പുതിയ അവതാരത്തിൽ നിസാൻ കൈറ്റ്; ഇന്ത്യയിലേക്ക് വരുമോ?

ബ്രസീലിൽ നടന്ന ചടങ്ങിൽ നിസാൻ തങ്ങളുടെ പുതിയ കോംപാക്റ്റ് എസ്‌യുവി 'കൈറ്റ്' ആഗോളതലത്തിൽ അവതരിപ്പിച്ചു. 1.6 ലിറ്റർ ഫ്ലെക്സ്-ഫ്യുവൽ എഞ്ചിനും, ADAS, 360-ഡിഗ്രി ക്യാമറ തുടങ്ങിയ ഫീച്ചറുകളുമുണ്ട് ഈ മോഡലിന്.

ബ്രസീലിലെ സാവോ പോളോയിൽ നടന്ന ഒരു പരിപാടിയിൽ പുതിയ നിസാൻ കൈറ്റ് കോംപാക്റ്റ് എസ്‌യുവി ലോക അരങ്ങേറ്റം കുറിച്ചു. ബ്രസീലിലെ നിസാന്റെ റെസെൻഡെ ആസ്ഥാനമായുള്ള പ്ലാന്റിൽ ഉത്പാദനം ഇതിനകം ആരംഭിച്ചിട്ടുണ്ട്, 2026 മുതൽ ഈ മോഡൽ 20-ലധികം രാജ്യങ്ങളിലേക്ക് കയറ്റുമതി ചെയ്യും. ലാറ്റിൻ അമേരിക്കയിലും മറ്റ് വിപണികളിലും ഫോക്‌സ്‌വാഗൺ ടെറ, ഫിയറ്റ് പൾസ്, ഹ്യുണ്ടായ് ക്രെറ്റ, റെനോ കാർഡിയൻ, ഷെവർലെ ട്രാക്കർ എന്നിവയ്‌ക്കെതിരെയായിരിക്കും കൈറ്റ് മത്സരിക്കുക. നിലവിൽ, അതിന്റെ ഇന്ത്യയിലെ ലോഞ്ചിനെക്കുറിച്ച് ഔദ്യോഗിക സ്ഥിരീകരണമൊന്നുമില്ല.

മൂന്നാം തലമുറ റെനോ ഡസ്റ്ററിനെ അടിസ്ഥാനമാക്കിയുള്ള ഒരു സി-സെഗ്മെന്റ് എസ്‌യുവി 2026 ന്റെ തുടക്കത്തിൽ പുറത്തിറക്കാൻ നിസാൻ ഇന്ത്യ പദ്ധതിയിടുന്നു. പുതിയ ഡസ്റ്ററുമായി ഈ മോഡൽ അതിന്റെ പ്ലാറ്റ്‌ഫോം, സവിശേഷതകൾ, പവർട്രെയിനുകൾ എന്നിവ പങ്കിടും, പക്ഷേ ഒരു പുതിയ ഡിസൈൻ ഭാഷ സ്വീകരിക്കും. ഇതിന്റെ മൊത്തത്തിലുള്ള സ്റ്റൈലിംഗ് മാഗ്നൈറ്റിൽ നിന്നും പുതുതായി അവതരിപ്പിച്ച നിസാൻ കൈറ്റിൽ നിന്നും പ്രചോദനം ഉൾക്കൊണ്ടേക്കാം.

സ്പെസിഫിക്കേഷൻസ്

നിസാൻ കൈറ്റിന് 4,30 മീറ്റർ നീളവും 1.76 മീറ്റർ വീതിയുമുണ്ട്, വീൽബേസ് 2.62 മീറ്റർ ആണ്. ഈ കോംപാക്റ്റ് എസ്‌യുവി 432 ലിറ്റർ ബൂട്ട് സ്‌പേസും മികച്ച ഇന്റീരിയർ സ്‌പേസും ഫീച്ചറുകളും നൽകുന്നു. 2016 ൽ ആദ്യമായി പുറത്തിറങ്ങിയ കിക്‌സ് പ്ലേയുടെ യഥാർത്ഥ പ്ലാറ്റ്‌ഫോം നിലനിർത്തിക്കൊണ്ട് നിസ്സാൻ അതിന്റെ ഡിസൈൻ അപ്‌ഡേറ്റ് ചെയ്‌തു. ആഗോളതലത്തിൽ, നിസ്സാൻ കൈറ്റ് എസ്‌യുവി ആക്ടീവ്, സെൻസ് പ്ലസ്, അഡ്വാൻസ് പ്ലസ്, എക്‌സ്‌ക്ലൂസീവ് എന്നിങ്ങനെ നാല് വകഭേദങ്ങളിൽ ലഭ്യമാകും. വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവയുള്ള ഒമ്പത് ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 7 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ, വയർലെസ് ഫോൺ ചാർജർ, ഓട്ടോമാറ്റിക്, ഡിജിറ്റൽ എസി, വേഗതയും ദൂരവും ഉൾക്കൊള്ളുന്ന അഡാപ്റ്റീവ് ക്രൂയിസ് കൺട്രോൾ, 360 ഡിഗ്രി ക്യാമറ, എഡിഎഎസ് തുടങ്ങിയവ ഈ കോംപാക്റ്റ് എസ്‌യുവിയിൽ സജ്ജീകരിച്ചിരിക്കുന്നു.

പവർട്രെയിൻ

നിസാൻ കൈറ്റ് എസ്‌യുവി അതിന്റെ പവർട്രെയിൻ കിക്‌സ് പ്ലേയുമായി പങ്കിടുന്നു. 1.6 ലിറ്റർ നാച്ചുറലി ആസ്പിറേറ്റഡ്, ഫ്ലെക്‌സ് ഫ്യുവൽ മോട്ടോർ ആണിത്. എത്തനോൾ ഉപയോഗിച്ച് 113 ബിഎച്ച്പി പവറും 149 എൻഎം ടോർക്കും പെട്രോൾ ഉപയോഗിച്ച് 110 ബിഎച്ച്പിയും 146 എൻഎം ടോർക്കും ഇത് ഉത്പാദിപ്പിക്കുന്നു. സിവിടി ഗിയർബോക്‌സാണ് ട്രാൻസ്‍മിഷൻ ചുമതലകൾ നിർവഹിക്കുന്നത്. കൈറ്റ് 11 കിലോമീറ്റർ ഇന്ധനക്ഷമത വാഗ്ദാനം ചെയ്യുന്നുവെന്ന് നിസാൻ സ്ഥിരീകരിച്ചു.