Asianet News Malayalam

ഭയം വേണ്ട, ഇനി 'കൂടുതൽ ജാഗ്രത' മതിയെന്ന് നിർദേശം; ബംഗ്ലാദേശിലേക്കുള്ള യാത്രകൾക്ക് അമേരിക്കയുടെ ഗ്രീൻ സിഗ്നൽ

Prashob Mon — Tue, 04 Aug 2026 16:19:56 +0530

ബംഗ്ലാദേശിലേക്കുള്ള യാത്ര സംബന്ധിച്ച മുന്നറിയിപ്പ് അമേരിക്ക ഇളവ് ചെയ്തു. ഇതുവരെ നിലവിലുണ്ടായിരുന്ന ലെവൽ മൂന്ന് – 'യാത്ര പുനഃപരിഗണിക്കുക' എന്ന മുന്നറിയിപ്പ് പിൻവലിച്ച് ലെവൽ രണ്ട് – 'കൂടുതൽ ജാഗ്രത പാലിക്കുക' എന്ന നിലയിലേക്ക് മാറ്റിയതായി അമേരിക്ക അറിയിച്ചു. രാജ്യത്തെ സുരക്ഷാ സാഹചര്യം മെച്ചപ്പെട്ടതിനെ തുടർന്നാണ് ഈ തീരുമാനമെന്ന് അമേരിക്കൻ അധികൃതർ വ്യക്തമാക്കി. അമേരിക്കയുടെ പുതിയ യാത്രാ നിർദേശം ബംഗ്ലാദേശിന്റെ സുരക്ഷാ സാഹചര്യത്തിലും യാത്രാ അന്തരീക്ഷത്തിലുമുള്ള മെച്ചപ്പെടുത്തലിലുള്ള വിശ്വാസമാണ് പ്രതിഫലിപ്പിക്കുന്നതെന്ന് ബംഗ്ലാദേശ് വിദേശകാര്യ മന്ത്രാലയം അറിയിച്ചു.

ഉഭയകക്ഷി കൂടിക്കാഴ്ചയ്ക്ക് പിന്നാലെ പ്രഖ്യാപനം

ധാക്കയിൽ ബംഗ്ലാദേശ് വിദേശകാര്യ മന്ത്രി ഖലീലുർ റഹ്മാനും ദക്ഷിണ-മധ്യേഷ്യൻ കാര്യങ്ങൾക്കായുള്ള അമേരിക്കൻ പ്രത്യേക പ്രതിനിധി സെർജിയോ ഗോറും തമ്മിൽ നടന്ന കൂടിക്കാഴ്ചയ്ക്ക് പിന്നാലെയാണ് പുതിയ തീരുമാനം അറിയിച്ചത്. കൂടിക്കാഴ്ചയ്ക്ക് ശേഷം അമേരിക്കയുടെ യാത്രാ നിർദേശം പുതുക്കിയ കാര്യം സെർജിയോ ഗോർ വിദേശകാര്യ മന്ത്രിയെ അറിയിച്ചതായി മന്ത്രാലയം വ്യക്തമാക്കി.

സുരക്ഷാ സാഹചര്യം മെച്ചപ്പെട്ടതായി വിലയിരുത്തൽ

നിലവിലെ സാഹചര്യങ്ങൾ വിശദമായി വിലയിരുത്തിയ ശേഷമാണ് ബംഗ്ലാദേശ് യാത്രികർക്ക് കൂടുതൽ സുരക്ഷിതമായ രാജ്യമാണെന്ന് അമേരിക്കൻ സ്റ്റേറ്റ് ഡിപ്പാർട്ട്മെന്റ് വിലയിരുത്തിയതെന്ന് സെർജിയോ ഗോർ അറിയിച്ചു. അതേസമയം, രാജ്യത്തെ ചില പ്രദേശങ്ങളിൽ ഇപ്പോഴും പ്രത്യേക നിയന്ത്രണങ്ങൾ തുടരുമെന്നും അദ്ദേഹം വ്യക്തമാക്കി.

വിനോദസഞ്ചാരത്തിനും നിക്ഷേപത്തിനും നേട്ടമാകുമെന്ന് പ്രതീക്ഷ

യാത്രാ മുന്നറിയിപ്പ് ഇളവ് ചെയ്തത് ബംഗ്ലാദേശും അമേരിക്കയും തമ്മിലുള്ള ബന്ധത്തിലെ അനുകൂല മുന്നേറ്റമാണെന്ന് വിദേശകാര്യ മന്ത്രാലയം വിലയിരുത്തി. നിയമ-സമാധാന സാഹചര്യം ശക്തിപ്പെടുത്താനും വിദേശ സന്ദർശകർക്കായി കൂടുതൽ സുരക്ഷിതമായ അന്തരീക്ഷം ഒരുക്കാനുമുള്ള ബംഗ്ലാദേശിന്റെ ശ്രമങ്ങൾക്ക് ലഭിച്ച അംഗീകാരമാണ് ഈ തീരുമാനമെന്നും മന്ത്രാലയം പറഞ്ഞു.

പുതിയ യാത്രാ നിർദേശം പ്രാബല്യത്തിൽ വരുന്നതോടെ വിനോദസഞ്ചാരം, വ്യാപാരം, നിക്ഷേപം, ജനങ്ങൾ തമ്മിലുള്ള ആശയവിനിമയം തുടങ്ങിയ മേഖലകളിൽ ഇരു രാജ്യങ്ങളും തമ്മിലുള്ള സഹകരണം കൂടുതൽ ശക്തമാകുമെന്നാണ് ബംഗ്ലാദേശ് പ്രതീക്ഷിക്കുന്നത്.

ഹെലികോപ്റ്ററിൽ കയറുന്നവർ ഈ തെറ്റുകൾ ഒരിക്കലും ചെയ്യരുത്! നിർബന്ധമായും ആദ്യയാത്രികർ ശ്രദ്ധിക്കുക

Web Desk — Sun, 02 Aug 2026 07:32:13 +0530

പതിവ് യാത്രകൾക്ക് വിമാനം, ട്രെയിൻ, ബസ് തുടങ്ങിയ മാർഗങ്ങളെയാണ് ഭൂരിഭാഗം പേരും ആശ്രയിക്കുന്നത്. എന്നാൽ ചില പ്രത്യേക സാഹചര്യങ്ങളിൽ ഹെലികോപ്റ്റർ യാത്ര വേണ്ടിവരാം. വിനോദസഞ്ചാര കേന്ദ്രങ്ങളിലെ ഹെലികോപ്റ്റർ റൈഡുകൾ, ദുർഘട പ്രദേശങ്ങളിലേക്കുള്ള യാത്രകൾ, അടിയന്തര രക്ഷാപ്രവർത്തനങ്ങൾ, ചികിത്സാ ആവശ്യങ്ങൾ എന്നിവയ്ക്കായി പലർക്കും ചിലപ്പോൾ ജീവിതത്തിൽ ഒരിക്കലെങ്കിലും ഹെലികോപ്റ്ററിൽ കയറേണ്ട സാഹചര്യം ഉണ്ടാകാം. ആദ്യമായി ഹെലികോപ്റ്ററിൽ കയറുമ്പോൾ ആവേശത്തിനൊപ്പം ചില കാര്യങ്ങളിൽ ശ്രദ്ധയും ആവശ്യമാണ്. വിമാനത്തേക്കാൾ വ്യത്യസ്‍തമായ പ്രവർത്തന രീതിയുള്ളതിനാൽ സുരക്ഷാ നിർദേശങ്ങൾ കൃത്യമായി പാലിക്കുകയാണ് പ്രധാന കാര്യം.

ഹെലികോപ്റ്ററിന് അടുത്തേക്ക് പോകുമ്പോൾ ശ്രദ്ധിക്കണം

ഹെലികോപ്റ്റർ നിർത്തിയ ശേഷവും റോട്ടർ ബ്ലേഡുകളുടെ ചലനവും ശക്തമായ കാറ്റും അപകടസാധ്യത ഉണ്ടാക്കാം. അതിനാൽ പൈലറ്റിന്റെയും ഗ്രൗണ്ട് ക്രൂവിന്റെയും അനുമതിയില്ലാതെ ഹെലികോപ്റ്ററിന് സമീപിക്കരുത്. പിന്നിലൂടെ സമീപിക്കുന്നത് ഒഴിവാക്കണം. ജീവനക്കാർ നിർദേശിക്കുന്ന സുരക്ഷിത വഴിയിലൂടെ മാത്രമേ കയറാനും ഇറങ്ങാനും പാടുള്ളൂ.

വസ്‍തുക്കൾ സുരക്ഷിതമായി സൂക്ഷിക്കുക

തൊപ്പി, സ്‍കാർഫ്, പേപ്പർ തുടങ്ങിയവ ഹെലികോപ്റ്ററിന്റെ ശക്തമായ കാറ്റിൽ പറന്നുപോകാം. ഇവ മറ്റുള്ളവർക്ക് അപകടമാകാനും സാധ്യതയുണ്ട്. അതിനാൽ കൈയിലെ വസ്തുക്കൾ സുരക്ഷിതമായി സൂക്ഷിക്കുകയും ബാഗുകൾ ശരിയായി കൈകാര്യം ചെയ്യുകയും വേണം.

കയറുമ്പോഴും ഇറങ്ങുമ്പോഴും

ഹെലികോപ്റ്ററിലേക്ക് ഓടിക്കയറുകയോ പെട്ടെന്ന് ഇറങ്ങുകയോ ചെയ്യരുത്. തല താഴ്ത്തി, ക്രൂ കാണിച്ച വഴിയിലൂടെ മാത്രം നീങ്ങുക. പ്രത്യേകിച്ച് മലപ്രദേശങ്ങളിലോ തുറന്ന സ്ഥലങ്ങളിലോ ഇറങ്ങുമ്പോൾ കൂടുതൽ ജാഗ്രത വേണം.

യാത്രയ്ക്കിടെ പാലിക്കേണ്ടത്

സീറ്റ് ബെൽറ്റ് കൃത്യമായി ധരിക്കുക. യാത്ര തുടങ്ങുന്നതിന് മുമ്പ് നൽകുന്ന സുരക്ഷാ നിർദേശങ്ങൾ ശ്രദ്ധിക്കുക. ഫോട്ടോ എടുക്കാനോ വീഡിയോ പകർത്താനോ ശ്രമിക്കുമ്പോൾ ക്രൂവിന്റെ നിർദേശങ്ങൾ മറികടക്കരുത്.

ഹെലികോപ്റ്റർ യാത്ര പലർക്കും ജീവിതത്തിലെ അപൂർവവും ആവേശകരവുമായ അനുഭവമായിരിക്കും. എന്നാൽ ആ ആവേശത്തേക്കാൾ സുരക്ഷയ്ക്ക് മുൻഗണന നൽകിയാൽ, ആകാശത്തിലൂടെയുള്ള ആ യാത്ര കൂടുതൽ സുരക്ഷിതവും മനോഹരവും മറക്കാനാവാത്തതുമായ അനുഭവമായി മാറും.

ഇന്ത്യൻ പാസ്‌പോർട്ട് ഉടമകൾക്ക് പുതിയ തിരിച്ചടി; വിസ നിയമം കടുപ്പിച്ച് ഇറാൻ ഉൾപ്പെടെ നാല് രാജ്യങ്ങൾ

Prashob Mon — Mon, 03 Aug 2026 13:53:56 +0530

വിദേശയാത്രകൾ ആസൂത്രണം ചെയ്യുന്ന ഇന്ത്യൻ പാസ്‌പോർട്ട് ഉടമകൾക്ക് പ്രധാന മുന്നറിയിപ്പുമായി നാല് രാജ്യങ്ങൾ. 2026-ൽ ഇറാൻ, ബൊളീവിയ, കേപ് വെർഡെ, നിക്കരാഗ്വ എന്നീ രാജ്യങ്ങൾ ഇന്ത്യക്കാർക്കുള്ള പ്രവേശന ചട്ടങ്ങളിൽ മാറ്റം വരുത്തിയതോടെ, മുമ്പുണ്ടായിരുന്ന എളുപ്പത്തിലുള്ള യാത്രാ സൗകര്യങ്ങൾ ഇനി ലഭ്യമല്ല.

ഇറാനിൽ ഇനി വിസ രഹിത പ്രവേശനമില്ല

ഇന്ത്യൻ വിനോദസഞ്ചാരികൾക്ക് ഏറെ പ്രിയപ്പെട്ട രാജ്യങ്ങളിലൊന്നായ ഇറാൻ ഇന്ത്യക്കാർക്കുള്ള വിസ രഹിത പ്രവേശനം പിൻവലിച്ചു. പേർഷ്യൻ വാസ്‍തുവിദ്യയും സിൽക്ക് റൂട്ട് പൈതൃകവും കൊണ്ട് പ്രശസ്‍തമായ ഇറാനിലെ ടെഹ്റാൻ, ഇസ്‍ഫഹാൻ, ഷിറാസ്, യസ്‍ദ് തുടങ്ങിയ നഗരങ്ങളും പെർസെപൊളിസ്, നഖ്ഷെ ജഹാൻ സ്ക്വയർ തുടങ്ങിയ യുനെസ്‌കോ ലോക പൈതൃക കേന്ദ്രങ്ങളും ഇന്ത്യൻ സഞ്ചാരികളുടെ പ്രധാന ആകർഷണങ്ങളാണ്.

ബൊളീവിയയിലേക്ക് പോകാൻ മുൻകൂട്ടി വിസ വേണം

ബൊളീവിയയും യാത്രാ ചട്ടങ്ങൾ കർശനമാക്കിയിട്ടുണ്ട്. ഇനി ഇന്ത്യൻ പാസ്‌പോർട്ട് ഉടമകൾ യാത്രയ്ക്ക് മുമ്പ് വിസ നിർബന്ധമായും നേടണം. ലോകത്തിലെ ഏറ്റവും വലിയ ഉപ്പുപ്രദേശമായ സലാർ ഡി ഉയൂനി, ടിറ്റിക്കാക്ക തടാകം, ആൻഡീസ് പർവതനിരകൾ എന്നിവയാണ് ബൊളീവിയയുടെ പ്രധാന വിനോദസഞ്ചാര കേന്ദ്രങ്ങൾ.

കേപ് വെർഡെയിൽ വിസ ഓൺ അറൈവൽ നിർത്തലാക്കി

അറ്റ്ലാന്റിക് സമുദ്രത്തിലെ ദ്വീപ് രാഷ്ട്രമായ കേപ് വെർഡെ ഇന്ത്യ ഉൾപ്പെടെയുള്ള നിരവധി രാജ്യങ്ങളിലെ പൗരന്മാർക്കുള്ള വിസ ഓൺ അറൈവൽ സൗകര്യം അവസാനിപ്പിച്ചു. അതിനാൽ വിമാനത്താവളത്തിലെത്തി വിസ നേടാമെന്ന രീതിക്ക് പകരം യാത്രയ്ക്ക് മുമ്പ് ആവശ്യമായ അനുമതി ഉറപ്പാക്കണം.

നിക്കരാഗ്വയിലേക്കും മുൻകൂർ യാത്രാനുമതി

മധ്യ അമേരിക്കൻ രാജ്യമായ നിക്കരാഗ്വയും ഇന്ത്യക്കാർക്കുള്ള പ്രവേശന നടപടികൾ പുതുക്കിയിട്ടുണ്ട്. ഇനി യാത്രയ്ക്ക് മുമ്പ് ആവശ്യമായ യാത്രാനുമതി നേടിയിരിക്കണം. കോളനിവൽക്കരണ കാലഘട്ടത്തിലെ നഗരങ്ങൾ, അഗ്നിപർവതങ്ങൾ, പസഫിക് തീരങ്ങൾ എന്നിവയാണ് നിക്കരാഗ്വയുടെ പ്രധാന ആകർഷണങ്ങൾ.

ഇന്ത്യക്കാർ അറിയേണ്ടത്

ഏറ്റവും പുതിയ ഹെൻലി പാസ്‌പോർട്ട് സൂചിക പ്രകാരം ഇന്ത്യൻ പാസ്‌പോർട്ട് ഉടമകൾക്ക് ഇപ്പോഴും 55 രാജ്യങ്ങളിലേക്ക് വിസ രഹിതമായോ, വിസ ഓൺ അറൈവൽ വഴിയോ, ഇലക്ട്രോണിക് യാത്രാനുമതിയോടെയോ യാത്ര ചെയ്യാൻ സാധിക്കും. എന്നാൽ വിവിധ രാജ്യങ്ങളുടെ കുടിയേറ്റ നയങ്ങളിൽ ഇടയ്ക്കിടെ മാറ്റങ്ങൾ സംഭവിക്കുന്നതിനാൽ, യാത്ര ബുക്ക് ചെയ്യുന്നതിന് മുമ്പ് ഏറ്റവും പുതിയ വിസ നിബന്ധനകൾ പരിശോധിക്കുന്നത് അനിവാര്യമാണ്.

യാത്രയ്ക്ക് മുമ്പ് ശ്രദ്ധിക്കേണ്ട കാര്യങ്ങൾ

യാത്ര ആസൂത്രണം ചെയ്യുന്നതിന് മുമ്പ് അതത് രാജ്യത്തിന്റെ ഔദ്യോഗിക കുടിയേറ്റ വകുപ്പിന്റെയോ എംബസിയുടെയോ വെബ്‌സൈറ്റിൽ നിന്ന് വിസ ചട്ടങ്ങൾ പരിശോധിക്കണം. പാസ്‌പോർട്ടിന്റെ കാലാവധി ഉറപ്പാക്കുക, ഹോട്ടൽ ബുക്കിങ്, മടക്കയാത്രാ ടിക്കറ്റ്, യാത്രാ ഇൻഷുറൻസ് എന്നിവയുടെ ഡിജിറ്റൽ, പ്രിന്റ് പകർപ്പുകൾ കൈവശം സൂക്ഷിക്കുക, വിസ ആവശ്യമാണെങ്കിൽ ആഴ്ചകൾക്ക് മുമ്പേ അപേക്ഷ നൽകുക എന്നിവയും പ്രധാനമാണ്.

കുടിയേറ്റ ചട്ടങ്ങളിൽ മാറ്റം തുടരും

അടുത്തിടെ തായ്‌ലൻഡും ഇന്ത്യക്കാർക്കുള്ള പ്രവേശന ചട്ടങ്ങളിൽ മാറ്റം വരുത്തിയിരുന്നു. അതിനാൽ അന്താരാഷ്ട്ര യാത്രകൾ ആസൂത്രണം ചെയ്യുന്നവർ പുതിയ കുടിയേറ്റ നിബന്ധനകൾ മുൻകൂട്ടി പരിശോധിക്കുകയും യാത്രാ പദ്ധതികളിൽ ആവശ്യമായ സമയവും സാമ്പത്തിക തയ്യാറെടുപ്പും ഉറപ്പാക്കുകയും ചെയ്യണമെന്ന് വിദഗ്ധർ നിർദേശിക്കുന്നു.

ഒറ്റയ്ക്ക് യാത്ര ചെയ്ത സ്‍ത്രീക്ക് ഒമ്പത് ടിക്കറ്റുകൾ! പ്രിയദർശിനി ബസുകളിലെ വമ്പൻ തട്ടിപ്പ് കയ്യോടെ പിടിച്ചത് ഇങ്ങനെ

Prashob Mon — Mon, 27 Jul 2026 11:21:03 +0530

തിരുവനന്തപുരം: സംസ്ഥാന സർക്കാരിന്റെ പ്രിയദർശിനി വനിതാ സൗജന്യ യാത്രാ പദ്ധതിയിൽ ക്രമക്കേടുകൾ കണ്ടെത്തിയതിനെ തുടർന്ന് കെഎസ്ആർടിസി പരിശോധന ശക്തമാക്കി. വിജിലൻസ് പരിശോധനയിൽ ടിക്കറ്റുമായി ബന്ധപ്പെട്ട തട്ടിപ്പുകൾ കണ്ടെത്തിയതോടെയാണ് സാധാരണ സർവീസുകളിലും വ്യാപക പരിശോധന നടത്താൻ തീരുമാനിച്ചത്. ഇതുവരെ ഫാസ്റ്റ്, സൂപ്പർഫാസ്റ്റ് ബസുകളിലായിരുന്നു പ്രധാനമായും പരിശോധന നടന്നിരുന്നത്.

