ഡസ്റ്ററിനായി ആളുകൾ കാത്തിരിക്കുമ്പോൾ, നിശബ്‍ദമായി മറ്റൊരു എസ്‍യുവി അവതരിപ്പിച്ച് റെനോ

ദക്ഷിണ കൊറിയയിൽ റെനോ തങ്ങളുടെ പുതിയ പ്രീമിയം ക്രോസ്ഓവർ എസ്‌യുവിയായ ഫിലാന്റെ അവതരിപ്പിച്ചു. ഫ്യൂച്ചറിസ്റ്റിക് ഡിസൈനും ഹൈടെക് ഫീച്ചറുകളുമുള്ള ഈ ഫുൾ ഹൈബ്രിഡ് എസ്‌യുവി, പ്രീമിയം വിപണിയിലേക്കുള്ള റെനോയുടെ തിരിച്ചുവരവ് കുറിക്കുന്നു. 

ആഗോളതലത്തിൽ ഫ്രഞ്ച് വാഹന ബ്രൻഡായ റെനോയ്ക്ക് ഒരു യഥാർത്ഥ മുൻനിര മോഡലിന്റെ അഭാവം വളരെക്കാലമായി അനുഭവപ്പെട്ടിരുന്നു. ഈ ആവശ്യം പരിഹരിക്കുന്നതിനായി കമ്പനി പുതിയ പ്രീമിയം ക്രോസ്ഓവർ എസ്‌യുവിയായ റെനോ ഫിലാന്റെ പുറത്തിറക്കി. ദക്ഷിണ കൊറിയയിൽ അവതരിപ്പിച്ച ഈ എസ്‌യുവി, ഏഷ്യൻ, മിഡിൽ ഈസ്റ്റേൺ വിപണികളിൽ ബ്രാൻഡിന്റെ സാന്നിധ്യം ശക്തിപ്പെടുത്താൻ ലക്ഷ്യമിടുന്ന റെനോയുടെ 2027 ലെ അന്താരാഷ്ട്ര ഗെയിം പ്ലാനിന്‍റെ ഒരു പ്രധാന ഭാഗമായിരിക്കും.

റെനോയുടെ ലാൻഡ് സ്പീഡ് പ്രോട്ടോടൈപ്പുകളിൽ നിന്ന് നാമകരണം ചെയ്യപ്പെട്ട ഫിലാന്റെ, പ്രീമിയം വിഭാഗത്തിലേക്കുള്ള കമ്പനിയുടെ തിരിച്ചുവരവിനെ അടയാളപ്പെടുത്തുന്ന ഒരു പൂർണ്ണ ഹൈബ്രിഡ് എസ്‌യുവിയാണ്. ഇതിന്റെ രൂപകൽപ്പന വ്യത്യസ്തവും ഭാവിയിലേക്കുള്ളതുമാണ്. ഹൈടെക് സവിശേഷതകളോടൊപ്പം ലോഞ്ച് പോലുള്ള സുഖസൗകര്യങ്ങളും ക്യാബിൻ വാഗ്ദാനം ചെയ്യുന്നു. വോൾവോ XC90, ഓഡി Q7, ലെക്സസ് RX തുടങ്ങിയ എസ്‌യുവികളുമായി മത്സരിച്ചുകൊണ്ട് ഇ-സെഗ്‌മെന്റിൽ ശക്തമായ സാന്നിധ്യം സ്ഥാപിക്കാനാണ് റെനോ ലക്ഷ്യമിടുന്നത്.

എസ്‌യുവിയുടെ മുൻവശത്ത് ശക്തമായ ഒരു ലുക്ക്, എയറോഡൈനാമിക് ക്രീസുകൾ, ആധുനിക ലൈറ്റിംഗ് സിഗ്നേച്ചർ എന്നിവയുണ്ട്. ബമ്പറിന് ചുറ്റും ഇരട്ട-ബാരൽ എൽഇഡി ഹെഡ്‌ലാമ്പുകളും ഷാർപ്പായിട്ടുള്ള എൽഇഡി ഡിആർഎല്ലുകളും ഇതിലുണ്ട്. ഗ്രിൽ ഡിസൈനിൽ ചെറിയ എൽഇഡി ഘടകങ്ങൾ ഉണ്ട്, ഇത് ഇതിന് ഒരു വ്യതിരിക്തമായ ലുക്ക് നൽകുന്നു. സൈഡ് പ്രൊഫൈലിൽ ഷാർപ്പായിട്ടുള്ള വരകളും ക്രീസുകളും ഉണ്ട്. ഇതൊരു ലെയേർഡ് ഡിസൈനിലും പിന്നിൽ ഒരു വലിയ ബമ്പറിലും അവസാനിക്കുന്നു.

