ഇതാ ഹ്യുണ്ടായിയിൽ നിന്നും വരാനിരിക്കുന്ന പുതിയ ഇലക്ട്രിക് കാറുകൾ

2030 ഓടെ ആറ് പുതിയ ഇലക്ട്രിക് വാഹന മോഡലുകൾ പുറത്തിറക്കാൻ ഹ്യുണ്ടായ് പദ്ധതിയിടുന്നു. ബഹുജന വിപണിയിലും താങ്ങാനാവുന്ന വിലയിലും ഇലക്ട്രിക് കാറുകൾ അവതരിപ്പിക്കുന്നതിനുള്ള വൈദ്യുത വാഹന പ്രാദേശികവൽക്കരണ പദ്ധതിയും കമ്പനി വെളിപ്പെടുത്തിയിട്ടുണ്ട്.

ഇന്ത്യയിൽ ഇലക്ട്രിക്ക് വാഹനങ്ങളുടെ പ്രചാരം കൂടുകയാണ്. അതുകൊണ്ടുതന്നെ 2030 സാമ്പത്തിക വർഷത്തോടെ ആറ് പുതിയ മോഡലുകൾ പുറത്തിറക്കാൻ ദക്ഷിണ കൊറയിൻ വാഹന ബ്രാൻഡായ ഹ്യുണ്ടായ് മോട്ടോർ ഇന്ത്യ പദ്ധതിയിടുന്നു. ബഹുജന വിപണിയിലും താങ്ങാനാവുന്ന വിലയിലും ഹ്യുണ്ടായ് ഇലക്ട്രിക് കാറുകൾ അവതരിപ്പിക്കുന്നതിനുള്ള വൈദ്യുത വാഹന പ്രാദേശികവൽക്കരണ പദ്ധതിയും കമ്പനി വെളിപ്പെടുത്തിയിട്ടുണ്ട്.

ഹ്യുണ്ടായിക്ക് ഇതിനകം പ്രാദേശികവൽക്കരിച്ച ബാറ്ററി സിസ്റ്റം അസംബ്ലി (ബിഎസ്എ) ഉണ്ട്. കൂടാതെ സെല്ലുകൾ പ്രാദേശികവൽക്കരിക്കുന്നതിനായി ഒരു ഇന്ത്യൻ പങ്കാളിത്തവും ഹ്യുണ്ടായിക്ക് ഇപ്പോൾ ഉണ്ട്. അതേസമയം ഡ്രൈവ്ട്രെയിൻ, പവർ ഇലക്ട്രോണിക്സ് പ്രാദേശികവൽക്കരണം തുടങ്ങിയ കാര്യങ്ങളിലും കമ്പനി ശ്രദ്ധ കേന്ദ്രീകരിക്കുന്നു. വരാനിരിക്കുന്ന ഇലക്ട്രിക് കാറുകളുടെ പേരുകളും പൂർണ്ണ വിശദാംശങ്ങളും ദക്ഷിണ കൊറിയൻ വാഹന നിർമ്മാതാക്കൾ ഇതുവരെ വെളിപ്പെടുത്തിയിട്ടില്ല. എങ്കിലും, വരാനിരിക്കുന്ന ഹ്യുണ്ടായി ഇലക്ട്രിക് കാറുകളെക്കുറിച്ച് ഇതുവരെ നമുക്കറിയാവുന്ന പ്രധാന വിവരങ്ങൾ ഇതാ:

ഹ്യുണ്ടായി ക്രെറ്റ ഇലക്ട്രിക് ഫെയ്‌സ്‌ലിഫ്റ്റ്

2027 ൽ പുതുക്കിയ ക്രെറ്റ ഇലക്ട്രിക് എസ്‌യുവി എത്തും. പുതിയ കംഫർട്ട് സവിശേഷതകളും സാങ്കേതികവിദ്യയും ഉൾപ്പെടെ കുറഞ്ഞ ഡിസൈൻ മാറ്റങ്ങൾ ഇവിയിൽ ഉണ്ടാകാനാണ് സാധ്യത. നിലവിലുള്ള പവർട്രെയിനുകൾ നിലനിർത്തുമെന്ന് പ്രതീക്ഷിക്കുന്നു. എങ്കിലും വലിയ ബാറ്ററി പായ്ക്ക് അല്ലെങ്കിൽ അപ്‌ഡേറ്റ് ചെയ്ത ബാറ്ററി മാനേജ്‌മെന്‍റ് സോഫ്റ്റ്‌വെയർ ഉള്ള ഒരു ലോംഗ്-റേഞ്ച് പതിപ്പ് കമ്പനി അവതരിപ്പിച്ചേക്കാം.

