ഫാമിലികൾക്ക് കോളടിച്ചു! വലിപ്പം കൂട്ടിയ ഡസ്റ്ററിന് പുതിയ പേരായി, വരുന്നത് റെനോ ബോറിയൽ!

റെനോയുടെ വരാനിരിക്കുന്ന ഏഴ് സീറ്റർ എസ്‌യുവിക്ക് 'റെനോ ബോറിയൽ' എന്ന് പേരിടുമെന്ന് റിപ്പോർട്ടുകൾ. മൂന്നാം തലമുറ ഡസ്റ്ററിനെ അടിസ്ഥാനമാക്കി, ഈ മൂന്ന് നിര എസ്‌യുവി വരും മാസങ്ങളിൽ ആഗോളതലത്തിൽ അരങ്ങേറ്റം കുറിക്കും.

ഇന്ത്യൻ വിപണിയിൽ പുതിയ റെനോ ഡസ്റ്ററിനായി ഫാൻസ് കാത്തിരിക്കുകയാണ്. പല അവസരങ്ങളിലും ഇതുമായി ബന്ധപ്പെട്ട വിശദാംശങ്ങൾ പുറത്തുവരുന്നുണ്ട്. 5 സീറ്റർ, 7 സീറ്റർ വേരിയന്റുകളിൽ കമ്പനി ഈ എസ്‌യുവി പുറത്തിറക്കാൻ പോകുന്നു എന്നതാണ് പ്രത്യേകത. ഇപ്പോൾ കമ്പനി വരാനിരിക്കുന്ന 7 സീറ്റർ പതിപ്പിന്റെ പേര് സ്ഥിരീകരിച്ചു. റെനോയുടെ വരാനിരിക്കുന്ന ഏഴ് സീറ്റർ എസ്‌യുവിക്ക് 'റെനോ ബോറിയൽ' എന്ന് പേരിടുമെന്നാണ് റിപ്പോർട്ടുകൾ. മൂന്നാം തലമുറ ഡസ്റ്ററിനെ അടിസ്ഥാനമാക്കി, മൂന്ന് നിര എസ്‌യുവി വരും മാസങ്ങളിൽ ആഗോളതലത്തിൽ അരങ്ങേറ്റം കുറിക്കും. ആദ്യം ലാറ്റിൻ അമേരിക്കൻ വിപണിയിലും തുടർന്ന് ഇന്ത്യ ഉൾപ്പെടെ 70 ൽ അധികം യൂറോപ്യൻ ഇതര രാജ്യങ്ങളിലും ഇത് ലോഞ്ച് ചെയ്യും. ഫ്രഞ്ച് വാഹന നിർമ്മാതാക്കൾ ഇതുവരെ ഇന്ത്യയിലെ ലോഞ്ച് ടൈംലൈൻ വെളിപ്പെടുത്തിയിട്ടില്ല. എങ്കിലും പുതിയ റെനോ ഡസ്റ്ററിന്റെ ലോഞ്ചിന് ശേഷം 2026 ൽ ഇത് എത്താൻ സാധ്യതയുണ്ട് . 7 സീറ്റർ റെനോ ഡസ്റ്റർ   ബോറിയലിന്റെ പ്രധാന വിശദാംശങ്ങൾ പരിശോധിക്കാം.

റെനോ ബോറിയൽ പേരിന് പിന്നിൽ
ഗ്രീക്ക് പുരാണത്തിലെ കാറ്റിന്റെ ദേവനായ ബോറിയസിൽ നിന്നാണ് 'ബോറിയൽ' എന്ന പേര് ഉരുത്തിരിഞ്ഞതെന്ന് കമ്പനി പറയുന്നു. "വടക്കൻ കാറ്റ്" എന്നർത്ഥം വരുന്ന 'ബോറിയലിസ്, ബോറിയസ്' എന്ന ലാറ്റിൻ പദത്തിൽ നിന്നും ഇത് പ്രചോദനം ഉൾക്കൊണ്ടതാണ്. റെനോയ്ക്ക് സാഗ നാമങ്ങൾ, ഐക്കൺ നാമങ്ങൾ, പുതിയ നാമങ്ങൾ എന്നിങ്ങനെ മൂന്ന് വിഭാഗങ്ങളിലുള്ള പേരുകളുണ്ടെന്ന് റെനോ ബ്രാൻഡ് ഗ്ലോബൽ മാർക്കറ്റിംഗിലെ നാമകരണവിഭാഗം മാനേജർ സിൽവിയ ഡോസ് സാന്റോസ് വെളിപ്പെടുത്തുന്നു. 'ബോറിയൽ' എന്ന പേര് പുതിയ നാമങ്ങൾ വിഭാഗത്തിൽ പെടുന്നു. ഇത് എസ്‌യുവിയുടെ സ്റ്റാറ്റസ് വർദ്ധിപ്പിക്കുന്ന രൂപകൽപ്പനയുടെ ശക്തിയെ പ്രതിനിധീകരിക്കുന്നു.

