്റ്റിന്റെ നിർമിതബുദ്ധി സംവിധാനം. പുതിയ പഠനമനുസരിച്ച്, ഡോക്ടർമാർ 36 ശതമാനം കൃത്യത നേടിയപ്പോൾ മൈക്രോസോഫ്റ്റിന്റെ എഐ സംവിധാനം 83 ശതമാനം കൃത്യത നേടി. ആരോഗ്യരംഗത്ത് മനുഷ്യരുടെ കഴിവുകളെ മറികടക്കുന്ന ‘മെഡിക്കൽ സൂപ്പർ ഇന്റലിജൻസ്’ വികസിപ്പിക്കുന്നതിലേക്കുള്ള പ്രധാന ചുവടുവയ്പ്പായാണ് ഈ നേട്ടത്തെ കമ്പനി വിലയിരുത്തുന്നത്. ഇതോടെ ആരോഗ്യരംഗത്ത് മനുഷ്യരുടെ കഴിവുകളെ മറികടക്കുന്ന ‘മെഡിക്കൽ സൂപ്പർ ഇന്റലിജൻസ്’ വികസിപ്പിക്കുകയെന്ന ലക്ഷ്യത്തിലേക്ക് കൂടുതൽ അടുക്കുകയാണെന്ന് മൈക്രോസോഫ്റ്റ് എഐ മേധാവി മുസ്തഫ സുലൈമാൻ വ്യക്തമാക്കി. സയൻസ് ജേണലിൽ പ്രസിദ്ധീകരിച്ച പഠനത്തിലാണ് ഈ നേട്ടം വിശദീകരിക്കുന്നത്. എങ്കിലും യഥാർഥ രോഗികളിൽ ഈ സാങ്കേതികവിദ്യയുടെ ഫലപ്രാപ്‍തി തെളിയിക്കേണ്ടതുണ്ടെന്ന് വിദഗ്ധർ ചൂണ്ടിക്കാട്ടുന്നു.

ഡോക്ടർമാരുടെ സംഘത്തെപ്പോലെ പ്രവർത്തിക്കുന്ന എഐ

മൈക്രോസോഫ്റ്റ് എഐ ഡയഗ്നോസ്റ്റിക് ഓർക്കസ്ട്രേറ്റർ എന്നതിന്റെ ചുരുക്കപ്പേരായ എംഎഐ-ഡിഎക്സ്ഒ ആണ് പുതിയ സംവിധാനത്തിന്റെ പേര്. സാധാരണ ചാറ്റ്ബോട്ടുകളിൽനിന്ന് വ്യത്യസ്തമായി, ഒന്നിലധികം എഐ ഏജന്റുമാർ ചേർന്ന് പ്രവർത്തിക്കുന്ന രീതിയിലാണ് ഇതിന്റെ രൂപകൽപ്പന. രോഗികളോട് ചോദ്യങ്ങൾ ചോദിക്കുക, ലബോറട്ടറി പരിശോധനകൾ നിർദേശിക്കുക, രോഗലക്ഷണങ്ങൾ വിലയിരുത്തുക, സാധ്യതയുള്ള രോഗങ്ങളെക്കുറിച്ച് വിശകലനം നടത്തുക എന്നിവയിലൂടെ അന്തിമ രോഗനിർണയത്തിലെത്തുകയാണ് സംവിധാനം ചെയ്യുന്നത്.

ന്യൂ ഇംഗ്ലണ്ട് ജേണൽ ഓഫ് മെഡിസിനിൽ പ്രസിദ്ധീകരിച്ച സങ്കീർണമായ രോഗവിവരങ്ങൾ ഉപയോഗിച്ചുള്ള സിമുലേഷൻ പരീക്ഷണത്തിൽ എംഎഐ-ഡിഎക്സ്ഒ 83 ശതമാനം കൃത്യത നേടി. മെഡിക്കൽ റഫറൻസ് സംവിധാനങ്ങളുടെ സഹായം ലഭിച്ച ജനറൽ ഫിസിഷ്യൻമാർക്ക് 36 ശതമാനം കേസുകളിൽ മാത്രമാണ് ശരിയായ രോഗനിർണയം നടത്താനായത്. എന്നാൽ, ഇത്രയും സങ്കീർണമായ കേസുകൾ സാധാരണയായി വിദഗ്ധ ഡോക്ടർമാരുടെ സംഘമാണ് കൈകാര്യം ചെയ്യുന്നത്. അത്തരം സംഘങ്ങളുമായി നേരിട്ടുള്ള താരതമ്യം പഠനത്തിൽ ഉൾപ്പെടുത്തിയിരുന്നില്ല. അതിനാൽ ഈ ഫലങ്ങളെ യഥാർഥ ചികിത്സാരംഗത്തെ പ്രകടനമായി കാണാനാവില്ല.

ജിപിടി മോഡലുകളുടെ കരുത്ത്

ഓപ്പൺഎഐ, ഗൂഗിൾ, മെറ്റ തുടങ്ങിയ കമ്പനികളുടെ എഐ മോഡലുകൾ പരീക്ഷിച്ച മൈക്രോസോഫ്റ്റിന് മികച്ച ഫലങ്ങൾ ലഭിച്ചത് ഓപ്പൺഎഐയുടെ ജിപിടി-5, ജിപിടി-5.5 മോഡലുകൾ ഉപയോഗിച്ചപ്പോഴാണെന്നാണ് പഠനം വ്യക്തമാക്കുന്നത്. ജിപിടി-5 മാത്രം ഉപയോഗിച്ചപ്പോൾ സങ്കീർണ കേസുകളിൽ 78.9 ശതമാനം കൃത്യത ലഭിച്ചെങ്കിലും ചെലവ് ഏകദേശം 8,400 ഡോളറായിരുന്നു. ഡിഎക്സ്ഒ സംവിധാനം കൂട്ടിച്ചേർത്തതോടെ ചെലവിൽ ഏകദേശം 3,000 ഡോളറിന്റെ കുറവുണ്ടാക്കാനും കൃത്യത മെച്ചപ്പെടുത്താനും സാധിച്ചു.

ജിപിടി-5.5 ഉപയോഗിച്ചുള്ള പരീക്ഷണത്തിൽ ഡിഎക്സ്ഒ സംവിധാനം കൃത്യത 72 ശതമാനത്തിൽനിന്ന് ഏകദേശം 87 ശതമാനമായി ഉയർത്തിയതായും റിപ്പോർട്ടുകൾ ഉണ്ട്. താരതമ്യേന ശേഷി കുറഞ്ഞ എഐ മോഡലുകൾക്കും ഈ സംവിധാനം ഗുണം ചെയ്തു. ഗൂഗിളിന്റെ ജെമിനി 2.5 ഫ്ലാഷിന്റെ കൃത്യത 46.4 ശതമാനത്തിൽനിന്ന് ഏകദേശം 69 ശതമാനമായി ഉയർന്നു. അതേസമയം, അടിയന്തര ചികിത്സാവിഭാഗങ്ങളിലെ വേഗമേറിയ തീരുമാനങ്ങൾ ആവശ്യമായ കേസുകളിൽ ഏറ്റവും നൂതനമായ മോഡലുകൾക്ക് ഡിഎക്സ്ഒ സംവിധാനം കാര്യമായ കൃത്യതാ വർധനയോ ചെലവുകുറവോ നൽകിയില്ലെന്നും പഠനം ചൂണ്ടിക്കാട്ടുന്നു.

ആശുപത്രികളിൽ പരീക്ഷണം; അടുത്ത ലക്ഷ്യം 2027

അടുത്ത രണ്ടുമുതൽ മൂന്നുവർഷത്തിനുള്ളിൽ എഐ അധിഷ്ഠിത ആരോഗ്യസംവിധാനങ്ങൾ കൂടുതൽ മെച്ചപ്പെടുമെന്നാണ് സുലൈമാന്റെ വിലയിരുത്തൽ. മയോ ക്ലിനിക്കുമായി സഹകരിച്ച് ആരോഗ്യരംഗത്തിനായി പ്രത്യേക എഐ മോഡൽ വികസിപ്പിക്കുന്ന പ്രവർത്തനങ്ങളും മൈക്രോസോഫ്റ്റ് നടത്തുന്നുണ്ട്. ഇത് അടുത്ത വർഷം പുറത്തിറക്കാനാണ് ലക്ഷ്യമിടുന്നത്. 2027ഓടെ രോഗിയുടെ മെഡിക്കൽ രേഖകളുടെ അടിസ്ഥാനത്തിൽ ഭാവിയിലെ ആരോഗ്യസ്ഥിതിയെക്കുറിച്ച് കൂടുതൽ കൃത്യമായ പ്രവചനങ്ങൾ നടത്താൻ ഡോക്ടർമാർക്ക് എഐയുടെ സഹായം ലഭിക്കുമെന്നാണ് പ്രതീക്ഷിക്കുന്നത്.

യഥാർഥ ചികിത്സാരംഗത്ത് സംവിധാനം സുരക്ഷിതമാണെന്ന് ഉറപ്പാക്കാൻ ബോസ്റ്റണിലെ ബെത്ത് ഇസ്രയേൽ ഡീക്കണസ് മെഡിക്കൽ സെന്ററുമായി ചേർന്ന് പരീക്ഷണവും ആരംഭിക്കുന്നുണ്ട്. രോഗികൾക്ക് പതിവുപോലെ ഡോക്ടർമാർ ചികിത്സ നൽകുമ്പോൾ, പശ്ചാത്തലത്തിൽ എഐ പ്രവർത്തിക്കും. പിന്നീട് എഐയുടെ നിർദേശങ്ങളും ഡോക്ടർമാർ സ്വീകരിച്ച ചികിത്സാ തീരുമാനങ്ങളും താരതമ്യം ചെയ്യും.

ആരോഗ്യരംഗത്തെ വിദഗ്ധരുടെ കുറവ് പരിഹരിക്കാൻ ഇത്തരം സാങ്കേതികവിദ്യകൾ സഹായിക്കുമെന്നാണ് മൈക്രോസോഫ്റ്റിന്റെ പ്രതീക്ഷ. എന്നാൽ, ആശുപത്രികളിൽ വ്യാപകമായി ഉപയോഗിക്കുന്നതിന് മുമ്പ് സുരക്ഷയും കൃത്യതയും ഫലപ്രദമായി തെളിയിക്കേണ്ടതുണ്ട്.

