വമ്പൻ മൈലജുമായി ടൊയോട്ടയുടെ പുതിയ രണ്ട് എസ്‌യുവികൾ ഇന്ത്യയിലേക്ക്!

ടൊയോട്ട 2025-26 സാമ്പത്തിക വർഷത്തിൽ രണ്ട് പുതിയ എസ്‌യുവികൾ പുറത്തിറക്കുന്നു. ഹൈറൈഡറിനെ അടിസ്ഥാനമാക്കി 7 സീറ്റർ എസ്‌യുവി, അർബൻ ക്രൂയിസർ ഇവി എന്നിവയാണ് വരുന്നത്.

ജാപ്പനീസ് വാഹന നിർമ്മാതാക്കളായ ടൊയോട്ട കഴിഞ്ഞ സാമ്പത്തിക വർഷം, അതായത് 2024-25, മികച്ച പ്രകടനത്തോടെ അവസാനിപ്പിച്ചു. 2023-24 സാമ്പത്തിക വർഷത്തിൽ 2,63,512 യൂണിറ്റുകൾ വിറ്റഴിച്ചപ്പോൾ, 2024-25 സാമ്പത്തിക വർഷത്തിൽ കമ്പനി ആകെ 3,37,148 വാഹനങ്ങൾ വിറ്റഴിച്ചു. ഇത് വാർഷിക വിൽപ്പനയിൽ 28 ശതമാനം വളർച്ച രേഖപ്പെടുത്തി. വളർച്ച കൂടുതൽ ത്വരിതപ്പെടുത്തുന്നതിനായി. 2025-26 സാമ്പത്തിക വർഷത്തിൽ ഇന്ത്യൻ വിപണിയിൽ രണ്ട് പുതിയ എസ്‌യുവികൾ പുറത്തിറക്കാൻ ടൊയോട്ട പദ്ധതിയിടുന്നു.

2025-ൽ ടൊയോട്ട അർബൻ ക്രൂയിസർ ഹൈറൈഡറിനെ അടിസ്ഥാനമാക്കിയുള്ള പുതിയ 7 സീറ്റർ എസ്‌യുവി രാജ്യത്ത് പുറത്തിറക്കും. ഇന്ത്യൻ റോഡുകളിൽ പരീക്ഷണയോട്ടം നടത്തുന്ന മാരുതി 7 സീറ്റർ ഗ്രാൻഡ് വിറ്റാരയെ അടിസ്ഥാനമാക്കിയായിരിക്കും പുതിയ 7 സീറ്റർ ഹൈറൈഡർ. രണ്ട് എസ്‌യുവികളും സുസുക്കിയുടെ ഹരിയാനയിലെ ഖാർഖോഡ ആസ്ഥാനമായുള്ള പുതിയ പ്രൊഡക്ഷൻ പ്ലാന്റിൽ നിർമ്മിക്കും.

7 സീറ്റർ എസ്‌യുവിയുടെ വീൽബേസ് കൂടുതലായിരിക്കും. മൂന്നാം നിര സീറ്റുകൾ ഉൾപ്പെടുത്തുന്നതിനായി നീളം കൂടും. കൂടാതെ, അധിക സീറ്റ് ചേർക്കാൻ ടൊയോട്ട ഹൈറൈഡറിന്റെ ബൂട്ട് സ്‌പേസ് ഉപയോഗിക്കും. ടൊയോട്ട ഹൈറൈഡർ 7 സീറ്റർ എസ്‌യുവി ഹ്യുണ്ടായി അൽകാസർ , എംജി ഹെക്ടർ പ്ലസ് എന്നിവയോട് മത്സരിക്കും .

1.5 ലിറ്റർ K15 മൈൽഡ്-ഹൈബ്രിഡ് പെട്രോൾ എഞ്ചിൻ, 1.5 ലിറ്റർ ടിഎൻജിഎ ഹൈബ്രിഡ് എഞ്ചിൻ എന്നിങ്ങനെ രണ്ട് എഞ്ചിൻ ഓപ്ഷനുകളിലാണ് ഈ എസ്‌യുവി വാഗ്ദാനം ചെയ്യുന്നത്. 7 സീറ്റർ ഹൈറൈഡർ അതിന്റെ വിഭാഗത്തിലെ ഏറ്റവും ഇന്ധനക്ഷമതയുള്ള എസ്‌യുവി ആയിരിക്കും. ലിറ്ററിന് 25 കിലോമീറ്ററിൽ കൂടുതൽ മൈലേജ് എസ്‌യുവി വാഗ്ദാനം ചെയ്യുമെന്ന് പ്രതീക്ഷിക്കുന്നു.

2025 ഓട്ടോ എക്സ്പോയിൽ കൺസെപ്റ്റ് രൂപത്തിൽ പ്രദർശിപ്പിച്ച അർബൻ ക്രൂയിസർ ഇവിയിലൂടെയാണ് ജാപ്പനീസ് ബ്രാൻഡ് ഒടുവിൽ ഇന്ത്യയിലെ ഇവി മേഖലയിലേക്ക് പ്രവേശിക്കുന്നത്. 2025 ന്റെ രണ്ടാം പകുതിയിൽ ഇത് ഇന്ത്യയിൽ പുറത്തിറങ്ങുമെന്ന് പ്രതീക്ഷിക്കുന്നു. സുസുക്കിയുടെ ഗുജറാത്ത് ആസ്ഥാനമായുള്ള പ്ലാന്റിലാണ് ഇലക്ട്രിക് എസ്‌യുവി നിർമ്മിക്കുന്നത്. കൂടാതെ ജപ്പാനിലേക്കും മറ്റ് അന്താരാഷ്ട്ര വിപണികളിലേക്കും കയറ്റുമതി ചെയ്യും.

അർബൻ ക്രൂയിസർ ഇവിക്ക് രണ്ട് ബാറ്ററി വേരിയന്റുകൾ ഉണ്ടായിരിക്കും. 49kWh വേരിയന്‍റും 61kWh വേരിയന്‍റും. 49kWh ബാറ്ററി പായ്ക്കുള്ള എൻട്രി ലെവൽ മോഡലിന് 143hp ഫ്രണ്ട് ആക്‌സിൽ-മൗണ്ടഡ് ഇലക്ട്രിക് മോട്ടോർ ഉണ്ടായിരിക്കും. അതേസമയം വലിയ 61kWh ബാറ്ററിക്ക് 173hp ഫ്രണ്ട് ആക്‌സിൽ-മൗണ്ടഡ് ഇലക്ട്രിക് മോട്ടോർ ഉണ്ടായിരിക്കും. രണ്ടും 193Nm പീക്ക് ടോർക്ക് വാഗ്ദാനം ചെയ്യുന്നു. വലിയ ബാറ്ററി പാക്കിൽ 184hp ഉം 300Nm ടോർക്കും വാഗ്ദാനം ചെയ്യുന്ന ഡ്യുവൽ-മോട്ടോർ AWD സജ്ജീകരണവും ഉണ്ടായിരിക്കും എന്നാണ് റിപ്പോർട്ടുകൾ.