വിജിലൻസിന്റെ കണ്ടെത്തൽ നിർണായകം

പ്രിയദർശിനി പദ്ധതിയുടെ മറവിൽ ടിക്കറ്റ് വിതരണത്തിൽ കൃത്രിമം നടന്നതായി വിജിലൻസ് കണ്ടെത്തിയെന്നാണ് വിവരം. ക്ഷേമപദ്ധതിയുടെ വിശ്വാസ്യത തകർക്കുന്ന ഇത്തരം പ്രവർത്തനങ്ങൾക്കെതിരെ കർശന നടപടി സ്വീകരിക്കാൻ ഗതാഗത വകുപ്പ് നിർദേശം നൽകിയിട്ടുണ്ട്. ടിക്കറ്റ് കൃത്രിമം നടത്തിയതായി കണ്ടെത്തുന്ന ജീവനക്കാർക്കെതിരെ സർവീസിൽ നിന്ന് പിരിച്ചുവിടൽ ഉൾപ്പെടെയുള്ള അച്ചടക്ക നടപടികൾ സ്വീകരിക്കുമെന്ന് ഗതാഗത മന്ത്രി സി.പി. ജോൺ മുന്നറിയിപ്പ് നൽകി.

ഒറ്റയാത്രക്കാരിക്ക് ഒമ്പത് ഗ്രൂപ്പ് ടിക്കറ്റുകൾ

ഈ മാസം തിരുവനന്തപുരത്ത് നടത്തിയ പരിശോധനയ്ക്കിടെയാണ് ഗുരുതരമായ ഒരു ക്രമക്കേട് പുറത്തുവന്നത്. ഒറ്റയ്ക്ക് യാത്ര ചെയ്തിരുന്ന ഒരു വനിതയ്ക്ക് ഒരു കണ്ടക്ടർ ഒമ്പത് ഗ്രൂപ്പ് ടിക്കറ്റുകൾ നൽകിയെന്നാണ് കണ്ടെത്തൽ. യാത്രക്കാരുടെ എണ്ണം കൃത്രിമമായി വർധിപ്പിച്ച് രേഖകളിൽ തെറ്റായ വിവരങ്ങൾ ഉൾപ്പെടുത്താനുള്ള ശ്രമമാണിതെന്നാണ് പ്രാഥമിക അന്വേഷണത്തിലെ വിലയിരുത്തൽ. തുടർന്ന് നടത്തിയ പരിശോധനകളിലും സമാന രീതിയിലുള്ള ക്രമക്കേടുകൾ കണ്ടെത്തിയതായി റിപ്പോർട്ടുണ്ട്.

പുരുഷ യാത്രക്കാർക്കും സീറോ വാല്യു ടിക്കറ്റുകൾ

സ്ത്രീകൾക്കായി മാത്രം അനുവദിച്ചിരിക്കുന്ന സീറോ വാല്യു ടിക്കറ്റുകൾ പുരുഷ യാത്രക്കാർക്കും നൽകിയ സംഭവങ്ങളും വിജിലൻസ് കണ്ടെത്തി. പദ്ധതിപ്രകാരം അർഹരായ വനിതാ യാത്രക്കാർക്ക് നൽകുന്ന ഇത്തരം ടിക്കറ്റുകളുടെ തുക സർക്കാർ കെഎസ്ആർടിസിക്ക് തിരിച്ചുനൽകുന്നതാണ്. എന്നാൽ ചില കണ്ടക്ടർമാർ പുരുഷ യാത്രക്കാരിൽ നിന്ന് യാത്രാക്കൂലി വാങ്ങിയ ശേഷം സീറോ വാല്യു ടിക്കറ്റുകൾ നൽകിയതായും, പിന്നീട് സർക്കാർ റീഇംബഴ്‌സ് ചെയ്യുന്ന തുകയുടെ ആനുകൂല്യം അനധികൃതമായി നേടിയതായുമാണ് ആരോപണം.

സംസ്ഥാനത്തിന്‍റെ വിവിധ ഭാഗങ്ങളിൽ പരാതികൾ

തിരുവനന്തപുരം, എറണാകുളം ഉൾപ്പെടെ സംസ്ഥാനത്തിന്റെ വിവിധ ഭാഗങ്ങളിൽ സമാന പരാതികൾ റിപ്പോർട്ട് ചെയ്തിട്ടുണ്ട്. ആദ്യം തിരക്കുമൂലമുള്ള പിഴവുകളായി ചില സംഭവങ്ങളെ കണക്കാക്കിയിരുന്നെങ്കിലും, പല സ്ഥലങ്ങളിലും ആവർത്തിച്ച് സമാന ക്രമക്കേടുകൾ കണ്ടെത്തിയതോടെ മനപ്പൂർവമായ തട്ടിപ്പിനുള്ള സാധ്യതയാണ് അധികൃതർ പരിശോധിക്കുന്നത്.

മൂന്ന് കണ്ടക്ടർമാർക്ക് നോട്ടീസ്

പദ്ധതി ദുരുപയോഗം ചെയ്തെന്നാരോപിച്ച് മൂന്ന് കണ്ടക്ടർമാർക്ക് കെഎസ്ആർടിസി കാരണം കാണിക്കൽ നോട്ടീസ് നൽകിയിട്ടുണ്ട്. സമാന രീതിയിലുള്ള ക്രമക്കേടുകൾ മറ്റ് ഡിപ്പോകളിലും നടന്നിട്ടുണ്ടോയെന്നും ഇതുമൂലം കോർപ്പറേഷന് ഉണ്ടായ സാമ്പത്തിക നഷ്ടത്തിന്റെ വ്യാപ്തി എത്രയാണെന്നും വിജിലൻസ് അന്വേഷണം തുടരുകയാണ്.

വെല്ലുവിളി

കെഎസ്ആർടിസിയിലെ ഇൻസ്പെക്ടർമാരുടെ കുറവും പരിശോധനാ പ്രവർത്തനങ്ങളെ പ്രതികൂലമായി ബാധിക്കുന്നുണ്ട്. അനുവദിച്ച 789 തസ്തികകളിൽ നിലവിൽ 311 ഇൻസ്പെക്ടർമാർ മാത്രമാണ് സേവനത്തിലുള്ളത്. നിരവധി ഉദ്യോഗസ്ഥരെ മറ്റ് ഭരണപരമായ ചുമതലകൾക്ക് നിയോഗിച്ചതും പരിശോധനയുടെ കാര്യക്ഷമതയെ ബാധിച്ചിട്ടുണ്ട്. ദിവസേന ഏകദേശം 4,600 ബസുകൾ സർവീസ് നടത്തുന്ന സാഹചര്യത്തിൽ എല്ലാ സർവീസുകളിലും ഫലപ്രദമായ പരിശോധന നടത്തുക വെല്ലുവിളിയാണെന്ന് ഉദ്യോഗസ്ഥർ പറയുന്നു.

'പദ്ധതിയുടെ വിശ്വാസ്യത സംരക്ഷിക്കും'

അതേസമയം അർഹതയില്ലാത്തവർക്ക് സൗജന്യ ടിക്കറ്റുകൾ നൽകിയതായി കണ്ടെത്തുന്ന ജീവനക്കാർക്കെതിരെ കർശന നടപടി സ്വീകരിക്കുമെന്ന് ഗതാഗത മന്ത്രി സി.പി. ജോൺ, ആവർത്തിച്ചു. പ്രിയദർശിനി പദ്ധതിയിലൂടെ സർവീസ് നടത്തുന്ന ബസുകളിൽ വലിയ തിരക്കാണ് അനുഭവപ്പെടുന്നതെന്നും അതിനിടയിലും പദ്ധതിയുടെ വിശ്വാസ്യത സംരക്ഷിക്കാനും തട്ടിപ്പുകൾ തടയാനും പരിശോധനയും നിരീക്ഷണവും കൂടുതൽ ശക്തമാക്കുമെന്നും മന്ത്രി വ്യക്തമാക്കി.

അഫ്ഗാനിൽ താൻ അറസ്റ്റിലായെന്ന് വ്ലോഗര്‍ അരുണിമയുടെ ഇൻസ്റ്റ പോസ്റ്റ്, പിന്നാലെ സംഭവിച്ചത് വിശദീകരിച്ച് കുറിപ്പ്

Prabeesh PP — Tue, 15 Sep 2026 08:29:47 +0530

കാബൂൾ: ഒഫീഷ്യൽ ലെറ്ററില്ലാത്തതിന്റെ പേരിൽ താൻ അഫ്ഗാനിസ്ഥാനിൽ അറസ്റ്റിലായെന്ന മെസേജും ഇന്ത്യൻ എംബസിയുമായി ബന്ധപ്പെടാൻ സഹായിക്കണം എന്നാവശ്യപ്പെട്ടുമുള്ള ഇൻസ്റ്റാഗ്രാം പോസ്റ്റിന് പിന്നാലെ വിശദീകരണവുമായി വ്ലോഗർ അരുണിമ. താൻ നേരിട്ട ടെൻഷനും തുടർന്നുണ്ടായ സംഭവങ്ങളും വിശദീകരിച്ചുകൊണ്ടാണ് അരുണിമ ഫേസ്ബുക്ക് കുറിപ്പ് പങ്കുവെച്ചിരിക്കുന്നത്. വൈകുന്നേരം ലോറിയിൽ ലിഫ്റ്റടിച്ച് ബമ്മിയാനിൽ എത്തിയപ്പോൾ വിസയും പാസ്‌പോർട്ടും പരിശോധിച്ച നാട്ടുകാർ സുരക്ഷിതമായ സ്ഥലമെന്ന നിലയിൽ ഒരു ഹോട്ടലിൽ എത്തിക്കുകയായിരുന്നു. എന്നാൽ വലിയ തുക ചോദിച്ചതിനാൽ ടെന്റ് അടിക്കാൻ സ്ഥലം ചോദിക്കുകയും, അവർ നൽകിയ മുറിയിൽ കിടക്കാൻ തീരുമാനിക്കുകയുമായിരുന്നു. തുടര്‍ന്ന് ചാർജ് ചെയ്യാനായി ഹാളിൽ പോയപ്പോൾ വന്ന ആളുകൾ ഗൂഗിൾ ട്രാൻസ്ലേറ്ററിലൂടെ സംസാരിച്ച് പെർമിറ്റ് ചോദിക്കുകയായിരുന്നു. രാജ്യത്തെ നിയമപ്രകാരം ഒരു സ്ത്രീക്ക് ഒറ്റയ്ക്ക് യാത്ര ചെയ്യാൻ സാധിക്കില്ല. ജലാലാബാദിൽ നിന്ന് പെർമിറ്റ് ചോദിച്ചെങ്കിലും പുരുഷനോ ഗൈഡോ കൂടെയില്ലാത്തതിനാൽ പെർമിറ്റ് ലഭിച്ചിരുന്നില്ല.

ഇതിനിടെ കാബൂളിലേക്ക് പോകാൻ ആവശ്യപ്പെട്ടെങ്കിലും ജർമ്മനിയിലുള്ള സുഹൃത്ത് വരാനുണ്ടെന്ന് കള്ളം പറഞ്ഞ് യാത്ര തുടർന്നു. എന്നാൽ ആഗസ്റ്റ് 27-ന് രാജ്യത്ത് എത്തിയ അരുണിമ ഇത്രയും ദിവസം ഒറ്റയ്ക്ക് യാത്ര ചെയ്തത് നിയമലംഘനമാണെന്നും അതിനാൽ അറസ്റ്റ് ചെയ്യുമെന്നും അവർ അറിയിച്ചു. വിദേശത്തുള്ള ബോയ്ഫ്രണ്ടിനെ വിവരം അറിയിച്ച അരുണിമ തന്നെയെത്തിച്ച വ്യക്തിയുടെ സഹായത്തോടെ സംസാരിച്ച് ഒത്തുതീർപ്പാക്കുകയായിരുന്നു. ഇവിടെനിന്ന് അടുത്ത രാജ്യത്തേക്ക് പൊയ്ക്കോളാൻ അവർ പറഞ്ഞതായും, പെർമിറ്റ് ഇല്ലാതെ തന്നെ ഉസ്ബകിസ്ഥാൻ ബോർഡറിലേക്ക് നാളെ പോകുമെന്നും അരുണിമ വ്യക്തമാക്കി. ഭയം കാരണമാണ് രക്ഷിക്കാൻ ആരെങ്കിലും വരുമെന്നോർത്ത് ഇൻസ്റ്റഗ്രാമിൽ സ്റ്റോറി ഇട്ടതെന്നും നിലവിൽ പാനിക് ആയതിനാൽ ആർക്കും റിപ്ലൈ നൽകാൻ സാധിക്കുന്നില്ലെന്നും അരുണിമ കുറിച്ചു.

ഫേസ്ബുക്ക് കുറിപ്പ് ഇങ്ങനെ,

കുറച്ചു മണിക്കൂറുകൾ ടെൻഷനടിച്ച് മരിച്ചില്ല എന്നേയുള്ളൂ..‼️

വൈകുന്നേരം ഒരു ലോറിയിൽ ലിഫ്റ്റ് അടിച്ച് ബമ്മിയാൻ എന്ന സ്ഥലത്തേക്ക് വന്നു. ഇവിടെയെത്തിയപ്പോഴേക്കും സമയം 7 മണി ആയിട്ടുണ്ടായി ഇരുട്ടായിരുന്നു. വണ്ടിയിൽ നിന്നും ഇറങ്ങിയപ്പോൾ തന്നെ ഇവിടെയുള്ള ആളുകൾ എൻറെ അടുത്തേക്ക് ഓടിക്കൂടി കാരണം രാത്രിയിൽ ഒരു സ്ത്രീ ഒറ്റയ്ക്ക് ഈ രാജ്യത്ത് പുറത്തു പോവില്ല. അങ്ങനെ എന്നോട് വിസയും പാസ്പോർട്ടും എല്ലാം ചോദിച്ചു എന്നിട്ട് അതെല്ലാം കാണിച്ചു കൊടുത്തു. എവിടെ താമസിക്കുന്നതെന്ന് ചോദിച്ചപ്പോൾ തീരുമാനിച്ചിട്ടില്ല ഇപ്പോൾ എവിടെയെങ്കിലും ഒരു സേഫ് ആയ സ്ഥലം ഞാൻ കണ്ടു പിടിച്ച താമസിക്കും എന്ന് പറഞ്ഞു. അവർ എൻറെ ഇഷ്ടത്തിന് ഒറ്റക്ക് എന്നെ വിടില്ല. അങ്ങനെ കുറച്ചുസമയം അവിടെ കാത്തുനിന്നു ഇംഗ്ലീഷിൽ സംസാരിക്കുന്ന ഒരാൾ വന്നു അയാൾ എന്നോട് കാറിൽ കയറാൻ പറഞ്ഞു. കാറിൽ കയറി ഒരു ഹോട്ടലിലേക്കാണ് പോയത് അവിടെ എത്തിയപ്പോൾ ഒരുപാട് പൈസയാണ് ഒരു രാത്രി താമസിക്കാൻ അവർ ചോദിക്കുന്നത് അതിനാൽ ഞാൻ അവരോട് പറഞ്ഞു എൻറെ കയ്യിൽ tent ഉണ്ട് ഇവിടെ എവിടെയെങ്കിലും എനിക്ക് കുറച്ച് സ്ഥലം തന്നാൽ മതിയെന്ന്..ഇവിടെ തണുപ്പുള്ള സ്ഥലമാണ് ഇത്രയും ദിവസം അധികഠിനമായ ചൂടിലൂടെയാണ് ഞാൻ യാത്ര ചെയ്തിരുന്നത്...

ഇവിടെ ടെൻ അടിക്കാൻ പറ്റില്ല, അടിക്കാനുള്ള വേറെ സ്ഥലം കാണിച്ചു തരാമെന്ന് പറഞ്ഞ് ആ വ്യക്തി എന്നെ വീണ്ടും കാറിൽ കയറ്റി വേറൊരു സ്ഥലത്തേക്ക് കൊണ്ടുവന്നു. ഇവിടെ എത്തിയപ്പോൾ എനിക്ക് tent അടിക്കാനുള്ള ഒരു സ്ഥലം കാണിച്ചു തന്നു. Tent അടിക്കാൻ തുടങ്ങിയപ്പോൾ എന്നോട് പറഞ്ഞു നല്ല തണുപ്പ് ആയിരിക്കും രാത്രി കിടന്നുറങ്ങാൻ ബുദ്ധിമുട്ടാകും ഇവിടെ ഒരു ഒഴിവ് റൂം ഉണ്ട് അവിടെ കിടന്നോളൂ.. അങ്ങനെ ഞാൻ അവിടെ കിടക്കാൻ തീരുമാനിച്ചു.. ചാർജ് ചെയ്യാനായി അവിടെയുള്ള ഹാളിൽ പോയപ്പോൾ പുറത്തൊന്നും രണ്ട് ആൾക്കാർ വന്നു.. എന്നോട് ആദ്യം എവിടെ നിന്നാണ് വരുന്നത് എന്നെല്ലാം ചോദിച്ചു ഇതെല്ലാം ട്രാൻസിലേറ്റിൽ ആണ് ചോദിക്കുന്നത് ഗൂഗിൾ ട്രാൻസിലേറ്റ് ഫോണിലൂടെ.. പിന്നീട് എന്നോട് പെർമിറ്റ് കാണിക്കാൻ പറഞ്ഞു. ഞാനെൻറെ പാസ്പോർട്ടും വിസയും കാണിച്ചുകൊടുത്തു.. ഈ രാജ്യത്തിൻറെ നിയമം അനുസരിച്ച് ഒരു സ്ത്രീക്ക് ഒറ്റയ്ക്ക് യാത്ര ചെയ്യാൻ സാധിക്കില്ല അത് ഈ രാജ്യത്ത് സ്ത്രീ ആണെങ്കിലും പുറത്തുനിന്ന സ്ത്രീയാണെങ്കിലും ഒരേപോലെ നിയമം...

കഴിഞ്ഞദിവസം jalalabad എന്ന സ്ഥലത്തുനിന്ന് പെർമിറ്റ് എടുക്കാനായി ഞാൻ പോയതാണ്, അപ്പോൾ അവർ എനിക്ക് പെർമിറ്റ് തന്നില്ല. കാരണം ഒരു സ്ത്രീ ഒറ്റയ്ക്ക് യാത്ര ചെയ്യാൻ പറ്റില്ല... ഞാൻ അവരോട് ഒരുപാട് ചോദിച്ചു പെർമിറ്റ് തരാനായി അവർ പറഞ്ഞു ഒരു പുരുഷനില്ലാതെ തരാൻ പറ്റില്ല അല്ലെങ്കിൽ കൂടെ ഒരു ഗൈഡിനെ കൊണ്ടുപോകണം എൻറെ യാത്രയിൽ അതിനും എനിക്ക് സാധിക്കില്ല.കൂടെ യാത്ര ചെയ്യാനും ആരുമില്ല.. എല്ലാ രാജ്യവും ഞാൻ ഒറ്റയ്ക്കാണ് യാത്ര ചെയ്യാറുള്ളത്. അങ്ങനെയാണ് ഇവിടെയും എത്തിയത് എന്നാൽ ഈ രാജ്യത്തിൻറെ നിയമം വളരെ കർശനമാണ്... അവർ എന്നോട് തിരിച്ചു കാബൂളിലേക്ക് പോകാനാണ് ആവശ്യപ്പെട്ടത്. അങ്ങനെ രണ്ടു ദിവസം കാബൂളിൽ നിന്ന് ശേഷം. ഇന്ന് രാവിലെ യാത്ര തുടങ്ങിയത് വരുന്ന വഴിയിൽ ഒരുപാട് ചെക്ക് പോസ്റ്റുകൾ ഉണ്ട് അവിടെയെല്ലാം എന്നെ തടഞ്ഞു വച്ചിരുന്നു. അപ്പോൾ ഞാൻ അവരുടെ കള്ളം പറഞ്ഞു ജർമ്മനിയിൽ നിന്നും ഒരു സുഹൃത്ത് കൂടെയുണ്ട് അദ്ദേഹം ഇപ്പോൾ വേറെ പ്രൊവൈൻസിൽ പോയിരിക്കുകയാണ് കുറച്ചു മണിക്കൂറുകൾ കഴിയുമ്പോൾ എൻറെ അടുത്തേക്ക് വരുമെന്ന്.. അല്ലാതെ ഇവരെന്നെ യാത്ര ചെയ്യാൻ സമ്മതിക്കില്ല...