കാര്യമൊക്കെ ട്രെന്റ് തന്നെ! പക്ഷെ സൂക്ഷിച്ചില്ലെങ്കിൽ പണി കിട്ടും, 80കളിലെ വിന്റേജ് വൈറൽ ട്രെന്റിൽ ശ്രദ്ധിക്കേണ്ട കാര്യങ്ങൾ

Sangeetha KS — Wed, 09 Sep 2026 12:11:18 +0530

ഇൻസ്റ്റഗ്രാം തുറന്നാൽ ഫുൾ വൈബ്! ബോളിവുഡ് സ്റ്റൈൽ മുതൽ ഇങ്ങ് കേരളാ സ്റ്റൈലിൽ വരെ 80 സ് യുവാക്കളുടെ ചിത്രങ്ങളും വീഡിയോകളും... ഗ്യാങ്സ്റ്റർ ഫോട്ടോകളും കപ്പിൾ ഫോട്ടോകളും ഫാമിലി ഫോട്ടോകളുമെല്ലാം 40 വർഷം സഞ്ചരിച്ച് പുറകോട്ടു പോയി. ചാറ്റ്ജിപിടിയിൽ ആദ്യ തവണ പ്രോംപ്റ്റ് കൊടുത്തു നോക്കി ശരിയാത്തവർ പല തവണ ഫോട്ടോകളും സ്റ്റൈലുകളും മാറ്റിക്കൊടുത്തു. സ്റ്റോറികളായും റീൽസായും പ്രൊഫൈൽ പിക്ച്ചറുകളുമായി ഇവയെല്ലാം ലോകം ഏറ്റെടുത്തു കഴിഞ്ഞു.

ലോകത്തിന്റെ ഏതോ കോണിൽ നിന്ന് പൊട്ടിപ്പുറപ്പെട്ട ഈ ട്രെൻഡിൽ പിടിച്ചു നിൽക്കാൻ കൂടെക്കൂടിയവരാണ് നമ്മൾ മലയാളികളും. ഇനി അൽപം കാര്യത്തിലേക്ക് വരാം. ഇനി കാര്യത്തിലേക്ക് വരാം. ഈ ട്രെൻഡിനെ അൽപ്പമൊന്ന് സൂക്ഷിക്കണമെന്നാണ് വിദഗ്ദർ നൽകുന്ന മുന്നറിയിപ്പ്. വ്യക്തിഗത വിവരങ്ങളുടെ ചോർച്ചയ്ക്കും ദുരുപയോഗത്തിനും വരെ ഇവ ഉപയോഗിക്കപ്പെട്ടേക്കാം.

ഉപയോക്താക്കൾ അപ്‌ലോഡ് ചെയ്യുന്ന മുഖത്തിന്റെ ചിത്രങ്ങളിൽ നിന്ന് കമ്പനികൾ കൃത്യമായ ബയോമെട്രിക് വിവരങ്ങൾ ശേഖരിക്കുന്നു. ഈ വിവരങ്ങൾ ഭാവിയിൽ എഐ മോഡലുകളെ പരിശീലിപ്പിക്കാൻ ഉപയോഗിക്കപ്പെട്ടേക്കാം. നമ്മൾ അപ്ലോഡ് ചെയ്യുന്ന ഹൈ റെസല്യൂഷൻ ഫോട്ടോകൾ വഴി നിർമിച്ചെടുക്കുന്ന എഐ ചിത്രങ്ങൾ തട്ടിപ്പുകാർക്ക് വ്യാജ അക്കൗണ്ടുകൾ ഉണ്ടാക്കാനും ഡീപ്‌ഫേക്ക് വിഡിയോകളും ചിത്രങ്ങളും ഉപയോഗിച്ച് സാമ്പത്തിക തട്ടിപ്പുകൾ നടത്താൻ വരെ ഉപയോഗിക്കാം. വ്യക്തിഗത ഫോട്ടോകൾ അപ്‌ലോഡ് ചെയ്യുമ്പോൾ ചിത്രങ്ങൾ എവിടെയെങ്കിലും സൂക്ഷിക്കപ്പെടുന്നുണ്ടോ, ഇത് എങ്ങനെ ഉപയോഗിക്കപ്പെടുന്നു തുടങ്ങിയ കാര്യങ്ങളിൽ നമുക്ക് ഇന്നും വ്യക്തതയില്ല.

നമ്മുടെ വ്യക്തിഗത വിവരങ്ങൾ തേർഡ് പാർട്ടി ആപ്പുകൾക്ക് കൈമാറ്റം ചെയ്യപ്പെടാനുള്ള സാധ്യതയും തള്ളിക്കളയാനാവില്ല. ഡാറ്റ അനലിറ്റിക്സ് കമ്പനികൾക്കോ പരസ്യ ഏജൻസികൾക്കോ വരെ നമ്മുടെ വിവരങ്ങൾ വിൽക്കപ്പെട്ടേക്കാമെന്നും സൈബർ സുരക്ഷാ വിദഗ്ധർ നിർദേശിക്കുന്നു.

മുഖത്ത് മാത്രം ഒതുങ്ങുന്നതല്ല നമ്മുടെ സ്വകാര്യത എന്നും ഓർക്കണം. അപ്ലോഡ് ചെയ്യുന്ന ഒരു ഫോട്ടോയിൽ നമ്മുടെ വാഹനത്തിന്റെ നമ്പർ പ്ലേറ്റ് കാണാമെങ്കിൽ പോലും അപകടം തിരിച്ചറിയണം. വ്യക്തിഗതമായി നമ്മളെ തിരിച്ചറിയാൻ സഹായിക്കുന്ന എല്ലാ വിവരവും സ്വകാര്യതയിലേക്ക് നമ്മളുടെ ആക്സസ് കൊടുക്കുന്നതിന് തുല്യമാണെന്ന് ഓർക്കുക. ചിത്രങ്ങളിൽ മെറ്റാഡാറ്റ ഉൾപ്പെടെ ഓഫ് ചെയ്ത ശേഷമേ അപ്ലോഡ് ചെയ്യാൻ പാടുള്ളൂ.

ഇതെല്ലാം മാറ്റി നിർത്തിയാലും പ്രശ്നങ്ങൾ തീരുന്നില്ല. എഐ എപ്പോഴും നിർമിക്കുക സോ കോൾഡ് പെർഫക്ട് ചിത്രങ്ങളായിരിക്കും.. പ്രോംപ്റ്റ് കൊടുത്ത് പുറത്തു വരുന്ന ചിത്രങ്ങൾ ഉപയോക്താക്കളിൽ മിഥ്യയായ സൗന്ദര്യ മാനദണ്ഡങ്ങൾ വളർത്താനുള്ള സാധ്യതയുമുണ്ട്. റിയൽ ലൈഫിലെ സ്വന്തം ചിത്രവുമായി എഐ രൂപത്തെ താരതമ്യം ചെയ്യുന്നത് ആളുകളിൽ ആത്മവിശ്വാസക്കുറവുണ്ടാക്കുമെന്നും വിദഗ്ദർ മുന്നറിയിപ്പ് നൽകുന്നു.

80-കളിലെ ഫാഷനും സംസ്കാരവും ഇപ്പോഴത്തെ തലമുറക്ക് പരിചയപ്പെടുത്തുന്ന ഒരു റിട്രോ ട്രെന്റായി മാത്രം ഇതിനെ കാണുന്നവരുണ്ട്. കാലങ്ങളിലേക്കൊരു തിരിച്ചു നടത്തമാണിത്. അൽപമൊന്ന് ശ്രദ്ധിച്ച് നടക്കാം...

വാട്‌സ്ആപ്പിൽ വമ്പൻ മാറ്റം! ഇനി സന്ദേശങ്ങൾ മുൻകൂട്ടി ഷെഡ്യൂൾ ചെയ്യാം

Prashobh Prasannan — Tue, 13 Oct 2026 10:27:11 +0530

വാട്‌സ്ആപ്പ് ഉപയോക്താക്കൾക്ക് ഏറെ ഉപകാരപ്പെടുന്ന പുതിയ ഫീച്ചർ അവതരിപ്പിക്കാനൊരുങ്ങുന്നതായി റിപ്പോർട്ട്. സന്ദേശങ്ങൾ, ചിത്രങ്ങൾ, വീഡിയോകൾ എന്നിവ മുൻകൂട്ടി തയ്യാറാക്കി നിശ്ചിത സമയത്ത് തനിയെ അയയ്ക്കാൻ കഴിയുന്ന ഷെഡ്യൂൾഡ് മെസേജസ് ഫീച്ചറാണ് പരീക്ഷിക്കുന്നത്. ആൻഡ്രോയിഡ് ബീറ്റാ ഉപയോക്താക്കളിൽ ചിലർക്കായി ഫീച്ചർ ലഭ്യമായിത്തുടങ്ങിയതായാണ് വിവരം. വരും ആഴ്ചകളിൽ കൂടുതൽ ഉപയോക്താക്കളിലേക്ക് ഈ സൗകര്യം എത്തിയേക്കും.

