ഫുൾചാർജ്ജിൽ 315 കിലോമീറ്റർ ഓടും; വില വെറും 8.50 ലക്ഷം രൂപ മുതൽ! മാരുതി സുസുക്കിയുടെ വിലകുറഞ്ഞ ഇലക്ട്രിക് കാർ

ഇന്ത്യൻ വിപണി ലക്ഷ്യമിട്ട് 10 ലക്ഷം രൂപയിൽ താഴെ വിലയുള്ള പുതിയ ഇലക്ട്രിക് കാർ അവതരിപ്പിക്കാൻ മാരുതി സുസുക്കി ഒരുങ്ങുന്നു. നഗരയാത്രകൾക്ക് പ്രാധാന്യം നൽകുന്ന ഈ വാഹനം, ഒറ്റ ചാർജിൽ 315 കിലോമീറ്റർ വരെ റേഞ്ച് നൽകുമെന്നാണ് പ്രതീക്ഷ. നിലവിലുള്ള കാറിന്റെ പതിപ്പല്ലാതെ, ഒരു സമർപ്പിത ഇവി പ്ലാറ്റ്‌ഫോമിലായിരിക്കും ഇത് നിർമ്മിക്കുക.

ഇന്ത്യൻ ഇലക്ട്രിക് കാർ വിപണിയിൽ കൂടുതൽ സജീവമാകാൻ ഒരുങ്ങി മാരുതി സുസുക്കി. 10 ലക്ഷം രൂപയിൽ താഴെ വിലയിൽ പുതിയ ഇലക്ട്രിക് കാർ അവതരിപ്പിക്കാൻ കമ്പനി പദ്ധതിയിടുന്നതായാണ് റിപ്പോർട്ടുകൾ. ഫോർച്യൂൺ ഇന്ത്യയുടെ റിപ്പോർട്ട് പ്രകാരം വരാനിരിക്കുന്ന മാരുതി ഇലക്ട്രിക് കാറിന് ഏകദേശം 8.50 ലക്ഷം മുതൽ 10.50 ലക്ഷം രൂപ വരെ എക്സ്-ഷോറൂം വില പ്രതീക്ഷിക്കാം.

നഗര യാത്രകൾക്ക് അനുയോജ്യമായ ഇവി

വിലകൂടിയ ഇലക്ട്രിക് എസ്‌യുവികളെപ്പോലെ വലിയ ബാറ്ററിയും ദീർഘദൂര റേഞ്ചും നൽകുന്നതിനേക്കാൾ നഗരങ്ങളിലും നഗരത്തിന് സമീപമുള്ള പ്രദേശങ്ങളിലും ദൈനംദിന യാത്രകൾക്ക് അനുയോജ്യമായ വാഹനമായിരിക്കും മാരുതിയുടെ പുതിയ ഇവി എന്നാണ് സൂചന. ഒറ്റ ചാർജിൽ ഏകദേശം 250 മുതൽ 315 കിലോമീറ്റർ വരെ റേഞ്ച് നൽകാനാണ് ലക്ഷ്യമിടുന്നത്. ഈ റേഞ്ച് ടാറ്റ ടിയാഗോ ഇവിയുടെ നിലവാരത്തിന് സമാനമായിരിക്കും.

ഐസിഇ കാറിന്റെ ഇലക്ട്രിക് പതിപ്പല്ല

നിലവിലുള്ള പെട്രോൾ കാറിന്റെ ഇലക്ട്രിക് പതിപ്പായിട്ടല്ല പുതിയ മോഡൽ വികസിപ്പിക്കുന്നതെന്നാണ് റിപ്പോർട്ടിലെ പ്രധാന വിവരം. തുടക്കം മുതൽ ഇലക്ട്രിക് വാഹനമായി രൂപകൽപ്പന ചെയ്യുന്ന സമർപ്പിത ഇവിയായിരിക്കും ഇത്. ഇതിലൂടെ ബാറ്ററിക്കായി കൂടുതൽ അനുയോജ്യമായ സ്ഥലം ഒരുക്കാനും ക്യാബിൻ സ്പേസ് പരമാവധി ഉപയോഗപ്പെടുത്താനും ഇലക്ട്രിക് പവർട്രെയിനുമായി ബന്ധപ്പെട്ട ഘടകങ്ങൾ കൂടുതൽ കാര്യക്ഷമമായി ക്രമീകരിക്കാനും മാരുതിക്ക് സാധിക്കും.

10 ലക്ഷം രൂപയിൽ താഴെ വില ലക്ഷ്യം

കൂടുതൽ പ്രാദേശികവൽക്കരണവും താരതമ്യേന ചെറിയ ബാറ്ററി പാക്കും വാഹനത്തിന്റെ വില നിയന്ത്രിക്കുന്നതിൽ നിർണായകമാകുമെന്നാണ് പ്രതീക്ഷ. ഏകദേശം 8.50 ലക്ഷം മുതൽ 10.50 ലക്ഷം രൂപ വരെയാണ് ലക്ഷ്യമിടുന്ന എക്സ്-ഷോറൂം വില. ഇത് യാഥാർഥ്യമായാൽ രാജ്യത്തെ കൂടുതൽ ഉപഭോക്താക്കൾക്ക് ഇലക്ട്രിക് കാർ സ്വന്തമാക്കാനുള്ള അവസരം ലഭിക്കും. നിലവിൽ വാഗൺആർ, സ്വിഫ്റ്റ് തുടങ്ങിയ താങ്ങാനാവുന്ന വിലയുള്ള കാറുകൾ പരിഗണിക്കുന്ന ഉപഭോക്താക്കളെയും പുതിയ ഇവി ലക്ഷ്യമിടാനാണ് സാധ്യത.

