ഒറ്റയടിക്ക് കുറഞ്ഞത് 34 ലക്ഷം രൂപ! ലാൻഡ് റോവർ ഡിഫൻഡറിന് വൻ വിലക്കുറവ്; കാരണമിതാണ്

പൂനെ പ്ലാന്റിൽ പ്രാദേശിക അസംബ്ലി ആരംഭിച്ചതോടെ ലാൻഡ് റോവർ ഡിഫൻഡർ 110 മോഡലിന് ഇന്ത്യയിൽ 34 ലക്ഷം രൂപ വരെ വില കുറച്ചു. ഇതോടെ വാഹനത്തിന്റെ പ്രാരംഭ വില ഒരു കോടി രൂപയിൽ താഴെയായി. വിലക്കുറവിന് പുറമെ കൂടുതൽ ഫീച്ചറുകളും കമ്പനി ഇപ്പോൾ സ്റ്റാൻഡേർഡായി നൽകുന്നുണ്ട്.

ലക്ഷ്വറി എസ്‌യുവി വാങ്ങാൻ ആഗ്രഹിക്കുന്നവർക്ക് ശ്രദ്ധേയമായ വാർത്ത. ലാൻഡ് റോവർ ഡിഫൻഡർ 110 മോഡലിന്റെ തിരഞ്ഞെടുത്ത വകഭേദങ്ങൾക്ക് ഇന്ത്യയിൽ 34 ലക്ഷം രൂപ വരെ വില കുറച്ചു. ജാഗ്വാർ ലാൻഡ് റോവർ പൂനെയിലെ പ്ലാന്റിൽ ഡിഫൻഡറിന്റെ പ്രാദേശിക അസംബ്ലി ആരംഭിച്ചതോടെയാണ് വിലയിൽ വലിയ മാറ്റമുണ്ടായത്. ഇതോടെ ഡിഫൻഡറിന്റെ പ്രാരംഭ വകഭേദം ഒരു കോടി രൂപയിൽ താഴെയുള്ള എക്സ്-ഷോറൂം വിലയിൽ സ്വന്തമാക്കാം.

പുതിയ വില എത്ര?

ഡിഫൻഡർ 110-ന്റെ രണ്ട് ലിറ്റർ ടർബോ പെട്രോൾ എക്സ്-ഡൈനാമിക് എച്ച്എസ്ഇ വകഭേദത്തിന് നേരത്തേ 1.13 കോടി രൂപയായിരുന്ന എക്സ്-ഷോറൂം വില ഇപ്പോൾ 99 ലക്ഷം രൂപയായി കുറഞ്ഞു. ഇതിലൂടെ 14 ലക്ഷം രൂപയുടെ നേട്ടമാണ് ഉപഭോക്താക്കൾക്ക് ലഭിക്കുന്നത്. മൂന്ന് ലിറ്റർ ടർബോ പെട്രോൾ, മൂന്ന് ലിറ്റർ ഡീസൽ വകഭേദങ്ങൾക്കാണ് ഏറ്റവും വലിയ വിലക്കുറവ്. ഈ പതിപ്പുകളുടെ വില 1.52 കോടി രൂപയിൽനിന്ന് 1.18 കോടി രൂപയായി കുറഞ്ഞു. അതായത്, രണ്ട് വകഭേദങ്ങൾക്കും 34 ലക്ഷം രൂപയുടെ കുറവ് ലഭിക്കും. ഈ വിലകൾ എക്സ്-ഷോറൂം നിരക്കുകളാണ്. ഇൻഷുറൻസ്, രജിസ്ട്രേഷൻ തുടങ്ങിയ ചെലവുകൾ കൂടി ഉൾപ്പെടുത്തുമ്പോൾ ഓൺറോഡ് വില ഉയരും.

ഇന്ത്യയിലെ അസംബ്ലി വില കുറച്ചു

നേരത്തേ സ്ലൊവാക്യയിൽ പൂർണമായി നിർമിച്ചശേഷം ഇന്ത്യയിലേക്ക് ഇറക്കുമതി ചെയ്താണ് ഡിഫൻഡർ വിറ്റിരുന്നത്. ഇപ്പോൾ വിദേശത്തുനിന്ന് ഘടകങ്ങൾ എത്തിച്ച് പൂനെയിലെ പ്ലാന്റിൽ അസംബ്ലി ചെയ്യുന്ന രീതിയിലേക്ക് കമ്പനി മാറിയിരിക്കുകയാണ്. പൂർണമായി നിർമിച്ച വാഹനം ഇറക്കുമതി ചെയ്യുന്നതിനെ അപേക്ഷിച്ച് ഈ രീതി ചെലവ് കുറയ്ക്കാൻ സഹായിക്കും. അതിന്റെ നേട്ടം വിലയിലും പ്രതിഫലിക്കുന്നതായാണ് റിപ്പോർട്ടുകൾ.

ഫീച്ചറുകളിലും മാറ്റം

വില കുറച്ചതിനൊപ്പം നേരത്തേ അധികവില നൽകി സ്വന്തമാക്കേണ്ടിയിരുന്ന ചില ഫീച്ചറുകളും സ്റ്റാൻഡേർഡായി ലഭ്യമാക്കിയിട്ടുണ്ട്. രണ്ട് ലിറ്റർ പെട്രോൾ പതിപ്പിൽ 6.5 ലക്ഷം രൂപ വരെ വിലമതിക്കുന്ന ഫീച്ചറുകളും മൂന്ന് ലിറ്റർ പതിപ്പുകളിൽ 17 ലക്ഷം രൂപ വരെ വിലമതിക്കുന്ന ഫീച്ചറുകളും ഉൾപ്പെടുത്തിയിട്ടുണ്ടെന്നാണ് റിപ്പോർട്ടുകൾ. അഡാപ്റ്റീവ് ഓഫ്-റോഡ് ക്രൂയിസ് കൺട്രോൾ, എയർ സസ്പെൻഷൻ, ത്രീ-സോൺ ക്ലൈമറ്റ് കൺട്രോൾ തുടങ്ങിയവ ഇതിൽപ്പെടുന്നു.

ഡിഫൻഡർ 110-ന്റെ പുതുക്കിയ പതിപ്പുകളുടെ ബുക്കിങ് ആരംഭിച്ചിട്ടുണ്ട്. നവംബർ 15 മുതൽ വാഹനങ്ങളുടെ വിതരണം തുടങ്ങാനാണ് കമ്പനിയുടെ പദ്ധതി. അതേസമയം, ഡിഫൻഡർ 90, ഡിഫൻഡർ 130, ഡിഫൻഡർ ഒക്ട എന്നീ മോഡലുകൾക്ക് ഈ വിലക്കുറവ് ബാധകമല്ലെന്നാണ് റിപ്പോർട്ടുകൾ.