വാട്‌സ്ആപ്പിൽ സന്ദേശങ്ങൾ ഷെഡ്യൂൾ ചെയ്യാം

വാട്‌സ്ആപ്പിലെ പുതിയ ഫീച്ചറുകളെക്കുറിച്ചുള്ള വിവരങ്ങൾ പുറത്തുവിടുന്ന വാബീറ്റാഇൻഫോയുടെ റിപ്പോർട്ട് പ്രകാരം, ആൻഡ്രോയിഡിനായുള്ള വാട്‌സ്ആപ്പ് ബീറ്റാ പതിപ്പ് 2.26.40.7 ഉപയോഗിക്കുന്ന ചിലർക്കാണ് നിലവിൽ ഈ സൗകര്യം ലഭിച്ചിരിക്കുന്നത്. സന്ദേശങ്ങൾ മുൻകൂട്ടി തയ്യാറാക്കി അയയ്ക്കേണ്ട തീയതിയും സമയവും തിരഞ്ഞെടുക്കാൻ ഇതിലൂടെ സാധിക്കും. ഒരു വ്യക്തിഗത ചാറ്റിലോ ഗ്രൂപ്പ് ചാറ്റിലോ സന്ദേശം ടൈപ്പ് ചെയ്തശേഷം സെൻഡ് ബട്ടൺ അമർത്തിപ്പിടിക്കുമ്പോൾ ഷെഡ്യൂൾ ചെയ്യാനുള്ള ഓപ്ഷൻ ലഭിച്ചേക്കും. തുടർന്ന് സന്ദേശം അയയ്ക്കേണ്ട തീയതിയും സമയവും തിരഞ്ഞെടുക്കാം. നിശ്ചയിച്ച സമയമാകുമ്പോൾ സന്ദേശം തനിയെ അയയ്ക്കപ്പെടും.

ചിത്രങ്ങളും വീഡിയോകളും അയയ്ക്കാം

ടെക്സ്റ്റ് സന്ദേശങ്ങൾക്കു പുറമേ ലിങ്കുകൾ, ചിത്രങ്ങൾ, വീഡിയോകൾ എന്നിവയും ഷെഡ്യൂൾ ചെയ്യാൻ കഴിയുമെന്നാണ് റിപ്പോർട്ട്. എന്നാൽ ഒരേസമയം ഒരു ചിത്രമോ വീഡിയോയോ മാത്രമേ ഷെഡ്യൂൾ ചെയ്യാനാകൂ എന്ന നിയന്ത്രണം ഉണ്ടായേക്കാം. ചിത്രങ്ങൾ അയയ്ക്കുന്നതിന് മുമ്പ് എഡിറ്റ് ചെയ്യാനും ചിത്രത്തിൽ വരയ്ക്കാനും അടിക്കുറിപ്പ് ചേർക്കാനും സൗകര്യമുണ്ടാകുമെന്നാണ് സൂചന. സന്ദേശങ്ങൾ അയയ്ക്കുന്നതിന് 10 മിനിറ്റ് മുമ്പ് മുതൽ രണ്ടാഴ്ച വരെ മുൻകൂട്ടി സമയം നിശ്ചയിക്കാൻ കഴിയുമെന്നാണ് റിപ്പോർട്ടിൽ പറയുന്നത്. ഫോൺ ഓഫ്‌ലൈനിലായാലും വാട്‌സ്ആപ്പ് തുറന്നിട്ടില്ലെങ്കിലും നിശ്ചിത സമയത്ത് സന്ദേശം സ്വയം അയയ്ക്കാൻ കഴിയുമെന്നതാണ് ഈ ഫീച്ചറിന്റെ പ്രധാന പ്രത്യേകത.

ഷെഡ്യൂൾ ചെയ്ത സന്ദേശങ്ങൾ ഒഴിവാക്കാനും സൗകര്യം

ഷെഡ്യൂൾ ചെയ്ത സന്ദേശങ്ങൾ അയയ്ക്കുന്നതിന് മുമ്പ് പരിശോധിക്കാനും ആവശ്യമെങ്കിൽ നീക്കം ചെയ്യാനും ഉപയോക്താക്കൾക്ക് സാധിച്ചേക്കും. ഇതിനായി ചാറ്റ് വിവരങ്ങൾ കാണുന്ന സ്ക്രീനിൽ പ്രത്യേക വിഭാഗം ഉൾപ്പെടുത്തിയേക്കുമെന്നാണ് വിവരം. ഷെഡ്യൂൾ ചെയ്ത സന്ദേശം നീക്കം ചെയ്താൽ സ്വീകർത്താവിന് ഇതുസംബന്ധിച്ച് അറിയിപ്പ് ലഭിക്കില്ലെന്നും റിപ്പോർട്ടിൽ പറയുന്നു. ഗ്രൂപ്പ് ചാറ്റുകളിൽ സന്ദേശം ഷെഡ്യൂൾ ചെയ്ത സമയത്ത് അംഗങ്ങളായിരുന്നവർക്ക് മാത്രമേ അത് ലഭിക്കൂ. പിന്നീട് ഗ്രൂപ്പിൽ ചേരുന്നവർക്ക് നേരത്തേ ഷെഡ്യൂൾ ചെയ്ത സന്ദേശം ലഭിക്കില്ലെന്നും റിപ്പോർട്ടിൽ വ്യക്തമാക്കുന്നു.

ഉടൻ എല്ലാവർക്കും ലഭിക്കുമോ?

പുതിയ ഫീച്ചർ എൻഡ്-ടു-എൻഡ് എൻക്രിപ്ഷൻ സുരക്ഷയോടെ ലഭ്യമാകുമെന്നാണ് പ്രതീക്ഷ. ഗൂഗിൾ പ്ലേ സ്റ്റോർ വഴി തിരഞ്ഞെടുത്ത ആൻഡ്രോയിഡ് ബീറ്റാ ഉപയോക്താക്കൾക്കാണ് നിലവിൽ പരീക്ഷണാടിസ്ഥാനത്തിൽ സൗകര്യം ലഭിക്കുന്നത്. വരും ആഴ്ചകളിൽ കൂടുതൽ ഉപയോക്താക്കളിലേക്ക് ഫീച്ചർ എത്താൻ സാധ്യതയുണ്ടെങ്കിലും എല്ലാവർക്കും ലഭ്യമാകുന്ന തീയതി വാട്‌സ്ആപ്പ് ഔദ്യോഗികമായി പ്രഖ്യാപിച്ചിട്ടില്ല.

വാട്‌സ്ആപ്പ് ഉപയോഗിക്കണമെങ്കിൽ ഇനി ഫോൺ അപ്‌ഡേറ്റ് ചെയ്യണം? പുതിയ നീക്കവുമായി കമ്പനി

Prashobh Prasannan — Wed, 07 Oct 2026 11:23:33 +0530

പഴയ പതിപ്പിലുള്ള ആൻഡ്രോ, ഐഒഎസ് സോഫ്റ്റ്‌വെയറുകൾ ഉപയോഗിക്കുന്ന ഫോണുകളിൽ വാട്‍സാപ്പിലേക്ക് പ്രവേശിക്കുന്നത് തടയാനുള്ള സുരക്ഷാ നടപടി കമ്പനി പരീക്ഷിക്കുന്നതായി റിപ്പോർട്ട്. ഫോൺ സോഫ്റ്റ്‌വെയർ ഏറ്റവും പുതിയ പതിപ്പിലേക്ക് പുതുക്കിയതിന് ശേഷം മാത്രമേ വാട്‍സാആപ്പ് ഉപയോഗിക്കാൻ കഴിയൂ എന്ന രീതിയിലുള്ള മാറ്റമാണ് പരീക്ഷിക്കുന്നത്. പഴയ സോഫ്റ്റ്‌വെയറുകളിലെ സുരക്ഷാ പോരായ്‍മകൾ മുതലെടുത്തുള്ള സൈബർ ആക്രമണങ്ങളിൽ നിന്ന് ഉപയോക്താക്കളെ സംരക്ഷിക്കുകയാണ് നീക്കത്തിന് പിന്നിലെ ലക്ഷ്യമെന്നാണ് റിപ്പോർട്ട്.

ലോഗിൻ ചെയ്യണമെങ്കിൽ ആദ്യം സോഫ്റ്റ്‌വെയർ പുതുക്കണം

വാട്‍സാപ്പ് സംബന്ധിച്ച പുതിയ മാറ്റങ്ങൾ റിപ്പോർട്ട് ചെയ്യുന്ന വാബീറ്റാഇൻഫോയുടെ റിപ്പോർട്ട് പ്രകാരം, ചില ആൻഡ്രോയ്ഡ്, ഐഒഎസ് ഉപയോക്താക്കളുടെ ഫോണുകളിൽ പുതിയ മുന്നറിയിപ്പ് സന്ദേശം പ്രത്യക്ഷപ്പെട്ടിട്ടുണ്ട്. വാട്‍സാപ്പിൽ ലോഗിൻ ചെയ്യുന്നതിന് മുമ്പ് ഫോണിന്റെ ഓപ്പറേറ്റിങ് സിസ്റ്റം പുതുക്കണമെന്നാണ് സന്ദേശത്തിൽ ആവശ്യപ്പെടുന്നത്. ഫോണിന്റെ സെറ്റിംഗ്‍സിൽ നിന്ന് നിലവിലുള്ള സോഫ്റ്റ്‌വെയർ പതിപ്പ് പരിശോധിക്കാനും പുതിയ പതിപ്പ് ലഭ്യമാണെങ്കിൽ അത് ഇൻസ്റ്റാൾ ചെയ്യാനും നിർദേശമുണ്ട്. പുതിയ അപ്‌ഡേറ്റ് ഒഴിവാക്കി വാട്സ്ആപ്പിലേക്ക് പ്രവേശിക്കാനുള്ള സൗകര്യം ബാധിക്കപ്പെട്ട ഉപയോക്താക്കൾക്ക് ലഭിക്കില്ലെന്നാണ് റിപ്പോർട്ട്. അതായത്, ആദ്യം ഫോൺ സോഫ്റ്റ്‌വെയർ പുതുക്കിയതിന് ശേഷമേ വാട്സ്ആപ്പ് ഉപയോഗിക്കാൻ സാധിക്കൂ.

പുതിയ വാട്‍സാപ്പ് പതിപ്പ് ഡൗൺലോഡ് ചെയ്യേണ്ടതില്ല

ഇതിനായി വാട്‍സാപ്പിന്റെ പുതിയ പതിപ്പ് പ്രത്യേകം ഡൗൺലോഡ് ചെയ്യേണ്ടതില്ലെന്നാണ് വിവരം. സെർവർ ഭാഗത്തുനിന്നുള്ള മാറ്റത്തിലൂടെയാണ് പുതിയ നിയന്ത്രണം സജീവമാക്കുന്നത്. നിലവിൽ തിരഞ്ഞെടുത്ത ചില ആൻഡ്രോയ്ഡ്, ഐഒഎസ് അക്കൗണ്ടുകളിൽ മാത്രമാണ് പരീക്ഷണം നടക്കുന്നത്. എന്നാൽ ഏതൊക്കെ സോഫ്റ്റ്‌വെയർ പതിപ്പുകളാണ് ഈ നിയന്ത്രണത്തിന് വിധേയമാകുകയെന്ന് വാട്‍സാപ്പ് ഇതുവരെ വ്യക്തമാക്കിയിട്ടില്ല.

