ഒറ്റ ചാർജ്ജിൽ 449 കിമി മാത്രമല്ല; എതിരാളികൾക്ക് ഷോക്കായി പുതിയ എംജി വിൻഡ്‍സ‍ർ ഇവി പ്രോയുടെ വില പ്രഖ്യാപനം!

എം‌ജി മോട്ടോർ ഇന്ത്യ വിൻഡ്‌സർ ഇവിയുടെ പുതിയ പതിപ്പായ വിൻഡ്‌സർ ഇവി പ്രോ 17.49 ലക്ഷം രൂപ എക്സ്-ഷോറൂം എന്ന പ്രാരംഭ വിലയിൽ പുറത്തിറക്കി. 52.9 കിലോവാട്ട്സ് ബാറ്ററി പായ്ക്കും 449 കിലോമീറ്റർ റേഞ്ചും പുതിയ പതിപ്പിന്റെ സവിശേഷതകളാണ്.

ജെ‌എസ്‌ഡബ്ല്യു എം‌ജി മോട്ടോർ ഇന്ത്യ വിൻഡ്‌സർ ഇവിയുടെ പുതിയ പതിപ്പായ വിൻഡ്‌സർ ഇവി പ്രോ രാജ്യത്ത് അവതരിപ്പിച്ചു. വാഹനത്തിന്റെ ഈ പതിപ്പ് ആദ്യത്തെ 17.49 ലക്ഷം രൂപ എക്സ്-ഷോറൂം എന്ന പ്രാരംഭ വിലയിൽ ആണ് പുറത്തിറക്കിയത്. സ്റ്റാൻഡേർഡ് മോഡലിനെ അപേക്ഷിച്ച് ഇതിൽ നിരവധി മാറ്റങ്ങളുണ്ട്, പവർട്രെയിനിലെ സവിശേഷതകളും മാറ്റങ്ങളും പട്ടികയിൽ ഉൾപ്പെടുത്തിയിട്ടുണ്ട്. എം‌ജിയുടെ ബാറ്ററി-ആസ്-എ-സർവീസ് (BaaS) പ്രോഗ്രാം തിരഞ്ഞെടുക്കുന്നവർക്ക് , വിൻഡ്‌സർ ഇവി പ്രോ വില 12.49 ലക്ഷം രൂപയിൽ ആരംഭിക്കുന്നു. ഈ പദ്ധതി അനുസരിച്ച് ബാറ്ററി ചെലവ് ഒഴിവാക്കി, ഓടിയ കിലോമീറ്ററുകളുടെ എണ്ണമോ മുൻകൂട്ടി നിശ്ചയിച്ച തുകയോ അനുസരിച്ച് പ്രതിമാസ അടിസ്ഥാനത്തിൽ ചാർജ് ചെയ്യുന്നു. അതേസമയം 17.49 ലക്ഷം രൂപയുടെ ഈ ആമുഖ വില ആദ്യത്തെ 8,000 ബുക്കിംഗുകൾക്ക് മാത്രമാണെന്ന് ശ്രദ്ധിക്കുക. മെയ് 8 ന് പുതിയ വിൻഡ്‍സറിനുള്ള ബുക്കിംഗുകൾ കമ്പനി ആരംഭിക്കും.

എം‌ജി വിൻഡ്‌സർ പ്രോ 52.9 കിലോവാട്ട്സ് ബാറ്ററി പായ്ക്കുമായി വരുന്നു. ഈ യൂണിറ്റ് ഒറ്റ ചാർജിൽ 449 കിലോമീറ്റർ അവകാശപ്പെടുന്ന റേഞ്ച് നൽകുന്നു.  ഇത് സ്റ്റാൻഡേർഡ് പതിപ്പിൽ 38 കിലോവാട്ട്സ് ബാറ്ററി പായ്ക്ക് വാഗ്ദാനം ചെയ്യുന്ന 332 കിലോമീറ്റർ റേഞ്ചിനേക്കാൾ കൂടുതലാണ്. അതേസമയം, പവർ സ്പെസിഫിക്കേഷനുകൾ അതേപടി തുടരുന്നു. 136 എച്ച്പി പവറും 200 എൻഎം ടോർക്കും ഉത്പാദിപ്പിക്കുന്ന ഒരു ഇലക്ട്രിക് മോട്ടോർ ഇതിൽ തുടരുന്നു. വാഹനം മുന്നോട്ട് നീക്കുന്നതിനായി ഈ പവർ മുൻ ചക്രങ്ങളിലേക്ക് കൈമാറ്റം ചെയ്യപ്പെടുന്നു. 

എംജി വിൻഡ്‌സർ ഇവിയുടെ നിലവിലുള്ള രൂപം നിലനിർത്തും. എങ്കിലും, കുറച്ച് അപ്‌ഡേറ്റുകളും ലഭിക്കും.  കാറിന് ഇപ്പോൾ അലോയ് വീലുകൾക്കായി ഒരു പുതിയ ഡിസൈൻ ലഭിക്കുന്നു. കൂടാതെ ടെയിൽഗേറ്റിൽ ഒരു "ADAS" ബാഡ്ജ് ഉണ്ട്. ഇതെല്ലാം സെലാഡൺ ബ്ലൂ, അറോറ സിൽവർ, ഗ്ലേസ് റെഡ് തുടങ്ങിയ പുതിയ നിറങ്ങളിലും എത്തുന്നു.

വിൻഡ്‌സർ ഇവി പ്രോയുടെ ക്യാബിനിലും മാറ്റങ്ങൾ വരുത്തുന്നു. സ്റ്റാൻഡേർഡ് പതിപ്പിൽ ലഭ്യമായ കറുത്ത അപ്ഹോൾസ്റ്ററിക്ക് പകരമായി ബ്രാൻഡ് ഇപ്പോൾ ഇളം നിറമുള്ള ഇന്റീരിയർ വാഗ്ദാനം ചെയ്യുന്നു. അതിനുപുറമെ, പവർഡ്, ടെയിൽഗേറ്റ്, ലെവൽ 2 ADAS സവിശേഷതകളായ ട്രാഫിക് ജാം അസിസ്റ്റ്, അഡാപ്റ്റീവ് ക്രൂയിസ് കൺട്രോൾ എന്നിവയും ഫീച്ചറുകളുടെ പട്ടികയിൽ ഉൾപ്പെടുന്നു.

എംജി വിൻഡ്‌സർ ഇവി പ്രോയിൽ വെഹിക്കിൾ-ടു-ലോഡ്, വെഹിക്കിൾ-ടു-വെഹിക്കിൾ ശേഷികൾ സജ്ജീകരിച്ചിരിക്കുന്നു. V2L ഫംഗ്ഷൻ ഉടമയെ വാഹനത്തിന്റെ പവർ ഉപയോഗിച്ച് വിവിധ ഉപകരണങ്ങൾ പ്രവർത്തിപ്പിക്കാൻ പ്രാപ്തമാക്കുന്നു. അതേസമയം, V2V സവിശേഷത അനുയോജ്യമായ വാഹനങ്ങൾക്കിടയിൽ ഊർജ്ജ പങ്കിടൽ അനുവദിക്കുന്നു.