അങ്ങനെ ഇവിടെ അവരുമായി ട്രാൻസ്ലേറ്റിൽ സംസാരിക്കുകയായിരുന്നു.. ഇവിടെ എനിക്ക് കള്ളം പറയാൻ സാധിക്കില്ല, കാരണം ഞാൻ രാത്രിയിൽ ഒറ്റയ്ക്കാണല്ലോ... എൻറെ വിസ കണ്ടപ്പോൾ അവർക്ക് മനസ്സിലായി ഞാൻ കഴിഞ്ഞ മാസം 27ന് ഈ രാജ്യത്ത് കയറിയതാണ്... ഇത്രയും ദിവസവും ഞാൻ ഒറ്റയ്ക്കാണ് യാത്ര ചെയ്തത്... അവരുടെ നിയമപ്രകാരം ഞാൻ നിയമലംഘനമാണ് നടത്തിയത്.. അതിനായി എന്നെ അറസ്റ്റ് ചെയ്യാൻ പോവുകയാണ് ഇപ്പോൾ എന്ന് പറഞ്ഞു... ഈ രാജ്യത്ത് ഓരോ താലിബാനും പോലീസുകാരെ പോലെയാണ്.. അവർക്ക് ഇഷ്ടമുള്ളത് ചെയ്യാം.. ഞാന് ഇത് എത്രയും വേഗം എൻറെ ബോയ്ഫ്രണ്ടിനെ അറിയിച്ചു... എൻറെ കൈകാലുകൾ വിറച്ചു തുടങ്ങി.. എന്തുചെയ്യണമെന്ന് എനിക്കറിയില്ലായിരുന്നു... അതേസമയം ഞാൻ ഗൂഗിൾ ട്രാൻസിലേറ്റ് ഫോൺ ഉപയോഗിച്ച് അവരോട് സംസാരിക്കുന്നു... എന്നെ ഡി പോർട്ട് ചെയ്തോളാൻ പറഞ്ഞു... അവർ പറഞ്ഞു ഞാൻ നിയമലംഘനം നടത്തി.. അതുകൊണ്ട് അവർ അറസ്റ്റ് ചെയ്യും എന്നു പറഞ്ഞു... ഞാൻ ചെയ്ത കുറ്റം എന്തെന്ന് വെച്ചാൽ ഒറ്റയ്ക്ക് ഒരു സ്ത്രീക്ക് യാത്ര ചെയ്യാൻ പറ്റാത്ത രാജ്യത്ത് അത് അനുസരിക്കാതെ ഒറ്റയ്ക്ക് യാത്ര ചെയ്തു...ഓരോ പ്രൊവിൻസിലേക്കും പെർമിറ്റ് എടുക്കണം ആ പെർമിറ്റ് എടുത്തില്ല കാരണം ഒറ്റയ്ക്ക് ഒരു സ്ത്രീയ്ക്ക് ഇവർ ലഭിക്കില്ല... എന്നെ ഇവിടെ കൊണ്ടുവന്നു ആക്കിയ വ്യക്തി തിരികെ പോയിരുന്നു...എൻറെ നമ്പർ വാങ്ങിയിട്ടുണ്ടായിരുന്നു... അദ്ദേഹത്തെ ഞാൻ പെട്ടെന്ന് വിവരം അറിയിച്ചു.

അയാൾ പറഞ്ഞു കുറച്ച് അകലെയാണ് പെട്ടെന്ന് തന്നെ വരാം എന്നു പറഞ്ഞു... അങ്ങനെ ആ വ്യക്തി അവരോട് സംസാരിച്ചു ഞാനിപ്പോൾ വരാം അതുവരെ ഒന്ന് വെയിറ്റ് ചെയ്യാൻ പറഞ്ഞു... അദ്ദേഹം വരുന്നതുവരെ എൻറെ ഹൃദയം ഇടുപ്പ് കൂടി,ഞാൻ ആകെ സ്തംഭിച്ചിരിക്കുക ആയിരുന്നു. ഇവർ ഞാൻ എന്തു പറഞ്ഞാലും തിരിച്ച് എന്നോട് ഞാൻ നിയമലംഘിച്ചു എന്ന് തന്നെ പറഞ്ഞു കൊണ്ടിരിക്കുകയായിരുന്നു... കുറച്ചുസമയങ്ങൾക്കുള്ളിൽ അദ്ദേഹം വന്നു അങ്ങനെ ഞാൻ കാര്യങ്ങൾ സംസാരിച്ചു..ആ വ്യക്തിക്ക് ഇംഗ്ലീഷ് അറിയാം... ഞാൻ അയാളുടെ കാലുപിടിച്ചു പറഞ്ഞു എൻറെ അവസ്ഥ ഒന്നു മനസ്സിലാക്കണമെന്ന്.. അങ്ങനെ അദ്ദേഹം എനിക്കുവേണ്ടി ഇവരോട് സംസാരിച്ചു.. അവർ അതിനു വഴങ്ങിയില്ല... ഇപ്പോൾ തന്നെ പെർമിറ്റ് എടുക്കണം അതിനായി ഒരു ഗൈഡിനെ കൂടെ വയ്ക്കണം ഇവിടത്തെ 10000 പൈസയും പറഞ്ഞു. പെർമിറ്റ് എടുക്കാൻ മാത്രമുള്ള പൈസ ഗൈഡിനായി വേറെ പൈസയും ഞാൻ കൊടുക്കണം.ഞാൻ പറഞ്ഞു ഈ രാജ്യത്ത് നിന്നും എക്സിറ്റ് ചെയ്ത് ഉസ്ബകിസ്താനിലേക്ക് പോവുകയാണ് ഞാൻ... ഇത്രയും ദിവസം നിയമം ലംഘിച്ച് താമസിച്ചതിനാൽ പൈസ അടയ്ക്കണം എന്നാലേ എങ്ങോട്ടും പോകാൻ സാധിക്കുകയുള്ളൂ എന്ന് പറഞ്ഞു. അങ്ങനെ ഞാൻ അവരുമായി സംസാരിച്ചു ഒത്തുതീർപ്പാക്കി... എന്നോട് പെർമിറ്റ് ഇല്ലാതെ തന്നെ അടുത്ത രാജ്യത്തേക്ക് പൊയ്ക്കോളാൻ പറഞ്ഞു... ഇവരുടെ തീരുമാനങ്ങളാണ് ഇവരുടെ നിയമം...

പോലീസ് ജയിലോ ഒന്നുമല്ല.... ഇവിടത്തെ താലിബാൻ അത് ഓരോ മനുഷ്യരും താലിബാനാണ്... എന്നുവച്ചാൽ എല്ലാരും താലിബാൻ ആണെന്നല്ല.. ഒരുപാട് ആളുകൾ ഉണ്ട് അവരാണ് തീരുമാനിക്കുന്നത് ഞാൻ അയാളുടെ കയ്യും കാലും പിടിച്ചാണ് എന്നെ അറസ്റ്റ് ചെയ്യാതിരുന്നത്... കുറച്ചു മണിക്കൂറുകൾ ഞാൻ തീ തിന്നു. എനിക്ക് എന്തു ചെയ്യണം എന്ന് അറിയാതെ ടെൻഷൻ അടിച്ചു മരിക്കാറായി.... എനിക്ക് എന്തോ സംഭവിക്കാൻ പോവുകയാണെന്ന് എനിക്ക് തോന്നി... അതുകൊണ്ടാണ് എന്നെ രക്ഷിക്കാൻ ആരെങ്കിലും വരുമെന്ന് ഓർത്ത് ഇൻസ്റ്റഗ്രാമിൽ സ്റ്റോറി ഇട്ടത്...ഒരു പെണ്ണായതുകൊണ്ട് മാത്രമാണ് എനിക്ക് ഇതൊക്കെ അനുഭവിക്കേണ്ടിവന്നത്... എൻറെ ഒരുപാട് ആൺ സുഹൃത്തുക്കൾ ഈ രാജ്യത്ത് യാത്ര ചെയ്തു പോയിട്ടുണ്ട്... അവർക്ക് ആർക്കും ഒരു കുഴപ്പവും ഉണ്ടായിട്ടില്ല പെൺ സുഹൃത്തുക്കളും യാത്ര ചെയ്തിട്ടുണ്ട് എന്നാൽ അവരെല്ലാം ഒരു ഗൈഡിനെ വച്ചാണ് യാത്ര ചെയ്തിരുന്നത്, അല്ലെങ്കിൽ ഒരു പുരുഷൻറെ ഒപ്പം... നാളെ ഇവിടെ നിന്നും ഉസ്ബകിസ്ഥാൻ ബോർഡറിലേക്ക് പോവുകയാണ്..ഏകദേശം 500 കിലോമീറ്റർ ഉണ്ട് ഇനിയും ഇടയ്ക്കുവെച്ച് ചെക്ക് പോസ്റ്റുകൾ ഉണ്ടാകും,എന്നെ ചെക്ക് ചെയ്യുമ്പോൾ അവിടെ കള്ളം പറഞ്ഞ് രക്ഷപ്പെടേണ്ടി വരും...ബോർഡർ എത്തുന്ന വരെ ശ്വാസം അടക്കിപ്പിടിച്ച് ആയിരിക്കും ഞാൻ യാത്ര ചെയ്യുന്നത്... മണിക്കൂറുകളോളം ഞാൻ ഇല്ലാതെയായി... ഞാനിപ്പോൾ ഫോൺ നോക്കിയപ്പോൾ ഒരുപാട് കോളും മെസ്സേജ് എല്ലാം കണ്ടു എനിക്ക് തീരെ വയ്യാതിരിക്കുകയാണ്... ടെൻഷൻ അടിച്ചു panic ആയതുകൊണ്ട് ഇപ്പോഴും ശരീരമാകെ വിറയൽ പോലെയാണ്... മാറിയിട്ടില്ല... അതുകൊണ്ട് ആർക്കും റിപ്ലൈ തരാൻ സാധിക്കുന്നില്ല. എല്ലാവർക്കും നന്ദി സ്നേഹം മാത്രം എൻറെ യാത്രകൾ തുടരും

33 വർഷം, 233 രാജ്യങ്ങൾ; ലോകം ചുറ്റാൻ ചൈനീസ് വ്യവസായി ചെലവഴിച്ചത് 14 കോടി, ഇനി സ്വസ്ഥം ഗൃഹഭരണം!

Web Desk — Thu, 10 Sep 2026 13:55:21 +0530

ലോകം ചുറ്റിക്കാണുകയെന്നത് വെറുമൊരു അവധിക്കാല സ്വപ്നമായി മാറ്റിവെക്കാതെ, 33 വർഷം കൊണ്ട് 233 രാജ്യങ്ങളും ഭരണപ്രദേശങ്ങളും സന്ദർശിച്ച് ചൈനീസ് വ്യവസായി. കിഴക്കൻ ചൈനയിലെ ഷെജിയാങ് പ്രവിശ്യയിലെ ജുജി സ്വദേശിയായ ചെൻ ജിൻവെയ് (53) ആണ് പെറുവിലേക്കുള്ള യാത്രയോടെ തന്‍റെ ദീർഘകാല സ്വപ്നം പൂർത്തിയാക്കി സ്വന്തം നാട്ടിൽ തിരിച്ചെത്തിയത്.

ചെലവഴിച്ചത് 14 കോടിയിലധികം

മെഷിനറി കമ്പനി ഉടമയായ ചെൻ തന്‍റെ സ്വപ്നയാത്രകൾക്കായി ഏകദേശം 14 കോടിയിലധികം ഇന്ത്യൻ രൂപയാണ് ചെലവഴിച്ചത്. എന്നാൽ ബിസിനസും കുടുംബവും ഉപേക്ഷിച്ചായിരുന്നില്ല ഈ യാത്രകൾ. ഒരു മാസം ബിസിനസും കുടുംബ കാര്യങ്ങളും നോക്കിനടത്തുകയും, തൊട്ടടുത്ത മാസം വിദേശയാത്രയ്ക്കായി തിരിക്കുകയും ചെയ്യുന്ന രീതിയാണ് അദ്ദേഹം വർഷങ്ങളായി പിന്തുടർന്നത്.

തുടക്കം 1993 -ൽ

1993 -ൽ സിംഗപ്പൂർ, മലേഷ്യ, തായ്‌ലൻഡ് എന്നിവിടങ്ങളിലേക്ക് നടത്തിയ യാത്രയോടെയാണ് ചെൻ ജിൻവെയ്യുടെ യാത്രകളുടെ തുടക്കം. ഇന്‍റർനെറ്റ് പ്രചാരത്തിലാകുന്നതിന് മുൻപുള്ള ആ കാലത്ത്, പുസ്തകങ്ങളിലൂടെ മാത്രം ലോകത്തെ അറിയുന്നതിന് പകരം നേരിട്ട് കണ്ടനുഭവിക്കാനാണ് ചെൻ ആഗ്രഹിച്ചിരുന്നത്.

യാത്രയുടെ തുടക്കത്തിൽ തന്നെ അന്‍റാർട്ടിക്ക, ആർട്ടിക് തുടങ്ങിയ കഠിനമായ യാത്രാലക്ഷ്യങ്ങൾ അദ്ദേഹം തെരഞ്ഞെടുത്തു. 2015 -ൽ അന്‍റാർട്ടിക്കയിലേക്കുള്ള ആദ്യ ശ്രമത്തിനിടെ കപ്പലിന് സാങ്കേതിക തകരാർ സംഭവിച്ച് യാത്ര ഉപേക്ഷിക്കേണ്ടി വന്നെങ്കിലും, 2016 ജനുവരിയിൽ അദ്ദേഹം ലക്ഷ്യം കണ്ടു. ന്യൂസിലാൻഡിന്‍റെ കീഴിലുള്ള വിദൂര ദ്വീപായ ടോക്കെലാവുവിൽ എത്താനും അദ്ദേഹത്തിന് വർഷങ്ങളുടെ കാത്തിരിപ്പ് വേണ്ടിവന്നു.

യാത്രകൾക്കിടയിൽ ആഫ്രിക്കയിൽ വെച്ച് മലമ്പനി ബാധിക്കുകയും ഗ്രീസിൽ വെച്ച് ഭൂകമ്പത്തെ നേരിടേണ്ടി വന്നു. ഇത്തരം പ്രതിസന്ധികളാണ്, കാര്യങ്ങൾ കൈവിട്ടുപോകുമ്പോൾ ശാന്തനായിരിക്കാൻ തന്നെ പഠിപ്പിച്ചതെന്ന് ചെൻ വ്യക്തമാക്കുന്നു.

സംസ്കാരങ്ങളെ അറിഞ്ഞുള്ള യാത്ര

വെറുതെ സ്ഥലങ്ങൾ കണ്ടുമടങ്ങുന്നതിന് പകരം, സന്ദർശിക്കുന്ന ഇടങ്ങളിലെ പ്രാദേശിക സംസ്കാരങ്ങൾ പഠിക്കാനാണ് അദ്ദേഹം സമയം കണ്ടെത്തിയത്. യാത്രകൾക്കിടയിൽ 198 രാജ്യങ്ങളിലെ കറൻസികൾ ശേഖരിച്ച ചെൻ, അവ പിന്നീട് പ്രശസ്ത ചൈനീസ് പര്യവേക്ഷകനായ ഷു സിയാകെയുടെ ഓർമ്മ നിലനിർത്തുന്ന 'ഷു സിയാകെ മെമ്മോറിയൽ ഹാളിന്' സംഭാവന നൽകി.

"തടസ്സങ്ങളോ സന്തോഷങ്ങളോ സങ്കടങ്ങളോ എന്തുതന്നെയായാലും ചെയ്യുന്ന കാര്യങ്ങളിൽ ഉറച്ചുനിൽക്കുക. സമയം ആർക്കും വേണ്ടി കാത്തുനിൽക്കില്ല, അതിനാൽ യാത്ര ചെയ്യാൻ ആഗ്രഹിക്കുന്നവർ കാത്തിരിക്കരുത്," എന്നാണ് ലോകം ചുറ്റാൻ ആഗ്രഹിക്കുന്നവരോട് ചെന്നിന് പറയാനുള്ളത്.

ലോകത്ത് ഔദ്യോഗികമായി അംഗീകരിക്കപ്പെട്ട 195 രാജ്യങ്ങളാണുള്ളതെങ്കിലും, ആശ്രിത പ്രദേശങ്ങളും പ്രത്യേക ഭരണമേഖലകളും ഉൾപ്പെടുത്തിയാണ് ഈ എണ്ണം 233 ആയി കണക്കാക്കുന്നത്. ചൈനയിൽ ഇതുവരെ എഴുപതോളം പേർ ഇത്തരത്തിൽ 233 പ്രദേശങ്ങളും സന്ദർശിച്ചിട്ടുണ്ടെന്ന് റിപ്പോർട്ടുകൾ പറയുന്നു. ഇനി കുടുംബത്തോടൊപ്പം കൂടുതൽ സമയം ചെലവഴിക്കാനാണ് ചെൻ ജിൻവെയ് ലക്ഷ്യമിടുന്നത്.

സീറ്റ് ബെൽറ്റ് ധരിക്കില്ലെന്ന് വാശി, സീറ്റിൽ എഴുന്നേറ്റുനിന്ന് കുട്ടി ; ഒടുവിൽ വിമാനം തന്നെ റദ്ദാക്കി, യാത്രക്കാർ കുടുങ്ങി

Prashobh Prasannan — Sun, 09 Aug 2026 07:38:06 +0530

സീറ്റ് ബെൽറ്റ് ധരിക്കാൻ വിസമ്മതിച്ച് സീറ്റിൽ നിന്ന് എഴുന്നേറ്റ് നിന്ന കുട്ടിയെ സുരക്ഷിതമായി ഇരുത്താൻ കഴിയാതെ വന്നതോടെ കാനഡയിൽ വിമാനം റദ്ദാക്കി. വിക്ടോറിയയിൽ നിന്ന് ടൊറന്റോയിലേക്ക് പുറപ്പെടേണ്ട പോർട്ടർ എയർലൈൻസ് വിമാനമാണ് റദ്ദാക്കിയത്. സംഭവത്തെ തുടർന്ന് വിമാനത്തിലെ യാത്രക്കാർക്ക് രാത്രി മുഴുവൻ വിക്ടോറിയയിൽ കഴിയേണ്ടിവന്നു.

റൺവേയിലേക്ക് നീങ്ങുന്നതിനിടെ കുട്ടി എഴുന്നേറ്റു

വ്യാഴാഴ്ച (ഓഗസ്റ്റ് 6) വിക്ടോറിയ ഇന്റർനാഷണൽ എയർപോർട്ടിൽ നിന്ന് പുറപ്പെട്ട PD444 വിമാനം റൺവേയിലേക്ക് നീങ്ങുന്നതിനിടെയാണ് കുട്ടി സീറ്റിൽ എഴുന്നേറ്റ് നിൽക്കുന്നതായി ജീവനക്കാരുടെ ശ്രദ്ധയിൽപ്പെട്ടത്. കുട്ടിയോട് സീറ്റ് ബെൽറ്റ് ധരിക്കാൻ ആവശ്യപ്പെട്ടെങ്കിലും കുട്ടി തയ്യാറായില്ല. മാതാപിതാക്കളും ക്യാബിൻ ജീവനക്കാരും ചേർന്ന് കുട്ടിയെ സീറ്റിലിരുത്തി ബെൽറ്റ് ധരിപ്പിക്കാൻ ശ്രമിച്ചെങ്കിലും വിജയിച്ചില്ല.

സുരക്ഷാ പ്രശ്‍നം; വിമാനം ടെർമിനലിലേക്ക് തിരിച്ചെത്തിച്ചു

സീറ്റ് ബെൽറ്റ് ധരിക്കാതെ കുട്ടി നിൽക്കുന്ന സാഹചര്യത്തിൽ വിമാനം പറത്തുന്നത് സുരക്ഷിതമല്ലെന്ന് ജീവനക്കാർ വിലയിരുത്തി. തുടർന്ന് വിമാനം ടെർമിനലിലേക്ക് തിരിച്ചെത്തിക്കുകയും കുട്ടിയെയും മാതാപിതാവിനെയും വിമാനത്തിൽ നിന്ന് ഇറക്കുകയും ചെയ്തു. “ഒരു ചെറിയ കുട്ടി സീറ്റിൽ എഴുന്നേറ്റ് നിൽക്കുകയും സീറ്റ് ബെൽറ്റ് സുരക്ഷിതമായി ധരിക്കാൻ വിസമ്മതിക്കുകയും ചെയ്തു. ഈ സുരക്ഷിതമല്ലാത്ത സാഹചര്യത്തിൽ വിമാനം ടേക്ക് ഓഫ് ചെയ്യാൻ കഴിയില്ലായിരുന്നു,” പോർട്ടർ എയർലൈൻസ് അറിയിച്ചു.

റൺവേ അടച്ചതോടെ യാത്ര മുടങ്ങി

കുട്ടിയെയും മാതാപിതാവിനെയും ലഗേജുകളടക്കം വിമാനത്തിൽ നിന്ന് ഇറക്കുന്നതിനും ആവശ്യമായ രേഖകളും പുതിയ ഫ്ലൈറ്റ് പ്ലാനുകളും തയ്യാറാക്കുന്നതിനും സമയം എടുത്തു. ഇതിനിടെ സമയം രാത്രി 12.30 കഴിഞ്ഞു. ഇതോടെ വിക്ടോറിയ വിമാനത്താവളത്തിലെ റൺവേ രാത്രിയിലേക്ക് അടച്ചു. ഫലമായി വിമാനം അന്നത്തെ ദിവസം യാത്ര തുടരാൻ കഴിയാതെ വന്നു. യാത്രക്കാരെ അടുത്ത ദിവസം പുതിയ വിമാനത്തിൽ ടൊറന്റോയിലേക്ക് അയക്കുകയായിരുന്നു. സംഭവത്തിൽ മറ്റ് യാത്രക്കാർക്കുണ്ടായ ബുദ്ധിമുട്ടിൽ പോർട്ടർ എയർലൈൻസ് ഖേദം പ്രകടിപ്പിച്ചു.