പഴയ സോഫ്റ്റ്‌വെയറുകൾ സുരക്ഷാ ഭീഷണിയാകാം

പഴയ ആൻഡ്രോയ്ഡ്, ഐഒഎസ് പതിപ്പുകളിൽ ഏറ്റവും പുതിയ സുരക്ഷാ പരിഹാരങ്ങൾ ലഭ്യമാകാത്തതിനാൽ സൈബർ ഭീഷണികൾക്ക് ഫോണുകൾ കൂടുതൽ വിധേയമാകാനുള്ള സാധ്യതയുണ്ട്. ഈ സാഹചര്യത്തിലാണ് ഉപയോക്താക്കളെ പുതിയ സോഫ്റ്റ്‌വെയർ പതിപ്പുകളിലേക്ക് മാറാൻ പ്രേരിപ്പിക്കുന്നതിന്റെ ഭാഗമായി വാട്‍സാപ്പ് പുതിയ നിയന്ത്രണം പരീക്ഷിക്കുന്നതെന്നാണ് വിലയിരുത്തൽ.

അനൗദ്യോഗിക വാട്‍സാപ്പ് സേവനങ്ങൾക്കും മുന്നറിയിപ്പ്

അതേസമയം, അനൗദ്യോഗിക വാട്‍സാപ്പ് വെബ് സേവനങ്ങളുമായി അക്കൗണ്ട് ബന്ധിപ്പിക്കുന്ന ഉപയോക്താക്കൾക്കായി മറ്റൊരു മുന്നറിയിപ്പും കമ്പനി പരീക്ഷിക്കുന്നതായി റിപ്പോർട്ടുണ്ട്. വാട്‍സാപ്പിലെ കണക്റ്റഡ് ഡിവൈസസ് എന്ന വിഭാഗത്തിൽ ഈ മുന്നറിയിപ്പ് പ്രത്യക്ഷപ്പെടാം. ഔദ്യോഗിക വാട്‍സാപ്പ് സേവനം ഉപയോഗിക്കണമെന്നാണ് ഇതിലൂടെ ഉപയോക്താക്കളോട് ആവശ്യപ്പെടുക.

കൂടുതൽ സുരക്ഷാ ഫീച്ചറുകളും വരുന്നു

അക്കൗണ്ട് സുരക്ഷ ശക്തമാക്കുന്നതിന്റെ ഭാഗമായി വാട്‍സാപ്പ് കൂടുതൽ ഫീച്ചറുകൾ പരീക്ഷിക്കുന്നതായും റിപ്പോർട്ടുകളുണ്ട്. തട്ടിപ്പ് മുന്നറിയിപ്പ്, നിയന്ത്രിത ചാറ്റുകൾ തുടങ്ങിയ സംവിധാനങ്ങളും കമ്പനി വികസിപ്പിക്കുന്നതായി സൂചനയുണ്ട്. നിലവിൽ സോഫ്റ്റ്‌വെയർ പുതുക്കാതെ വാട്‍സാപ്പിൽ പ്രവേശിക്കുന്നത് തടയുന്ന സംവിധാനം പരിമിതമായ ഉപയോക്താക്കളിൽ മാത്രമാണ് പരീക്ഷിക്കുന്നത്. അതിനാൽ മുന്നറിയിപ്പ് ലഭിക്കാത്തവർക്ക് നിലവിൽ സാധാരണ രീതിയിൽ വാട്‍സാപ്പ് ഉപയോഗിക്കാൻ സാധിക്കും. ഏതൊക്കെ സോഫ്റ്റ്‌വെയർ പതിപ്പുകളെയാണ് നിയന്ത്രണം ബാധിക്കുക, എപ്പോൾ ഇത് എല്ലാ ഉപയോക്താക്കളിലേക്കും എത്തും തുടങ്ങിയ കാര്യങ്ങളിൽ വാട്‍സാപ്പ് ഔദ്യോഗിക സ്ഥിരീകരണം നൽകിയിട്ടില്ല.

വാട്‍സാപ്പിലൂടെ ഇനി വൈദ്യുതി, ഗ്യാസ്, വെള്ളം ബില്ലുകളും അടയ്ക്കാം; ഇന്ത്യയിൽ പുതിയ ഫീച്ചർ അവതരിപ്പിച്ചു

Sangeetha KS — Fri, 04 Sep 2026 14:05:01 +0530

വാട്‍സാപ്പിലൂടെ ഇനി വിവിധ വീട്ടുബില്ലുകളും യൂട്ടിലിറ്റി ബില്ലുകളും നേരിട്ട് അടയ്ക്കാം. ഇന്ത്യയിൽ ബിൽ പേയ്‌മെന്റ്സ് എന്ന പുതിയ ഫീച്ചർ വാട്സ്ആപ്പ് അവതരിപ്പിച്ചു. മെസേജിങ് ആപ്പ് വിട്ടുപോകാതെ തന്നെ ബില്ലുകൾ കണ്ടെത്താനും പരിശോധിക്കാനും പണമടയ്ക്കാനും ഇതിലൂടെ സാധിക്കും. വ്യാഴാഴ്ചയാണ് പുതിയ സേവനം ഇന്ത്യയിൽ അവതരിപ്പിച്ചത്. മെറ്റയുടെ ഉടമസ്ഥതയിലുള്ള വാട്സ്ആപ്പ് ഭാരത് കണക്ട് എന്ന ബിൽ പേയ്‌മെന്റ് സംവിധാനത്തിന്റെ ശൃംഖലയാണ് ഇതിനായി ഉപയോഗിക്കുന്നത്. വൈദ്യുതി, ഗ്യാസ്, വെള്ളം, ഫാസ്റ്റാഗ്, ഇൻഷുറൻസ്, ക്രെഡിറ്റ് കാർഡ്, വായ്പ തിരിച്ചടവ് തുടങ്ങി 30 വിഭാഗങ്ങളിലായി 22,722 ബില്ലർമാരുടെ സേവനം ലഭ്യമാകും.

എങ്ങനെ ബിൽ അടയ്ക്കാം?

വാട്സ്ആപ്പിന്റെ ഹോം സ്ക്രീനിൽ മുകളിൽ കാണുന്ന രൂപ ചിഹ്നത്തിൽ ടാപ്പ് ചെയ്താണ് ബിൽ പേയ്‌മെന്റ്സ് വിഭാഗത്തിലേക്ക് പ്രവേശിക്കേണ്ടത്. തുടർന്ന് ആവശ്യമായ ബിൽ വിഭാഗവും ബില്ലറും തിരഞ്ഞെടുക്കണം. അക്കൗണ്ട് വിവരങ്ങൾ നൽകിയ ശേഷം അവ സ്ഥിരീകരിക്കാം. വാട്സ്ആപ്പ് ബിൽ തുക ലഭ്യമാക്കും. തുക പരിശോധിച്ച ശേഷം പേയ്‌മെന്റ് പൂർത്തിയാക്കാം. യൂണിഫൈഡ് പേയ്‌മെന്റ്സ് ഇന്റർഫേസ്, ഡെബിറ്റ് കാർഡ്, ക്രെഡിറ്റ് കാർഡ് എന്നിവ ഉപയോഗിച്ച് പണമടയ്ക്കാനുള്ള സൗകര്യവും പുതിയ ഫീച്ചറിൽ ഉൾപ്പെടുത്തിയിട്ടുണ്ട്.

വീട്ടിലെ ബില്ലുകൾ ഒറ്റയിടത്ത്

വീട്ടിലെ വിവിധ ബില്ലുകൾ എളുപ്പത്തിൽ കൈകാര്യം ചെയ്യുന്നതിനായി ഹൗസ്ഹോൾഡ് ബിൽസ് സമ്മറിയും വാട്സ്ആപ്പ് അവതരിപ്പിച്ചിട്ടുണ്ട്. നേരത്തെ പണമടച്ചിട്ടുള്ള ബില്ലർമാരെ പേയ്‌മെന്റ്സ് ഹോം സ്ക്രീനിൽ കാണിക്കും. അതുവഴി ഒരൊറ്റ ടാപ്പിലൂടെ വീണ്ടും ബിൽ പേയ്‌മെന്റിലേക്ക് എത്താം. ഒരേ ബില്ലറിന് കീഴിൽ ഒന്നിലധികം അക്കൗണ്ടുകൾ കൈകാര്യം ചെയ്യാനും ഉപയോക്താക്കൾക്ക് സാധിക്കും. വീട്ടിലെ ബില്ലുകൾക്ക് പുറമെ ഓഫീസ്, കുടുംബാംഗങ്ങൾ എന്നിവരുടെ ബില്ലുകളും കൈകാര്യം ചെയ്യാൻ ഈ സൗകര്യം സഹായിക്കും.

30 വിഭാഗങ്ങളിലായി സേവനം

ഉപയോക്താക്കൾ പതിവായി ഉപയോഗിക്കുന്ന ബിൽ വിഭാഗങ്ങൾ പേയ്‌മെന്റ്സ് ഹോം സ്ക്രീനിൽ വാട്സ്ആപ്പ് സ്വമേധയാ പ്രദർശിപ്പിക്കും. കൂടുതൽ വിഭാഗങ്ങൾ കാണുന്നതിനായി സീ ഓൾ എന്ന ഓപ്ഷനും ലഭിക്കും. വിവിധ ബില്ലുകൾ അടയ്ക്കുന്നതിനായി മറ്റൊരു ആപ്പിലേക്ക് മാറേണ്ട സാഹചര്യം ഒഴിവാക്കുകയാണ് പുതിയ ഫീച്ചറിലൂടെ വാട്സ്ആപ്പ് ലക്ഷ്യമിടുന്നത്. നേരത്തെ മൊബൈൽ റീചാർജ് ഉൾപ്പെടെയുള്ള പണമിടപാട് സേവനങ്ങൾ വാട്സ്ആപ്പിൽ ലഭ്യമായിരുന്നു.

