മാരുതി സുസുക്കിയുടെ വമ്പൻ പ്ലാൻ; ലക്ഷ്യം 2026 സാമ്പത്തിക വർഷത്തിൽ നാലുലക്ഷം കയറ്റുമതി

2025-26 സാമ്പത്തിക വർഷത്തിൽ 400,000-ൽ അധികം വാഹനങ്ങൾ കയറ്റുമതി ചെയ്യാൻ മാരുതി സുസുക്കി ലക്ഷ്യമിടുന്നു. ഈ ലക്ഷ്യത്തിലേക്കുള്ള പാതയിലാണെന്ന് കമ്പനി വ്യക്തമാക്കി. 

രാജ്യത്തെ ജനപ്രിയ വാഹന നിർമ്മാതാക്കളായ മാരുതി സുസുക്കി അടുത്ത സാമ്പത്തിക വർഷമായ 2025-26 (FY26) ൽ 400,000 ൽ അധികം വാഹനങ്ങൾ കയറ്റുമതി ചെയ്യാനാണ് ലക്ഷ്യമിടുന്നത്. 2025 ഏപ്രിൽ മുതൽ സെപ്റ്റംബർ വരെ കമ്പനി ഇതിനകം 200,000 ൽ അധികം യൂണിറ്റുകൾ കയറ്റുമതി ചെയ്തിട്ടുണ്ടെന്ന് മാരുതി സുസുക്കി ഇന്ത്യയുടെ സീനിയർ എക്സിക്യൂട്ടീവ് ഓഫീസർ (കോർപ്പറേറ്റ് അഫയേഴ്‌സ്) രാഹുൽ ഭാരതി പറഞ്ഞു.

നാല് ലക്ഷം വാഹനങ്ങൾ കയറ്റുമതി ചെയ്യുക ലക്ഷ്യം

2025 സെപ്റ്റംബറിൽ മാരുതി സുസുക്കി ഇന്ത്യ ലിമിറ്റഡ് 42,204 വാഹനങ്ങൾ കയറ്റുമതി ചെയ്തു, മുൻ വർഷത്തെ അപേക്ഷിച്ച് 52% വർധന. കഴിഞ്ഞ വർഷം സെപ്റ്റംബറിൽ കമ്പനി 27,728 യൂണിറ്റുകൾ കയറ്റുമതി ചെയ്തു. ആദ്യ പാദത്തിൽ (Q1) കദേശം 1.10 ലക്ഷം വാഹനങ്ങൾ കയറ്റുമതി ചെയ്തുവെന്നും ഏപ്രിൽ മുതൽ സെപ്റ്റംബർ വരെയുള്ള ആറ് മാസത്തിനുള്ളിൽ ആകെ 2.07 ലക്ഷത്തിലധികം യൂണിറ്റുകൾ കയറ്റുമതി ചെയ്തുവെന്നും രാഹുൽ ഭാരതി പറഞ്ഞു. ഇതിനർത്ഥം നാല് ലക്ഷം യൂണിറ്റുകൾ എന്ന ലക്ഷ്യം കൈവരിക്കാനുള്ള പാതയിലാണ് കമ്പനി എന്നും അദ്ദേഹം വ്യക്തമാക്കി.

രാജ്യത്തെ രണ്ടാമത്തെ വലിയ കമ്പനിയേക്കാൾ ഇരട്ടിയാണ് മാരുതി സുസുക്കിയുടെ കയറ്റുമതിയെന്നും അദ്ദേഹം പറഞ്ഞു. രാഹുൽ ഭാരതിയുടെ അഭിപ്രായത്തിൽ, ആഭ്യന്തര വിപണിയിൽ മാരുതി സുസുക്കിക്ക് ശക്തമായ പിടിയുള്ളതുപോലെ, വിദേശ വിപണികളിലും കമ്പനിയുടെ ആധിപത്യം തുടർച്ചയായി വർദ്ധിച്ചുകൊണ്ടിരിക്കുകയാണ്. നാല് വർഷം മുമ്പ് കമ്പനി പ്രതിവർഷം ഒരു ലക്ഷം വാഹനങ്ങൾ കയറ്റുമതി ചെയ്തിരുന്നു, എന്നാൽ ഇപ്പോൾ രണ്ടാം പാദത്തിൽ മാത്രം ഒരു ലക്ഷത്തിലധികം യൂണിറ്റുകൾ കയറ്റുമതി ചെയ്തിട്ടുണ്ട്. 2021 സാമ്പത്തിക വർഷത്തിൽ കമ്പനി 96,139 യൂണിറ്റുകൾ കയറ്റുമതി ചെയ്തു.

6,068 യൂണിറ്റ് ഇ-വിറ്റാര കയറ്റുമതി ചെയ്തു

കൂടാതെ, 2025 ഓഗസ്റ്റ് മുതൽ സെപ്റ്റംബർ വരെയുള്ള കാലയളവിൽ കമ്പനി 6,068 യൂണിറ്റ് ഇലക്ട്രിക് കാറായ ഇ-വിറ്റാര കയറ്റുമതി ചെയ്തു. "മെയ്ക്ക് ഇൻ ഇന്ത്യ" എന്നതിനായുള്ള ശക്തമായ സന്ദേശമാണിതെന്ന് രാഹുൽ ഭാരതി പറഞ്ഞു. ഇന്ത്യയിൽ നിർമ്മിച്ച കാറുകൾ ഇപ്പോൾ ആഗോളതലത്തിൽ തങ്ങളുടെ വ്യക്തിമുദ്ര പതിപ്പിക്കുന്നു. ഇന്ത്യ ഒപ്പുവച്ച രാജ്യങ്ങളുമായുള്ള സമീപകാല സ്വതന്ത്ര വ്യാപാര കരാറുകൾ (FTA) കയറ്റുമതി വർദ്ധിപ്പിക്കാൻ സഹായിച്ചതായും അദ്ദേഹം അഭിപ്രായപ്പെട്ടു. 2026 സാമ്പത്തിക വർഷത്തിന്റെ ആദ്യ പകുതിയിൽ കമ്പനിയുടെ ഏറ്റവും കൂടുതൽ കയറ്റുമതി ചെയ്ത വാഹനങ്ങൾ ഫ്രോങ്ക്സ്, ജിംനി, സ്വിഫ്റ്റ്, ബലേനോ, ഡിസയർ എന്നിവയായിരുന്നു. ദക്ഷിണാഫ്രിക്ക, ജപ്പാൻ, സൗദി അറേബ്യ, ചിലി, കൊളംബിയ എന്നിവയായിരുന്നു മാരുതി സുസുക്കിയുടെ ഏറ്റവും വലിയ വിദേശ വിപണികൾ.