ജീപ്പിന്‍റെ പുതിയ എസ്‍യുവിയുടെ ചിത്രങ്ങള്‍ പുറത്ത്

ഐക്കണിക്ക് വാഹനബ്രാന്‍ഡ് ജീപ്പിന്‍റെ പുതിയ എസ്‍യുവി മോ‍ഡലിന്‍റെ ചിത്രങ്ങലും വിവരങ്ങളും പുറത്ത്. ബീജിങ്​ മോട്ടോർ ഷോയിൽ അവതരിപ്പിക്കുമെന്ന്​ പ്രതീക്ഷിക്കുന്ന , ആഗോള വിപണിയിൽ എത്താനിരിക്കുന്ന ഗ്രാൻഡ്​ കമാൻഡറി​​​ന്‍റെ വിവരങ്ങളാണ് പുറത്തായത്.

കഴിഞ്ഞ ഷാൻഹായ്​ മോ​ട്ടോർ ഷോയിലാണ്​ ഈ എസ്​.യു.വിയുടെ മാതൃക ജീപ്പ് ആദ്യം​ അവതരിപ്പിച്ചത്​.  യുന്തു കൺസെപ്​റ്റിൽ നിന്ന്​ പ്രചോദനമുൾക്കൊണ്ടാണ്​ വാഹനത്തിന്‍റെ ഡിസൈന്‍. മൂന്ന്​ നിരകളായി ഏഴ്​ സീറ്റുകൾ ഉൾക്കൊള്ളുന്ന കമാൻഡറിന്‍റെ രൂപം ബോക്​സി പ്രൊഫൈലിലായിരിക്കും. സെവൻ സ്ലോട്ട്​ ഗ്രില്ലും ആങ്കുലർ വീൽ ആർച്ചുകളും എൽ.ഇ.ഡി ടെയിൽഗേറ്റുമൊക്കെ പ്രത്യേകതകളാണ്.

ലോഞ്ചിട്ട്യൂട്​, ലിമിറ്റഡ്​, ഓവർലാൻഡ്​, സമ്മിറ്റ്​ എന്നീ നാല്​ വേരിയൻറുകളിലായിരിക്കും വാഹനം വിപണിയിലെത്തുക.  ചൈനയിൽ ഏപ്രിലിൽ വിപണിയിലെത്തുമെങ്കിലും മറ്റ്​ രാജ്യങ്ങളിലെ എസ്​.യു.വിയുടെ വരവിന്​ സംബന്ധിച്ച്​ ജീപ്പ്​ വിവരങ്ങളൊന്നും പുറത്ത്​ വിട്ടിട്ടില്ല. കോംപസ് ഉള്‍പ്പെടെ ജീപ്പിന്‍റെ മോഡലുകള്‍ അടുത്തകാലത്ത് ഇന്ത്യയില്‍ തരംഗമായ സാഹചര്യത്തില്‍ രാജ്യത്തെ വാഹനപ്രേമികള്‍ ഗ്രാന്‍ഡ് കമാന്‍ഡറിന്‍റെ അരങ്ങേറ്റം ആകാംക്ഷയോടെയാണ് വീക്ഷിക്കുന്നത്.