പുതിയ ബൊലേറോ സിഎൻജി പിക്ക്-അപ്പ് പുറത്തിറക്കി മഹീന്ദ്ര

മികച്ച മൈലേജും 1.85 ടൺ പേലോഡ് ശേഷിയുമുള്ള പുതിയ ബൊലേറോ മാക്സ് പിക്ക്-അപ്പ് എച്ച്ഡി 1.9 സിഎൻജി മഹീന്ദ്ര പുറത്തിറക്കി. 

രാജ്യത്തെ ജനപ്രിയ വാഹന നിർമ്മാതാക്കളായ മഹീന്ദ്ര ആൻഡ് മഹീന്ദ്ര പുതിയ ബൊലേറോ മാക്സ് പിക്ക്-അപ്പ് എച്ച്ഡി 1.9 സിഎൻജി പുറത്തിറക്കിക്കൊണ്ട് ബൊലേറോ പിക്ക്-അപ്പ് ശ്രേണി വിപുലീകരിച്ചു. 11.19 ലക്ഷം രൂപ പ്രാരംഭ എക്സ്-ഷോറൂം വിലയുള്ള ഒരു ഹെവി-ഡ്യൂട്ടി വാണിജ്യ വാഹനമാണിത്. പൂർണ്ണമായി ലോഡുചെയ്യുമ്പോഴും മികച്ച മൈലേജ് നൽകുന്ന തരത്തിലാണ് ഈ പിക്ക്-അപ്പ് രൂപകൽപ്പന ചെയ്തിരിക്കുന്നതെന്ന് കമ്പനി അവകാശപ്പെടുന്നു.

ഈ പിക്ക്-അപ്പിൽ കമ്പനി 2.5 ലിറ്റർ ടർബോചാർജ്ഡ് സിഎൻജി എഞ്ചിനാണ് ഉപയോഗിച്ചിരിക്കുന്നത്. ഇത് 82 ബിഎച്ച്പി പവറും 220 ന്യൂട്ടൺ മീറ്റർ (എൻഎം) ടോർക്കും ഉത്പാദിപ്പിക്കുന്നു. ഈ സജ്ജീകരണം പൂർണ്ണ ലോഡിലാണെങ്കിലും പിക്കപ്പിനെ ഇന്ധനക്ഷമതയുള്ളതാക്കി മാറ്റുന്നുവെന്ന് മഹീന്ദ്ര അവകാശപ്പെടുന്നു. ഇതിന് മികച്ച ഇൻ-ക്ലാസ് പേലോഡ് ശേഷിയുണ്ട്. 1.85 ടൺ സാധനങ്ങൾ ലോഡുചെയ്യാൻ ഇതിന് കഴിയും. ഇത് സിഎൻജി വിഭാഗത്തിലെ ഏറ്റവും മികച്ചതാക്കി മാറ്റുന്നു.

180 ലിറ്റർ സിഎൻജി ടാങ്കാണ് ഇതിനുള്ളതെന്ന് മഹീന്ദ്ര പറയുന്നു. ഇതിനുപുറമെ, ഫുൾ ടാങ്ക് സിഎൻജിയിൽ ഏകദേശം 400 കിലോമീറ്റർ ഡ്രൈവിംഗ് റേഞ്ച് നൽകാൻ ഈ പിക്ക്-അപ്പിന് കഴിയും. ഹെവി ഡ്യൂട്ടി, ശക്തമായ പേലോഡ്, മികച്ച മൈലേജ് എന്നിവ ഈ ബൊലേറോ പിക്ക്-അപ്പിനെ വളരെ ലാഭകരമാക്കുന്നു. ഇതിന്റെ എഞ്ചിൻ 5-സ്പീഡ് മാനുവൽ ട്രാൻസ്‍മിഷനുമായി ഘടിപ്പിച്ചിരിക്കുന്നു. കൂടാതെ പവർ സ്റ്റിയറിംഗ് സഹിതം, നഗരപ്രദേശങ്ങളിലും ഗ്രാമപ്രദേശങ്ങളിലും മികച്ച യാത്ര നൽകുന്നു.

ഹെവി ഡ്യൂട്ടിക്കായി രൂപകൽപ്പന ചെയ്‌തിരിക്കുന്ന ഈ പിക്ക്-അപ്പിൽ ലീഫ് സ്പ്രിംഗ് സസ്‌പെൻഷനും രണ്ട് ആക്‌സിലുകളിലും 16 ഇഞ്ച് ടയറുകളും ഉണ്ട്. മോശം റോഡുകളിൽ പോലും സ്ഥിരത നൽകിക്കൊണ്ട് ലോഡ്-ബെയറിംഗിനെ ഇവ പിന്തുണയ്ക്കുമെന്ന് കമ്പനി പറയുന്നു. സിഎൻജി പിക്കപ്പിൽ മഹീന്ദ്ര ആദ്യമായി ഐമാക്സ് കണക്റ്റഡ് വെഹിക്കിൾ സാങ്കേതികവിദ്യ ഉപയോഗിച്ചു. ഇന്ധന നിരീക്ഷണം, ട്രിപ്പ് ട്രാക്കിംഗ്, എഞ്ചിൻ ഡയഗ്നോസ്റ്റിക്സ്, വാഹന ഉപയോഗം എന്നിവയ്ക്കായി ഈ സിസ്റ്റം തത്സമയ ടെലിമാറ്റിക്സ് നൽകുന്നു.

പ്രകടനത്തിനും കണക്റ്റിവിറ്റിക്കും പുറമെ, ബൊലേറോ പിക്ക്-അപ്പിൽ ചില പ്രത്യേക സവിശേഷതകളും നൽകിയിട്ടുണ്ട്. ഡ്രൈവറുടെ സുഖസൗകര്യങ്ങൾ കണക്കിലെടുത്ത്, എയർ കണ്ടീഷനിംഗ്, ഹീറ്റർ, ഉയരം ക്രമീകരിക്കാവുന്ന ഡ്രൈവർ സീറ്റ് എന്നിവയും ഇതിൽ നൽകിയിട്ടുണ്ട്. ഇതിനുപുറമെ, D + 2 സീറ്റിംഗ് കോൺഫിഗറേഷൻ ഒരു അധിക യാത്രക്കാരനെയും ഉൾക്കൊള്ളാൻ അനുവദിക്കുന്നു. 3050 എംഎം നീളമുള്ള ഒരു കാർഗോ ബെഡും ഈ പിക്കപ്പിന് ലഭിക്കുന്നു. ഇത് ഭാരമേറിയ വസ്‍തുക്കൾ കൊണ്ടുപോകുന്നതിന് മികച്ചതാക്കുന്നു എന്നും കമ്പനി പറയുന്നു.