ഘട്ടംഘട്ടമായി ലഭ്യമാകും

ഭാരത് കണക്ട് സംവിധാനത്തിന്റെ പിന്തുണയോടെ പ്രവർത്തിക്കുന്ന പുതിയ സേവനം ഇന്ത്യയിൽ ഘട്ടംഘട്ടമായാണ് ലഭ്യമാക്കുന്നത്. ആൻഡ്രോയിഡ്, ഐഒഎസ് ഉപയോക്താക്കൾക്ക് വരും ആഴ്ചകളിൽ ഫീച്ചർ ലഭ്യമാകുമെന്ന് വാട്സ്ആപ്പ് അറിയിച്ചു. 22,722 ബില്ലർമാരെയും 30 വിഭാഗങ്ങളെയും ഒരൊറ്റ പ്ലാറ്റ്‌ഫോമിലേക്ക് കൊണ്ടുവരുന്നതിലൂടെ ദൈനംദിന ബിൽ പേയ്‌മെന്റുകൾ കൂടുതൽ എളുപ്പമാക്കുകയാണ് വാട്സ്ആപ്പിന്റെ പുതിയ നീക്കം.

ഐഫോൺ 18 പ്രോ: അമ്പരപ്പിക്കാൻ മൂന്ന് പുതിയ നിറങ്ങൾ?

Prashobh Prasannan — Thu, 03 Sep 2026 12:25:48 +0530

ആപ്പിളിന്‍റെ അടുത്ത തലമുറ പ്രീമിയം സ്‍മാർട്ട്ഫോൺ സീരീസായ ഐഫോൺ 18 പ്രോ ഈ മാസം തന്നെ വിപണിയിൽ എത്തിയേക്കുമെന്ന് റിപ്പോർട്ട്. ഐഫോൺ 18 പ്രോ, ഐഫോൺ 18 പ്രോ മാക്സ് എന്നീ മോഡലുകൾ ഉൾപ്പെടുന്നതായിരിക്കും പുതിയ സീരീസ്. സെപ്റ്റംബർ 9ന് ആപ്പിൾ പാർക്കിൽ നടക്കുന്ന ‘സർപ്രൈസ് ആൻഡ് ഷൈൻ’ പരിപാടിയിൽ പുതിയ ഐഫോൺ മോഡലുകൾ അവതരിപ്പിച്ചേക്കുമെന്നാണ് സൂചന.

ഐഫോൺ 18 പ്രോ സീരീസിനൊപ്പം ആപ്പിളിന്റെ ആദ്യത്തെ ബുക്ക്-സ്റ്റൈൽ ഫോൾഡബിൾ ഫോണായ ഐഫോൺ അൾട്രയും അവതരിപ്പിച്ചേക്കും. ലോഞ്ചിന് മുന്നോടിയായി ഫോണുമായി ബന്ധപ്പെട്ട നിരവധി വിവരങ്ങൾ ഓൺലൈനിൽ പ്രചരിക്കുന്നുണ്ട്. ഇപ്പോൾ പുറത്തുവന്ന പുതിയ ചോർച്ച പ്രകാരം ഐഫോൺ 18 പ്രോ സീരീസ് മൂന്ന് പുതിയ നിറങ്ങളിൽ എത്തിയേക്കും.

ബർഗണ്ടി, കറുപ്പ്, സ്കൈ ബ്ലൂ

വെയ്‌ബോയിൽ ടിപ്സ്റ്റർ ഫിക്സഡ്-ഫോക്കസ് ഡിജിറ്റൽ ക്യാമറാസ് പങ്കുവച്ച വിവരങ്ങളിലാണ് പുതിയ നിറങ്ങളെക്കുറിച്ചുള്ള സൂചന. ഐഫോൺ 18 പ്രോയുടെതായി പറയപ്പെടുന്ന ചിത്രത്തിൽ നാല് നിറങ്ങൾ കാണിക്കുന്നുണ്ട്. എന്നാൽ ഇതിൽ ടൈറ്റാനിയം നിറം ഒഴിവാക്കി ബാക്കിയുള്ള മൂന്ന് നിറങ്ങളിലായിരിക്കും ഫോൺ ലഭിക്കുകയെന്നാണ് ടിപ്സ്റ്ററുടെ അവകാശവാദം. ബർഗണ്ടി, പ്യൂർ ബ്ലാക്ക്, സ്കൈ ബ്ലൂ എന്നീ നിറങ്ങളിലായിരിക്കും ഐഫോൺ 18 പ്രോ, ഐഫോൺ 18 പ്രോ മാക്സ് മോഡലുകൾ എത്തുകയെന്നാണ് വിവരം. ചൈനീസ് ഭാഷയിൽ പങ്കുവച്ച വിവരത്തിന്റെ പരിഭാഷ പ്രകാരമാണ് നിറങ്ങളുടെ പേരുകൾ പുറത്തുവന്നിരിക്കുന്നത്.

കഴിഞ്ഞ വർഷത്തെ നിറങ്ങൾ ഒഴിവാക്കും

പുതിയ നിറങ്ങൾ എത്തുന്നതോടെ കഴിഞ്ഞ വർഷത്തെ ഐഫോൺ 17 പ്രോ സീരീസിൽ അവതരിപ്പിച്ച മൂന്ന് നിറങ്ങളും ആപ്പിൾ ഒഴിവാക്കിയേക്കും. 2025 സെപ്റ്റംബറിൽ കോസ്മിക് ഓറഞ്ച്, ഡീപ് ബ്ലൂ, സിൽവർ എന്നീ നിറങ്ങളിലായിരുന്നു ഐഫോൺ 17 പ്രോ, ഐഫോൺ 17 പ്രോ മാക്സ് മോഡലുകൾ അവതരിപ്പിച്ചത്. പുതിയ സീരീസിലെ സ്കൈ ബ്ലൂ നിറം കൂടുതൽ ഇളം നീല ഷേഡിലാണ് കാണപ്പെടുന്നത്. ബർഗണ്ടി നിറത്തിന് കടുത്ത ചുവപ്പ് ടോണാണ് നൽകിയിരിക്കുന്നതെന്നും ചോർന്ന ചിത്രങ്ങൾ സൂചിപ്പിക്കുന്നു. അതേസമയം, ഐഫോൺ 18 പ്രോ സീരീസിലൂടെ കറുപ്പ് നിറം പ്രോ മോഡലുകളിലേക്ക് തിരിച്ചെത്താനും സാധ്യതയുണ്ട്. സാധാരണ ഐഫോൺ 17ൽ നൽകിയിരിക്കുന്ന കറുപ്പിനേക്കാൾ ഇരുണ്ട ഷേഡായിരിക്കും പുതിയ കറുപ്പ് നിറമെന്നും റിപ്പോർട്ടുകൾ ഉണ്ട്.

സെപ്റ്റംബർ 9ന് ആപ്പിൾ ഇവന്‍റ്

സെപ്റ്റംബർ 9ന് രാവിലെ 10 മണിക്ക് പസഫിക് സമയം, അതായത് ഇന്ത്യൻ സമയം രാത്രി 10.30ന്, ക്യൂപ്പർട്ടിനോയിലെ ആപ്പിൾ പാർക്കിലാണ് ആപ്പിളിന്റെ ‘സർപ്രൈസ് ആൻഡ് ഷൈൻ’ പരിപാടി നടക്കുക. ഐഫോൺ 18 പ്രോ, ഐഫോൺ 18 പ്രോ മാക്സ് എന്നിവയ്ക്കൊപ്പം ഐഫോൺ അൾട്രയും ഈ പരിപാടിയിൽ അവതരിപ്പിച്ചേക്കും. ആപ്പിളിന്റെ ആദ്യ ബുക്ക്-സ്റ്റൈൽ ഫോൾഡബിൾ ഫോണായിരിക്കും ഐഫോൺ അൾട്രയെന്നാണ് റിപ്പോർട്ടുകൾ. ആപ്പിൾ വാച്ച് സീരീസ് 12, എയർപോഡ്സ് 5 എന്നിവയുടെ പ്രഖ്യാപനത്തിനും പരിപാടി വേദിയാകാൻ സാധ്യതയുണ്ട്.

പുതിയ ക്യാമറ സജ്ജീകരണം

ഡിസൈനിന്റെ കാര്യത്തിൽ ഐഫോൺ 18 പ്രോ സീരീസ് മുൻഗാമിയുടെ രൂപകൽപ്പന നിലനിർത്തുമെന്നാണ് ചോർച്ചകൾ സൂചിപ്പിക്കുന്നത്. എന്നാൽ പിന്നിലെ ക്യാമറ പ്ലാറ്റോക്ക് വലുപ്പം കൂടിയേക്കും. പുതിയ ട്രിപ്പിൾ റിയർ ക്യാമറ സംവിധാനവും ഇതിൽ ഉൾപ്പെടുത്തിയേക്കുമെന്നാണ് വിവരം. പുതിയ എ20 പ്രോ ചിപ്സെറ്റായിരിക്കും ഐഫോൺ 18 പ്രോ സീരീസിന് കരുത്തേകുകയെന്നും റിപ്പോർട്ടുകളുണ്ട്. എന്നാൽ ആപ്പിൾ ഇതുവരെ ഈ വിവരങ്ങളൊന്നും ഔദ്യോഗികമായി സ്ഥിരീകരിച്ചിട്ടില്ല. ലോഞ്ച് തീയതി അടുക്കുന്നതോടെ ഐഫോൺ 18 പ്രോ സീരീസിന്റെ കൂടുതൽ സവിശേഷതകൾ പുറത്തുവരുമെന്നാണ് പ്രതീക്ഷിക്കുന്നത്.