കൊച്ചിയിലേക്കുള്ള വിമാനത്തിൽ എമർജൻസി വാതിൽ തുറക്കാൻ ശ്രമം

അതേസമയം, കൊച്ചിയിലേക്കുള്ള ബാറ്റിക് എയർ വിമാനത്തിൽ യാത്രക്കാരെ ഭീതിയിലാക്കിയ മറ്റൊരു സംഭവവും റിപ്പോർട്ട് ചെയ്തു. ക്വാലാലംപൂരിൽ നിന്ന് കൊച്ചിയിലേക്ക് വരികയായിരുന്ന വിമാനത്തിലാണ് യാത്രക്കാരൻ എമർജൻസി എക്സിറ്റ് തുറക്കാൻ ശ്രമിച്ചത്.

എമർജൻസി എക്സിറ്റ് ജനൽ തകർക്കാൻ ശ്രമിച്ചെന്ന് ആരോപണം

പാലക്കാട് കൂറ്റനാട് സ്വദേശി ജംഷീർ അത്താണിക്കൽ (34) ആണ് സംഭവത്തിൽ പിടിയിലായത്. വിമാനം കൊച്ചിയിലേക്ക് ഇറങ്ങുന്നതിനിടെ ഇയാൾ സീറ്റിൽ നിന്ന് എഴുന്നേറ്റ് എമർജൻസി എക്സിറ്റ് വിൻഡോയുടെ ഭാഗത്ത് അടിക്കുകയും വാതിൽ തുറക്കാൻ ശ്രമിക്കുകയും ചെയ്തെന്നാണ് ആരോപണം. ഇയാൾ ക്യാബിൻ ജീവനക്കാരെയും യാത്രക്കാരെയും ഭീഷണിപ്പെടുത്തിയതായും റിപ്പോർട്ടുകളുണ്ട്. സംഭവത്തിനിടെ എമർജൻസി എക്സിറ്റിന്റെ ഉൾഭാഗത്തെ പാനലിന് കേടുപാടുകൾ സംഭവിച്ചതായും റിപ്പോർട്ടുകൾ പറയുന്നു.

യാത്രക്കാരും ജീവനക്കാരും ചേർന്ന് കീഴടക്കി

സ്ഥിതിഗതികൾ നിയന്ത്രണാതീതമാകുന്നതിന് മുമ്പ് യാത്രക്കാരും ക്യാബിൻ ജീവനക്കാരും ചേർന്ന് ഇയാളെ കീഴടക്കി നിയന്ത്രണത്തിലാക്കി. തുടർന്ന് വിമാനം സുരക്ഷിതമായി കൊച്ചി അന്താരാഷ്ട്ര വിമാനത്താവളത്തിൽ ഇറക്കി. വിമാനമിറങ്ങിയതിന് പിന്നാലെ ജംഷീർ അത്താണിക്കലിനെ പൊലീസ് കസ്റ്റഡിയിലെടുത്തു. സംഭവത്തിൽ അന്വേഷണം തുടരുകയാണ്.

"കേറിവാടാ മക്കളേ..." സൗജന്യ ടൂറിസ്റ്റ് വിസയുമായി ഒമാൻ; ആർക്കൊക്കെ ലഭിക്കും 14 ദിവസത്തെ ഫ്രീ എൻട്രി?

Prashob Mon — Mon, 03 Aug 2026 11:14:50 +0530

ലോകത്തിന്റെ വിവിധ ഭാഗങ്ങളിൽ നിന്ന് കൂടുതൽ വിനോദസഞ്ചാരികളെ ആകർഷിക്കാൻ 14 ദിവസത്തെ സൗജന്യ ടൂറിസ്റ്റ് വിസ പ്രഖ്യാപിച്ച് ഒമാൻ. വിദേശികളുടെ താമസനിയമത്തിന്റെ എക്സിക്യൂട്ടീവ് ചട്ടങ്ങളിൽ ഭേദഗതി വരുത്തിയതിന്റെ ഭാഗമായാണ് പുതിയ തീരുമാനം. 2026 ഓഗസ്റ്റ് 2-ന് ഒമാന്റെ ഔദ്യോഗിക ഗസറ്റിൽ പ്രസിദ്ധീകരിച്ച വിജ്ഞാപനത്തിലൂടെയാണ് ഇത് പ്രാബല്യത്തിൽ വന്നത്.

പുതിയ ചട്ടമനുസരിച്ച്, നിർദ്ദിഷ്‍ട രാജ്യങ്ങളിലെ പൗരന്മാർക്ക് അപേക്ഷയുടെ അടിസ്ഥാനത്തിൽ ബന്ധപ്പെട്ട അധികൃതർ 14 ദിവസത്തെ സൗജന്യ ടൂറിസ്റ്റ് വിസ അനുവദിക്കും. എന്നാൽ, ഏത് രാജ്യങ്ങളിലെ പൗരന്മാർക്കാണ് ഈ ആനുകൂല്യം ലഭ്യമാകുക എന്ന വിശദമായ പട്ടിക അധികൃതർ ഈ വിജ്ഞാപനത്തിൽ വ്യക്തമാക്കിയിട്ടില്ല എന്ന് ഖലീജ് ടൈംസ് റിപ്പോർട്ട്ചെയ്യുന്നു. സൗജന്യ വിസയിൽ ഒമാനിലെത്തുന്നവർക്ക്, 14 ദിവസത്തെ കാലാവധി അവസാനിക്കുന്നതിന് മുമ്പ് മറ്റ് ടൂറിസ്റ്റ് വിസകൾക്കായി അപേക്ഷിക്കാനും അവസരമുണ്ട്. ഇതിനായി നിലവിലുള്ള നിബന്ധനകളും ഫീസുകളും ബാധകമായിരിക്കും.

ഗൾഫ് മേഖലയിലെ പ്രധാന വിനോദസഞ്ചാര കേന്ദ്രങ്ങളിലൊന്നാണ് ഒമാൻ. സമ്പന്നമായ സാംസ്‍കാരിക പൈതൃകവും പ്രകൃതിസൗന്ദര്യവും രാജ്യത്തെ സഞ്ചാരികളുടെ പ്രിയകേന്ദ്രമാക്കുന്നു. ഹജർ പർവതനിരകൾ, മരുഭൂമികൾ, ചരിത്രപ്രസിദ്ധമായ കോട്ടകൾ, മനോഹരമായ കടൽത്തീരങ്ങൾ എന്നിവയ്‌ക്കൊപ്പം സലാലയിലെ ഖരീഫ് സീസണും ഒമാന്റെ പ്രധാന ആകർഷണങ്ങളാണ്.

ജൂൺ 21-ന് ആരംഭിച്ച ഈ വർഷത്തെ ഖരീഫ് സീസൺ സെപ്റ്റംബർ 21 വരെ തുടരും. ഈ കാലയളവിൽ ധോഫാർ ഗവർണറേറ്റ് പച്ചപ്പിൽ മുങ്ങിയ പ്രകൃതിദൃശ്യങ്ങളാൽ ശ്രദ്ധേയമാകും. ഗൾഫിലെ മറ്റു രാജ്യങ്ങൾ കടുത്ത വേനൽച്ചൂട് അനുഭവിക്കുന്ന സമയത്ത് സലാലയിൽ താരതമ്യേന തണുത്ത കാലാവസ്ഥയാണ് അനുഭവപ്പെടുന്നത്.

കടൽത്തീരങ്ങൾ, വെള്ളച്ചാട്ടങ്ങൾ, സിങ്ക്‌ഹോളുകൾ എന്നിവയ്ക്ക് പുറമെ, ഈ വർഷത്തെ ഖരീഫ് ആഘോഷങ്ങളുടെ ഭാഗമായി 125 സാംസ്‍കാരിക, കലാ, കായിക, വിനോദ പരിപാടികളും സംഘടിപ്പിക്കുന്നതായി ധോഫാർ മുനിസിപ്പാലിറ്റി അറിയിച്ചു.

പുതിയ സൗജന്യ ടൂറിസ്റ്റ് വിസ പദ്ധതി ഒമാനിലെ ടൂറിസം മേഖലയെ കൂടുതൽ ശക്തിപ്പെടുത്താനും രാജ്യത്തേക്കുള്ള അന്താരാഷ്ട്ര സന്ദർശകരുടെ എണ്ണം വർധിപ്പിക്കാനുമുള്ള സുപ്രധാന നീക്കമായാണ് വിലയിരുത്തപ്പെടുന്നത്. അതേസമയം, ഈ സൗകര്യത്തിന് അർഹതയുള്ള രാജ്യങ്ങളുടെ ഔദ്യോഗിക പട്ടിക പുറത്തുവന്നാൽ മാത്രമേ ആനുകൂല്യം ലഭിക്കുന്ന രാജ്യങ്ങളെക്കുറിച്ച് വ്യക്തതയുണ്ടാകൂ.

കാർ വിറ്റോ? ഫാസ്‍ടാഗ് ഉടൻ ഡീആക്ടിവേറ്റ് ചെയ്യണം; ഇല്ലെങ്കിൽ പണം പോകും

Prashobh Prasannan — Tue, 15 Sep 2026 15:11:43 +0530

പഴയ കാർ വിറ്റശേഷം ആർസിയും മറ്റ് രേഖകളും പുതിയ ഉടമയുടെ പേരിലേക്ക് മാറ്റിയാൽ നടപടികൾ പൂർത്തിയായെന്ന് കരുതുന്നവരാണ് പലരും. എന്നാൽ ഒരു പ്രധാന കാര്യം കൂടി ചെയ്യാനുണ്ട്. കാർ വിറ്റതിന് ശേഷം അതുമായി ബന്ധപ്പെട്ട ഫാസ്ടാഗ് നിർജ്ജീവമാക്കേണ്ടത് അത്യാവശ്യമാണ്. ഇത് ചെയ്തില്ലെങ്കിൽ പിന്നീട് നിങ്ങളുടെ ബാങ്ക് അക്കൗണ്ടിൽ നിന്ന് അനാവശ്യമായി ടോൾ തുക കുറയാൻ സാധ്യതയുണ്ട്. പഴയ കാർ വാങ്ങിയ പുതിയ ഉടമ ടോൾ പ്ലാസകളിലൂടെ യാത്ര ചെയ്യുമ്പോൾ, വാഹനത്തിൽ സജീവമായി തുടരുന്ന നിങ്ങളുടെ ഫാസ്ടാഗിൽ നിന്നായിരിക്കും ടോൾ തുക ഈടാക്കുക. അക്കൗണ്ടിൽ നിന്ന് തുടർച്ചയായി പണം കുറയുമ്പോഴായിരിക്കും ഫാസ്ടാഗ് ഇപ്പോഴും സജീവമാണെന്ന് പലരും മനസിലാക്കുന്നത്.

എന്തുകൊണ്ട് ഫാസ്‍ടാഗ് നിർജ്ജീവമാക്കണം?

കാറിന്റെ വിൻഡ്‌ഷീൽഡിൽ സ്ഥാപിക്കുന്ന റേഡിയോ ഫ്രീക്വൻസി തിരിച്ചറിയൽ സംവിധാനമുള്ള ടാഗാണ് ഫാസ്ടാഗ്. ഇത് നിങ്ങളുടെ ഫാസ്ടാഗ് അക്കൗണ്ടുമായോ വാലറ്റുമായോ ബന്ധിപ്പിച്ചിരിക്കും. വാഹനം ടോൾ പ്ലാസയിലൂടെ കടന്നുപോകുമ്പോൾ സ്കാനർ ഫാസ്ടാഗ് തിരിച്ചറിയുകയും അതുമായി ബന്ധിപ്പിച്ചിട്ടുള്ള അക്കൗണ്ടിൽ നിന്ന് ടോൾ തുക സ്വമേധയാ കുറയ്ക്കുകയും ചെയ്യും. കാർ വിറ്റശേഷവും ഫാസ്ടാഗ് നിർജ്ജീവമാക്കിയില്ലെങ്കിൽ ഈ സംവിധാനം പഴയതുപോലെ തന്നെ പ്രവർത്തിക്കും. അതിനാൽ പുതിയ ഉടമ നടത്തുന്ന യാത്രകളുടെ ടോൾ തുകയും മുൻ ഉടമയുടെ അക്കൗണ്ടിൽ നിന്ന് ഈടാക്കപ്പെടാൻ സാധ്യതയുണ്ട്.

കാർ വിറ്റാൽ എന്താണ് ചെയ്യേണ്ടത്?

നാഷണൽ ഹൈവേ അതോറിറ്റി ഓഫ് ഇന്ത്യയുടെ പതിവുചോദ്യങ്ങൾ പ്രകാരം, വാഹനം മറ്റൊരാൾക്ക് വിൽക്കുകയോ കൈമാറ്റം ചെയ്യുകയോ ചെയ്ത ശേഷം മുൻ ഉടമ ഫാസ്ടാഗ് നൽകിയ ബാങ്കുമായി ബന്ധപ്പെടണം. ഫാസ്ടാഗ് അക്കൗണ്ടോ വാലറ്റോ നിർജ്ജീവമാക്കുന്നതിനുള്ള നടപടികൾ പൂർത്തിയാക്കണം. തുടർന്ന് പുതിയ ഉടമ സ്വന്തം പേരിൽ പുതിയ ഫാസ്ടാഗ് എടുക്കണം.

ഫാസ്ടാഗിൽ പണം ബാക്കിയുണ്ടെങ്കിൽ?

ഫാസ്ടാഗ് നിർജ്ജീവമാക്കുന്നതിന് മുമ്പ് വാലറ്റിലെ ബാലൻസ് പരിശോധിക്കുന്നത് പ്രധാനമാണ്. അക്കൗണ്ടിൽ പണം ബാക്കിയുണ്ടെങ്കിൽ, അത് എങ്ങനെ തിരികെ ലഭിക്കുമെന്ന് ബന്ധപ്പെട്ട ബാങ്കിനോട് അന്വേഷിക്കണം. ബാക്കിയുള്ള തുക തിരികെ നൽകുന്നതിനുള്ള നടപടിക്രമം ഓരോ ബാങ്കിന്റെയും നിബന്ധനകൾ അനുസരിച്ച് വ്യത്യാസപ്പെടാം. അതിനാൽ ഫാസ്ടാഗ് അക്കൗണ്ട് ക്ലോസ് ചെയ്യുന്നതിനുള്ള അപേക്ഷ നൽകുമ്പോൾ റീഫണ്ടിനായി ആവശ്യമായ നടപടികളും രേഖകളും ബാങ്കിനോട് ചോദിച്ചറിയുന്നതാണ് ഉചിതം.

എങ്ങനെ ഫാസ്ടാഗ് ഡീആക്ടിവേറ്റ് ചെയ്യാം?

ആദ്യം നിങ്ങളുടെ ഫാസ്ടാഗ് ഏത് ബാങ്കാണ് നൽകിയതെന്ന് പരിശോധിക്കുക. തുടർന്ന് ബന്ധപ്പെട്ട ബാങ്കിന്റെ കസ്റ്റമർ കെയർ സേവനത്തിലൂടെയോ ഓൺലൈൻ ഫാസ്ടാഗ് പോർട്ടലിലൂടെയോ അക്കൗണ്ട് ക്ലോഷറിനായി അപേക്ഷ നൽകാം. കാർ വിറ്റതായും ഫാസ്ടാഗ് അക്കൗണ്ട് നിർജ്ജീവമാക്കണമെന്നും ബാങ്കിനെ അറിയിക്കണം. രജിസ്റ്റർ ചെയ്ത മൊബൈൽ നമ്പർ, വാഹന രജിസ്ട്രേഷൻ നമ്പർ, ഫാസ്ടാഗുമായി ബന്ധപ്പെട്ട മറ്റ് വിവരങ്ങൾ എന്നിവ ബാങ്ക് ആവശ്യപ്പെട്ടേക്കാം. വിവരങ്ങൾ പരിശോധിച്ചുറപ്പിച്ച ശേഷം ബാങ്ക് ഫാസ്ടാഗ് നിർജ്ജീവമാക്കുന്നതിനുള്ള നടപടികൾ പൂർത്തിയാക്കും.

ഡീആക്ടിവേറ്റ് ചെയ്തോ എന്ന് ഉറപ്പാക്കണം

കാർ വിറ്റതിന് ശേഷം ആദ്യം ഫാസ്ടാഗ് നൽകിയ ബാങ്ക് ഏതാണെന്ന് കണ്ടെത്തുക. തുടർന്ന് കസ്റ്റമർ കെയർ വഴിയോ ഓൺലൈൻ ഫാസ്ടാഗ് സേവനം വഴിയോ ക്ലോഷർ അപേക്ഷ നൽകുക. നടപടി പൂർത്തിയായ ശേഷം ഫാസ്ടാഗ് ഇനി സജീവമല്ലെന്ന് ഉറപ്പാക്കുകയും വേണം. ബാങ്ക് വഴി പ്രശ്നം പരിഹരിക്കാൻ സാധിക്കുന്നില്ലെങ്കിൽ, ഫാസ്ടാഗുമായി ബന്ധപ്പെട്ട പരാതികൾക്കും സഹായത്തിനുമായി ഇന്ത്യൻ ഹൈവേസ് മാനേജ്മെന്റ് കമ്പനിയുടെ ഹെൽപ്പ്‌ലൈനും പരാതി പരിഹാര സംവിധാനവും ഉപയോഗിക്കാം.

രേഖകൾ കൈമാറിയാൽ മാത്രം പോരാ

കാർ വിറ്റശേഷം ആർസി ഉൾപ്പെടെയുള്ള രേഖകൾ പുതിയ ഉടമയുടെ പേരിലേക്ക് മാറ്റുന്നതുപോലെ തന്നെ പ്രധാനമാണ് ഫാസ്ടാഗ് നിർജ്ജീവമാക്കുന്നതും. ഇത് ചെയ്യാതെ പോയാൽ മറ്റൊരാൾ ഉപയോഗിക്കുന്ന വാഹനത്തിന്റെ ടോൾ തുക നിങ്ങളുടെ അക്കൗണ്ടിൽ നിന്ന് കുറയാനുള്ള സാധ്യതയുണ്ട്. അതിനാൽ കാർ വിൽക്കുന്നവർ ഉടൻ തന്നെ ബന്ധപ്പെട്ട ബാങ്കുമായി ബന്ധപ്പെട്ട് ഫാസ്ടാഗ് അക്കൗണ്ട് ക്ലോസ് ചെയ്യുകയും ബാക്കിയുള്ള തുകയുടെ റീഫണ്ട് നടപടികൾ പൂർത്തിയാക്കുകയും ചെയ്യുന്നത് സുരക്ഷിതമാണ്.

ബസ്, മെട്രോ ടിക്കറ്റുകൾ ഇനി ഒരൊറ്റ ആപ്പിൽ; ‘നമ്മ ബിഎംടിസി 2.0’ എത്തി

Prashobh Prasannan — Sat, 12 Sep 2026 14:31:11 +0530

ബെംഗളൂരുവിലെ പൊതുഗതാഗത യാത്ര കൂടുതൽ എളുപ്പമാക്കാൻ പുതിയ മൊബൈൽ ആപ്പുമായി ബെംഗളൂരു മെട്രോപൊളിറ്റൻ ട്രാൻസ്‌പോർട്ട് കോർപ്പറേഷൻ. ‘നമ്മ ബി.എം.ടി.സി 2.0’ എന്ന പേരിൽ നവീകരിച്ച ആപ്പാണ് ബി.എം.ടി.സി പുറത്തിറക്കിയത്. ബസ്, നമ്മ മെട്രോ ടിക്കറ്റ് ബുക്കിങ്, ബസ് തത്സമയ ട്രാക്കിങ്, ഡിജിറ്റൽ പേയ്‌മെന്റ് തുടങ്ങി യാത്രക്കാർക്ക് ആവശ്യമായ നിരവധി സേവനങ്ങൾ ഇനി ഒരൊറ്റ ആപ്പിലൂടെ ലഭ്യമാകും.

ബസിനും മെട്രോയ്ക്കും മൊബൈൽ ടിക്കറ്റ്

പുതിയ ആപ്പിലെ പ്രധാന ആകർഷണം ബി.എം.ടി.സി ബസുകളുടെയും നമ്മ മെട്രോയുടെയും ടിക്കറ്റുകൾ ഡിജിറ്റലായി വാങ്ങാനുള്ള സൗകര്യമാണ്. മൊബൈൽ ടിക്കറ്റുകൾക്ക് പുറമെ പ്രതിമാസ പാസുകളും ആപ്പിലൂടെ സ്വന്തമാക്കാം. എക്സ്പ്രസ്, ഓർഡിനറി സർവീസ്, വജ്ര ഗോൾഡ്, വായു വജ്ര, നൈസ് റോഡ് തുടങ്ങിയ വിവിധ വിഭാഗങ്ങളിലുള്ള പാസുകളും ലഭ്യമാകും. ഇതോടെ യാത്രയ്ക്കായി പേപ്പർ ടിക്കറ്റുകളെ ആശ്രയിക്കേണ്ട സാഹചര്യം കുറയും.

