കിയ സിറോസ് ഇവി ഇന്ത്യയിൽ പരീക്ഷണത്തിൽ

കിയയുടെ പുതിയ ഇലക്ട്രിക് വാഹനം, സിറോസ് ഇവി, ഇന്ത്യയിൽ പരീക്ഷണത്തിനിടെ ക്യാമറയിൽ പതിഞ്ഞു. ഐസിഇ എഞ്ചിനുള്ള സിറോസിന് സമാനമായ രൂപകൽപ്പനയും സ്റ്റൈലിംഗും ഇതിനുണ്ട്. 

കിയ ഇന്ത്യയുടെ വാഹനനിരരയിൽ നിലവിൽ EV6, EV9, കാരൻസ് ഇവി പോലുള്ള പ്രീമിയം ഇലക്ട്രിക് വാഹന മോഡലുകൾ ഉണ്ട്. എന്നാൽ ഇപ്പോൾ കമ്പനി മധ്യവർഗത്തെ ലക്ഷ്യമിട്ട് ഒരു പുതിയ ഇലക്ട്രിക് വാഹനം പുറത്തിറക്കാൻ ഒരുങ്ങുകയാണ് . കിയ സിറോസ് ഇവി ആയിരിക്കും ഈ കാർ. ഇപ്പോൾ ഇന്ത്യയിൽ പരീക്ഷണത്തിനിടെ ഈ കാർ ക്യാമറയിൽ പതിഞ്ഞതായാണ് റിപ്പോർട്ടുകൾ.

ബാഹ്യ രൂപകൽപ്പനയിലും സ്റ്റൈലിംഗിലും സിറോസ് ഇവിക്ക് ഐസിഇ എഞ്ചിനുള്ള കിയ സിറോസിനോട് വളരെ സാമ്യമുണ്ട്. ടെസ്റ്റ് പതിപ്പിനെ പൂർണ്ണമായും മൂടിയിരുന്നു. പില്ലറുകൾ, ഓആർവിഎമ്മുകൾ, റൂഫ് റെയിലുകൾ തുടങ്ങിയ ദൃശ്യമാകുന്ന മിക്ക ഭാഗങ്ങളും നിലവിലെ സിറോസിന് സമാനമാണ്. ഒരു ഷാർക്ക് ഫിൻ ആന്റിനയും ദൃശ്യമാണ്. അടച്ച ഗ്രിൽ, ചാർജിംഗ് പോർട്ടിനുള്ള സ്ലോട്ട് തുടങ്ങിയ ഇലക്ട്രിക് വാഹനങ്ങൾക്ക് മാത്രമായുള്ള സവിശേഷതകൾ ഇതിലുണ്ടാകും. ദക്ഷിണ കൊറിയയിൽ നേരത്തെ കണ്ടെത്തിയ ഒരു ടെസ്റ്റ് വാഹനത്തിന് ഇടതുവശത്ത് ചാർജിംഗ് പോർട്ട് ഉണ്ടായിരുന്നു. ഈ ടെസ്റ്റ് വാഹനവും പൂർണ്ണമായും മൂടിയിരുന്നു. എന്നിരുന്നാലും, മുൻവശത്തെയും പിൻവശത്തെയും ലൈറ്റിംഗ് ഘടകങ്ങൾ ഐസിഇ സിറോസിന് സമാനമായി കാണപ്പെട്ടു.

പുതിയ വാഹനത്തിന് മുന്നിലും പിന്നിലും ചില ചെറിയ മാറ്റങ്ങൾ ഉണ്ടാകാം. സൈഡ് പ്രൊഫൈൽ വലിയതോതിൽ അതേപടി തുടരും. കൊറിയയിൽ കണ്ടെത്തിയ ടെസ്റ്റ് വാഹനം നിലവിൽ ഐസിഇ സിറോസിൽ കാണപ്പെടുന്ന അതേ അലോയ് വീലുകളോടെയാണ് കാണപ്പെട്ടത്. വാഹനത്തിന്റെ ഇലക്ട്രിക് ബേസിനെ സൂചിപ്പിക്കുന്ന പച്ച നിറത്തിലുള്ള ബ്രേക്ക് കാലിപ്പറുകൾ മാത്രമാണ് വ്യത്യാസം. പിൻഭാഗത്തും EV-നിർദ്ദിഷ്ട ബാഡ്ജിംഗ് സാധ്യമാണ്.

