ടാറ്റ പഞ്ച് ഇവിയും സിട്രോൺ ഇസി3യും തമ്മിൽ; ഏതാണ് മികച്ചത്?

ടാറ്റ പഞ്ച് ഇവി, സിട്രോൺ ഇസി3 എന്നീ കോംപാക്ട് ഇലക്ട്രിക് എസ്‌യുവികളെ ഈ ലേഖനം താരതമ്യം ചെയ്യുന്നു. ഡിസൈൻ, ബാറ്ററി, റേഞ്ച്, സുരക്ഷ, വില എന്നിവയിലെ പ്രധാന വ്യത്യാസങ്ങൾ ഇതിൽ വിശദീകരിക്കുന്നു. 

നാല് പേർക്ക് സുഖമായി സഞ്ചരിക്കാവുന്ന, നല്ല റേഞ്ച് ഉള്ള, ദൈനംദിന നഗര യാത്രകൾക്ക് അനുയോജ്യമായ ഒരു ഇലക്ട്രിക് വാഹനമാണ് നിങ്ങൾ തിരയുന്നതെങ്കിൽ, ടാറ്റ പഞ്ച് ഇവിയും സിട്രോൺ ഇസി3യും രണ്ട് ഓപ്ഷനുകളാണ്. രണ്ടും കോം‌പാക്റ്റ് എസ്‌യുവികളാണ്. പൂർണ്ണ ചാർജിൽ 240 കിലോമീറ്ററിലധികം റേഞ്ച് അവകാശപ്പെടുന്നു. എങ്കിലും ഈ രണ്ട് ഇലക്ട്രിക് എസ്‌യുവികളും സവിശേഷതകൾ, ഡിസൈൻ, ഉപയോക്തൃ അനുഭവം എന്നിവയിൽ കാര്യമായ വ്യത്യാസമുണ്ട്. അതിനാൽ ഈ രണ്ട് വാഹനങ്ങൾ തമ്മിലുള്ള വ്യത്യാസങ്ങൾ അറിയാം.

ഡിസൈൻ

രൂപകൽപ്പനയുടെ കാര്യത്തിൽ, രണ്ട് എസ്‌യുവികളും വ്യത്യസ്‍തമാണ്. പഞ്ച് ഇവിയിൽ സ്മാർട്ട് ഡിജിറ്റൽ എൽഇഡി ഡിആർഎല്ലുകളും ഹെഡ്‌ലൈറ്റുകളും ഉണ്ട്. ബാക്കിയുള്ള എസ്‌യുവി അതിന്റെ നേരായ ലുക്കും ചെറിയ ഓവർഹാങ്ങുകളും കൊണ്ട് ഐസിഇ വേരിയന്റിന് സമാനമാണ്. സിട്രോൺ ഇസി3 സ്റ്റാൻഡേർഡ് സി3യോട് സമാനമാണ്. സ്പ്ലിറ്റ് എൽഇഡി ഡിആർഎല്ലുകളും ഹാലൊജൻ ഹെഡ്‌ലൈറ്റുകളാൽ ചുറ്റപ്പെട്ട ഒരു വേറിട്ട രൂപകൽപ്പനയാണ് ലഭിക്കുന്നത്. മുൻവശത്തെ ബമ്പർ സ്‍പോർട്ടിയായി കാണപ്പെടുന്നു.

ബാറ്ററി പായ്ക്ക്

സിട്രോൺ ഇന്ത്യ 29.2 kWh എയർ-കൂൾഡ് ബാറ്ററി പായ്ക്കോടുകൂടിയ eC3 വാഗ്ദാനം ചെയ്യുന്നു. ഇത് 246 കിലോമീറ്റർ (MIDC) റേഞ്ച് അവകാശപ്പെടുന്നു. ഇലക്ട്രിക് മോട്ടോർ 56.88 കുതിരശക്തിയും 143 Nm ടോർക്കും ഉത്പാദിപ്പിക്കുന്നു. ഇത് ഇലക്ട്രിക് എസ്‌യുവിക്ക് മണിക്കൂറിൽ 107 കിലോമീറ്റർ വേഗത നൽകുന്നു.