ബസ് എവിടെയെത്തിയെന്ന് തത്സമയം അറിയാം

നേരത്തെ ലഭ്യമായിരുന്ന ബസ് ട്രാക്കിങ് സംവിധാനവും പുതിയ ആപ്പിൽ തുടരും. യാത്രക്കാർക്ക് തങ്ങൾ കാത്തിരിക്കുന്ന ബസ് നിലവിൽ എവിടെയാണെന്ന് തത്സമയം പരിശോധിക്കാം. ബെംഗളൂരുവിലെ തിരക്കേറിയ റോഡുകളിലൂടെയുള്ള യാത്ര ആസൂത്രണം ചെയ്യാനും ഇതിലൂടെ സാധിക്കും. നഗരത്തിന്റെ വിവിധ ഭാഗങ്ങളിലേക്ക് ദിവസേന യാത്ര ചെയ്യുന്നവർക്കും ജോലി, പഠനം തുടങ്ങിയ ആവശ്യങ്ങൾക്കായി പൊതുഗതാഗതത്തെ ആശ്രയിക്കുന്നവർക്കും പുതിയ സംവിധാനം ഏറെ പ്രയോജനപ്പെടുമെന്നാണ് പ്രതീക്ഷ.

യുപിഐ ഉൾപ്പെടെ ഡിജിറ്റൽ പേയ്‌മെന്‍റ്

ടിക്കറ്റുകളും മറ്റ് സേവനങ്ങളും ഉപയോഗിക്കുന്നതിനുള്ള പണമിടപാടുകൾ ഡിജിറ്റലായും നടത്താം. ആപ്പിലെ വാലറ്റിന് പുറമെ യു.പി.ഐയും മറ്റ് ലഭ്യമായ ഡിജിറ്റൽ പേയ്‌മെന്റ് മാർഗങ്ങളും ഉപയോഗിക്കാനുള്ള സൗകര്യമുണ്ട്.

സെപ്റ്റംബർ 10ന് പുറത്തിറക്കി

2026 സെപ്റ്റംബർ 10നാണ് ‘നമ്മ ബി.എം.ടി.സി 2.0’ ഔദ്യോഗികമായി പുറത്തിറക്കിയത്. നിലവിൽ ഗൂഗിൾ പ്ലേ സ്റ്റോറിൽ നിന്ന് ആപ്പ് ഡൗൺലോഡ് ചെയ്യാം. ഇംഗ്ലീഷിനൊപ്പം കന്നഡയിലും ആപ്പ് ലഭ്യമാണ്.

2016ൽ തുടക്കം, ഇനി പുതിയ മാറ്റം

യാത്രക്കാർക്ക് ബസ് ട്രാക്കിങ് എളുപ്പമാക്കുന്നതിനായി 2016ലാണ് ബി.എം.ടി.സി ആദ്യമായി മൊബൈൽ ആപ്പ് അവതരിപ്പിച്ചത്. തുടർന്ന് 2019ലും 2023ലും പ്രധാനപ്പെട്ട രണ്ട് അപ്‌ഡേറ്റുകൾ പുറത്തിറക്കി. ആപ്പിന്റെ സാങ്കേതിക പ്രവർത്തനങ്ങളും ഉപയോക്തൃ അനുഭവവും മെച്ചപ്പെടുത്തുന്നതിനായിരുന്നു ഈ പരിഷ്‌കരണങ്ങൾ. പുതിയ ‘നമ്മ ബി.എം.ടി.സി 2.0’യിലൂടെ ബെംഗളൂരുവിലെ ബസ്, മെട്രോ യാത്രകൾ കൂടുതൽ ലളിതവും ഡിജിറ്റൽ സൗഹൃദവുമാക്കുകയാണ് ലക്ഷ്യം.

ഡൽഹിയിലേക്ക് യാത്രയുണ്ടോ? ഓഗസ്റ്റ് 15ന് മുന്നോടിയായി വൻ നിയന്ത്രണങ്ങൾ; ട്രെയിൻ, വിമാന യാത്രക്കാർ ശ്രദ്ധിക്കുക

Prashobh Prasannan — Tue, 11 Aug 2026 15:22:40 +0530

രാജ്യത്തിന്‍റെ 80-ാം സ്വാതന്ത്ര്യദിനാഘോഷങ്ങൾക്ക് മുന്നോടിയായി ഡൽഹിയിലും സമീപ പ്രദേശങ്ങളിലും സുരക്ഷ ശക്തമാക്കുന്നു. ഇതിന്റെ ഭാഗമായി റോഡ്, റെയിൽ, വിമാന ഗതാഗതത്തിൽ നിയന്ത്രണങ്ങളും വഴിതിരിച്ചുവിടലുകളും ഉണ്ടായേക്കാം. ഓഗസ്റ്റ് 15ന് നടക്കുന്ന ആഘോഷങ്ങളുടെ പശ്ചാത്തലത്തിൽ ഡൽഹിയിലേക്ക് യാത്ര ചെയ്യുന്നവർ ഏറ്റവും പുതിയ യാത്രാ നിർദേശങ്ങൾ പരിശോധിച്ച് യാത്ര ആസൂത്രണം ചെയ്യണമെന്ന് അധികൃതർ അറിയിച്ചു. സുരക്ഷാ പരിശോധനകൾ ശക്തമാക്കുന്നതിനാൽ റെയിൽവേ സ്റ്റേഷനുകളിലും വിമാനത്താവളങ്ങളിലും അധിക സമയം ആവശ്യമായി വരും. യാത്രക്കാർ ആവശ്യത്തിന് നേരത്തെ എത്തണമെന്നും നിർദേശമുണ്ട്.

ട്രെയിൻ യാത്രക്കാർ നേരത്തെ എത്തണം

ഓഗസ്റ്റ് 13 മുതൽ 16 വരെ ഡൽഹിയിലെ പ്രധാന റെയിൽവേ സ്റ്റേഷനുകളിൽ സുരക്ഷാ പരിശോധന ശക്തമാക്കുമെന്ന് വടക്കൻ റെയിൽവേ അറിയിച്ചു. ന്യൂഡൽഹി, ഓൾഡ് ഡൽഹി, ഹസ്രത്ത് നിസാമുദ്ദീൻ, ആനന്ദ് വിഹാർ ടെർമിനൽ, ഡൽഹി സരായ് റോഹില്ല എന്നിവയുൾപ്പെടെയുള്ള പ്രധാന സ്റ്റേഷനുകളിലാണ് പരിശോധനകൾ ഉണ്ടാകുക. ട്രെയിൻ യാത്രക്കാർ യാത്രാസമയത്തിന് ഏറെ മുമ്പ് സ്റ്റേഷനിൽ എത്തണം. സുരക്ഷാ ഉദ്യോഗസ്ഥരുമായി സഹകരിക്കണമെന്നും പരിശോധനകൾക്കായി അധിക സമയം മാറ്റിവയ്ക്കണമെന്നും റെയിൽവേ നിർദേശിച്ചു.

ഡൽഹിയിലേക്കുള്ള റോഡ് യാത്രയിലും നിയന്ത്രണം

ഡൽഹിയിലേക്ക് റോഡ് മാർഗം യാത്ര ചെയ്യുന്നവരും ജാഗ്രത പാലിക്കണം. സ്വാതന്ത്ര്യദിനത്തിന് മുന്നോടിയായി ചില റോഡുകളിൽ ഗതാഗതം വഴിതിരിച്ചുവിടും. പാനിപ്പത്തിൽ നിന്ന് എത്തുന്ന ഭാരവാഹനങ്ങൾ ദേശീയപാത 44ലെ ഗന്നൗർ മേൽപ്പാലത്തിൽ നിന്ന് ഖുബ്രു ഝാൽ ഭാഗത്തേക്ക് തിരിച്ചുവിടും. പാനിപ്പത്തിൽ നിന്ന് ഗ്രാൻഡ് ട്രങ്ക് റോഡ്, ഗോഹാന ബൈപാസ് വഴി എത്തുന്ന ഭാരവാഹനങ്ങൾ മുർതലിന് സമീപം ദേശീയപാത 352ലേക്ക് തിരിച്ചുവിടും. ഉത്തർപ്രദേശിൽ നിന്ന് ഡൽഹിയിലേക്ക് എത്തുന്ന വാഹനങ്ങൾ ബഹാൽഗഢ് വഴി സോനിപത്തിലേക്ക് തിരിച്ചുവിടും. ദേശീയപാത 334ബി വഴി എത്തുന്ന വാഹനങ്ങൾക്കും ബഹാൽഗഢ് വഴിയാകും നിയന്ത്രണം.

പ്രധാന പാതകളിൽ പരിശോധന

കുണ്ഡ്‌ലി-ഗാസിയാബാദ്-പൽവൽ എക്സ്പ്രസ് വേയുടെയും കുണ്ഡ്‌ലി-മനേസർ-പൽവൽ എക്സ്പ്രസ് വേയുടെയും പ്രവേശന ഭാഗങ്ങളിൽ പൊലീസ് പരിശോധനാ കേന്ദ്രങ്ങൾ സ്ഥാപിക്കും. കുണ്ഡ്‌ലിയിൽ നിന്ന് എത്തുന്ന വാഹനങ്ങൾ നരേലയിലേക്ക് തിരിച്ചുവിടും. ഖർഖോദയിലെ ഡൽഹി ചൗക്ക് ബൈപാസിന് സമീപവും പ്രത്യേക പരിശോധനാ കേന്ദ്രം സ്ഥാപിക്കും. ഇവിടെ നിന്ന് വാഹനങ്ങൾ ഖർഖോദ-സാംപ്ല റോഡിലേക്ക് തിരിച്ചുവിടും. ഹൽദാന അതിർത്തി മുതൽ സിംഘു അതിർത്തി വരെയുള്ള ദേശീയപാത 44ലും കൂടുതൽ പൊലീസ് ഉദ്യോഗസ്ഥരെ വിന്യസിക്കും. ഗതാഗതം സുഗമമായി നിയന്ത്രിക്കുന്നതിനാണ് നടപടി. സ്വാതന്ത്ര്യദിനത്തിന് മുന്നോടിയായി ഡൽഹിയിലേക്ക് ഭാരവാഹനങ്ങളുടെ പ്രവേശനത്തിന് താൽക്കാലിക നിയന്ത്രണം ഏർപ്പെടുത്തിയതായി സോനിപത് പൊലീസ് ഡൽഹി പൊലീസുമായി സഹകരിച്ച് അറിയിച്ചതായി റിപ്പോർട്ടുകളുണ്ട്.

വിമാന യാത്രക്കാർക്കും മുന്നറിയിപ്പ്

വിമാന യാത്രക്കാരും യാത്രയ്ക്ക് അധിക സമയം മാറ്റിവയ്ക്കണം. ഓഗസ്റ്റ് 10 മുതൽ 20 വരെ വിമാനയാത്ര നടത്തുന്നവർ വിമാനത്താവളത്തിൽ നേരത്തെ എത്തണമെന്ന് എയർ ഇന്ത്യ നിർദേശിച്ചു. വിമാനത്താവളങ്ങളിലെ സുരക്ഷാ പരിശോധനകൾ ശക്തമാക്കിയതിനാൽ സാധാരണയേക്കാൾ കൂടുതൽ സമയം യാത്രക്കാർക്ക് ആവശ്യമായി വന്നേക്കാം. അവസാന നിമിഷത്തെ തിരക്ക് ഒഴിവാക്കാൻ നേരത്തെ വിമാനത്താവളത്തിലെത്തണമെന്നാണ് നിർദേശം. സ്വാതന്ത്ര്യദിനാഘോഷങ്ങളുമായി ബന്ധപ്പെട്ട് ഡൽഹിയിലേക്കോ ഡൽഹിയിൽ നിന്നോ യാത്ര ചെയ്യാനിരിക്കുന്നവർ യാത്രയ്ക്ക് മുമ്പ് റെയിൽവേ, വിമാനക്കമ്പനികൾ, പൊലീസ്, ബന്ധപ്പെട്ട സർക്കാർ ഏജൻസികൾ എന്നിവയുടെ ഏറ്റവും പുതിയ യാത്രാ നിർദേശങ്ങൾ പരിശോധിക്കുന്നത് സുരക്ഷിതമായിരിക്കും.

ഇന്ത്യക്കാർക്ക് വിസ വേണ്ട; ഈ 26 രാജ്യങ്ങളിലേക്ക് കൂളായി പറക്കാം

Prashobh Prasannan — Tue, 11 Aug 2026 14:45:01 +0530

വിദേശയാത്രയ്ക്ക് ഒരുങ്ങുന്ന ഇന്ത്യൻ പാസ്‌പോർട്ട് ഉടമകൾക്ക് സന്തോഷവാർത്ത. 2026ൽ ഇന്ത്യൻ പൗരന്മാർക്ക് വിസയില്ലാതെ പ്രവേശിക്കാനാകുന്ന 27 രാജ്യങ്ങളുടെ പട്ടിക പുറത്തുവന്നു. കേന്ദ്ര വിദേശകാര്യ മന്ത്രാലയത്തിന്റെ കണക്കുകൾ പ്രകാരം 27 രാജ്യങ്ങളാണ് നിലവിൽ ഇന്ത്യൻ പാസ്‌പോർട്ട് ഉടമകൾക്ക് വിസ രഹിത പ്രവേശനം അനുവദിക്കുന്നത്. 47 രാജ്യങ്ങളിൽ എത്തിച്ചേരുമ്പോൾ തന്നെ വിസ ലഭിക്കുന്ന സംവിധാനവും 66 രാജ്യങ്ങളിൽ ഇ-വിസ സംവിധാനവും ലഭ്യമാണ്.

തായ്‌ലൻഡും മലേഷ്യയും പട്ടികയിൽ

ഇന്ത്യക്കാർക്കിടയിൽ ഏറെ ജനപ്രിയമായ വിനോദസഞ്ചാര കേന്ദ്രങ്ങളായ തായ്‌ലൻഡും മലേഷ്യയും പട്ടികയിലുണ്ട്. തായ്‌ലൻഡിൽ ഇന്ത്യൻ പാസ്‌പോർട്ട് ഉടമകൾക്ക് 30 ദിവസം വരെ വിസയില്ലാതെ പ്രവേശിക്കാം. മലേഷ്യയിലും 2026 ഡിസംബർ വരെ 30 ദിവസം വരെയുള്ള വിസ രഹിത യാത്ര അനുവദിച്ചിട്ടുണ്ട്. ഇതോടെ ഈ രണ്ട് പ്രധാന വിനോദസഞ്ചാര കേന്ദ്രങ്ങളിലേക്കുള്ള യാത്ര ഇന്ത്യൻ സഞ്ചാരികൾക്ക് കൂടുതൽ എളുപ്പമാകും.

മൗറീഷ്യസിലും 90 ദിവസം വരെ

മാലദ്വീപിന് പകരം ഇന്ത്യൻ യാത്രക്കാർ കൂടുതലായി പരിഗണിക്കുന്ന മൗറീഷ്യസിലും വിസയില്ലാതെ 90 ദിവസം വരെ താമസിക്കാം. ഭൂട്ടാനിലേക്കും നേപ്പാളിലേക്കും ഇന്ത്യൻ പൗരന്മാർക്ക് പ്രവേശന നടപടികൾ താരതമ്യേന ലളിതമാണ്. എന്നാൽ ഭൂട്ടാനിലേക്ക് യാത്ര ചെയ്യുമ്പോൾ പ്രവേശന അനുമതി ആവശ്യമാണ്.

27 രാജ്യങ്ങൾ ഏതൊക്കെ?

ഇന്ത്യൻ പാസ്‌പോർട്ട് ഉടമകൾക്ക് വിസയില്ലാതെ പ്രവേശിക്കാനാകുന്ന രാജ്യങ്ങളുടെ പട്ടികയിൽ ഭൂട്ടാൻ, നേപ്പാൾ, മൗറീഷ്യസ്, തായ്‌ലൻഡ്, കസാഖ്സ്ഥാൻ, മലേഷ്യ, സെഷെൽസ്, കുക്ക് ദ്വീപുകൾ, നിയു, ഇറാൻ, മക്കാവു, ഫിജി എന്നിവ ഉൾപ്പെടുന്നു. ബാർബഡോസ്, ഡൊമിനിക്ക, ഗ്രനേഡ, സെനഗൽ, ഹെയ്തി, എൽ സാൽവദോർ, മൈക്രോനേഷ്യ, ട്രിനിഡാഡ് ആൻഡ് ടൊബാഗോ, സെന്റ് വിൻസെന്റ് ആൻഡ് ഗ്രനഡൈൻസ്, ഗാംബിയ, ജമൈക്ക, സെന്റ് കിറ്റ്സ് ആൻഡ് നെവിസ്, മോണ്ട്സെറാറ്റ്, വാനുവാട്ടു, അംഗോള എന്നിവയാണ് പട്ടികയിലെ മറ്റ് രാജ്യങ്ങൾ.

ചില രാജ്യങ്ങളിൽ 180 ദിവസം വരെ

വിസയില്ലാതെ അനുവദിക്കുന്ന താമസ കാലയളവ് രാജ്യങ്ങൾക്കനുസരിച്ച് വ്യത്യാസപ്പെടും. ഡൊമിനിക്കയിൽ ഇന്ത്യൻ പാസ്‌പോർട്ട് ഉടമകൾക്ക് 180 ദിവസം വരെ വിസയില്ലാതെ താമസിക്കാം. മോണ്ട്സെറാറ്റിലും വിനോദസഞ്ചാരത്തിനും ബിസിനസ് ആവശ്യങ്ങൾക്കുമായി 180 ദിവസം വരെയുള്ള ഹ്രസ്വകാല സന്ദർശനങ്ങൾക്ക് വിസ ഒഴിവാക്കിയിട്ടുണ്ട്. ബാർബഡോസ്, ഗ്രനേഡ, സെനഗൽ, ഹെയ്തി, എൽ സാൽവദോർ, ട്രിനിഡാഡ് ആൻഡ് ടൊബാഗോ, സെന്റ് വിൻസെന്റ് ആൻഡ് ഗ്രനഡൈൻസ്, ഗാംബിയ, സെന്റ് കിറ്റ്സ് ആൻഡ് നെവിസ് എന്നിവിടങ്ങളിൽ 90 ദിവസം വരെ വിസയില്ലാതെ കഴിയാം.

14 ദിവസം മുതൽ 120 ദിവസം വരെ

കസാഖ്സ്ഥാനിൽ 14 ദിവസം വരെയും ഇറാനിൽ ആറുമാസത്തിനിടെ ഒരിക്കൽ 15 ദിവസം വരെയും വിസയില്ലാതെ യാത്ര ചെയ്യാം. മക്കാവു, നിയു, മൈക്രോനേഷ്യ എന്നിവിടങ്ങളിൽ 30 ദിവസം വരെ വിസ രഹിത പ്രവേശനം ലഭിക്കും. അംഗോളയിലും 30 ദിവസം വരെ വിസയില്ലാതെ യാത്ര ചെയ്യാം. ഫിജിയിൽ 120 ദിവസം വരെ വിസയില്ലാതെ പ്രവേശിക്കാമെങ്കിലും എത്തിച്ചേരുമ്പോൾ സന്ദർശക അനുമതി നേടണം. വാനുവാട്ടുവിൽ പ്രവേശന നിബന്ധനകൾ അനുസരിച്ച് 30 മുതൽ 120 ദിവസം വരെയാണ് വിസ രഹിത താമസ കാലയളവ്.

യാത്രയ്ക്ക് മുമ്പ് ശ്രദ്ധിക്കണം

വിസ ആവശ്യമില്ലെങ്കിലും ചില രാജ്യങ്ങൾ അധിക പ്രവേശന നിബന്ധനകൾ മുന്നോട്ടുവയ്ക്കാറുണ്ട്. പാസ്‌പോർട്ടിന് നിശ്ചിത കാലാവധി, മടക്കയാത്രാ ടിക്കറ്റ്, താമസ രേഖ, മതിയായ സാമ്പത്തിക ശേഷിയുടെ തെളിവ് തുടങ്ങിയവ ആവശ്യപ്പെട്ടേക്കാം. അതിനാൽ യാത്ര ബുക്ക് ചെയ്യുന്നതിന് മുമ്പ് ബന്ധപ്പെട്ട രാജ്യത്തിന്റെ ഏറ്റവും പുതിയ പ്രവേശന മാനദണ്ഡങ്ങൾ പരിശോധിക്കേണ്ടത് പ്രധാനമാണ്. വിസ നിബന്ധനകളിൽ മാറ്റം വരാൻ സാധ്യതയുള്ളതിനാൽ ഔദ്യോഗിക സർക്കാർ വെബ്സൈറ്റുകളിൽ നിന്നുള്ള വിവരങ്ങൾ പരിശോധിച്ച ശേഷമാകണം യാത്രാ പദ്ധതികൾ അന്തിമമാക്കുന്നത്.

