കാ‍ർ വാങ്ങാൻ പോകുന്നോ? ജസ്റ്റ് വെയിറ്റ്, വമ്പൻ മൈലേജുമായി ഈ കാറുകൾ അടുത്തമാസം എത്തും

മാരുതി സുസുക്കി ഇ-വിറ്റാര, ബിവൈഡി സീലിയോൺ 7, എംജി M9 ഇലക്ട്രിക് എംപിവി, സൈബർസ്റ്റർ ഇലക്ട്രിക് സ്‌പോർട്‌സ്റ്റർ എന്നിവ ഉൾപ്പെടെ നിരവധി പുതിയ ഇലക്ട്രിക് കാറുകൾ വിപണിയിലെത്തുന്നു. ഈ വാഹനങ്ങൾ വിപുലമായ സവിശേഷതകളും ശ്രദ്ധേയമായ പ്രകടനവും വാഗ്ദാനം ചെയ്യുന്നു, ഇത് ഇലക്ട്രിക് വാഹന വിപണിയിൽ കാര്യമായ സ്വാധീനം ചെലുത്തും.

മാരുതി സുസുക്കി അവരുടെ ആദ്യത്തെ ഇലക്ട്രിക് കാറായ ഇ-വിറ്റാര അവതരിപ്പിക്കും. അതേസമയം ബിവൈഡി സീലിയോൺ 7-നൊപ്പം അവരുടെ ഉൽപ്പന്ന പോർട്ട്‌ഫോളിയോ വികസിപ്പിക്കും. എംജി M9 ഇലക്ട്രിക് എംപിവി, സൈബർസ്റ്റർ ഇലക്ട്രിക് സ്‌പോർട്‌സ്റ്റർ തുടങ്ങിയവ എംജി മോട്ടോഴ്‍സും അവതരിപ്പിക്കും. വരാനിരിക്കുന്ന ഈ ഇവികളുടെ പ്രധാന വിശദാംശങ്ങൾ നമുക്ക് പരിശോധിക്കാം. 

ഇലക്ട്രിക് മാരുതി വിറ്റാര
സ്കേറ്റ്ബോർഡ് ഇ-ഹാർട്ടെക്റ്റ് പ്ലാറ്റ്‌ഫോമിനെ അടിസ്ഥാനമാക്കി, മാരുതി ഇ വിറ്റാര രണ്ട് പവർട്രെയിൻ ഓപ്ഷനുകളോടെ ലഭ്യമാകും - 143 ബിഎച്ച്പി മോട്ടോറുള്ള 49kWh ഉം 173 ബിഎച്ച്പി ഇലക്ട്രിക് മോട്ടോറുള്ള 61kWh ഉം. രണ്ട് സജ്ജീകരണങ്ങളുടെയും ടോർക്ക് ഫിഗർ 192.5Nm ആണ്. വലിയ ബാറ്ററി പായ്ക്കുള്ള ഇലക്ട്രിക് വിറ്റാര 500 കിലോമീറ്ററിൽ കൂടുതൽ (MIDC) റേഞ്ച് വാഗ്ദാനം ചെയ്യുമെന്ന് കമ്പനി പറയുന്നു. അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം സ്യൂട്ട് വാഗ്ദാനം ചെയ്യുന്ന ആദ്യത്തെ മാരുതി സുസുക്കി മോഡലായിരിക്കും ഇത്. നിലവിലുള്ള മാരുതി കാറുകളേക്കാൾ ആധുനികമാണ് ഇ വിറ്റാരയുടെ ഇന്റീരിയർ.