വോയിസ്, എസ്എംഎസ് റീചാർജുകൾക്ക് പുതിയ നിയമം; കുറഞ്ഞ നിരക്കിൽ കൂടുതൽ പ്ലാനുകൾ വരുന്നു

Prashobh Prasannan — Fri, 25 Sep 2026 16:49:58 +0530

മൊബൈൽ ഫോൺ പ്രധാനമായും കോളുകൾക്കും എസ്എംഎസിനുമായി ഉപയോഗിക്കുന്നവർക്ക് ആശ്വാസവാർത്ത. ഇന്റർനെറ്റ് ഡാറ്റ ആവശ്യമില്ലാത്ത ഉപഭോക്താക്കൾക്കായി കൂടുതൽ വോയിസ്, എസ്എംഎസ് മാത്രം ഉൾപ്പെടുന്ന റീചാർജ് പ്ലാനുകൾ അവതരിപ്പിക്കാൻ ടെലികോം കമ്പനികൾക്ക് ടെലികോം റെഗുലേറ്ററി അതോറിറ്റി ഓഫ് ഇന്ത്യ അഥവാ ട്രായ് നിർദേശം നൽകി.

30 ദിവസം വരെ കാലാവധിയുള്ള പ്ലാനുകൾ

2026ലെ ടെലികോം കൺസ്യൂമർ പ്രൊട്ടക്ഷൻ പതിമൂന്നാം ഭേദഗതി ചട്ടങ്ങൾ പ്രകാരം 30 ദിവസം വരെയുള്ള കാലാവധിയുള്ള വോയ്സ്, എസ്എംഎസ് മാത്രം ഉൾപ്പെടുന്ന പ്രത്യേക താരിഫ് വൗച്ചറുകൾ ടെലികോം കമ്പനികൾ അവതരിപ്പിക്കണം. നിലവിലുള്ള താരിഫ് പ്ലാനുകളിൽ ലഭ്യമായ കുറഞ്ഞ കാലാവധിക്ക് അനുസൃതമായ ഓപ്ഷനുകളും കമ്പനികൾ നൽകേണ്ടിവരും. ഡാറ്റ ഉൾപ്പെടുത്താത്തതിനാൽ ഇത്തരം പ്ലാനുകൾക്ക് അതിനനുസരിച്ചുള്ള നിരക്ക് കുറവും ഉണ്ടായിരിക്കണമെന്ന് ട്രായ് നിർദേശിച്ചിട്ടുണ്ട്. ഇതോടെ ഇന്റർനെറ്റ് ഉപയോഗിക്കാത്തവർക്ക് ആവശ്യമില്ലാത്ത ഡാറ്റയ്ക്കായി പണം നൽകേണ്ട സാഹചര്യം ഒഴിവാക്കാനാകും.

മാസത്തിൽ ഒരേ തീയതിയിൽ പുതുക്കാം

30 ദിവസത്തിൽ കൂടുതൽ കാലാവധിയുള്ള കുറഞ്ഞത് ഒരു വോയ്സ്, എസ്എംഎസ് പ്ലാനെങ്കിലും എല്ലാ ടെലികോം കമ്പനികളും നൽകണം. ഈ പ്ലാനുകൾ എല്ലാ മാസവും ഒരേ തീയതിയിൽ പുതുക്കാൻ കഴിയുന്ന തരത്തിലായിരിക്കണം. ഒരു മാസത്തിൽ പുതുക്കേണ്ട തീയതി ഇല്ലെങ്കിൽ, ആ മാസത്തെ അവസാന ദിവസമായിരിക്കും പുതുക്കലിനുള്ള തീയതി. ഉദാഹരണത്തിന്, ഒരു പ്ലാൻ എല്ലാ മാസവും 31ന് പുതുക്കേണ്ടതാണെങ്കിൽ 31 ദിവസമില്ലാത്ത മാസങ്ങളിൽ അവസാന ദിവസത്തിൽ പ്ലാൻ പുതുക്കും.

നിലവിൽ ദീർഘകാല പ്ലാനുകൾ കൂടുതൽ

ടെലികോം കമ്പനികൾ നിലവിൽ നൽകുന്ന വോയ്സ്, എസ്എംഎസ് മാത്രം ഉൾപ്പെടുന്ന പ്ലാനുകളിൽ ഭൂരിഭാഗവും ദീർഘകാല കാലാവധിയുള്ളവയാണെന്ന് ട്രായ് ചൂണ്ടിക്കാട്ടി. 80 അല്ലെങ്കിൽ 84 ദിവസം, 336 അല്ലെങ്കിൽ 365 ദിവസം തുടങ്ങിയ കാലാവധികളിലാണ് ഇത്തരം പ്ലാനുകൾ കൂടുതലായും ലഭിക്കുന്നത്. കുറഞ്ഞ കാലയളവിലേക്ക് റീചാർജ് ചെയ്യാൻ ആഗ്രഹിക്കുന്ന ഉപഭോക്താക്കൾക്ക് ഇതോടെ പരിമിതമായ ഓപ്ഷനുകളാണ് ഉണ്ടായിരുന്നത്. പ്രത്യേകിച്ച് കുറഞ്ഞ വരുമാനമുള്ള ഉപഭോക്താക്കൾക്ക് അവരുടെ ആവശ്യത്തിനും സാമ്പത്തിക സാഹചര്യത്തിനും അനുസരിച്ച് ചെറിയ കാലയളവിലേക്ക് റീചാർജ് ചെയ്യാൻ പുതിയ സംവിധാനം സഹായിക്കുമെന്നാണ് ട്രായ് വ്യക്തമാക്കുന്നത്.

നിലവിലെ പ്ലാൻ നിരക്കുകൾ

നിലവിൽ ജിയോ, എയർടെൽ, വോഡഫോൺ ഐഡിയ എന്നീ കമ്പനികൾ വോയ്സ്, എസ്എംഎസ് മാത്രം ഉൾപ്പെടുന്ന റീചാർജ് പ്ലാനുകൾ നൽകുന്നുണ്ട്. ജിയോയുടെ ത്രൈമാസ പ്ലാനിന് 448 രൂപയും വാർഷിക പ്ലാനിന് 1748 രൂപയുമാണ് നിരക്ക്. എയർടെലും വോഡഫോൺ ഐഡിയയും 1849 രൂപ നിരക്കിൽ വാർഷിക പ്ലാനുകൾ നൽകുന്നു. ഇവയുടെ ത്രൈമാസ പ്ലാനുകൾക്ക് യഥാക്രമം 469 രൂപയും 470 രൂപയുമാണ് നിരക്ക്.

പുതിയ പ്ലാനുകളുടെ വില എത്ര?

ട്രായിയുടെ പുതിയ നിർദേശത്തോടെ നിലവിലുള്ള ദീർഘകാല പ്ലാനുകൾക്ക് പുറമെ കുറഞ്ഞ കാലാവധിയുള്ള കൂടുതൽ റീചാർജ് ഓപ്ഷനുകളും ഉപഭോക്താക്കൾക്ക് ലഭിച്ചേക്കും. എന്നാൽ പുതിയ പ്ലാനുകളുടെ കൃത്യമായ നിരക്കുകൾ ടെലികോം കമ്പനികൾ ഇതുവരെ പ്രഖ്യാപിച്ചിട്ടില്ല. ഡാറ്റ ആവശ്യമില്ലാത്ത ഉപഭോക്താക്കൾക്ക് അവരുടെ ഉപയോഗത്തിനും ബജറ്റിനും അനുസരിച്ച് റീചാർജ് തിരഞ്ഞെടുക്കാൻ പുതിയ സംവിധാനം കൂടുതൽ സൗകര്യം നൽകുമെന്നാണ് പ്രതീക്ഷിക്കുന്നത്.

പഴയ അലക്സ അല്ലിത്! പുതിയ അലക്സാ+ ഇന്ത്യയിൽ

Prashobh Prasannan — Wed, 23 Sep 2026 13:00:57 +0530

കൂടുതൽ ബുദ്ധിപരമായ സംഭാഷണശേഷിയുമായി ആമസോണിന്റെ പുതിയ അലക്സാ+ ഇന്ത്യയിലെത്തി. നിലവിലെ അലക്സയെക്കാൾ കൂടുതൽ കാര്യങ്ങൾ മനസിലാക്കാനും സ്വാഭാവികമായി സംസാരിക്കാനും കഴിയുന്ന രീതിയിലാണ് പുതിയ സേവനം ഒരുക്കിയിരിക്കുന്നത്. നിലവിൽ തിരഞ്ഞെടുത്ത ഉപയോക്താക്കൾക്ക് മാത്രമാണ് അലക്സാ+ ലഭിക്കുക. പുതിയതായി അനുയോജ്യമായ ആമസോൺ എക്കോ ഉപകരണം വാങ്ങുന്നവർക്കും സേവനം ലഭിക്കും. ഇന്ത്യയിൽ ഇപ്പോൾ അലക്സാ+ സൗജന്യമായാണ് നൽകുന്നത്.

ആമസോൺ പ്രൈം അംഗങ്ങൾക്ക് സൗജന്യം

ഭാവിയിൽ കൂടുതൽ ഉപയോക്താക്കളിലേക്ക് സേവനം വ്യാപിപ്പിക്കുമ്പോൾ ആമസോൺ പ്രൈം അംഗങ്ങൾക്ക് അലക്സാ+ സൗജന്യമായി ലഭിക്കും. എന്നാൽ പ്രൈം ലൈറ്റ്, പ്രൈം ഷോപ്പിങ് എഡിഷൻ പ്ലാനുകൾ ഉപയോഗിക്കുന്നവർക്ക് ഈ ആനുകൂല്യം ലഭിക്കില്ല. പൂർണ ആമസോൺ പ്രൈം അംഗത്വമില്ലാത്ത ഉപയോക്താക്കൾക്ക് അലക്സാ+ പ്രതിമാസം 2000 രൂപയ്ക്ക് ലഭിക്കുമെന്നാണ് കമ്പനി അറിയിച്ചിരിക്കുന്നത്.