ഫാസ്‍ടാഗ് മാറ്റാതെ ബാങ്ക് മാറ്റാം; എന്താണ് വൺടാഗ്?

Prashobh Prasannan — Wed, 23 Sep 2026 13:21:18 +0530

ഹൈവേകളിലെ ടോൾ പേയ്‌മെന്റുകൾ എളുപ്പമാക്കിയ സംവിധാനമാണ് ഫാസ്‍ടാഗ്. വാഹനത്തിന്‍റെ വിൻഡ്‌ഷീൽഡിൽ പതിപ്പിക്കുന്ന ചെറിയ സ്റ്റിക്കറിലൂടെ ടോൾ പ്ലാസകളിൽ പണം സ്വയമേവ അടയ്ക്കാം. എന്നാൽ ഫാസ്‍ടാഗുമായി ബന്ധപ്പെട്ട ബാങ്ക് മാറ്റുന്നത് ഇതുവരെ ഉപയോക്താക്കൾക്ക് ബുദ്ധിമുട്ടുള്ള കാര്യമായിരുന്നു. ബാങ്ക് മാറുമ്പോൾ പുതിയ ഫാസ്‍ടാഗ് എടുക്കുകയും പഴയ സ്റ്റിക്കർ നീക്കം ചെയ്യുകയും വേണമായിരുന്നു. ഈ പ്രശ്നത്തിന് പരിഹാരമായാണ് സർക്കാർ വൺടാഗ് സംവിധാനം അവതരിപ്പിച്ചിരിക്കുന്നത്. ഫാസ്‍ടാഗ് സ്റ്റിക്കർ മാറ്റാതെ തന്നെ മറ്റൊരു ബാങ്കിലേക്ക് പോർട്ട് ചെയ്യാൻ വൺടാഗിലൂടെ സാധിക്കും.

മൊബൈൽ നമ്പർ പോർട്ടബിലിറ്റി പോലെ

വൺടാഗിനെ മൊബൈൽ നമ്പർ പോർട്ടബിലിറ്റിയുമായി താരതമ്യം ചെയ്യാം. മൊബൈൽ നമ്പർ മാറ്റാതെ നെറ്റ്‌വർക്ക് സേവനദാതാവിനെ മാറ്റുന്നതുപോലെ, ഫാസ്‍ടാഗ് സ്റ്റിക്കറും ടാഗ് ഐഡന്റിറ്റിയും നിലനിർത്തി ഇഷ്യൂ ചെയ്യുന്ന ബാങ്ക് മാറ്റാൻ വൺടാഗിലൂടെ സാധിക്കും.

1. ഫാസ്‍ടാഗ് സ്റ്റിക്കർ മാറ്റേണ്ട

വൺടാഗിന്റെ പ്രധാന പ്രത്യേകത വാഹനത്തിന്റെ വിൻഡ്‌ഷീൽഡിൽ പതിപ്പിച്ചിരിക്കുന്ന ഫാസ്‍ടാഗ് സ്റ്റിക്കർ ബാങ്ക് മാറുമ്പോൾ നീക്കം ചെയ്യേണ്ടതില്ല എന്നതാണ്. ഉപയോക്താവിന്റെ ടാഗ് ഐഡിയും വാഹന രജിസ്ട്രേഷൻ നമ്പറും അതേപടി തുടരും. അതിനാൽ പുതിയ ഫാസ്‍ടാഗ് എടുക്കുകയോ പഴയ സ്റ്റിക്കർ നീക്കം ചെയ്യുകയോ വേണ്ടിവരില്ല.

2. ബാങ്ക് മാറ്റുന്നത് എളുപ്പം

നിലവിലുള്ള ഫാസ്‍ടാഗ് മറ്റൊരു ബാങ്കിലേക്ക് പോർട്ട് ചെയ്യാൻ വൺടാഗ് ഉപയോക്താക്കളെ അനുവദിക്കും. ഇതോടെ പുതിയ ഫാസ്‍ടാഗ് നൽകേണ്ട സാഹചര്യം ഒഴിവാക്കാം. ബാങ്ക് മാറുമ്പോൾ ഫാസ്‍ടാഗുമായി ബന്ധപ്പെട്ട ബാക്ക്‌എൻഡ് വിവരങ്ങൾ അപ്‌ഡേറ്റ് ചെയ്യും. തുടർന്ന് ഫാസ്‍ടാഗുമായി ബന്ധപ്പെട്ട സേവനങ്ങൾ പുതിയ ബാങ്ക് കൈകാര്യം ചെയ്യും.

3. പണമടയ്ക്കുന്നത് എങ്ങനെ?

എൻഎച്ച്എഐയുടെ രാജ്‍മാർഗ്‌യാത്ര ആപ്പ് വഴിയാണ് ഉപയോക്താക്കൾക്ക് വൺടാഗ് സൗകര്യം ഉപയോഗിക്കാനാകുന്നത്. ടോൾ പേയ്‌മെന്റുകൾ മുമ്പത്തെപ്പോലെ തന്നെ എൻഇടിസി സംവിധാനത്തിലൂടെ പ്രോസസ് ചെയ്യും. അതിനാൽ ടോൾ പ്ലാസകളിൽ ഫാസ്റ്റാഗ് ഉപയോഗിച്ച് പണം അടയ്ക്കുന്ന രീതിയിൽ കാര്യമായ മാറ്റമുണ്ടാകില്ല.

4. പഴയ ഫാസ്‍ടാഗിലെ ബാലൻസ് എന്താകും?

ബാങ്ക് മാറ്റുന്നതോടെ പഴയ ഫാസ്റ്റാഗ് വാലറ്റിലെ ബാലൻസ് പുതിയ ബാങ്കിലേക്ക് സ്വയമേവ കൈമാറില്ല. പഴയ ബാങ്കിന്റെ കൈവശമുള്ള ബാലൻസ്, റീഫണ്ട്, തീർപ്പാക്കാത്ത ഇടപാടുകൾ തുടങ്ങിയവ നിലവിലെ ഇഷ്യൂ ചെയ്യുന്ന ബാങ്ക് തന്നെ തീർപ്പാക്കും. അതിനാൽ ബാങ്ക് മാറുന്നതിന് മുമ്പ് പഴയ ഫാസ്റ്റാഗിലെ ബാലൻസും തീർപ്പാക്കാത്ത ഇടപാടുകളും പരിശോധിക്കുന്നത് പ്രധാനമാണ്.

5. എന്തിനാണ് വൺടാഗ്?

ഫാസ്‍ടാഗ് നൽകുന്ന ബാങ്ക് മാറ്റുന്നത് കൂടുതൽ എളുപ്പമാക്കുകയാണ് വൺടാഗിന്റെ പ്രധാന ലക്ഷ്യം. നിലവിലെ ബാങ്കിന്റെ സേവനത്തിൽ തൃപ്‍തി ഇല്ലാത്ത ഉപയോക്താക്കൾക്ക് മറ്റൊരു ബാങ്കിലേക്ക് മാറാൻ ഇനി വാഹനത്തിലെ ഫാസ്റ്റാഗ് സ്റ്റിക്കർ നീക്കം ചെയ്ത് പുതിയതൊന്ന് പതിപ്പിക്കേണ്ടതില്ല. പോർട്ടബിലിറ്റി പൂർത്തിയായാൽ ഫാസ്‍ടാഗ് അക്കൗണ്ടുമായി ബന്ധപ്പെട്ട സേവനങ്ങളും തുടർന്നുള്ള മാനേജ്മെന്റും പുതിയ ബാങ്ക് ഏറ്റെടുക്കും.

ഇന്ത്യക്കാർക്ക് സന്തോഷവാർത്ത; അബുദാബിയിലേക്ക് സൗജന്യ യുഎഇ വിസ, ചെയ്യേണ്ടത് ഇത്രമാത്രം!

Prashobh Prasannan — Tue, 11 Aug 2026 14:57:54 +0530

ഇന്ത്യൻ സഞ്ചാരികൾക്ക് സന്തോഷവാർത്ത. കുറഞ്ഞത് മൂന്ന് രാത്രിയെങ്കിലും അബുദാബിയിൽ അവധിക്കാലം ചെലവഴിക്കാൻ ഹോട്ടൽ ബുക്ക് ചെയ്യുന്ന ഇന്ത്യൻ പാസ്‌പോർട്ട് ഉടമകൾക്ക് യുഎഇ പ്രവേശന വിസ സൗജന്യമായി ലഭിക്കും. പുതിയ വിനോദസഞ്ചാര പദ്ധതിയുടെ ഭാഗമായാണ് അബുദാബി അധികൃതർ ഈ ആനുകൂല്യം പ്രഖ്യാപിച്ചത്. അബുദാബി സാംസ്‍കാരിക-വിനോദസഞ്ചാര വകുപ്പ് പ്രഖ്യാപിച്ച പദ്ധതി ഓഗസ്റ്റ് ഒന്ന് മുതൽ ഒക്ടോബർ 31, 2026 വരെയാണ് പ്രാഥമികമായി നടപ്പാക്കുന്നത്. പദ്ധതിയുടെ ആദ്യഘട്ടത്തിൽ പരമാവധി 20,000 വിസകൾക്കാണ് ആനുകൂല്യം ലഭിക്കുക.

വിസയുടെ മുഴുവൻ ചെലവും അധികൃതർ വഹിക്കും

പദ്ധതിയിൽ പങ്കെടുക്കുന്ന അംഗീകൃത യാത്രാ പങ്കാളികൾ വഴിയോ ഓൺലൈൻ യാത്രാ ഏജൻസികൾ വഴിയോ ബുക്ക് ചെയ്യുന്ന അർഹമായ അവധിക്കാല പാക്കേജുകൾക്കാണ് സൗജന്യ വിസ ലഭിക്കുക. യാത്രാ പാക്കേജ് പദ്ധതിയുടെ നിബന്ധനകൾ പാലിക്കുന്നുണ്ടെങ്കിൽ യുഎഇ പ്രവേശന വിസയ്ക്കായി അധിക തുക നൽകേണ്ടതില്ല. അതായത്, യോഗ്യരായ യാത്രക്കാരുടെ വിസ ചെലവ് അബുദാബി സാംസ്കാരിക-വിനോദസഞ്ചാര വകുപ്പ് പൂർണമായും വഹിക്കും.

ആർക്കൊക്കെ ആനുകൂല്യം ലഭിക്കും?

ഇന്ത്യയിൽ നിന്ന് യാത്ര പുറപ്പെടുന്ന ഇന്ത്യൻ പാസ്‌പോർട്ട് ഉടമകൾക്കാണ് പദ്ധതിയുടെ ആനുകൂല്യം ലഭിക്കുക. സൗജന്യ വിസ ലഭിക്കാൻ ചില നിബന്ധനകൾ പാലിക്കണം. പദ്ധതിയിൽ പങ്കെടുക്കുന്ന യാത്രാ പങ്കാളിയോ ഓൺലൈൻ യാത്രാ ഏജൻസിയോ വഴി യാത്ര ബുക്ക് ചെയ്യണം. അബുദാബിയിലെ ഹോട്ടലിൽ തുടർച്ചയായി കുറഞ്ഞത് മൂന്ന് രാത്രിയെങ്കിലും താമസിക്കുകയും വേണം. ഇതിന് പുറമെ ഇന്ത്യയിൽ നിന്ന് പുറപ്പെട്ട് ഇന്ത്യയിലേക്ക് മടങ്ങുന്ന വിമാന ടിക്കറ്റും ഉണ്ടായിരിക്കണം.

എങ്ങനെയാണ് സൗജന്യ വിസ ലഭിക്കുക?

പദ്ധതിയിൽ പങ്കെടുക്കുന്ന യാത്രാ കമ്പനികൾക്ക് രണ്ട് രീതികളിലൂടെയാണ് വിസ നടപടികൾ പൂർത്തിയാക്കാൻ കഴിയുക. അബുദാബി സാംസ്‍കാരിക-വിനോദസഞ്ചാര വകുപ്പ് നിയോഗിച്ച ഡെസ്റ്റിനേഷൻ മാനേജ്മെന്റ് കമ്പനി വഴി യാത്രാ കമ്പനികൾക്ക് വിസ നടപടികൾ നടത്താം. ഈ സാഹചര്യത്തിൽ വിസയുടെ ചെലവ് വകുപ്പ് നേരിട്ട് വഹിക്കും. അല്ലെങ്കിൽ യാത്രാ പങ്കാളികൾക്ക് നിലവിൽ പ്രവർത്തിക്കുന്ന ഡെസ്റ്റിനേഷൻ മാനേജ്മെന്റ് കമ്പനികളുമായി തന്നെ സഹകരിച്ച് വിസ നടപടികൾ തുടരാം. ഈ രീതിയിൽ അനുവദിക്കുന്ന ഓരോ വിസയ്ക്കും 285 ദിർഹം വീതം അബുദാബി സാംസ്കാരിക-വിനോദസഞ്ചാര വകുപ്പ് തിരികെ നൽകും.

ഇന്ത്യ പ്രധാന വിപണി

മൂന്ന് മാസത്തെ പരീക്ഷണാടിസ്ഥാനത്തിലുള്ള പദ്ധതിയുടെ ഭാഗമായി ആദ്യഘട്ടത്തിൽ 20,000 വിസകൾ വരെയാണ് സൗജന്യമായി നൽകുക. ഇന്ത്യൻ വിപണിയുമായുള്ള ബന്ധം കൂടുതൽ ശക്തമാക്കുന്നതിന്റെ ഭാഗമായാണ് പദ്ധതി നടപ്പാക്കുന്നതെന്ന് അബുദാബി സാംസ്കാരിക-വിനോദസഞ്ചാര വകുപ്പ് അറിയിച്ചു. വിമാന സർവീസുകളുടെ ബന്ധം ശക്തിപ്പെടുത്തുക, യാത്രാ മേഖലയിലെ പങ്കാളിത്തം വിപുലീകരിക്കുക, കൂടുതൽ ഇന്ത്യൻ സഞ്ചാരികൾക്ക് അബുദാബി സന്ദർശിക്കാനുള്ള അവസരങ്ങൾ ഒരുക്കുക തുടങ്ങിയ ലക്ഷ്യങ്ങളും പദ്ധതിക്കുണ്ട്.

ഇന്ത്യ അബുദാബിയുടെ ഏറ്റവും പ്രധാനപ്പെട്ട അന്താരാഷ്ട്ര വിപണികളിലൊന്നാണെന്ന് അന്താരാഷ്ട്ര പ്രവർത്തനങ്ങളുടെ ഡയറക്ടർ അബ്ദുല്ല യൂസുഫ് പറഞ്ഞു. ഇന്ത്യൻ യാത്രക്കാർക്ക് അബുദാബിയിലേക്കുള്ള യാത്ര കൂടുതൽ എളുപ്പമാക്കുന്നതിനൊപ്പം, വിനോദസഞ്ചാര കേന്ദ്രമായി അബുദാബിയെ ശുപാർശ ചെയ്യാൻ യാത്രാ പങ്കാളികൾക്ക് കൂടുതൽ പ്രോത്സാഹനം നൽകുകയാണ് പദ്ധതിയിലൂടെ ലക്ഷ്യമിടുന്നതെന്നും അദ്ദേഹം വ്യക്തമാക്കി. അബുദാബിയുടെ സംസ്കാരം, വിനോദപരിപാടികൾ, ആതിഥേയത്വം, പ്രകൃതിസൗന്ദര്യം എന്നിവ ആസ്വദിക്കാൻ കൂടുതൽ ഇന്ത്യൻ സഞ്ചാരികളെ വരും മാസങ്ങളിൽ സ്വാഗതം ചെയ്യാനാകുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേർത്തു.

ദക്ഷിണാഫ്രിക്കൻ യാത്ര: വിസ ഇനി വിരൽത്തുമ്പിൽ!

Prashob Mon — Mon, 03 Aug 2026 14:02:37 +0530

ഇന്ത്യൻ പൗരന്മാർക്കായി ഇലക്ട്രോണിക് ട്രാവൽ ഓതറൈസേഷൻ സംവിധാനം ആരംഭിച്ച് ദക്ഷിണാഫ്രിക്ക. ഇനി ഹ്രസ്വകാല സന്ദർശനങ്ങൾക്കായി വിസ അപേക്ഷാ കേന്ദ്രങ്ങളിൽ നേരിട്ട് പോകേണ്ടതില്ല. മുഴുവൻ നടപടിക്രമങ്ങളും ഓൺലൈനായി പൂർത്തിയാക്കി 24 മുതൽ 48 മണിക്കൂറിനുള്ളിൽ ഡിജിറ്റൽ യാത്രാനുമതി ലഭ്യമാക്കുകയാണ് പുതിയ സംവിധാനത്തിന്റെ ലക്ഷ്യം.

ടൂറിസം, സന്ദർശനം, ചില ബിസിനസ് ആവശ്യങ്ങൾ എന്നിവയ്ക്കായി 90 ദിവസം വരെ ദക്ഷിണാഫ്രിക്കയിൽ താമസിക്കാനാണ് ഇലക്ട്രോണിക് ട്രാവൽ ഓതറൈസേഷൻ അനുവദിക്കുന്നത്. പരമ്പരാഗത വിസ സ്റ്റിക്കറിന് പകരമായി യാത്രക്കാരന്റെ പാസ്‌പോർട്ടുമായി ഡിജിറ്റലായി ബന്ധിപ്പിച്ചിരിക്കുന്ന യാത്രാനുമതിയാണ് ഇനി ലഭിക്കുക.

ഇലക്ട്രോണിക് ട്രാവൽ ഓതറൈസേഷന്റെ കാലാവധിക്കുള്ളിൽ ഒന്നിലധികം തവണ രാജ്യത്ത് പ്രവേശിക്കാൻ സാധിക്കും. എന്നാൽ തൊഴിൽ ആവശ്യങ്ങൾക്കോ ദീർഘകാല താമസത്തിനോ ഈ സംവിധാനം ഉപയോഗിക്കാനാവില്ല. കൂടാതെ, യാത്രാനുമതി ലഭിച്ചാലും ദക്ഷിണാഫ്രിക്കയിൽ പ്രവേശനം അനുവദിക്കണമോ എന്ന അന്തിമ തീരുമാനം വിമാനത്താവളത്തിലെ കുടിയേറ്റ പരിശോധനാ ഉദ്യോഗസ്ഥരുടേതായിരിക്കും. നിലവിൽ ഇന്ത്യ, ചൈന, ഇൻഡോനേഷ്യ, മെക്സിക്കോ എന്നീ രാജ്യങ്ങളിലെ സാധാരണ പാസ്‌പോർട്ട് കൈവശമുള്ള അർഹരായ യാത്രക്കാർക്കാണ് ഈ സേവനം ലഭ്യമാക്കിയിരിക്കുന്നത്.

ആദ്യഘട്ടത്തിൽ ഒ. ആർ. ടാംബോ അന്താരാഷ്ട്ര വിമാനത്താവളം (ജൊഹന്നാസ്ബർഗ്), കേപ് ടൗൺ അന്താരാഷ്ട്ര വിമാനത്താവളം, ലാൻസീരിയ അന്താരാഷ്ട്ര വിമാനത്താവളം എന്നിവ വഴിയെത്തുന്ന യാത്രക്കാർക്ക് മാത്രമാണ് ഈ ഡിജിറ്റൽ യാത്രാനുമതി ഉപയോഗിക്കാനാകുക. വരും മാസങ്ങളിൽ കൂടുതൽ വിമാനത്താവളങ്ങളും പ്രവേശനകേന്ദ്രങ്ങളും പദ്ധതിയുടെ ഭാഗമാക്കുമെന്ന് ദക്ഷിണാഫ്രിക്കയുടെ ആഭ്യന്തരകാര്യ വകുപ്പ് അറിയിച്ചു.

എങ്ങനെ അപേക്ഷിക്കാം?

ദക്ഷിണാഫ്രിക്കയുടെ ആഭ്യന്തരകാര്യ വകുപ്പിന്റെ ഔദ്യോഗിക ഇലക്ട്രോണിക് ട്രാവൽ ഓതറൈസേഷൻ പോർട്ടൽ വഴിയാണ് അപേക്ഷ സമർപ്പിക്കേണ്ടത്. അപേക്ഷകർ ആദ്യം പോർട്ടലിൽ അക്കൗണ്ട് സൃഷ്ടിക്കണം. തുടർന്ന് യാത്രയ്ക്ക് ഉപയോഗിക്കുന്ന പാസ്‌പോർട്ടിന്റെ ചിത്രം അപ്‌ലോഡ് ചെയ്യുകയും വ്യക്തിഗത വിവരങ്ങളും യാത്രാ വിവരങ്ങളും ഓൺലൈൻ ഫോമിൽ പൂരിപ്പിക്കുകയും വേണം.