അരീന ഡീലർഷിപ്പുകളിലൂടെ വിൽപ്പന

മാരുതിയുടെ പ്രീമിയം നെക്സ ഡീലർഷിപ്പ് ശൃംഖലയിലൂടെയാണ് ഇ-വിറ്റാര വിൽക്കുന്നത്. എന്നാൽ പുതിയ താങ്ങാനാവുന്ന ഇലക്ട്രിക് കാർ അരീന ഡീലർഷിപ്പുകളിലൂടെ വിൽക്കാനാണ് സാധ്യത. രാജ്യത്തെ വിപുലമായ അരീന ശൃംഖല ഉപയോഗപ്പെടുത്തുന്നത് മാരുതിയുടെ നിലവിലെ ഉപഭോക്താക്കളിലേക്ക് പുതിയ ഇവിയെ വേഗത്തിൽ എത്തിക്കാൻ സഹായിക്കും. ഇന്ത്യയിലെ ഏറ്റവും വലിയ പാസഞ്ചർ വാഹന റീട്ടെയിൽ ശൃംഖലകളിലൊന്നായ അരീനയുടെ സാന്നിധ്യം പുതിയ മോഡലിന് നേട്ടമാകുമെന്നും വിലയിരുത്തപ്പെടുന്നു.

ഇ-വിറ്റാരയ്ക്ക് പിന്നാലെ വിലകുറഞ്ഞ മോഡൽ

മാരുതി സുസുക്കി ഇലക്ട്രിക് വാഹന വിപണിയിൽ വൈകിയാണ് പ്രവേശിച്ചതെങ്കിലും ഇ-വിറ്റാരയിലൂടെ മികച്ച മുന്നേറ്റമാണ് നടത്തുന്നത്. ഹ്യുണ്ടായി ക്രെറ്റ ഇലക്ട്രിക്, വിൻഫാസ്റ്റ് തുടങ്ങിയ മോഡലുകളുമായി മത്സരിക്കുന്ന ഇ-വിറ്റാരയുടെ വിജയത്തിന് പിന്നാലെയാണ് കൂടുതൽ ഉപഭോക്താക്കളിലേക്ക് എത്തുന്ന വിലകുറഞ്ഞ ഇവിയിലേക്ക് കമ്പനി ശ്രദ്ധ തിരിക്കുന്നത്. ഇ-വിറ്റാരയുടെ ഉയർന്ന വില പല ഉപഭോക്താക്കൾക്കും ഇപ്പോഴും വലിയ തടസ്സമാണ്. ഈ സാഹചര്യത്തിൽ കുറഞ്ഞ വിലയിലുള്ള പുതിയ മോഡൽ മാരുതിയുടെ ഇവി വിൽപ്പന കൂടുതൽ ഉയർത്താൻ സഹായിച്ചേക്കും.

ജപ്പാനിൽ എത്തിയ ഇ-സ്കൈയുമായി ബന്ധമുണ്ടോ?

സുസുക്കി അടുത്തിടെ താങ്ങാനാവുന്ന വിലയിലുള്ള ഇ-സ്കൈ എന്ന ഇലക്ട്രിക് ഹാച്ച്ബാക്ക് പുറത്തിറക്കിയിരുന്നു. എന്നാൽ ഇന്ത്യയിൽ വരാനിരിക്കുന്ന മാരുതി ഇവിയും ഇ-സ്കൈയും തമ്മിലുള്ള ബന്ധം കമ്പനി ഇതുവരെ സ്ഥിരീകരിച്ചിട്ടില്ല. ഇ-സ്കൈയ്ക്ക് 3,395 മില്ലീമീറ്റർ നീളവും 2,460 മില്ലീമീറ്റർ വീൽബേസുമാണുള്ളത്. ഏകദേശം 1,030 കിലോഗ്രാം ഭാരമുള്ള വാഹനത്തിൽ ഒതുക്കമുള്ള വലുപ്പത്തിനുള്ളിൽ പരമാവധി ക്യാബിൻ സ്പേസ് നൽകുന്ന ‘ടോൾ ബോയ്’ ഡിസൈനാണ് ഉപയോഗിച്ചിരിക്കുന്നത്.

310 കിലോമീറ്റർ റേഞ്ച്

26 കിലോവാട്ട് ബാറ്ററി പാക്കാണ് ഇ-സ്കൈയ്ക്ക് കരുത്ത് നൽകുന്നത്. ഒറ്റ ചാർജിൽ 310 കിലോമീറ്റർ വരെ റേഞ്ച് നൽകാൻ വാഹനത്തിന് സാധിക്കും. ഇന്ത്യയ്ക്കായി മാരുതി വികസിപ്പിക്കുന്ന പുതിയ താങ്ങാനാവുന്ന ഇവി ഇ-സ്കൈയുമായി ഏതെങ്കിലും തരത്തിലുള്ള സാങ്കേതിക ബന്ധം പങ്കിടുമോ എന്ന കാര്യത്തിൽ നിലവിൽ വ്യക്തതയില്ല. പുതിയ മോഡലിന്റെ പേര്, ബാറ്ററി ശേഷി, ചാർജിങ് വേഗത, കൃത്യമായ റേഞ്ച്, ലോഞ്ച് തീയതി എന്നിവ സംബന്ധിച്ച ഔദ്യോഗിക വിവരങ്ങൾ മാരുതി സുസുക്കി ഇതുവരെ പുറത്തുവിട്ടിട്ടില്ല.