പുതിയ ഹ്യുണ്ടായി ക്രെറ്റ, വെന്യു: കൂടുതൽ വിവരങ്ങൾ!

ഹ്യുണ്ടായിയുടെ ക്രെറ്റ, വെന്യു എന്നീ എസ്‌യുവി മോഡലുകൾ പുതിയ തലമുറയിലേക്ക്. ക്രെറ്റ 2027-ലും വെന്യു 2025 അവസാനത്തോടെയും പുറത്തിറങ്ങും.

നിലവിലുള്ള ഉൽപ്പന്നങ്ങളുടെ അടുത്ത തലമുറ ഉൾപ്പെടെ നിരവധി പുതിയ വാഹനങ്ങളുടെ പണിപ്പുരയിലാണ് ദക്ഷിണ കൊറിയൻ വാഹന ബ്രാൻഡായ ഹ്യുണ്ടായി. കമ്പനിയുടെ ഏറ്റവും കൂടുതൽ വിറ്റഴിക്കപ്പെടുന്ന രണ്ട് എസ്‌യുവികളായ ക്രെറ്റയും വെന്യുവും അടുത്ത രണ്ടുവർഷത്തിനുള്ളിൽ പുതിയ തലമുറയിലേക്ക് പ്രവേശിക്കും. ഈ രണ്ട് മോഡലുകളെക്കുറിച്ചും വിശദമായി അറിയാം. 

പുതുതലമുറ ഹ്യുണ്ടായി ക്രെറ്റ
2024 ജനുവരിയിലാണ് ഹ്യുണ്ടായി ക്രെറ്റ ഫെയ്‌സ്‌ലിഫ്റ്റ് പുറത്തിറക്കിയത്. എങ്കിലും, കൊറിയൻ വാഹന നിർമ്മാതാക്കൾ മൂന്നാം തലമുറ ക്രെറ്റ എസ്‌യുവിയുടെ നിർമ്മാണം ആരംഭിച്ചു കഴിഞ്ഞു. പുതിയ റിപ്പോർട്ടുകൾ പ്രകാരം പുതുതലമുറ ഹ്യുണ്ടായി ക്രെറ്റ 2027 ൽ ഇന്ത്യയിൽ പുറത്തിറങ്ങും. SX3 എന്ന രഹസ്യനാമത്തിൽ അറിയപ്പെടുന്ന പുതിയ ഹ്യുണ്ടായി ക്രെറ്റ എസ്‌യുവി തമിഴ്‌നാട്ടിലെ ഹ്യുണ്ടായിയുടെ പ്രൊഡക്ഷൻ പ്ലാന്‍റിലായിരിക്കും നിർമ്മിക്കുക. 

1.5L NA പെട്രോൾ, 1.5L ഡയറക്ട്-ഇഞ്ചക്ഷൻ ടർബോ പെട്രോൾ, 1.5L ടർബോ ഡീസൽ തുടങ്ങിയവ ഉൾപ്പെടെ നിലവിലുള്ള എഞ്ചിൻ ശ്രേണിയിൽ തന്നെ എസ്‌യുവി നിലനിർത്തുമെന്ന് പ്രതീക്ഷിക്കുന്നു. മാനുവൽ, ഓട്ടോമാറ്റിക് ഗിയർബോക്‌സ് ഓപ്ഷനുകൾ വാഗ്ദാനം ചെയ്യപ്പെടും. 1.5L പെട്രോൾ എഞ്ചിനും ഇലക്ട്രിക് മോട്ടോറും ഉപയോഗിക്കാവുന്ന ശക്തമായ ഒരു ഹൈബ്രിഡ് പവർട്രെയിനും എസ്‌യുവിക്ക് ലഭിച്ചേക്കാം. 

അടുത്ത തലമുറ ഹ്യുണ്ടായി വെന്യു
പുതുതലമുറ വെന്യു കോംപാക്റ്റ് എസ്‌യുവിയുടെ പരീക്ഷണം ഹ്യുണ്ടായി ഇന്ത്യൻ റോഡുകളിൽ ആരംഭിച്ചു. ഔദ്യോഗിക ലോഞ്ച് വിശദാംശങ്ങൾ ഇതുവരെ വെളിപ്പെടുത്തിയിട്ടില്ലെങ്കിലും, പുതുതലമുറ ഹ്യുണ്ടായി വെന്യു 2025 ന്റെ അവസാന പാദത്തിൽ, അതായത് മിക്കവാറും ഒക്ടോബറിൽ വിൽപ്പനയ്‌ക്കെത്തുമെന്ന് പ്രതീക്ഷിക്കുന്നു. പുതിയ ഹ്യുണ്ടായി വെന്യു അതിന്റെ പരിചിതമായ ബോക്‌സി ഡിസൈൻ നിലനിർത്തും. പക്ഷേ കൂടുതൽ നേരായ ഫാസിയയും പുതിയ പിൻ പ്രൊഫൈലും ലഭിക്കാൻ സാധ്യതയുണ്ട്. ക്രെറ്റ, അൽകാസർ എന്നിവയുൾപ്പെടെയുള്ള ഏറ്റവും പുതിയ ഹ്യുണ്ടായി എസ്‌യുവികളുമായി മുൻവശത്തെ ഡിസൈൻ സമന്വയിപ്പിക്കും. 

പൂർണ്ണമായും പുനർരൂപകൽപ്പന ചെയ്ത ഡാഷ്‌ബോർഡും വായുസഞ്ചാരമുള്ള ഫ്രണ്ട്, റിയർ സീറ്റുകൾ, 360-ഡിഗ്രി സറൗണ്ട് വ്യൂ ക്യാമറ, ലെവൽ 2 എഡിഎഎസ് എന്നിവ ഉൾപ്പെടെ നിരവധി പുതിയ സവിശേഷതകളും ഉൾപ്പെടുന്ന ക്യാബിനിൽ വലിയ മാറ്റങ്ങൾ വരുത്തും. 1.0L 3-സിലിണ്ടർ ടർബോ പെട്രോൾ, 1.2L 4-സിലിണ്ടർ NA പെട്രോൾ, 1.5L ടർബോ ഡീസൽ എന്നിവയുൾപ്പെടെ നിലവിലുള്ള പവർട്രെയിൻ ഓപ്ഷനുകൾ എസ്‌യുവി നിലനിർത്തും.