ശേഷം സ്‍മാർട്ട്ഫോൺ ഉപയോഗിച്ച് തത്സമയ ബയോമെട്രിക് ചിത്രം പകർത്തി തിരിച്ചറിയൽ സ്ഥിരീകരിക്കണം. തുടർന്ന് അപേക്ഷാ ഫീസ് ഓൺലൈനായി അടച്ച് അപേക്ഷ സമർപ്പിക്കാം. അപേക്ഷയുടെ പുരോഗതി തത്സമയം പോർട്ടലിലൂടെ പരിശോധിക്കാനും സൗകര്യമുണ്ട്. അപേക്ഷ അംഗീകരിച്ചാൽ യാത്രാനുമതി യാത്രക്കാരന്റെ പാസ്‌പോർട്ടുമായി ഡിജിറ്റലായി ബന്ധിപ്പിക്കും. ഇതോടെ വിസ സ്റ്റിക്കറിന്റെ ആവശ്യമില്ലാതാകും. കൂടാതെ ക്യൂആർ കോഡ് ഉൾപ്പെടുന്ന ഡിജിറ്റൽ സ്ഥിരീകരണവും ലഭിക്കും. യാത്രയ്ക്കിടെ ഇത് ഹാജരാക്കിയാൽ മതിയാകും.

വിസ അപേക്ഷാ നടപടികൾ പൂർണമായും ഡിജിറ്റലാക്കി നടപടിക്രമങ്ങൾ ലളിതമാക്കുകയും അപേക്ഷകൾ വേഗത്തിൽ തീർപ്പാക്കുകയും ചെയ്യുക എന്നതാണ് പുതിയ സംവിധാനത്തിന്റെ പ്രധാന ലക്ഷ്യമെന്ന് ദക്ഷിണാഫ്രിക്കയുടെ ആഭ്യന്തരകാര്യ വകുപ്പ് വ്യക്തമാക്കി.

സ്പെയിനിലേക്ക് പോകുന്നോ? ഈ 10 തെറ്റുകൾ ചെയ്താൽ പിഴ ലക്ഷങ്ങൾ; യാത്രയ്ക്ക് മുമ്പ് അറിയാം

Prashobh Prasannan — Sat, 01 Aug 2026 15:53:48 +0530

ലോകത്തിലെ ഏറ്റവും കൂടുതൽ സന്ദർശകരെ ആകർഷിക്കുന്ന രാജ്യങ്ങളിലൊന്നാണ് സ്പെയിൻ. എന്നാൽ വിനോദസഞ്ചാരികളുടെ എണ്ണം വർധിച്ചതോടെ പൊതുസ്ഥലങ്ങളിലെ അച്ചടക്കലംഘനങ്ങൾ നിയന്ത്രിക്കാൻ സ്‍പെയിനിലെ വിവിധ നഗരങ്ങളും പ്രാദേശിക ഭരണകൂടങ്ങളും കർശന നിയമങ്ങളാണ് നടപ്പാക്കുന്നത്. യാത്രയ്ക്ക് മുമ്പ് പ്രാദേശിക നിയമങ്ങൾ അറിയാതെ പോയാൽ വലിയ പിഴകൾ നേരിടേണ്ടി വന്നേക്കാം. സ്പെയിനിലെ പല നഗരങ്ങളിലും നിയമങ്ങൾ ഒരുപോലെയല്ല. പ്രത്യേകിച്ച് ബാഴ്സലോണ, മല്ലോർക്ക, ഇബിസ, ബെനിഡോം തുടങ്ങിയ വിനോദസഞ്ചാര കേന്ദ്രങ്ങളിൽ പ്രാദേശിക ചട്ടങ്ങൾ കർശനമായി നടപ്പാക്കുന്നുണ്ട്. അതിനാൽ യാത്രക്കാർ സന്ദർശിക്കുന്ന സ്ഥലത്തെ നിയമങ്ങൾ മുൻകൂട്ടി പരിശോധിക്കുന്നത് സുരക്ഷിതമാണ്.

1. പൊതുസ്ഥലങ്ങളിൽ മദ്യപിച്ചാൽ പിഴ

തെരുവുകളിലും ചില പൊതുസ്ഥലങ്ങളിലും മദ്യപിക്കുന്നത് സ്പെയിനിലെ പല മേഖലകളിലും നിയന്ത്രിച്ചിട്ടുള്ളതാണ്. പ്രത്യേകിച്ച് ബാലിയാറിക് ദ്വീപുകൾ പോലുള്ള വിനോദസഞ്ചാര മേഖലകളിൽ നിയമലംഘനം നടത്തിയാൽ സ്ഥലത്തുവെച്ചുതന്നെ പിഴ ചുമത്താൻ സാധിക്കും. ചില പ്രദേശങ്ങളിൽ പിഴ ആയിരക്കണക്കിന് യൂറോ വരെ ഉയരാം.

2. ബീച്ചിൽ പുകവലി സൂക്ഷിക്കണം

സ്പെയിനിലെ നിരവധി ബീച്ചുകളിൽ പുകവലിക്ക് നിയന്ത്രണമുണ്ട്. ചില പ്രദേശങ്ങളിൽ സിഗരറ്റ് വലിക്കുന്നതിനും ബീച്ചിൽ മാലിന്യം ഉപേക്ഷിക്കുന്നതിനും പിഴ ചുമത്തുന്നുണ്ട്. പുതിയ പുകയില നിയന്ത്രണ നിർദേശങ്ങൾ പ്രകാരം ബീച്ചുകൾ ഉൾപ്പെടെയുള്ള കൂടുതൽ തുറന്ന ഇടങ്ങളിൽ പുകവലി നിരോധനം വ്യാപിപ്പിക്കാനുള്ള നടപടികളും പുരോഗമിക്കുകയാണ്.

3. ബീച്ച് ഷവറിൽ സോപ്പ് ഉപയോഗിക്കരുത്

കടൽത്തീരത്തെ ഷവറുകളിൽ സോപ്പ്, ഷാംപൂ തുടങ്ങിയവ ഉപയോഗിക്കുന്നത് ചില നഗരങ്ങളിൽ നിരോധിച്ചിട്ടുണ്ട്. ജല മലിനീകരണം ഒഴിവാക്കാനാണ് ഇത്തരം നിയന്ത്രണങ്ങൾ കൊണ്ടുവന്നിരിക്കുന്നത്.

4. ബീച്ചിൽ സ്ഥലം പിടിച്ചിടുന്നത് പ്രശ്‍നമാകാം

അനുമതിയില്ലാതെ കുട, കസേര തുടങ്ങിയവ ഉപയോഗിച്ച് ബീച്ചിൽ വലിയ സ്ഥലം കൈവശപ്പെടുത്തുന്നതും ചില പ്രദേശങ്ങളിൽ നിയമവിരുദ്ധമായി കണക്കാക്കുന്നു. പ്രാദേശിക ചട്ടങ്ങൾ അനുസരിച്ച് പിഴ ലഭിക്കാം.

5. സ്വിംവെയറിൽ നഗരത്തിലൂടെ നടക്കുന്നത് ഒഴിവാക്കുക

ബീച്ചിന് പുറത്തുള്ള നഗരവീഥികളിൽ സ്വിംസ്യൂട്ട് മാത്രം ധരിച്ച് നടക്കുന്നത് ചില വിനോദസഞ്ചാര നഗരങ്ങളിൽ നിരോധിച്ചിട്ടുണ്ട്. പൊതുശീലങ്ങളും നഗരത്തിന്റെ അന്തരീക്ഷവും സംരക്ഷിക്കാനാണ് ഈ നിയന്ത്രണം.

6. അമിത ശബ്‍ദവും രാത്രി ബഹളവും ഒഴിവാക്കണം

ഹോട്ടലുകളിലും താമസസ്ഥലങ്ങളിലും രാത്രി സമയത്ത് അമിത ശബ്‍ദമുണ്ടാക്കി മറ്റുള്ളവർക്ക് ബുദ്ധിമുട്ടുണ്ടാക്കിയാൽ പിഴ നേരിടേണ്ടിവരും. പ്രത്യേകിച്ച് വിനോദസഞ്ചാര മേഖലകളിൽ ശബ്ദ നിയന്ത്രണ നിയമങ്ങൾ കർശനമാണ്.

7. പൊതുമുതൽ നശിപ്പിച്ചാൽ നടപടി

പൊതു സ്ഥലങ്ങളിലെ സൗകര്യങ്ങൾ നശിപ്പിക്കൽ, ചുമരുകളിൽ എഴുത്തുകൾ വരയ്ക്കൽ തുടങ്ങിയ പ്രവർത്തനങ്ങൾക്കും സ്പെയിനിൽ കർശന നടപടിയുണ്ട്.

8. ലഹരിവസ്‍തു ക്കളുടെ കാര്യത്തിൽ ജാഗ്രത

അനധികൃത ലഹരിവസ്‍തുക്കളുടെ കൈവശംവെക്കലും ഉപയോഗവും ഗുരുതര കുറ്റമാണ്. പൊതുസ്ഥലങ്ങളിൽ ഇത്തരം വസ്‍തുക്കളുമായി പിടിക്കപ്പെട്ടാൽ നിയമനടപടികൾ നേരിടേണ്ടി വരാം.

9. പ്രാദേശിക നിയമങ്ങൾ അറിയാതെ യാത്ര ചെയ്യരുത്

സ്പെയിനിലെ ഓരോ നഗരത്തിനും സ്വന്തം നിയമങ്ങളുണ്ട്. ബാഴ്സലോണയിലെ നിയമങ്ങൾ മാഡ്രിഡിൽ നിന്ന് വ്യത്യസ്‍തമായിരിക്കാം. അതിനാൽ യാത്രയ്ക്ക് മുമ്പ് സന്ദർശിക്കുന്ന നഗരത്തിന്റെ ഔദ്യോഗിക നിർദേശങ്ങൾ പരിശോധിക്കുന്നത് നല്ലതാണ്.

10. വിനോദം ആസ്വദിക്കുമ്പോൾ നിയമം മറക്കരുത്

സ്പെയിൻ യാത്ര കൂടുതൽ മനോഹരമാക്കാൻ പ്രാദേശിക സംസ്‍കാരത്തെയും നിയമങ്ങളെയും മാനിക്കുക എന്നതാണ് പ്രധാന കാര്യം. ചെറിയൊരു അശ്രദ്ധ പോലും വലിയ പിഴയിലേക്കും യാത്രാ ബുദ്ധിമുട്ടുകളിലേക്കും നയിക്കാം.

നിയമങ്ങൾ പാലിച്ച് യാത്ര ചെയ്താൽ സ്പെയിനിലെ മനോഹരമായ ബീച്ചുകളും നഗരങ്ങളും സംസ്‍കാരവും തടസങ്ങളില്ലാതെ ആസ്വദിക്കാൻ സാധിക്കും.

ടോൾ യാത്രക്കാർക്ക് ആശ്വാസം; ഫാസ്‍ടാഗിൽ പുതിയ മാറ്റം

Prashobh Prasannan — Thu, 20 Aug 2026 13:46:43 +0530

ദേശീയപാതകളിലൂടെ സ്ഥിരമായി യാത്ര ചെയ്യുന്നവർക്ക് ആശ്വാസമായി പുതിയ സംവിധാനം. രാജ്യത്തെ 121 ടോൾ പ്ലാസകളിൽ ദേശീയപാത അതോറിറ്റി ഓഫ് ഇന്ത്യ ഓൺലൈൻ ഫാസ്റ്റാഗ് ലോക്കൽ പാസ് സൗകര്യം ആരംഭിച്ചു. യോഗ്യതയുള്ളവർക്ക് ഇനി ടോൾ പ്ലാസയിൽ നേരിട്ട് എത്താതെ തന്നെ മൊബൈൽ ആപ്പ് വഴി ലോക്കൽ പാസിന് അപേക്ഷിക്കാം. റോഡ് ഗതാഗത, ദേശീയപാത മന്ത്രാലയമാണ് പുതിയ സംവിധാനത്തെക്കുറിച്ച് അറിയിച്ചത്. ഇതോടെ താമസസ്ഥലം തെളിയിക്കുന്ന രേഖകൾ ഉൾപ്പെടെയുള്ളവ ടോൾ പ്ലാസയിലെത്തി സമർപ്പിക്കേണ്ട ബുദ്ധിമുട്ട് ഒഴിവാകും.

20 കിലോമീറ്റർ പരിധിയിൽ താമസിക്കുന്നവർക്ക്

യോഗ്യമായ ടോൾ പ്ലാസയുടെ 20 കിലോമീറ്റർ ചുറ്റളവിൽ താമസിക്കുന്നവർക്കാണ് ലോക്കൽ പാസ് ലഭിക്കുക. ദേശീയപാത ഉപയോക്താക്കൾക്ക് രാജമാർഗയാത്ര മൊബൈൽ ആപ്പ് വഴി അപേക്ഷ സമർപ്പിക്കാം. യോഗ്യമായ ടോൾ പ്ലാസകളുടെ പട്ടികയും രാജമാർഗയാത്ര വെബ്സൈറ്റിൽ പരിശോധിക്കാം. അപേക്ഷകന്റെ താമസ വിലാസവും വാഹന വിവരങ്ങളും പരിശോധിച്ച ശേഷമായിരിക്കും പാസ് അനുവദിക്കുക.

നേരത്തെ ടോൾ പ്ലാസയിലെത്തണം

ലോക്കൽ പാസ് ലഭിക്കുന്നതിനായി നേരത്തെ യാത്രക്കാർ അതത് ടോൾ പ്ലാസ സന്ദർശിക്കേണ്ടിവന്നിരുന്നു. 20 കിലോമീറ്റർ പരിധിക്കുള്ളിലാണ് താമസിക്കുന്നതെന്ന് തെളിയിക്കുന്ന രേഖകൾ ഉൾപ്പെടെ ആവശ്യമായ രേഖകൾ നേരിട്ട് സമർപ്പിക്കണമായിരുന്നു. പുതിയ ഡിജിറ്റൽ സംവിധാനം വന്നതോടെ ഈ നടപടിക്രമം കൂടുതൽ എളുപ്പമാകും. അപേക്ഷയും പരിശോധനയും ഓൺലൈനായി പൂർത്തിയാക്കാനാകും.

ഡിജിറ്റൽ പരിശോധനയും

ഡിജിറ്റൽ ലോക്കൽ പാസ് സംവിധാനത്തിൽ ഡിജിലോക്കർ, വാഹന വിവര ശേഖരം തുടങ്ങിയ സർക്കാർ ഡിജിറ്റൽ പ്ലാറ്റ്‌ഫോമുകളുമായി സമ്മതത്തിന്റെ അടിസ്ഥാനത്തിലുള്ള സംയോജനമാണ് ഉപയോഗിക്കുന്നത്. യാത്രക്കാരന്റെ താമസ വിലാസം, വാഹന വിവരങ്ങൾ, ബന്ധപ്പെട്ട ഫാസ്റ്റാഗ് തുടങ്ങിയ വിവരങ്ങൾ പരിശോധിച്ച ശേഷമാണ് യോഗ്യത ഉറപ്പാക്കുക. കൂടാതെ ഭൂപട അധിഷ്ഠിത പരിശോധനയിലൂടെയും അപേക്ഷകന്റെ രജിസ്റ്റർ ചെയ്ത വിലാസം ടോൾ പ്ലാസയുടെ 20 കിലോമീറ്റർ പരിധിയിലാണോ എന്ന് പരിശോധിക്കും.

മാസം മുഴുവൻ പരിധിയില്ലാത്ത യാത്ര

ബാധകമായ നിയമങ്ങൾ അനുസരിച്ച് ലോക്കൽ പാസ് ലഭിക്കുന്നവർക്ക് ഒരു മാസം മുഴുവൻ ബന്ധപ്പെട്ട ടോൾ പ്ലാസയിലൂടെ പരിധിയില്ലാതെ യാത്ര ചെയ്യാം. അതുകൊണ്ടുതന്നെ ദിവസേനയോ പതിവായോ ഇതുവഴി യാത്ര ചെയ്യുന്നവർക്ക് പുതിയ സംവിധാനം വലിയ സാമ്പത്തിക നേട്ടം നൽകും. ഡൽഹിയിലെ നഗര വിപുലീകരണ റോഡ് 2-ലെ മുണ്ട്ക-ബക്കർവാല ടോൾ പ്ലാസയിലാണ് 2026 ജൂലൈയിൽ ആദ്യമായി ഡിജിറ്റൽ ലോക്കൽ പാസ് സൗകര്യം ആരംഭിച്ചത്. തുടർന്ന് രാജ്യത്തെ കൂടുതൽ ടോൾ പ്ലാസകളിലേക്ക് സംവിധാനം വ്യാപിപ്പിക്കുകയായിരുന്നു.

വാർഷിക ഫാസ്റ്റാഗ് പാസും

ദേശീയപാതകളിലെ ടോൾ ചെലവ് കുറയ്ക്കാൻ വാർഷിക ഫാസ്റ്റാഗ് പാസ് സംവിധാനവും നിലവിലുണ്ട്. 3000 രൂപയാണ് വാർഷിക പാസിന്റെ നിരക്ക്. ഇതിലൂടെ 200 തവണ വരെ ടോൾ പ്ലാസ കടക്കാം. ഒരു തവണ ടോൾ പ്ലാസ കടക്കുന്നതാണ് ഒരു യാത്രയായി കണക്കാക്കുന്നത്. അതായത് 200 യാത്രകൾ ഉപയോഗിച്ചാൽ ഓരോ യാത്രയ്ക്കും ശരാശരി 15 രൂപ മാത്രമായിരിക്കും ചെലവ്.

എല്ലാ എക്സ്പ്രസ് വേകളിലും ബാധകമല്ല

കാറുകൾ, ജീപ്പുകൾ, വാനുകൾ തുടങ്ങിയ വാണിജ്യേതര സ്വകാര്യ വാഹനങ്ങൾക്കാണ് വാർഷിക ഫാസ്‍ടാഗ് പാസ് പ്രധാനമായും ഉപയോഗിക്കാനാകുന്നത്. ദേശീയപാതകളിലെയും ദേശീയ എക്സ്പ്രസ് വേകളിലെയും നിർദ്ദിഷ്ട ടോൾ പ്ലാസകളിലാണ് ഇത് ബാധകം. എന്നാൽ സംസ്ഥാന സർക്കാരുകളോ പ്രാദേശിക അധികാരികളോ നിയന്ത്രിക്കുന്ന ടോൾ റോഡുകളിൽ വാർഷിക പാസ് ബാധകമല്ല. മുംബൈ-പുണെ എക്സ്പ്രസ് വേ, മുംബൈ-നാഗ്പൂർ എക്സ്പ്രസ് വേ, അടൽ സേതു, ആഗ്ര-ലഖ്നൗ എക്സ്പ്രസ് വേ, ബെംഗളൂരു-മൈസൂർ എക്സ്പ്രസ് വേ, അഹമ്മദാബാദ്-വഡോദര എക്സ്പ്രസ് വേ തുടങ്ങിയ പാതകളിൽ സാധാരണ ഫാസ്റ്റാഗ് രീതിയിലുള്ള ടോൾ ഈടാക്കും.

യുനെസ്കോ ലോക പൈതൃക പട്ടികയിൽ സാരനാഥ്; ഇന്ത്യയ്ക്ക് അഭിമാന നേട്ടം

Prashobh Prasannan — Sun, 02 Aug 2026 17:05:06 +0530

ലോകത്തിന്റെ സാംസ്‍കാരികവും പ്രകൃതിദത്തവുമായ പൈതൃക സമ്പത്തുകളെ സംരക്ഷിക്കുന്നതിന്റെ ഭാഗമായി യുനെസ്കോ 2026-ലെ ലോക പൈതൃക പട്ടികയിലേക്ക് 25 പുതിയ ഇടങ്ങൾ കൂടി ഉൾപ്പെടുത്തി. ഇതോടെ ലോക പൈതൃക പട്ടികയിലെ ആകെ ഇടങ്ങളുടെ എണ്ണം 1,273 ആയി. ദക്ഷിണ കൊറിയയിലെ ബുസാനിൽ ജൂലൈ 19 മുതൽ 29 വരെ നടന്ന ലോക പൈതൃക സമിതിയുടെ 48-ാമത് സമ്മേളനത്തിലാണ് പുതിയ പട്ടികയ്ക്ക് അംഗീകാരം നൽകിയത്. കൊമോറോസ്, സാവോ ടോമെ ആൻഡ് പ്രിൻസിപ്പെ, ദക്ഷിണ സുഡാൻ എന്നീ രാജ്യങ്ങളിൽ നിന്നുള്ള കേന്ദ്രങ്ങൾ ആദ്യമായാണ് ലോക പൈതൃക പട്ടികയിൽ ഇടം നേടുന്നതെന്നതും ഇത്തവണത്തെ പ്രത്യേകതയാണ്.