പഴയ അലക്സയല്ല, പുതിയ സാങ്കേതികവിദ്യ

അലക്സാ+ പഴയ അലക്സയുടെ ചെറിയ പരിഷ്കരിച്ച പതിപ്പ് മാത്രമല്ലെന്നാണ് ആമസോൺ വ്യക്തമാക്കുന്നത്. വലിയ ഭാഷാ മോഡലുകളും ജനറേറ്റീവ് എഐ സാങ്കേതികവിദ്യയും അടിസ്ഥാനമാക്കിയുള്ള പുതിയ ആർക്കിടെക്ചറിലാണ് അലക്സാ+ പ്രവർത്തിക്കുന്നത്. ആമസോൺ അലക്സ ഇന്റർനാഷണൽ വൈസ് പ്രസിഡന്റ് മിഷേൽ ബുട്ടി ഇന്ത്യ ടുഡേ ടെക്കിനോട് പറഞ്ഞത്, പഴയ അലക്സയുടെ പേര് നിലനിർത്തിയെങ്കിലും സാങ്കേതികവിദ്യയും സംവിധാനങ്ങളും പൂർണമായും പുതുക്കിയിട്ടുണ്ടെന്നാണ്. ആഗോളതലത്തിൽ 600 ദശലക്ഷത്തിലധികം ആമസോൺ ഉപകരണങ്ങളിലൂടെ ഉപയോക്താക്കൾ അലക്സ ഉപയോഗിക്കുന്നുണ്ടെന്നും, പഴയ അലക്സയിൽ ലഭിച്ചിരുന്ന സൗകര്യങ്ങൾ പുതിയ അലക്സാ+ലും നിലനിർത്തുകയാണ് ലക്ഷ്യമെന്നും അദ്ദേഹം പറഞ്ഞു.

ഇന്ത്യക്കായി പ്രത്യേകമായി മാറ്റങ്ങൾ

ഇന്ത്യൻ ഉപയോക്താക്കളുടെ സംസാരരീതിക്കും വീടുകളിലെ സാഹചര്യങ്ങൾക്കും അനുയോജ്യമായാണ് അലക്സാ+ ക്രമീകരിച്ചിരിക്കുന്നതെന്ന് ആമസോൺ ഇന്ത്യയിലെ അലക്സ കൺട്രി മാനേജർ ടീന സിദാന പറഞ്ഞു. ഇന്ത്യൻ വീടുകളിൽ പശ്ചാത്തല ശബ്ദവും ഒരേസമയം നടക്കുന്ന സംഭാഷണങ്ങളും കൂടുതലായതിനാൽ ശബ്ദം തിരിച്ചറിയുന്ന സംവിധാനം ഇന്ത്യൻ സാഹചര്യത്തിന് അനുയോജ്യമായി കൂടുതൽ കൃത്യതയോടെ പ്രവർത്തിക്കുന്ന രീതിയിൽ മെച്ചപ്പെടുത്തിയിട്ടുണ്ട്.

ഹിന്ദിയും ഇംഗ്ലീഷും ചേർന്ന ഹിങ്ലിഷും മനസിലാക്കും

ഇന്ത്യയിലെ അലക്സാ+യുടെ പ്രധാന പ്രത്യേകതകളിലൊന്ന് ഹിന്ദിയും ഇംഗ്ലീഷും ചേർത്തുള്ള സാധാരണ സംസാരശൈലി മനസിലാക്കാനുള്ള കഴിവാണ്. ഇന്ത്യക്കാർ സംഭാഷണത്തിനിടെ ഭാഷകൾ മാറിമാറി ഉപയോഗിക്കുന്നത് സാധാരണമാണ്. ഇതിനെ ‘കോഡ് സ്വിച്ചിങ്’ എന്നാണ് വിളിക്കുന്നത്. ഇത്തരത്തിലുള്ള സംസാരവും അലക്സാ+ക്ക് മനസിലാക്കാൻ സാധിക്കും. ഉദാഹരണത്തിന്, “അലാറം ദോ ബജേ കാ സെറ്റ് കർദോ” പോലുള്ള ഹിങ്ലിഷ് നിർദേശങ്ങൾ നൽകാനും അലക്സാ+ക്ക് കഴിയും. നിലവിൽ ഇന്ത്യയിൽ ഹിന്ദി, ഇംഗ്ലീഷ്, ഹിങ്ലിഷ് എന്നിവയാണ് അലക്സാ+ പിന്തുണയ്ക്കുന്നത്. പ്രാദേശിക ഭാഷകൾക്കുള്ള പിന്തുണ പിന്നീട് അവതരിപ്പിക്കുമെന്ന് ആമസോൺ അറിയിച്ചു.

ഷോപ്പിങ്ങും അലക്സാ+ ചെയ്യും

സ്മാർട്ട് ഹോം നിയന്ത്രണം, ഷോപ്പിങ്, ഭക്ഷണ ആസൂത്രണം, റസ്റ്ററന്റ് ബുക്കിങ്, യാത്രാ ആസൂത്രണം, സംഗീതം കണ്ടെത്തൽ, വിനോദം തുടങ്ങി നിരവധി കാര്യങ്ങൾ സ്വാഭാവിക സംഭാഷണത്തിലൂടെ ചെയ്യാൻ അലക്സാ+ സഹായിക്കും. ശബ്ദ നിർദേശത്തിലൂടെ ഉപയോക്താവിനായി സാധനങ്ങൾ വാങ്ങാനും അലക്സാ+ക്ക് കഴിയും. ഇന്ത്യയിൽ ആമസോൺ നൗ സേവനം ഉപയോഗിച്ച് വോയ്സ് കമാൻഡ് വഴി പലചരക്ക് സാധനങ്ങൾ ഓർഡർ ചെയ്യാനും സാധിക്കും. ഉൽപ്പന്നങ്ങൾ തമ്മിൽ താരതമ്യം ചെയ്യാനും വില പരിശോധിക്കാനും വില കുറയുമ്പോൾ അറിയിപ്പ് നൽകുന്നതിനായി അലാറം ക്രമീകരിക്കാനും അലക്സാ+ സഹായിക്കും.

സ്വകാര്യതയ്ക്ക് പ്രത്യേക ശ്രദ്ധ

കൂടുതൽ സംഭാഷണങ്ങൾ കൈകാര്യം ചെയ്യുന്ന എഐ അസിസ്റ്റന്റ് എന്ന നിലയിൽ സ്വകാര്യതയ്ക്കും അലക്സാ+യിൽ പ്രത്യേക പരിഗണന നൽകിയിട്ടുണ്ടെന്ന് ആമസോൺ പറയുന്നു. ഉപകരണം ‘അലക്സ’ എന്ന വേക്ക് വേഡ് തിരിച്ചറിയുന്നതുവരെ ശബ്ദം റെക്കോർഡ് ചെയ്യില്ലെന്നാണ് കമ്പനി വ്യക്തമാക്കുന്നത്. വേക്ക് വേഡ് തിരിച്ചറിഞ്ഞതിന് ശേഷം എക്കോ ഉപകരണത്തിലെ നീല വെളിച്ചം തെളിയും. തുടർന്ന് ശബ്ദം റെക്കോർഡ് ചെയ്ത് ക്ലൗഡിലേക്ക് അയച്ച് പ്രോസസ്സ് ചെയ്യും. അലക്സ പ്രൈവസി ഡാഷ്ബോർഡ് വഴിയും ഉപയോക്താക്കൾക്ക് തങ്ങളുടെ ഇടപെടലുകൾ പരിശോധിക്കാം. അലക്സ കേട്ട ശബ്ദം കേൾക്കാനും പങ്കുവെച്ച അറ്റാച്ച്മെന്റുകൾ പരിശോധിക്കാനും വോയ്സ് റെക്കോർഡുകൾ എത്രകാലം സൂക്ഷിക്കണമെന്ന് ക്രമീകരിക്കാനും സാധിക്കും.

ഇന്ത്യയിൽ എപ്പോൾ ലഭിക്കും?

നിലവിൽ പരിമിതമായ ഉപയോക്താക്കൾക്കാണ് അലക്സാ+ ലഭ്യമാകുന്നത്. ആമസോൺ വെബ്സൈറ്റിൽ യോഗ്യത പരിശോധിക്കാനാകും. പുതിയതായി യോഗ്യമായ എക്കോ അല്ലെങ്കിൽ ഫയർ ടി വി ഉപകരണം വാങ്ങുന്നവർക്ക് അലക്സാ+ സ്വയമേവ ലഭിക്കും. കൂടുതൽ ഉപയോക്താക്കളിലേക്ക് സേവനം എത്തുന്നതുവരെ ഇന്ത്യയിൽ ഇത് സൗജന്യമായിരിക്കും. പിന്നീട് പൂർണ ആമസോൺ പ്രൈം അംഗങ്ങൾക്ക് സൗജന്യമായി തുടരുമെങ്കിലും, മറ്റ് ഉപയോക്താക്കൾക്ക് പ്രതിമാസം 2000 രൂപ നൽകേണ്ടിവരും.

ഓർക്കുട്ട് തിരിച്ചെത്തുമോ? പഴയ സോഷ്യൽ മീഡിയയെ തിരികെ കൊണ്ടുവരാൻ സ്ഥാപകന്‍റെ പുതിയ നീക്കം!

Prashobh Prasannan — Mon, 12 Oct 2026 11:12:48 +0530

ഒരുകാലത്ത് ഇന്ത്യയുൾപ്പെടെയുള്ള രാജ്യങ്ങളിൽ തരംഗമായിരുന്ന സോഷ്യൽ മീഡിയ പ്ലാറ്റ്ഫോം ആയ ഓർക്കുട്ട് വീണ്ടും തിരിച്ചെത്തുമോ? ഓർക്കുട്ടിന്റെ സ്ഥാപകൻ ഓർക്കുട്ട് ബ്യൂക്കോക്ക്റ്റൻ പുതിയൊരു സാമൂഹിക മാധ്യമ ശൃംഖല ആരംഭിക്കാനുള്ള നീക്കവുമായി രംഗത്തെത്തിയതോടെയാണ് ഈ ചർച്ചകൾ വീണ്ടും സജീവമായത്. യഥാർഥ ബന്ധങ്ങൾക്കും സൗഹൃദങ്ങൾക്കും പരസ്‍പരമുള്ള അടുപ്പത്തിനും പ്രാധാന്യം നൽകുന്ന ഒരു ഇന്റർനെറ്റ് ലോകമാണ് അദ്ദേഹം ലക്ഷ്യമിടുന്നത് എന്നാണ് റിപ്പോർട്ടുകൾ.