ഹ്യുണ്ടായി ഇൻസ്റ്റർ ഇവി

HE1i എന്ന കോഡുനാമത്തിൽ അറിയപ്പെടുന്ന ഈ ഹ്യുണ്ടായി കോംപാക്റ്റ് ഇലക്ട്രിക് എസ്‌യുവി 2026 ന്റെ രണ്ടാം പകുതിയിൽ പുറത്തിറങ്ങുമെന്ന് പ്രതീക്ഷിക്കുന്നു. ആഗോളതലത്തിൽ വിൽക്കപ്പെടുന്ന ഇൻസ്റ്റർ ഇവി അല്ലെങ്കിൽ അതിനെ അടിസ്ഥാനമാക്കിയുള്ള ഒരു മോഡൽ ആയിരിക്കാനാണ് സാധ്യത. സ്റ്റാൻഡേർഡ് 42kWh, ലോംഗ്-റേഞ്ച് 49kWh എന്നിങ്ങനെ രണ്ട് ബാറ്ററി പായ്ക്ക് ഓപ്ഷനുകളും 97bhp ഉം 115bhp ഉം ഉത്പാദിപ്പിക്കുന്ന രണ്ട് മോട്ടോർ ഓപ്ഷനുകളുമായാണ് ഹ്യുണ്ടായി ഇൻസ്റ്റർ ഇവി വാഗ്ദാനം ചെയ്യുന്നത്. ഇന്ത്യ-സ്പെക്ക് പതിപ്പിൽ ഇതേ പവർട്രെയിനുകൾ ഉൾപ്പെടുത്തിയേക്കാം.

ഹ്യുണ്ടായി ഗ്രാൻഡ് ഐ10 ഇവി, വെന്യു ഇവി

ഗ്രാൻഡ് i10 ഹാച്ച്ബാക്കിന്റെയും വെന്യു കോംപാക്റ്റ് എസ്‌യുവിയുടെയും ഇലക്ട്രിക് പതിപ്പുകൾ 2028 അല്ലെങ്കിൽ 2029 ൽ പുറത്തിറങ്ങുമെന്ന് പ്രതീക്ഷിക്കുന്നു. ദക്ഷിണ കൊറിയൻ വാഹന നിർമ്മാതാക്കളിൽ നിന്നുള്ള ബഹുജന വിപണി ഓഫറുകളായിരിക്കും ഇവ. ഹ്യുണ്ടായി ഗ്രാൻഡ് i10 ഇവി ടാറ്റ ടിയാഗോ ഇവിയെ നേരിടുമ്പോൾ, വെന്യു ഇവി ടാറ്റ നെക്‌സോൺ ഇവിയെയും വരാനിരിക്കുന്ന മഹീന്ദ്ര XVU 3XO ഇവിയെയും നേരിടും.

ഹ്യുണ്ടായ് അയോണിക് 9

ആഗോള വിപണിയിൽ ലഭ്യമായ ദക്ഷിണ കൊറിയൻ വാഹന നിർമ്മാതാക്കളിൽ നിന്നുള്ള ഏറ്റവും വലുതും ചെലവേറിയതുമായ ഇലക്ട്രിക് ഓഫറാണ് ഹ്യുണ്ടായി അയോണിക് 9. ഈ ബോൺ ഇലക്ട്രിക് എസ്‌യുവി 2026 ൽ ഇന്ത്യയിലും എത്തും എന്നാണ് റിപ്പോർട്ടുകൾ. ഇത് 6, 7 സീറ്റ് കോൺഫിഗറേഷനുകളിൽ വരുന്നു. കൂടാതെ 620 കിലോമീറ്റർ വരെ റേഞ്ച് നൽകുമെന്ന് അവകാശപ്പെടുന്ന 110.3kWh ബാറ്ററി പായ്ക്കും ലഭിക്കുന്നു.