സിറോസ് ഇവിയുടെ റോഡ് സാന്നിധ്യംഐസിഇ സിറോസിന് സമാനമായിരിക്കും. അതിന്റെ അളവുകൾ സമാനമാകുമെന്ന് പ്രതീക്ഷിക്കുന്നു, അതായത് അതിന്റെ നീളം 3,995 എംഎം, വീതി 1,805 എംഎം, ഉയരം 1,68 എംഎം എന്നിങ്ങനെ ആയിരിക്കും. സിറോസിന്റെ വീൽബേസ് 2,550 എംഎം ആണ്. ഇലക്ട്രിക് പതിപ്പിനായി ചില പ്രത്യേക വർണ്ണ ഓപ്ഷനുകൾ ലഭ്യമായേക്കാം. എങ്കിലും സിറോസ് ഐസിഇ പതിപ്പ് ഇതിനകം തന്നെ എട്ട് ആകർഷകമായ മോണോടോൺ നിറങ്ങളിൽ ലഭ്യമാണ്.

സിറോസ് ഇവിയുടെ ബാറ്ററി പായ്ക്കും റേഞ്ചും സംബന്ധിച്ച വിവരങ്ങൾ ഇതുവരെ ഔദ്യോഗികമായി സ്ഥിരീകരിച്ചിട്ടില്ല. എന്നാൽ സിറോസ് ഇവി ഹ്യുണ്ടായി ഇൻസ്റ്റർ ഇവിയിൽ നിന്ന് ബാറ്ററി പായ്ക്കുകൾ കടമെടുക്കുമെന്ന് പ്രതീക്ഷിക്കുന്നു. ഇൻസ്റ്റർ ഇവിയിൽ 42 kWh അല്ലെങ്കിൽ 49 kWh ബാറ്ററി പായ്ക്ക് ഉപയോഗിക്കുന്നു. ഈ ബാറ്ററി പായ്ക്കുകളിൽ നിക്കൽ മാംഗനീസ് കോബാൾട്ട് (NMC) കെമിസ്ട്രി ഉണ്ട്. വലിയ ബാറ്ററി പായ്ക്ക് ഉപയോഗിച്ച്, ഇതിന് 370 കിലോമീറ്റർ റേഞ്ച് ഉണ്ട്. ഏകദേശം 30 മിനിറ്റിനുള്ളിൽ ഇത് 10% മുതൽ 80% വരെ ചാർജ് ചെയ്യാൻ കഴിയും.

ലോഞ്ച് ചെയ്‍താൽ കിയ സിറോസ് ഇവി പ്രധാനമായും ടാറ്റ പഞ്ച് ഇവി, വിൻഡ്‌സർ ഇവി തുടങ്ങിയ മോഡലുകളെ നേരിടും. ചില വകഭേദങ്ങൾ ടാറ്റ നെക്‌സോൺ ഇവി, മഹീന്ദ്ര എക്സ്‌യുവി 400 ഇവി, വരാനിരിക്കുന്ന മാരുതി സുസുക്കി ഫ്രോങ്ക്സ് ഇവി എന്നിവയുമായും മത്സരിക്കും. സിറോസ് ഇവിയുടെ പ്രാരംഭ വില ഏകദേശം 14 ലക്ഷം രൂപയാകാൻ സാധ്യതയുണ്ട്. ടോപ്പ് വേരിയന്റിന് 20 ലക്ഷം രൂപ വരെ വിലവന്നേക്കും. കിയ കാരെൻസ് ക്ലാവിസ് ഇവിയുടെ വില 17.99 ലക്ഷം മുതൽ 24.49 ലക്ഷം രൂപ വരെയാണ്.