പാക് വ്യോമസേനയെക്കാളും കൂടുതൽ തിരഞ്ഞത് ഇന്ത്യൻ വ്യോമസേനയെ; ട്രെൻഡിങ്ങായി ബാലാക്കോട്ടും സർജിക്കൽ സ്ട്രൈക്കും
ഇന്ത്യ ബാലാകോട്ടിൽ ആക്രണമം നടത്തി മണിക്കൂറുകൾക്കുള്ളിലാണ് പാകിസ്ഥാനിൽ ഗൂഗിളിൽ ബാലാകോട്ട് എന്ന വാക്ക് ട്രെൻഡിങ്ങിൽ വന്നത്. ഇന്ത്യയിൽ രാവിലെ ഏകദേശം 8.50ഓടുകൂടിയാണ് സർജിക്കൽ സ്ട്രൈക്ക് എന്ന വാക്ക് ട്രെൻഡിങ്ങായി മാറിയത്.
ദില്ലി: ബാലാകോട്ട് ഭീകരാക്രമണത്തിന് ശേഷം പാക് വ്യോമസേനയെക്കാൾ കൂടുതൽ പാകിസ്ഥാനികൾ ഗൂഗിളിൽ തിരഞ്ഞത് ഇന്ത്യൻ വ്യോമസേനയെ. പാകിസ്ഥാൻ അതിർത്തി കടന്ന് ബാലാകോട്ടിൽ ഇന്ത്യൻ വ്യോമസേന ആക്രമണ നടത്തിയ ദിവസമാണ് പാകിസ്ഥാനികൾ ഇന്ത്യൻ വ്യോമസേനയെ ഗൂഗിളിൽ ഏറ്റവും കൂടുതല്‍ തിരഞ്ഞത്.
ഇന്ത്യൻ വ്യോമസേന, പാക് വ്യോമസേന എന്നിങ്ങനെ രണ്ടായി തിരിച്ചാണ് ഗൂഗിൽ വിശകലനം നടത്തിയത്. ഇന്ത്യയിൽ 'സർജിക്കൽ സ്ട്രൈക്ക്' എന്ന വാക്കാണ് ആളുകൾ ഏറ്റവും കൂടുതൽ തിരഞ്ഞത്. അതേസമയം പാകിസ്ഥാനിലെ ആളുകൾ ഏറ്റവും കൂടുതൽ തിരഞ്ഞത് 'ബാലാക്കോട്ട്' ആണ്.
ഇന്ത്യ ബാലാകോട്ടിൽ ആക്രമണം നടത്തി മണിക്കൂറുകൾക്കുള്ളിലാണ് പാകിസ്ഥാനിൽ ഗൂഗിളിൽ ബാലാകോട്ട് എന്ന വാക്ക് ട്രെൻഡിങ്ങിൽ വന്നത്. ഇന്ത്യയിൽ രാവിലെ ഏകദേശം 8.50ഓടുകൂടിയാണ് സർജിക്കൽ സ്ട്രൈക്ക് എന്ന വാക്ക് ട്രെൻഡിങ്ങായി മാറിയത്. ഇന്ത്യയിൽ ട്വിറ്ററിലെ ട്രെൻഡിങ്ങ് ഹാഷ് ടാഗും സർജിക്കൽ സ്ട്രൈക്ക് തന്നെയായിരുന്നു.
പുല്‍വാമ ഭീകരാക്രമണം നടന്ന് 12 ദിവസങ്ങൾക്കുള്ളിലാണ് പാകിസ്ഥാനിലെ ഭീകരവാദികളുടെ ക്യാമ്പുകളിലേക്ക് ഇന്ത്യൻ വ്യോമസേന ആക്രമണം നടത്തിയത്. ബുധനാഴ്ച പുലര്‍ച്ചെ 3:45ന് ആക്രമണം തുടങ്ങിയ ഇന്ത്യൻ വ്യോമസേന ജയ്ഷെ മുഹമ്മദ്, ലഷ്കര്‍ ഇ തോയിബ, ഹിസ്ബുള്‍ മുജാഹിദ്ദിന്‍ എന്നിവയുടെ സംയുക്തക്യാമ്പ് തകര്‍ത്തതായാണ് റിപ്പോർട്ട്. പിന്നീട് പുലര്‍ച്ചെ 3:48 മുതൽ 3:53 വരെ മുസഫറബാദിലെ ഭീകര ക്യാമ്പുകളിലേക്കും സൈനിക നടപടിയുണ്ടായി. പുലര്‍ച്ചെ 3:58ന് ചകോതിയിലെത്തിയ സംഘം 4:04 വരെ ആക്രമണം നടത്തി. ചകോതിയിലെ ഭീകര ക്യാമ്പുകളും തകര്‍ത്ത് ഇന്ത്യന്‍ സംഘം മടങ്ങി.
