ഔഡി കാറുകൾക്ക് വന്‍വിലക്കുറവ്

കാറുകള്‍ക്ക് വന്‍വിലക്കിഴിവുമായി ജർമൻ ആഡംബര കാർ നിർമാതാക്കളായ ഔഡി. ക്രിസ്മസ്, നവവത്സരാഘോഷവേള പ്രമാണിച്ചു പ്രഖ്യാപിച്ച ഔഡി റഷ് എന്ന പദ്ധതിയിലൂടെ തിരഞ്ഞെടുത്ത ഔഡി മോഡലുകള്‍ക്ക് വിലയിൽ 8.85 ലക്ഷം രൂപയുടെ വരെ കിഴിവ് ലഭിക്കും.

എ ത്രീ, എ ഫോർ, എ സിക്സ്, ക്യു ത്രീ തുടങ്ങിയവയ്ക്കാണു കമ്പനി പ്രത്യേക വിലയും ആകർഷക ഇ എം ഐയും ലഭ്യമാക്കുന്നത്. വിവിധ മോഡലുകൾക്ക് മൂന്നു ലക്ഷം മുതൽ 8.85 ലക്ഷം രൂപ വരെ വിലക്കിഴിവ് ലഭിക്കുന്നതിനൊപ്പം 2017ൽ വാങ്ങുന്ന കാറിന്റെ വായ്പയുടെ തിരിച്ചടവ് 2019ലാണ് ആരംഭിക്കുകയെന്നതും പ്രത്യേകതയാണ്.

പദ്ധതി അനുസരിച്ച് ലിസ്റ്റ് പ്രൈസ് 31.99 ലക്ഷം വിലയുള്ള എ ത്രീ 26.99 ലക്ഷം രൂപക്കു ലഭിക്കും. 39.97 ലക്ഷം രൂപയ്ക്കു വിറ്റിരുന്ന എ ഫോർ 33.99 ലക്ഷത്തിനും 53.84 ലക്ഷം വിലയുള്ള സെഡാന്‍ എ സിക്സ്  44.99 ലക്ഷം രൂപയ്ക്കും  33.40 ലക്ഷം രൂപയുണ്ടായിരുന്ന എസ് യു വി ക്യു ത്രീ 29.99 ലക്ഷത്തിനും പദ്ധതിയനുസരിച്ച് ലഭിക്കും.