ഋഷഭ് ഷെട്ടി തുറക്കുന്ന കാന്താരയുടെ ലോകം

2022ൽ കാന്താര തിയേറ്ററുകളിൽ കണ്ടത് ഓർക്കുന്നുണ്ടോ.. കെജിഎഫിന്റെ പ്രൊഡക്ഷൻ സ്കെയിലും പാൻ ഇന്ത്യൻ റീച്ചും സെറ്റ് ചെയ്ത് വച്ച ബഞ്ച് മാർക്കിലേയ്ക്ക് അതേ പ്രൊഡക്ഷൻ കമ്പനിയുടെ അധികമാരും അറിയാത്ത ഒരു കൊച്ചു ചിത്രം എത്തി. തുടക്കത്തിൽ ചുരുങ്ങിയ സ്ക്രീനുകളിൽ റിലീസ് ചെയ്ത കാന്താര പിന്നീട് 400 സ്ക്രീനുകളിലേക്ക് വ്യാപിക്കുകയും നിരവധി റെക്കോർഡുകൾ തകർക്കുകയും ചെയ്തതാണ് കേരളത്തിലെ മാത്രം കണക്കുകൾ. കെജിഎഫ് ഉണ്ടാക്കിയ വാർപ്പ് മാതൃകയിലേയ്ക്ക് പറിച്ച് വയ്ക്കാതെ കന്നഡ സിനിമയ്ക്ക് മറ്റൊരു ബെഞ്ച് മാർക്ക് സൃഷ്ടിച്ചു നൽകുകയായിരുന്നു കാന്താര. സാംസ്കാരികമായ പ്രമേയത്തിൽ വേരൂന്നിയ യുണീക് ആയ കഥ പറച്ചിൽ കന്നഡ സിനിമയുടെ ആഴവും സാധ്യതയും ലോകത്തിന് കാണിച്ചുകൊടുത്തു. മാസ് മസാല എന്ന ചേരുവയല്ല ഒരു സിനിമയെ പാൻ ഇന്ത്യൻ ആക്കുന്നതെന്ന ബോധ്യം ഇന്ത്യൻ സിനിമയ്ക്ക് തന്നെ നൽകി കാന്താര.