എന്തൊക്കെ പ്രതീക്ഷിക്കാം?
ബ്രാൻഡിന്റെ ഇന്റർനാഷണൽ ഗെയിം പ്ലാൻ 2027-ന്റെ ഭാഗമാണ് റെനോ ബോറിയൽ. കമ്പനി ഇതുവരെ ഉൽപ്പന്ന വിശദാംശങ്ങൾ വെളിപ്പെടുത്തിയിട്ടില്ല. എങ്കിലും, പുതിയ റെനോ ഡസ്റ്ററുമായി പ്ലാറ്റ്‌ഫോം, ഡിസൈൻ ഘടകങ്ങൾ, സവിശേഷതകൾ, പവർട്രെയിനുകൾ എന്നിവ പങ്കിടുമെന്ന് പ്രതീക്ഷിക്കുന്നു. അതിന്റെ 5 സീറ്റർ പതിപ്പുമായി താരതമ്യപ്പെടുത്തുമ്പോൾ, ഇത് നീളമുള്ളതും കൂടുതൽ വിശാലവും സവിശേഷതകളാൽ സമ്പന്നവുമായിരിക്കും.

എഞ്ചിൻ ഓപ്ഷനുകൾ
പവർട്രെയിനിനെ സംബന്ധിച്ചിടത്തോളം, പുതിയ റെനോ 7 സീറ്റർ എസ്‌യുവി ശക്തമായ ഹൈബ്രിഡ് സജ്ജീകരണത്തോടെ വരുമെന്ന് പ്രതീക്ഷിക്കുന്നു. 140 ബിഎച്ച്പി, 1.2 ലിറ്റർ പെട്രോൾ എഞ്ചിൻ ഉൾക്കൊള്ളുന്ന ഒരു മൈൽഡ് ഹൈബ്രിഡ് പതിപ്പും ഉണ്ടാകാൻ സാധ്യതയുണ്ട്.

ഇന്റീരിയറും സവിശേഷതകളും
ഉള്ളിൽ, പുതിയ റെനോ 7 സീറ്റർ എസ്‌യുവിയിൽ വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ കണക്റ്റിവിറ്റിയുള്ള വലിയ 10.1 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 7 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ, ഒരു ആർക്കാമിസ് ഓഡിയോ സിസ്റ്റം, ഒരു ഫ്ലാറ്റ്-ബോട്ടം സ്റ്റിയറിംഗ് വീൽ, ഓട്ടോമാറ്റിക് ക്ലൈമറ്റ് കൺട്രോൾ, ലെവൽ 2 ADAS സ്യൂട്ട് എന്നിവയും അതിലേറെയും ഉൾപ്പെടാൻ സാധ്യതയുണ്ട്.

ഡിസൈൻ വിശദാംശങ്ങൾ
പുതിയ 7 സീറ്റർ റെനോ ഡസ്റ്റർ അഥവാ ബോറിയലിൽ Y-ആകൃതിയിലുള്ള ഹെഡ്‌ലാമ്പുകൾ, എൽഇഡി - ഡിആർഎല്ലുകൾ, എൽഇഡി ടെയിൽലാമ്പുകൾ എന്നിവയ്‌ക്കൊപ്പം പ്രകാശിതമായ റെനോ ലോഗോ, സി-പില്ലർ മൗണ്ടഡ് ഡോർ ഹാൻഡിലുകൾ, സ്‌പോർട്ടി വീൽ ആർച്ച് ക്ലാഡിംഗുകൾ എന്നിവ ഉൾപ്പെടും.