ബിവൈഡി സീലിയോൺ 7
ബിവൈഡി  സീലിയൻ 7 ന്റെ ബുക്കിംഗുകൾ ഇതിനകം രാജ്യവ്യാപകമായി ആരംഭിച്ചിട്ടുണ്ട്. ബിവൈഡി യുടെ 3.0 ഇവോ ബോൺ ഇലക്ട്രിക് പ്ലാറ്റ്‌ഫോമിനെ പിന്തുണയ്ക്കുന്ന ഈ ഇലക്ട്രിക് എസ്‌യുവി, 82.5kWh (പ്രീമിയം RWD), 91.3kWh (പെർഫോമൻസ് AWD) എന്നീ രണ്ട് ബാറ്ററി പായ്ക്കുകളുമായി വരുന്നു. ഇത് ഫുൾ ചാർ‍ജ്ജിൽ പരമാവധി 502 കിലോമീറ്റർ വരെ റേഞ്ച് വാഗ്ദാനം ചെയ്യുന്നു. ചെറിയ ബാറ്ററി പായ്ക്ക് പരമാവധി 313bhp പവറും 380Nm ടോർക്കും നൽകുന്നു. അതേസമയം വലിയ ബാറ്ററി പതിപ്പ് 530bhp പവറും 690Nm ടോർക്കും നൽകുന്നു. 15.6 ഇഞ്ച് കറങ്ങുന്ന ടച്ച്‌സ്‌ക്രീൻ, 50W വയർലെസ് ഫോൺ ചാർജർ, സൺഷെയ്‌ഡുള്ള പനോരമിക് ഗ്ലാസ് റൂഫ്, കണക്റ്റഡ് കാർ ടെക്, എഡിഎഎസ്, വെന്റിലേറ്റഡ് ഫ്രണ്ട് സീറ്റുകൾ തുടങ്ങിയവ ഇതിന്‍റെ പ്രധാന സവിശേഷതകളിൽ ഉൾപ്പെടുന്നു.

എംജി സൈബർസ്റ്റർ
രാജ്യത്തെ ഏറ്റവും താങ്ങാനാവുന്ന വിലയുള്ള ഇലക്ട്രിക് സ്‌പോർട്‌സ് കാറായിരിക്കും എംജി സൈബർസ്റ്റർ. പൂർണ്ണമായും ഇറക്കുമതി ചെയ്ത യൂണിറ്റായാണ് ഇത് ഇവിടെ കൊണ്ടുവരുന്നത്. മാർച്ചിൽ ബുക്കിംഗ് ആരംഭിക്കുമെന്നും ഒരു മാസത്തിനുശേഷം ഡെലിവറികൾ ആരംഭിക്കുമെന്നും കമ്പനി സ്ഥിരീകരിച്ചു. ഓരോ ആക്‌സിലിലും ഒരു മോട്ടോർ ഉള്ള 77kWh ബാറ്ററി പാക്കുമായാണ് സൈബർസ്റ്റർ വരുന്നത്. ഇത് 510bhp കരുത്തും 725Nm ടോർക്കും ഉത്പാദിപ്പിക്കും. ഇത് 3.2 സെക്കൻഡിനുള്ളിൽ 0 മുതൽ 100kmph വരെ വേഗത കൈവരിക്കും. ഒറ്റ ചാർജിൽ (CLTC സൈക്കിൾ) 580 കിലോമീറ്റർ മൈലേജ് സൈബർസ്റ്റർ വാഗ്ദാനം ചെയ്യുന്നുവെന്ന് എംജി അവകാശപ്പെടുന്നു. പിന്നീടുള്ള ഘട്ടത്തിൽ ചെറിയ 64kWh ബാറ്ററി പായ്ക്കും ഇത് വാഗ്ദാനം ചെയ്യാൻ കഴിയും.

എംജി എം9
ജനുവരിയിൽ നടന്ന 2025 ലെ ഭാരത് മൊബിലിറ്റി ഷോയിൽ ഔദ്യോഗികമായി അരങ്ങേറ്റം കുറിച്ചതോടെ എംജി എം9 ആഡംബര ഇലക്ട്രിക് എംപിവിയുടെ പ്രീ-ബുക്കിംഗ് ആരംഭിച്ചു. തിരഞ്ഞെടുത്ത ആഗോള വിപണികളിൽ ഇതിനകം വിൽപ്പനയ്‌ക്കെത്തിയ റീ-ബാഡ്ജ് ചെയ്ത മാക്‌സസ് മിഫ 9 ആണ് ഇത്. 90kWh ലിഥിയം-അയൺ ബാറ്ററിയും FWD (ഫ്രണ്ട്-വീൽ ഡ്രൈവ്) സജ്ജീകരണത്തോടുകൂടിയ ഫ്രണ്ട് ആക്‌സിൽ മൗണ്ടഡ് ഇലക്ട്രിക് മോട്ടോറും M9-ൽ ഉണ്ട്. ഇ-മോട്ടോർ പരമാവധി 245bhp പവറും 350Nm ടോർക്കും പുറപ്പെടുവിക്കുന്നു. ഈ ഇവിക്ക് 430 കിലോമീറ്റർ WLTP ശ്രേണി വാഗ്ദാനം ചെയ്യുന്നു. ഇത് 5.2 മീറ്റർ നീളം അളക്കുന്നു, കൂടാതെ 7, 8 സീറ്റ് കോൺഫിഗറേഷനുകളുമായാണ് വരുന്നത്.