ഫാമിലികൾക്ക് കോളടിച്ചു! വില കുറഞ്ഞ എംപിവിയുമായി നിസാൻ

ജാപ്പനീസ് വാഹന ബ്രാൻഡായ നിസാൻ ഇന്ത്യയിൽ ഒരു പുതിയ 7 സീറ്റർ ഫാമിലി കാർ അവതരിപ്പിക്കാൻ ഒരുങ്ങുന്നു. റെനോ ട്രൈബറിനെ അടിസ്ഥാനമാക്കിയുള്ള ഈ എംപിവി, 2025 ഡിസംബർ 18-ന് വ്യത്യസ്തമായ ഡിസൈനും സമാനമായ ഫീച്ചറുകളുമായി എത്തും. 

വലിയ ഫാമിലകൾക്കൊരു സന്തോഷ വാർത്ത. ജാപ്പനീസ് വാഹന ബ്രാൻഡായ നിസാനിൽ നിന്നും മൂന്ന് നിരകളുള്ള ഒരു പുതിയ ഫാമിലി കാർ വരുന്നു. 2025 ഡിസംബർ 18 ന് പുതിയ എംപിവി ഔദ്യോഗികമായി അരങ്ങേറ്റം കുറിക്കുമെന്ന് നിസാൻ ഇന്ത്യ സ്ഥിരീകരിച്ചു. ഇന്ത്യയിലെ നിസാന്റെ ഉൽപ്പന്ന പോർട്ട്‌ഫോളിയോയിലെ മൂന്നാമത്തെ കൂട്ടിച്ചേർക്കലായിരിക്കും ഇത്. വരാനിരിക്കുന്ന നിസാൻ എംപിവിയുടെ ഔദ്യോഗിക വിവരങ്ങൾ വരും ദിവസങ്ങളിൽ വെളിപ്പെടുത്തുമെങ്കിലും, റെനോ ട്രൈബർ ഷെയറിംഗ് പ്ലാറ്റ്‌ഫോം, പവർട്രെയിൻ, സവിശേഷതകൾ എന്നിവയെ അടിസ്ഥാനമാക്കിയുള്ളതായിരിക്കുമെന്ന് പ്രതീക്ഷിക്കുന്നു. എങ്കിലും അതിന്റെ മൊത്തത്തിലുള്ള ഡിസൈൻ ഭാഷ ഡോണർ മോഡലിൽ നിന്ന് തികച്ചും വ്യത്യസ്‍തമായിരിക്കും.

ഡിസൈൻ വിശദാംശങ്ങൾ

ട്രൈബറിനോട് സമാനമായ ഒരു സിലൗറ്റും സ്റ്റാൻസും പുതിയ നിസ്സാൻ എംപിവിക്ക് ഉണ്ടാകുമെന്ന് ടീസർ വെളിപ്പെടുത്തുന്നു. ഷഡ്ഭുജ ഇൻസേർട്ടുകളുള്ള വലിയ ഗ്രിൽ, പുനർരൂപകൽപ്പന ചെയ്ത ഹെഡ്‌ലാമ്പുകൾ, സി ആകൃതിയിലുള്ള ആക്‌സന്റുകളുള്ള പുതുക്കിയ ബമ്പർ എന്നിവ ഉൾപ്പെടുന്ന ഇതിന്റെ മുൻഭാഗം പൂർണ്ണമായും പുതിയതായിരിക്കും. പുതുതായി രൂപകൽപ്പന ചെയ്‌ത അലോയ് വീലുകൾ, ഫങ്ഷണൽ റൂഫ് റെയിലുകൾ, വ്യത്യസ്തമായി രൂപകൽപ്പന ചെയ്‌ത ടെയിൽലാമ്പുകൾ, പിൻ ബമ്പർ എന്നിവയും ഫാമിലി കാറിൽ വരാൻ സാധ്യതയുണ്ട്.

ഇന്റീരിയറും സവിശേഷതകളും

സിഎംഎഫ്-എ പ്ലാറ്റ്‌ഫോമിനെ അടിസ്ഥാനമാക്കി, നിസാന്റെ 7 സീറ്റർ കാറിൽ റെനോ ട്രൈബറിനെപ്പോലെ ഒരു ക്യാബിൻ ലേഔട്ടും സവിശേഷതകളും വാഗ്ദാനം ചെയ്യുമെന്ന് പ്രതീക്ഷിക്കുന്നു. എട്ട് ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 7 ഇഞ്ച് ടിഎഫ്‍ടി ഇൻസ്ട്രുമെന്റ് ക്ലസ്റ്റർ, വയർലെസ് ആപ്പിൾ കാർപ്ലേ, ആൻഡ്രോയിഡ് ഓട്ടോ (ഉയർന്ന ട്രിമ്മുകൾക്കായി നീക്കിവച്ചിരിക്കുന്നു), കൂൾഡ് ലോവർ ഗ്ലോവ് ബോക്‌സ്, ഡ്രൈവർ സീറ്റ് ഉയരം ക്രമീകരിക്കാനും ഡ്രൈവർ സീറ്റ് ആംറെസ്റ്റ്, ഓട്ടോ-ഫോൾഡ് ഓആർവിഎമ്മുകൾ, ക്രൂയിസ് കൺട്രോൾ, പിൻ സീറ്റ് ലൈറ്റിംഗ് തുടങ്ങിയവ ഫീച്ചർ ലിസ്റ്റിൽ ഉൾപ്പെട്ടേക്കാം.

എഞ്ചിൻ ഓപ്ഷനുകൾ

പുതിയ നിസാൻ എംപിവിയിൽ ട്രൈബറിന്റെ 1.0 ലിറ്റർ, 3 സിലിണ്ടർ നാച്ചുറലി ആസ്പിറേറ്റഡ് പെട്രോൾ എഞ്ചിൻ ഉപയോഗിക്കുമെന്ന് പ്രതീക്ഷിക്കുന്നു. ഇത് 72 ബിഎച്ച്പി പവറും 96 എൻഎം ടോർക്കും ഉത്പാദിപ്പിക്കുന്നു. എങ്കിലും മികച്ച പ്രകടനത്തിനായി നിസാൻ എഞ്ചിൻ ട്യൂൺ ചെയ്തേക്കാം. ട്രാൻസ്‍മിഷൻ തിരഞ്ഞെടുപ്പുകളിൽ അഞ്ച് സ്പീഡ് മാനുവലും എഎംടി യൂണിറ്റും ഉൾപ്പെടാൻ സാധ്യതയുണ്ട്.

പ്രതീക്ഷിക്കുന്ന വില

പുതിയ നിസാൻ 7 സീറ്റർ എംപിവിയുടെ വില നിലവിൽ 5.76 ലക്ഷം മുതൽ 8.6 ലക്ഷം രൂപ വരെ എക്സ്-ഷോറൂം വില പരിധിയിൽ ലഭ്യമായ റെനോ ട്രൈബറിനോട് അടുത്തായിരിക്കും. സമാനമായ വിലയിൽ ലോഞ്ച് ചെയ്താൽ, ഇന്ത്യയിലെ ഏറ്റവും താങ്ങാനാവുന്ന ഫാമിലി കാറുകളിൽ ഒന്നായിരിക്കും ഇത്.