എംജി സൈബർസ്റ്റർ ഇവി ഇന്ന് ഇന്ത്യയിൽ ലോഞ്ച് ചെയ്യും

ജെഎസ്‍ഡബ്ല്യു എംജി മോട്ടോഴ്‌സ് ഇന്ന് ഇന്ത്യൻ വിപണിയിൽ എംജി സൈബർസ്റ്റർ ഇവി പുറത്തിറക്കും. ഈ ഇലക്ട്രിക് സ്‌പോർട്‌സ് കാർ നിരവധി സവിശേഷതകളോടെയാണ് വരുന്നത്, മികച്ച ഡിസൈൻ, ഹൈടെക് ഡാഷ്‌ബോർഡ്, ശക്തമായ ബാറ്ററി എന്നിവ ഇതിൽ ഉൾപ്പെടുന്നു.

ബ്രിട്ടീഷ് - ചൈനീസ് വാഹന നിർമ്മാതാക്കളായ ജെഎസ്‍ഡബ്ല്യു എംജി മോട്ടോഴ്‌സ് ഇന്ത്യൻ വിപണിയിൽ നിരവധി സെഗ്‌മെന്റുകളിൽ വാഹനങ്ങൾ വിൽക്കുന്നു. പ്രീമിയം സ്‌പോർട്‌സ് കാർ വിഭാഗത്തിൽ കമ്പനി ഇന്ന് എംജി സൈബർസ്റ്റർ ഇവിയെ പുറത്തിറക്കും. ഈ ഇലക്ട്രിക് സ്‌പോർട്‌സ് കാറിൽ എന്തൊക്കെ സവിശേഷതകൾ ലഭിക്കും? എത്ര ശ്രേണിയിൽ ഇത് വാഗ്ദാനം ചെയ്യും? എത്ര വിലയ്ക്ക് ഇത് പുറത്തിറക്കാൻ കഴിയും? ഇതാ അറിയേണ്ടതെല്ലാം.

സൈബ്സ്റ്റർ വെറുമൊരു ഇലക്ട്രിക് കാർ മാത്രമല്ല, ഇന്ത്യയിലെ ഇവി സ്പോർട്സ് വിഭാഗത്തിന് പുതിയ ദിശാബോധം നൽകുന്ന ഒരു മോഡൽ കൂടിയാണ്. ഇതിന്റെ വരവോടെ, പ്രകടനവും സ്റ്റൈലും ഒരുപോലെ ആഗ്രഹിക്കുന്ന യുവ ഉപഭോക്താക്കൾക്ക് ഒരു ഇലക്ട്രിക് ഓപ്ഷൻ ലഭിക്കും. മികച്ച ഡിസൈനാണ് എം‌ജി സൈബസ്റ്ററിന് ലഭിക്കുന്നത്. ഇതിന് താഴ്ന്ന സ്ലംഗ് രൂപകൽപ്പനയുണ്ട്. ഫ്യൂച്ചറിസ്റ്റിക് സിസർ വാതിലുകളുമുണ്ട്. ഇതിനുപുറമെ, ഇരട്ട വാതിലുകളുള്ള ഒരു തുറന്ന മേൽക്കൂര ബോഡിയും ലഭിക്കും. അതിനുള്ളിൽ മൂന്ന് സ്‌ക്രീനുകളുള്ള ഒരു ഹൈടെക് ഡാഷ്‌ബോർഡും ലഭിക്കും. വിമാനം പോലുള്ള യോക്ക് സ്റ്റൈൽ സ്റ്റിയറിംഗ് വീൽ ഇതിനുണ്ട്.

സൈബർസ്റ്ററിൽ 10.25 ഇഞ്ച് വെർച്വൽ ക്ലസ്റ്റർ, 7 ഇഞ്ച് ഇൻഫോടെയ്ൻമെന്റ് സ്‌ക്രീൻ, 7 ഇഞ്ച് ഡ്രൈവർ ടച്ച്‌സ്‌ക്രീൻ എന്നിവയാണ് എംജി നൽകിയിരിക്കുന്നത്. ഇതിനുപുറമെ, ബോസ് സൗണ്ട് സിസ്റ്റം, വൈ ഷേപ്പ് സ്‌പോർട്‌സ് സീറ്റ്, 19, 20 ഇഞ്ച് അലോയ് വീലുകൾ, പൂർണ്ണമായും ഇലക്ട്രിക് ഹുഡ്, ആൻഡ്രോയിഡ് ഓട്ടോ, ആപ്പിൾ കാർ പ്ലേ തുടങ്ങി നിരവധി ഫീച്ചറുകളും ഇതിൽ നൽകിയിട്ടുണ്ട്.

ജെഎസ്‍ഡബ്ല്യു എംജി സൈബർസ്റ്റർ ഇലക്ട്രിക് സൂപ്പർ കാറിൽ കമ്പനി ശക്തമായ 77 കിലോവാട്ട്സ് ബാറ്ററിയും മോട്ടോറും നൽകിയിട്ടുണ്ട്. ഇതിലെ ബാറ്ററിക്ക് പൂർണ്ണമായി ചാർജ് ചെയ്താൽ 507 കിലോമീറ്റർ വരെ സഞ്ചരിക്കാൻ കഴിയും. 144 കിലോവാട്ട് ഫാസ്റ്റ് ചാർജർ ഉപയോഗിച്ച് 38 മിനിറ്റിനുള്ളിൽ ബാറ്ററി 10 മുതൽ 80 ശതമാനം വരെ ചാർജ് ചെയ്യാൻ കഴിയും. കാറിലെ മോട്ടോർ 510 പിഎസ് പവറും 725 ന്യൂട്ടൺ മീറ്റർ ടോർക്കും നൽകുന്നു. ഇതിന്റെ പരമാവധി വേഗത മണിക്കൂറിൽ 195 കിലോമീറ്റർ വരെയാണ്. റിയർ വീൽ ഡ്രൈവ്, ഓൾ വീൽ ഡ്രൈവ് സംവിധാനവും ഇതിലുണ്ട്.

എംജി സൈബർസ്റ്റർ ഇന്ത്യൻ വാഹന വിപണിയിൽ ഒരു ഗെയിം ചെയിഞ്ചർ ആയിരിക്കും. ഇലക്ട്രിക് സ്പോർട്‍സ് കാറുകൾ ഇഷ്‍ടപ്പെടുന്നവർക്ക്, ഇതൊരു മികച്ച ഓപ്ഷനായിരിക്കും. ഈ വാഹനത്തിന്റെ കൃത്യമായ വില ലോഞ്ച് സമയത്ത് എംജി വെളിപ്പെടുത്തും. ഏകദേശം 70 മുതൽ 75 ലക്ഷം രൂപ വരെ എക്സ്-ഷോറൂം വിലയിൽ ഇത് പുറത്തിറക്കും എന്നാണ് റിപ്പോർട്ടുകൾ. ചില ഡീലർഷിപ്പുകളിൽ ഉപഭോക്തൃ പ്രിവ്യൂവും രജിസ്ട്രേഷനും ആരംഭിച്ചിട്ടുണ്ട്.