ക്യാബിനും സാങ്കേതികവിദ്യയും

ക്യാബിനിലേക്ക് കാലെടുത്തു വയ്ക്കുമ്പോൾ തന്നെ ഫ്യൂച്ചെറിസ്റ്റിക് അനുഭവം പ്രകടമാകും. വലിയ ഗ്ലാസ് മേൽക്കൂരയും സുഖപ്രദമായ ലോഞ്ച് പോലുള്ള സീറ്റുകളും ഇതിന്റെ സവിശേഷതയാണ്. റെനോ ഫിലാന്റെയ്ക്ക് 4,915 മില്ലീമീറ്റർ നീളവും 2,820 മില്ലീമീറ്റർ വീൽബേസുമാണുള്ളത്. ഇത് നിലവിൽ റെനോയുടെ ഏറ്റവും നീളം കൂടിയ കാറായി മാറുന്നു. 320 മില്ലീമീറ്റർ പിൻ ലെഗ്റൂം, 874 മില്ലീമീറ്റർ ഹെഡ്റൂം, 654 ലിറ്റർ വലിയ ബൂട്ട് സ്പേസ് എന്നിവയുള്ള ക്യാബിൻ സ്പേസ് ലഭിക്കുന്നു. ഇൻസ്ട്രുമെന്‍റ് ക്ലസ്റ്റർ, ഇൻഫോടെയ്ൻമെന്റ്, പാസഞ്ചർ ഡിസ്പ്ലേകൾ എന്നിവയായി മൂന്ന് 12.3 ഇഞ്ച് ഡിജിറ്റൽ സ്‌ക്രീനുകൾ പ്രവർത്തിക്കുന്നു. ഡ്രൈവർക്കായി 25.6 ഇഞ്ച് ഓഗ്‌മെന്റഡ് റിയാലിറ്റി ഹെഡ്-അപ്പ് ഡിസ്‌പ്ലേയും നൽകിയിട്ടുണ്ട്.

ഹൈബ്രിഡ് പവർട്രെയിൻ

ഗീലിയിൽ നിന്നുള്ള സിഎംഎ പ്ലാറ്റ്‌ഫോമിലാണ് റെനോ ഫിലാന്റെ നിർമ്മിച്ചിരിക്കുന്നത്. വോൾവോ എക്സ്‌സി40 നും ഇത് ശക്തി പകരുന്നു. 1.5 ലിറ്റർ ടർബോചാർജ്ഡ് പെട്രോൾ എഞ്ചിൻ, രണ്ട് ഇലക്ട്രിക് മോട്ടോറുകൾ, 1.64 കിലോവാട്ട്സ് ബാറ്ററി എന്നിവ ഉൾപ്പെടുന്ന റെനോയുടെ ഇ-ടെക് 250 ഹൈബ്രിഡ് സിസ്റ്റം ഈ എസ്‌യുവിയിൽ ഉൾപ്പെടുന്നു. 3-സ്പീഡ് ഡിഎച്ച്ടി പ്രോ ഓട്ടോമാറ്റിക് ട്രാൻസ്മിഷനുമായി ബന്ധിപ്പിച്ചിരിക്കുന്ന ഈ എസ്‌യുവി 247 എച്ച്പി പവറും 565 എൻഎം പീക്ക് ടോർക്കും ഉത്പാദിപ്പിക്കുന്നു. ദക്ഷിണ കൊറിയയിലെ ബുസാൻ പ്ലാന്റിൽ റെനോ ഫിലാന്റെയുടെ ഉത്പാദനം നടക്കും. 2026 മാർച്ചിൽ ഇത് പുറത്തിറങ്ങും. എസ്‌യുവി ചില ദക്ഷിണ അമേരിക്കൻ വിപണികളിലേക്കും ഗൾഫ് രാജ്യങ്ങളിലേക്കും കയറ്റുമതി ചെയ്യും. എന്നാൽ നിലവിൽ ഇന്ത്യയിൽ ലോഞ്ച് ചെയ്യുന്നതിന് പദ്ധതികളൊന്നുമില്ല എന്നാണ് റിപ്പോർട്ടുകൾ.