പഞ്ച് പ്ലാറ്റ്‌ഫോമിനെ അടിസ്ഥാനമാക്കിയുള്ള ഈ ഇലക്ട്രിക് വാഹനം രണ്ട് ബാറ്ററി ശേഷി ഓപ്ഷനുകൾ (25 kWh ഉം 35 kWh ഉം) വാഗ്ദാനം ചെയ്യുന്നു. കൂടാതെ ഒരു ലിക്വിഡ്-കൂൾഡ് ബാറ്ററി പായ്ക്കാണ് ഇത് നൽകുന്നത്. C75 റേറ്റിംഗ് അനുസരിച്ച് 35 kWh ബാറ്ററി 290 കിലോമീറ്റർ വരെ റിയലിസ്റ്റിക് റേഞ്ച് നൽകുന്നു, കൂടാതെ അതിന്റെ എഞ്ചിൻ 88.77 കുതിരശക്തിയും 190 Nm ടോർക്കും ഉത്പാദിപ്പിക്കുന്നു. ബാറ്ററി വാറന്റി സംബന്ധിച്ച്, സിട്രോൺ 7 വർഷം അല്ലെങ്കിൽ 1.40 ലക്ഷം കിലോമീറ്റർ വാറന്റി വാഗ്ദാനം ചെയ്യുന്നു, അതേസമയം പഞ്ച് EV എട്ട് വർഷം അല്ലെങ്കിൽ 1.60 ലക്ഷം കിലോമീറ്റർ വാറന്റി വാഗ്ദാനം ചെയ്യുന്നു.

ബൂട്ട് സ്പേസ്

സിട്രോൺ ഇസി3 യിൽ ഡിജിറ്റൽ ഡ്രൈവർ ഡിസ്‌പ്ലേയും 10.2 ഇഞ്ച് ടച്ച്‌സ്‌ക്രീനും ഉണ്ട്. 35 കണക്റ്റഡ് സവിശേഷതകളും ഇക്കോ, സ്റ്റാൻഡേർഡ് എന്നീ രണ്ട് ഡ്രൈവിംഗ് മോഡുകളും വാഗ്ദാനം ചെയ്യുന്നു. ഇവ രണ്ടും റീജനറേറ്റീവ് ബ്രേക്കിംഗ് സവിശേഷതയുമായാണ് വരുന്നത്. ലഗേജുകൾക്കായി 315 ലിറ്റർ ബൂട്ട് സ്‌പേസും ഇത് വാഗ്ദാനം ചെയ്യുന്നു.

സുരക്ഷയും ഫീച്ചറുകളും

പഞ്ച് ഇവിയിൽ രണ്ട് 10.24 ഇഞ്ച് ഡിസ്‌പ്ലേകളുണ്ട്. മൾട്ടി-മോഡ് ബ്രേക്ക് റീജനറേഷനായി പാഡിൽ ഷിഫ്റ്ററുകളും ഇതിലുണ്ട്. ഡിജിറ്റൽ ഡ്രൈവ് സെലക്ടർ നോബും വയർലെസ് ഫോൺ ചാർജറും, ക്രൂയിസ് കൺട്രോൾ, ഇലക്ട്രിക് സൺറൂഫ്, ഫ്രണ്ട് വെന്റിലേറ്റഡ് സീറ്റുകൾ, മറ്റ് നിരവധി സവിശേഷതകൾ എന്നിവയും ഇതിലുണ്ട്. ഏറ്റവും പ്രധാനമായി, പഞ്ച് ഇവിക്ക് ഇന്ത്യ NCAP-യിൽ നിന്ന് 5-സ്റ്റാർ ക്രാഷ് സേഫ്റ്റി റേറ്റിംഗ് ലഭിച്ചു.  അതേസമയം ഗ്ലോബൽ എൻസിഎപിയുടെ സേഫ് കാർസ് ഫോർ ഇന്ത്യയിൽ EC3-ന് പൂജ്യം സ്റ്റാറുകൾ ആണ് ലഭിച്ചത്.

വില

സിട്രോൺ eC3 അഞ്ച് വേരിയന്റുകളിലാണ് വരുന്നത്. 12.90 ലക്ഷം മുതൽ 13.53 ലക്ഷം വരെയാണ് എക്സ്-ഷോറൂം വില. ചെറിയ 25 kWh ബാറ്ററി പായ്ക്കുള്ള പഞ്ച് ഇവിയുടെ എക്സ്-ഷോറൂം വില 9.99 ലക്ഷം മുതൽ 14.44 ലക്ഷം വരെയാണ്. ഇത് 19 വ്യത്യസ്‍ത വേരിയന്റുകളിൽ ലഭ്യമാണ്.