അടുക്കള അണുവിമുക്തമാക്കാം

വീട്ടിൽ എപ്പോഴും വൃത്തിയുണ്ടാകേണ്ട സ്ഥലമാണ് അടുക്കള. അഴുക്ക് മാത്രമല്ല അണുക്കളുടെയും വാസസ്ഥലമാണ് അടുക്കള. അണുവിമുക്തമാക്കാൻ ഇങ്ങനെ ചെയ്യൂ.

അടുക്കളയിൽ പാത്രങ്ങൾ സൂക്ഷിക്കുന്ന ഇടവും വൃത്തിയുള്ളതായിരിക്കണം. ഓരോ തവണ ഉപയോഗം കഴിയുമ്പോഴും പാത്രങ്ങൾ നന്നായി കഴുകി വൃത്തിയാക്കണം. കഴുകിയതിന് ശേഷം ഉണക്കാനും മറക്കരുത്.

അടുക്കളയിൽ ഭക്ഷണ സാധനങ്ങളുടെ സുരക്ഷ ഉറപ്പാക്കേണ്ടതും പ്രധാനമാണ്. ഉപയോഗിക്കുന്നതിന് മുമ്പ് പച്ചക്കറികൾ നന്നായി കഴുകി വൃത്തിയാക്കാൻ മറക്കരുത്.

അടുക്കളയിൽ സാധനങ്ങൾ സൂക്ഷിക്കുന്ന ഇടമാണ് കൗണ്ടർടോപുകൾ. പഴങ്ങളും പച്ചക്കറികളും മറ്റ് ഭക്ഷണ സാധനങ്ങളും സൂക്ഷിക്കുന്നതുകൊണ്ട് തന്നെ ഇവിടെയും അണുക്കൾ ഉണ്ടാകുന്നു.

റെഫ്രിജറേറ്റർ, മൈക്രോവേവ്, ഓവൻ തുടങ്ങി പലതരം ഉപകരണങ്ങളാണ് അടുക്കളയിൽ ഉപയോഗിക്കുന്നത്. ഇത്തരം ഉപകരണങ്ങളിലും അണുക്കൾ മറഞ്ഞിരിപ്പുണ്ടാകാം. ഉപയോഗം കഴിഞ്ഞാൽ വൃത്തിയാക്കാൻ മറക്കരുത്.

വെള്ളത്തിൽ കുറച്ച് വിനാഗിരി ചേർത്തതിന് ശേഷം സ്പോഞ്ചിൽ മുക്കി ഉപകരണങ്ങൾ തുടച്ചെടുത്താൽ അണുവിമുക്തമാക്കാൻ സാധിക്കും.

ഇടയ്ക്കിടെ നാരങ്ങ നീര് ഉപയോഗിച്ച് അടുക്കള കൗണ്ടർടോപ് വൃത്തിയാക്കാൻ ശ്രദ്ധിക്കണം. നാരങ്ങ നീരും ഉപ്പും ചേർത്ത് തുടച്ചെടുത്താൽ മതി. ഇത് അണുക്കളെ ഇല്ലാതാക്കാൻ സഹായിക്കുന്നു.

അടുക്കളയിൽ ഗ്യാസ് സ്റ്റൗവിന്റെ ഭാഗത്താണ് ഏറ്റവും കൂടുതൽ അണുക്കൾ ഉണ്ടാകുന്നത്. സോപ്പ് പൊടിയും വെള്ളവും ഉപയോഗിച്ച് നന്നായി കഴുകിയാൽ അണുവിമുക്തമാക്കാം.