ഇന്ത്യയ്ക്ക് അഭിമാനം; സാരനാഥ് പട്ടികയിൽ

ഇന്ത്യയിൽ നിന്ന് ഇത്തവണ ലോക പൈതൃക പട്ടികയിൽ ഇടംനേടിയത് സാരനാഥിലെ പുരാതന ബൗദ്ധ കേന്ദ്രം ആണ്. ഗൗതമ ബുദ്ധൻ ബോധോദയത്തിന് ശേഷം തന്റെ ആദ്യ ധർമ്മപ്രഭാഷണം നടത്തിയ സ്ഥലമായാണ് സാരനാഥ് ലോകമെമ്പാടുമുള്ള ബൗദ്ധ വിശ്വാസികൾക്കിടയിൽ അറിയപ്പെടുന്നത്. പ്രധാന പുരാവസ്‍തു കേന്ദ്രവും തീർഥാടന കേന്ദ്രവുമായ സാരനാഥിന്‍റെ ചരിത്രപരവും ആത്മീയവുമായ പ്രാധാന്യമാണ് യുനെസ്കോയുടെ അംഗീകാരത്തിന് വഴിയൊരുക്കിയത്.

ആദ്യമായി അംഗീകാരം നേടിയ രാജ്യങ്ങൾ

ഈ വർഷം ലോക പൈതൃക പട്ടികയിൽ ആദ്യമായി ഇടംനേടിയ രാജ്യങ്ങളിൽ കൊമോറോസ്, സാവോ ടോമെ ആൻഡ് പ്രിൻസിപ്പെ, ദക്ഷിണ സുഡാൻ എന്നിവ ഉൾപ്പെടുന്നു. കൊമോറോസിലെ ചരിത്രപ്രസിദ്ധമായ സുൽത്താനേറ്റുകളുടെ നഗരങ്ങളും, സാവോ ടോമെ ആൻഡ് പ്രിൻസിപ്പെയിലെ കൊളോണിയൽ കാലഘട്ടത്തിലെ തോട്ടം സമുച്ചയങ്ങളും, ദക്ഷിണ സുഡാനിലെ ബോമ-ബാഡിംഗിലോ വന്യജീവി കുടിയേറ്റ മേഖലയും പട്ടികയിൽ ഇടംപിടിച്ചു.

ചരിത്രവും പ്രകൃതിയും ഒരുപോലെ

ഇത്തവണ പട്ടികയിൽ ഇടംപിടിച്ച കേന്ദ്രങ്ങളിൽ പുരാതന നഗരങ്ങൾ, ബൗദ്ധ ക്ഷേത്രങ്ങൾ, മധ്യകാല കോട്ടകൾ, പ്രകൃതി സംരക്ഷണ മേഖലകൾ, സമുദ്ര ആവാസവ്യവസ്ഥകൾ, ആധുനിക വാസ്‍തുവിദ്യാ സൃഷ്ടികൾ തുടങ്ങി വൈവിധ്യമാർന്ന പൈതൃക കേന്ദ്രങ്ങളുണ്ട്. ഫിൻലൻഡിലെ ആൽവർ ആൽട്ടോ രൂപകൽപ്പന ചെയ്ത കെട്ടിട സമുച്ചയങ്ങൾ, ഇറാനിലെ അലമൂത് കോട്ട, ബ്രസീലിലെ ആമസോൺ മേഖലയിലെ ചരിത്രപ്രസിദ്ധമായ നാടകശാലകൾ, ജപ്പാനിലെ അസുകയുടെയും ഫുജിവാരയുടെയും പുരാതന തലസ്ഥാനങ്ങൾ, ജോർദാനിലെ അഖബ സമുദ്ര സംരക്ഷണ മേഖല എന്നിവയും പുതിയ പട്ടികയിൽ ഉൾപ്പെട്ടു.

യൂറോപ്പിലെയും അമേരിക്കയിലെയും പ്രധാന കേന്ദ്രങ്ങൾ

ഫ്രാൻസിലെ നോർമണ്ടിയിലെ രണ്ടാം ലോകമഹായുദ്ധത്തിലെ ഡി-ഡേ ലാൻഡിങ് തീരങ്ങൾ, പോളണ്ടിലെ ഗ്‍ദിനിയ മോഡേണിസ്റ്റ് നഗരകേന്ദ്രം, ഇറ്റലിയിലെ ചരിത്രപ്രസിദ്ധമായ തിയേറ്റർ ശൃംഖല, ഡെൻമാർക്കിലെ പുരാതന മത്സ്യ ഫോസിൽ കേന്ദ്രം എന്നിവയും ലോക പൈതൃക പട്ടികയിൽ ഇടം നേടി. അമേരിക്കയിലെ ജോർജിയ–ഫ്ലോറിഡ അതിർത്തിയിലുള്ള ഒകെഫെനോക്കി ദേശീയ വന്യജീവി സങ്കേതവും പുതിയ പട്ടികയിൽ ഉൾപ്പെട്ടിട്ടുണ്ട്. കരടികൾ, ചീങ്കണ്ണികൾ, അപൂർവ പക്ഷികൾ എന്നിവയുടെ ആവാസകേന്ദ്രമായ ഈ ചതുപ്പുനിലം പരിസ്ഥിതി പ്രാധാന്യം കൊണ്ടാണ് ശ്രദ്ധേയമായത്.

ഏഷ്യയിലെ നിരവധി കേന്ദ്രങ്ങൾക്കും അംഗീകാരം

ചൈനയിലെ ജിങ്‌ദെഷെൻ പോഴ്‌സലൻ വ്യവസായ കേന്ദ്രം, കസാക്കിസ്ഥാനിലെ പാറകൾ തുരന്ന് നിർമിച്ച പള്ളികൾ, ഉസ്ബെക്കിസ്ഥാനിലെ താഷ്കെന്റിലെ മോഡേണിസ്റ്റ് വാസ്‍തുവിദ്യാ സമുച്ചയം, തായ്‌ലൻഡിലെ വാട് ഫ്രാ മഹാതാത് ബൗദ്ധ ക്ഷേത്രം, ഗ്രീസ് രാജ്യത്തെ ഒളിമ്പസ് പർവത പ്രദേശം എന്നിവയും ഇത്തവണ പട്ടികയിൽ ഇടംപിടിച്ചു.

ലോക പൈതൃക സംരക്ഷണത്തിന് പുതിയ അധ്യായം

ലോകത്തിന്റെ സാംസ്‍കാരികവും പ്രകൃതിദത്തവുമായ പൈതൃക സമ്പത്ത് സംരക്ഷിക്കുകയെന്ന ലക്ഷ്യത്തോടെയാണ് യുനെസ്കോ ലോക പൈതൃക പട്ടിക തയ്യാറാക്കുന്നത്. ഓരോ വർഷവും വിവിധ രാജ്യങ്ങളിൽ നിന്ന് സമർപ്പിക്കുന്ന നാമനിർദേശങ്ങൾ വിശദമായി പരിശോധിച്ച ശേഷമാണ് അന്തിമ പട്ടിക പ്രഖ്യാപിക്കുന്നത്.

അമേരിക്കൻ വിസയ്ക്ക് 17 ലക്ഷം രൂപ ബോണ്ട് വേണം; പുതിയ നിയമവുമായി ട്രംപ്

Prashob Mon — Mon, 03 Aug 2026 14:16:40 +0530

അമേരിക്കയിലേക്കുള്ള യാത്രയ്ക്കായി അപേക്ഷിക്കുന്ന ചില വിദേശ പൗരന്മാർക്ക് ഇനി 20,000 അമേരിക്കൻ ഡോളർ (ഏകദേശം 17 ലക്ഷം രൂപ) വരെ വിസ ബോണ്ട് നിർബന്ധമാക്കുന്ന പദ്ധതി സ്ഥിരനിയമമാക്കി അമേരിക്ക. പ്രധാനമായും ആഫ്രിക്കൻ രാജ്യങ്ങൾ ഉൾപ്പെടുന്ന 50 രാജ്യങ്ങളിലെ പൗരന്മാർക്കാണ് പുതിയ ചട്ടം ബാധകമാകുക. ഇതുസംബന്ധിച്ച അന്തിമ വിജ്ഞാപനം അമേരിക്കൻ ഫെഡറൽ രജിസ്റ്ററിൽ പ്രസിദ്ധീകരിച്ചു.

കുടിയേറ്റ നിയമങ്ങൾ പാലിക്കുന്നത് ഉറപ്പാക്കുക ലക്ഷ്യം

ബിസിനസ് ആവശ്യങ്ങൾക്കുള്ള ബി–1 വിസയും ടൂറിസം ആവശ്യങ്ങൾക്കുള്ള ബി–2 വിസയും അപേക്ഷിക്കുന്നവർക്കാണ് പുതിയ വ്യവസ്ഥ ബാധകമാകുക. ഓരോ അപേക്ഷയും പരിശോധിക്കുന്ന കോൺസുലർ ഉദ്യോഗസ്ഥരുടെ തീരുമാനപ്രകാരമായിരിക്കും ബോണ്ട് തുക നിശ്ചയിക്കുക. പുതിയ ചട്ടപ്രകാരം, വിസ അനുവദിക്കുന്നതിന് മുമ്പ് അപേക്ഷകരോട് 20,000 ഡോളർ വരെ ബോണ്ട് കെട്ടിവെക്കാൻ കോൺസുലർ ഉദ്യോഗസ്ഥർക്ക് ആവശ്യപ്പെടാം. മുൻപ് പരീക്ഷണാടിസ്ഥാനത്തിൽ നടപ്പാക്കിയ പദ്ധതിയിൽ 5,000 ഡോളർ, 10,000 ഡോളർ, 15,000 ഡോളർ എന്നിങ്ങനെയായിരുന്നു ബോണ്ട് തുക. ഇപ്പോൾ 5,000 ഡോളർ എന്ന ഓപ്ഷൻ ഒഴിവാക്കുകയും പരമാവധി ബോണ്ട് 20,000 ഡോളറായി ഉയർത്തുകയും ചെയ്തു.

2026 ഓഗസ്റ്റ് മൂന്ന് മുതൽ പുതിയ ചട്ടം പ്രാബല്യത്തിൽ വരും. പദ്ധതിയിൽ ഉൾപ്പെടുത്തിയിരിക്കുന്ന 50 രാജ്യങ്ങളിൽ 30 രാജ്യങ്ങളും ആഫ്രിക്കയിൽ നിന്നുള്ളവയാണ്. വിസ കാലാവധി കഴിഞ്ഞിട്ടും അമേരിക്കയിൽ തുടരുന്നവരുടെ എണ്ണം കുറയ്ക്കുകയും കുടിയേറ്റ നിയമങ്ങൾ പാലിക്കുന്നത് ഉറപ്പാക്കുകയും ചെയ്യുക എന്നതാണ് പുതിയ സംവിധാനത്തിന്റെ ലക്ഷ്യമെന്ന് അമേരിക്കൻ അധികൃതർ വ്യക്തമാക്കി. 2025-ൽ പരീക്ഷണാടിസ്ഥാനത്തിൽ നടപ്പാക്കിയ വിസ ബോണ്ട് പദ്ധതിയുടെ ഫലങ്ങൾ വിലയിരുത്തിയ ശേഷമാണ് ഇത് സ്ഥിരനിയമമാക്കാൻ തീരുമാനിച്ചതെന്നും അധികൃതർ അറിയിച്ചു.

പ്രതികൂലമായി ബാധിക്കുമെന്ന് കുടിയേറ്റ അവകാശ പ്രവർത്തകർ

അതേസമയം, പുതിയ നടപടി നിയമാനുസൃതമായി അമേരിക്കയിലേക്ക് യാത്ര ചെയ്യാൻ ആഗ്രഹിക്കുന്നവരെയും പ്രതികൂലമായി ബാധിക്കുമെന്ന് കുടിയേറ്റ അവകാശ പ്രവർത്തകർ വിമർശിച്ചു. ഉയർന്ന ബോണ്ട് തുക പലരെയും യാത്രയിൽ നിന്ന് പിന്തിരിപ്പിക്കുമെന്നും അവർ ചൂണ്ടിക്കാട്ടുന്നു. പ്രസിഡന്റ് ഡൊണാൾഡ് ട്രംപിന്റെ കടുത്ത കുടിയേറ്റ നയങ്ങൾ അഭിപ്രായസ്വാതന്ത്ര്യത്തെയും നിയമപരമായ നടപടിക്രമങ്ങളെയും ബാധിക്കുന്നതാണെന്നും, വംശീയ ന്യൂനപക്ഷങ്ങൾക്കിടയിൽ ആശങ്ക സൃഷ്ടിക്കുന്നതാണെന്നും മനുഷ്യാവകാശ സംഘടനകൾ ആരോപിക്കുന്നു. എന്നാൽ ദേശീയ സുരക്ഷ ശക്തിപ്പെടുത്താനും അനധികൃത കുടിയേറ്റം നിയന്ത്രിക്കാനുമാണ് ഈ നടപടികളെന്ന് ട്രംപ് ഭരണകൂടം വിശദീകരിക്കുന്നു.

അനധികൃത കുടിയേറ്റം തടയുമെന്ന് പ്രഖ്യാപിച്ച ട്രംപ് ഭരണകൂടം, ചില വിസ വിഭാഗങ്ങളിലെ അപേക്ഷാ ഫീസ് വർധിപ്പിക്കൽ, സോഷ്യൽ മീഡിയ അക്കൗണ്ടുകളുടെ വിശദമായ പരിശോധന ഉൾപ്പെടെയുള്ള നടപടികളിലൂടെ നിയമാനുസൃത കുടിയേറ്റ നടപടിക്രമങ്ങളും കൂടുതൽ കർശനമാക്കിയിട്ടുണ്ട്.

കാനഡയിലേക്ക് പറക്കാൻ ഇനി കുറച്ച് സമയം മതി; ഡൽഹി-ടൊറന്‍റോ നോൺ-സ്റ്റോപ്പ് സർവീസുമായി എയർ ഇന്ത്യ

Prashob Mon — Mon, 27 Jul 2026 16:05:34 +0530

ഇന്ത്യയിൽ നിന്ന് കാനഡയിലേക്കുള്ള വിമാനയാത്ര കൂടുതൽ വേഗത്തിലും സൗകര്യപ്രദമായും മാറ്റാൻ ഒരുങ്ങി എയർ ഇന്ത്യ. 2026 ഓഗസ്റ്റ് 1 മുതൽ ഡൽഹി-ടൊറന്റോ റൂട്ടിൽ നോൺ-സ്റ്റോപ്പ് സർവീസ് ആരംഭിക്കുമെന്ന് കമ്പനി അറിയിച്ചു. ഇതോടൊപ്പം ആഴ്ചയിൽ അഞ്ച് സർവീസുകൾ നടത്തിയിരുന്ന റൂട്ടിൽ ഇനി എല്ലാ ദിവസവും സർവീസ് ലഭ്യമാകും. പുതിയ ബോയിങ് 787-9 വിമാനങ്ങളാണ് ഈ റൂട്ടിൽ സർവീസ് നടത്തുക.

വിയന്നയിലെ സ്റ്റോപ്പിന് വിരാമം

നിലവിൽ ഡൽഹിയിൽ നിന്ന് ടൊറന്റോയിലേക്കുള്ള എയർ ഇന്ത്യ സർവീസുകൾ ഓസ്ട്രിയയിലെ വിയന്നയിൽ ഇന്ധനം നിറയ്ക്കുന്നതിനായി സാങ്കേതിക ഇടവേള നടത്താറുണ്ട്. ഓഗസ്റ്റ് 1 മുതൽ നോൺ-സ്റ്റോപ്പ് സർവീസ് ആരംഭിക്കുന്നതോടെ ഈ സ്റ്റോപ്പ് ഒഴിവാക്കും. ഇതോടെ നിലവിലെ ഏകദേശം 20 മണിക്കൂർ യാത്രാസമയം 17 മണിക്കൂറായി കുറയും. ടൊറന്റോയിൽ നിന്ന് ഡൽഹിയിലേക്കുള്ള മടക്കയാത്രയ്ക്ക് ഏകദേശം 16 മണിക്കൂർ മതിയാകുമെന്നും കമ്പനി വ്യക്തമാക്കുന്നു.

എല്ലാ ദിവസവും സർവീസ്

ഡൽഹിയിൽ നിന്ന് ടൊറന്റോയിലേക്കുള്ള സർവീസുകളുടെ എണ്ണം ആഴ്ചയിൽ അഞ്ചിൽ നിന്ന് ഏഴായി ഉയർത്തും. AI187 വിമാനം ഡൽഹിയിൽ നിന്ന് പുലർച്ചെ 1.45ന് പുറപ്പെട്ട് പ്രാദേശിക സമയം രാവിലെ 9.30ന് ടൊറന്റോയിലെത്തും. AI188 വിമാനം ടൊറന്റോയിൽ നിന്ന് ഉച്ചയ്ക്ക് 12.30ന് പുറപ്പെട്ട് അടുത്ത ദിവസം ഉച്ചയ്ക്ക് 2.05ന് ഡൽഹിയിലെത്തും.

പുതിയ ബോയിങ് 787-9 വിമാനത്തിന്റെ പ്രത്യേകതകൾ

ഈ റൂട്ടിൽ വിന്യസിക്കുന്ന പുതിയ ബോയിങ് 787-9 വിമാനങ്ങളിൽ എയർ ഇന്ത്യയുടെ നവീകരിച്ച കാബിൻ സൗകര്യങ്ങളാണ് ഒരുക്കിയിരിക്കുന്നത്. ബിസിനസ് ക്ലാസിൽ നേരിട്ട് ഐൽ ആക്‌സസ്, പൂർണമായും കിടക്കയാക്കാവുന്ന സീറ്റുകൾ, വയർലെസ് ചാർജിങ്, 17 ഇഞ്ച് 4കെ എന്റർടെയ്ൻമെന്റ് സ്ക്രീനുകൾ എന്നിവ ലഭിക്കും. പ്രീമിയം ഇക്കോണമി ക്ലാസിൽ കൂടുതൽ ലെഗ്‌റൂം, വിശാല സീറ്റുകൾ, 13.3 ഇഞ്ച് സ്ക്രീനുകൾ എന്നിവ ഉൾപ്പെടുത്തിയിട്ടുണ്ട്. ഇക്കോണമി ക്ലാസിലും 11.6 ഇഞ്ച് 4കെ എന്റർടെയ്ൻമെന്റ് സ്ക്രീനുകളും വ്യക്തിഗത ഉപകരണങ്ങൾ സ്ഥാപിക്കാനുള്ള സൗകര്യവും ലഭിക്കും.

യാത്രാനുഭവം കൂടുതൽ മെച്ചപ്പെടും

പുതിയ വിമാനങ്ങളിൽ 3,000 മണിക്കൂറിലധികം ഇൻ-ഫ്ലൈറ്റ് വിനോദ പരിപാടികൾ, ബ്ലൂടൂത്ത് ഓഡിയോ കണക്റ്റിവിറ്റി, യുഎസ്ബി-എ, യുഎസ്ബി-സി ചാർജിങ് പോർട്ടുകൾ, ഇന്ത്യൻ പാരമ്പര്യത്തിൽ നിന്ന് പ്രചോദനം ഉൾക്കൊണ്ട മൂഡ് ലൈറ്റിങ്, പുതുക്കിയ ഇന്ത്യൻ-അന്താരാഷ്ട്ര വിഭവങ്ങൾ ഉൾപ്പെടുത്തിയ മെനു, നവീകരിച്ച അമിനിറ്റി കിറ്റുകൾ എന്നിവയും യാത്രക്കാർക്ക് ലഭ്യമാകും.

ജൂണിലും ജൂലൈയിലും സർവീസുകൾ കുറച്ചിരുന്നു

വർധിച്ച ഇന്ധനവിലയും ഭൗമരാഷ്ട്രീയ സാഹചര്യങ്ങളും കണക്കിലെടുത്ത് ജൂൺ, ജൂലൈ മാസങ്ങളിൽ ഈ റൂട്ടിലെ സർവീസുകൾ എയർ ഇന്ത്യ ആഴ്ചയിൽ അഞ്ചായി ചുരുക്കിയിരുന്നു. ഓഗസ്റ്റ് മുതൽ നോൺ-സ്റ്റോപ്പ് സർവീസും ദിവസേനയുള്ള സർവീസും ആരംഭിക്കുന്നതോടെ ഇന്ത്യ-കാനഡ യാത്രക്കാർക്ക് യാത്രാസമയം ലാഭിക്കാനും കൂടുതൽ സൗകര്യപ്രദമായ യാത്രാനുഭവം നേടാനും സാധിക്കും.