ബുള്ളറ്റിനെ തോല്പ്പിക്കാന് കഷ്ടപ്പെടുന്ന കെടിഎം;വീഡിയോ വൈറല്
Synopsis
രാജ്യത്തെ ഐക്കണിക്ക് മോട്ടോര് സൈക്കിള് ബ്രാന്റായ റോയല് എന്ഫീല്ഡ് ചരിത്രത്തിൽ ആദ്യമായി ട്വിൻ സിലിണ്ടർ എൻജിനോടെ കരുത്തു കൂടിയ പുതിയ ബുള്ളറ്റ് അവതരിപ്പിക്കുന്നതായി വാര്ത്തകള് വന്നു തുടങ്ങിയിട്ട് ഏറെക്കാലമായി. പരീക്ഷണയോട്ടങ്ങൾ നടത്തുന്ന ബൈക്കിന്റെ ചിത്രങ്ങള് അടുത്തിടെയായി സമൂഹമാധ്യമങ്ങളിൽ വൈറലായിരുന്നു. എന്നാല് ഇപ്പോള് യൂ ടൂബിലും മറ്റും വൈറലാകുന്നത് ഒരു വീഡിയോ ആണ്.
അക്ഷയ് കുമാര് എന്നയാള് പകര്ത്തിയ റോയല് എന്ഫീല്ഡ് 750 യുടെ ദൃശ്യങ്ങള് ബുള്ളറ്റ് പ്രേമികളെ കോരിത്തരിപ്പിക്കുന്നതാണ്. റോഡ് ടെസ്റ്റ് നടത്തുന്ന റോയല് എന്ഫീല്ഡ് 750യെ ക്യാമറയില് പകര്ത്താനുള്ള ശ്രമമാണിതെന്നാണ് റിപ്പോര്ട്ടുകള്. ഇത് റോയല്എന്ഫീല്ഡ് കോണ്ടിനെന്റല് ജിടി ആണെന്നും റിപ്പോര്ട്ടുകളുണ്ട്. എന്തായാലും പാരലല് ട്വിന് റോയല് എന്ഫീല്ഡിനെ പകര്ത്താനുള്ള കെടിഎം റൈഡറുടെ ശ്രമമാണ് വീഡിയോ. റോയല് എന്ഫീല്ഡിനൊപ്പം വേഗത കൈവരിക്കാന് കഷ്ടപ്പെടുന്ന കെടിഎമ്മിനെ വീഡിയോ വ്യക്തമാക്കുന്നു. 373.2 സിസി സിംഗിള് സിലിണ്ടറിനെ 750 സിസി പാരലല് ട്വിനുമായി താരതമ്യം ചെയ്യുന്നത് ശരിയല്ലെങ്കിലും മണിക്കൂറില് 150 കിലോമീറ്ററിന് മേലെ വേഗത കൈവരിച്ചിട്ടും റോയല് എന്ഫീല്ഡ് 750 യെ പിടികൂടാന് കെടിഎമ്മിന് സാധിച്ചില്ലെന്നതാണ് രസകരം.
ആദ്യം കഫേ റെയ്സറിൽ 750 സിസി എൻജിൻ ഘടിപ്പിച്ചായിരുന്നു റോയല് എന്ഫീല്ഡിന്റെ പരീക്ഷണമെങ്കിൽ ഇപ്പോൾ രണ്ടു തരത്തിലുള്ള ബൈക്കുകളിൽ 750 സിസി എൻജിൻ ഘടിപ്പിച്ച് പരീക്ഷണയോട്ടം നടത്തുന്നുണ്ടെന്നാണ് റിപ്പോര്ട്ടുകള്. ഹിമാലയനിൽ ഉപയോഗിച്ചിരിക്കുന്ന 410 സിസി എൻജിനു ശേഷം കമ്പനി വികസിപ്പിക്കുന്ന ഏറ്റവും നൂതന എൻജിനായിരിക്കും പുതിയ ബൈക്കിൽ.
യുകെയിൽ കമ്പനി പുതുതായി സ്ഥാപിച്ച ടെക്നിക്കൽ സെന്ററിലാണ് ബൈക്ക് വികസിപ്പിച്ചത്. റോയൽ എൻഫീൽഡ് ഇന്നുവരെ നിർമിച്ചതിൽ ഏറ്റവുമധികം ശേഷിയും കരുത്തുമുള്ള എൻജിനായിരിക്കും പുതിയത്. ഏകദേശം 45 മുതൽ 50 ബിഎച്ച്പി വരെ കരുത്തും 60 മുതൽ 70 എൻഎം വരെ ടോർക്കുമുള്ള എൻജിനിൽ കാർബറേറ്ററായിരിക്കും ഉപയോഗിക്കുക.
അഞ്ചു സ്പീഡ് ഗിയർബോക്സ് ഉപയോഗിക്കുന്ന ബൈക്കിൽ എബിഎസ് ഓപ്ഷണലായി ഉണ്ടായേക്കുമെന്നും യൂറോപ്യൻ വിപണി കൂടി മുന്നിൽകണ്ടു നിർമിക്കുന്ന ബൈക്കിനു യൂറോ 4 നിലവാരം ഉണ്ടായിരിക്കുമെന്നും റിപ്പോര്ട്ടുകളുണ്ട്. ഹാർലി ഡേവിഡ്സൺ സ്ട്രീറ്റ് 750, ട്രയംഫ് ബോൺവില്ല തുടങ്ങിയ ബൈക്കുകളുമായി മൽസരിക്കാനെത്തുന്ന റോയൽ എൻഫീൽഡ് 750 ന്റെ പരമാവധി വേഗത 160 കീമി ആയിരിക്കും. മൂന്നു മുതൽ നാലു ലക്ഷം വരെയാണു പ്രതീക്ഷിക്കുന്ന വില. 2018 ആദ്യം പുതിയ ബൈക്ക് നിരത്തിലിറങ്ങുമെന്നുമാണ് റിപ്പോര്ട്ടുകള്.
ഏറ്റവും പുതിയ Automobile News, ഏറ്റവും പുതിയ Electric Vehicles, Newly launched cars in india, Bike Reviews in Malayalam , Car Reviews in Malayalam , തുടങ്ങിയവ മലയാളത്തിൽ അറിയാൻ Asianet News Malayalam. കാറുകൾ, ബൈക്കുകൾ, ഇലക്ട്രിക് വാഹനങ്ങൾ, ഓട്ടോ ടെക്നോളജി തുടങ്ങിയ മേഖലകളിലെ പുതിയ ട്രെൻഡുകളും അപ്ഡേറ്റുകളും ഒരൊറ്റ ക്ലിക്കിൽ.