2000-കളിൽ യുവജനങ്ങൾക്കിടയിൽ ഏറെ ജനപ്രീതി നേടിയ ഓർക്കുട്ട്, ഗൂഗിൾ 2014-ൽ അടച്ചുപൂട്ടുകയായിരുന്നു. ഒരു പതിറ്റാണ്ടിലേറെക്കാലത്തിന് ശേഷമാണ് ഈ സോഷ്യൽ മീഡിയ പ്ലാറ്റ്ഫോമിന്‍റെ തിരിച്ചുവരവിനുള്ള സാധ്യത വീണ്ടും ഉയരുന്നത്. എന്നാൽ, പഴയ ഓർക്കുട്ട് പ്ലാറ്റ്‌ഫോം പുനരാരംഭിക്കുമെന്ന് ഔദ്യോഗിക പ്രഖ്യാപനമൊന്നും ഇതുവരെ ഉണ്ടായിട്ടില്ല.

പുതിയ ഓർക്കുട്ടിനായി ഓൺലൈൻ നിവേദനം

പുതിയ സാമൂഹിക മാധ്യമ സംരംഭത്തിന് പിന്തുണ തേടി ബ്യൂക്കോക്ക്റ്റൻ ഓർക്കുട്ട് ഡോട്ട് കോം എന്ന വെബ്‌സൈറ്റിലൂടെ ഓൺലൈൻ നിവേദനം ആരംഭിച്ചിട്ടുണ്ട്. കൂടുതൽ മാനുഷികമായ ഇന്റർനെറ്റ് അനുഭവം ആഗ്രഹിക്കുന്നവരെയാണ് ഇതിലൂടെ ലക്ഷ്യമിടുന്നത്. ഇതുവരെ 115 രാജ്യങ്ങളിൽ നിന്നായി 2,70,000-ത്തിലധികം പേർ നിവേദനത്തിൽ ഒപ്പിട്ടിരുന്നു എന്നാണ് നിലവിലെ റിപ്പോർട്ടുകൾ. എക്സിലും അദ്ദേഹം തുറന്ന കത്തും സന്ദേശവും പങ്കുവെച്ചിട്ടുണ്ട്. സൗഹൃദങ്ങളും സമൂഹബന്ധങ്ങളും പരസ്പരം അംഗീകരിക്കപ്പെടുന്ന ഒരിടവും കണ്ടെത്താൻ ആളുകളെ സഹായിക്കുന്നതായിരിക്കണം ഇന്റർനെറ്റെന്നാണ് അദ്ദേഹത്തിന്റെ നിലപാട്.

സാമൂഹിക മാധ്യമങ്ങൾ ലക്ഷ്യം മറന്നുവെന്ന് സ്ഥാപകൻ

സാമൂഹിക മാധ്യമങ്ങൾ അവയുടെ യഥാർഥ ലക്ഷ്യത്തിൽനിന്ന് അകന്നുപോയെന്നാണ് ബ്യൂക്കോക്ക്റ്റന്റെ നിരീക്ഷണം. രണ്ട് പതിറ്റാണ്ടുകൾക്ക് മുമ്പ് ആദ്യകാല സാമൂഹിക മാധ്യമങ്ങളിൽ ചിലത് സൃഷ്‍ടിച്ച താൻ, അവയുടെ മാറ്റങ്ങൾ നേരിട്ട് കണ്ടിട്ടുണ്ടെന്നും അദ്ദേഹം തുറന്ന കത്തിൽ പറയുന്നു. ലോകത്തിന്റെ വിവിധ ഭാഗങ്ങളിലുള്ള അപരിചിതരുമായി ബന്ധപ്പെടുന്നത് ഒരുകാലത്ത് ആവേശകരമായ അനുഭവമായിരുന്നു. എന്നാൽ, ഇപ്പോൾ അർഥവത്തായ ബന്ധങ്ങളേക്കാൾ ഉപയോക്താക്കളുടെ ശ്രദ്ധ പരമാവധി പിടിച്ചുനിർത്തുന്നതിനാണ് പല സോഷ്യൽ മീഡിയ പ്ലാറ്റ്ഫോമുകളും പ്രാധാന്യം നൽകുന്നതെന്ന് അദ്ദേഹം വിമർശിക്കുന്നു.

ഉപയോക്താക്കളുടെ ഇടപെടലുകൾ വർധിപ്പിക്കാൻ രൂപകൽപ്പന ചെയ്ത ഫീഡുകളും ആളുകളെ സ്വാധീനിക്കുന്ന അൽഗോരിതങ്ങളും പരസ്യങ്ങൾക്കായുള്ള വിവരശേഖരണവും സാമൂഹിക മാധ്യമങ്ങളുടെ സ്വഭാവത്തെ മാറ്റിയെന്നാണ് അദ്ദേഹത്തിന്റെ വിലയിരുത്തൽ. ഇതിന്റെ ഫലമായി യുവാക്കൾക്കിടയിൽ ഏകാന്തതയും ഉത്കണ്ഠയും വർധിക്കുന്നതായും അദ്ദേഹം ചൂണ്ടിക്കാട്ടുന്നു.

എഐയും ഓൺലൈൻ വിശ്വാസ്യതയും

നിർമിത ബുദ്ധിയുടെ വളർച്ചയും സാമൂഹിക മാധ്യമങ്ങളിലെ വിശ്വാസ്യതയെ ബാധിക്കുന്നുണ്ടെന്ന് ബ്യൂക്കോക്ക്റ്റൻ മുന്നറിയിപ്പ് നൽകുന്നു. മറുവശത്ത് സംസാരിക്കുന്നത് യഥാർഥ വ്യക്തിയാണോ എന്ന് തിരിച്ചറിയുക കൂടുതൽ പ്രയാസകരമാകുകയാണ്. വ്യാജ അക്കൗണ്ടുകൾ, ഡീപ്‌ഫേക്ക് ദൃശ്യങ്ങൾ, നിർമിത ബുദ്ധി ഉപയോഗിച്ച് സൃഷ്ടിക്കുന്ന ഉള്ളടക്കങ്ങൾ, സ്വയം പ്രവർത്തിക്കുന്ന എഐ ഏജന്റുകൾ എന്നിവ ഓൺലൈൻ ഇടപെടലുകളിലെ വിശ്വാസം ദുർബലപ്പെടുത്തുന്നുവെന്നാണ് അദ്ദേഹത്തിന്റെ അഭിപ്രായം.

“ആർട്ടിഫിഷ്യൽ ഇന്‍റലിജൻസ് അസാധാരണമായ സാങ്കേതികവിദ്യയാണ്. എന്നാൽ, സാമൂഹിക മാധ്യമങ്ങളെ സവിശേഷവും മൂല്യവത്തുമാക്കിയ അടിസ്ഥാന സങ്കൽപ്പത്തെത്തന്നെ അത് ഇല്ലാതാക്കുകയാണ്. മറുവശത്ത് ഒരു യഥാർഥ വ്യക്തിയുണ്ടെന്ന വിശ്വാസമായിരുന്നു അത്,” എന്നാണ് അദ്ദേഹം വ്യക്തമാക്കുന്നത്.

ഓർക്കുട്ടിന്റെ തിരിച്ചുവരവ് ആദ്യ ശ്രമമല്ല

ഓർക്കുട്ട് തിരിച്ചെത്തുമെന്ന ചർച്ചകൾ ഇതാദ്യമല്ല. 2022-ലും ബ്യൂക്കോക്ക്റ്റൻ ഓർക്കുട്ട് ഡോട്ട് കോം വീണ്ടും സജീവമാക്കി പുതിയ സാമൂഹിക മാധ്യമം രൂപീകരിക്കുന്നതിനെക്കുറിച്ച് തുറന്ന കത്ത് പ്രസിദ്ധീകരിച്ചിരുന്നു. മുഖ്യധാരാ സാമൂഹിക മാധ്യമങ്ങളിൽ കാണുന്ന ഉപയോക്തൃ ഇടപെടലുകൾക്ക് അമിത പ്രാധാന്യം നൽകുന്ന രീതിക്കു പകരം അർഥവത്തായ ബന്ധങ്ങൾക്കും കൂട്ടായ്മകൾക്കും പ്രാധാന്യം നൽകുന്ന പ്ലാറ്റ്‌ഫോമാണ് അന്ന് അദ്ദേഹം വിഭാവനം ചെയ്തത്. എന്നാൽ, ആ ശ്രമം പഴയ ഓർക്കുട്ടിന്റെ ഔദ്യോഗിക തിരിച്ചുവരവിലേക്ക് നയിച്ചില്ല.

പുതിയ പ്രചാരണത്തിലൂടെ കൂടുതൽ മാനുഷികമായ ഇന്റർനെറ്റ് എന്ന ആശയത്തിന് പിന്തുണ തേടുകയാണ് ഇപ്പോൾ അദ്ദേഹം. ഓർക്കുട്ടിന്റെ പഴയകാല ഉപയോക്താക്കൾക്കിടയിൽ തിരിച്ചുവരവിനെക്കുറിച്ചുള്ള പ്രതീക്ഷ ശക്തമാണെങ്കിലും പുതിയ പ്ലാറ്റ്‌ഫോം എപ്പോൾ പ്രവർത്തനം ആരംഭിക്കുമെന്ന കാര്യത്തിൽ വ്യക്തതയില്ല. നിലവിൽ പൊതുജനപിന്തുണ ശേഖരിക്കുന്ന ഘട്ടത്തിലാണ് പദ്ധതി. ഔദ്യോഗിക പ്രഖ്യാപനമോ പ്രവർത്തനം ആരംഭിക്കുന്ന തീയതിയോ ഇതുവരെ പുറത്തുവന്നിട്ടില്ല.