മോഹവിലയില്‍ പുതിയ ഹോണ്ട ഏവിയേറ്റര്‍

ജാപ്പനീസ് വാഹന നിര്‍മ്മാതാക്കളായ ഹോണ്ടയുടെ നവീകരിച്ച പുതിയ മോഡല്‍ ഏവിയേറ്റര്‍ ഇന്ത്യന്‍ വിപണിയിലെത്തി. 55,157 രൂപ മുതല്‍ ദില്ലി എക്സ്ഷോറൂം വിലയില്‍ സ്റ്റാന്‍ഡേര്‍ഡ്, അലോയ് / ഡ്രം, അലോയ് / ഡിസ്‌ക് എന്നീ മൂന്നു വകഭേദങ്ങളിലാണ് വാഹനം എത്തുന്നത്. 

ലോഹനിര്‍മ്മിത മഫ്ളര്‍ പ്രൊട്ടക്ടറാണ് മാറ്റങ്ങളിലൊന്ന്. പുത്തന്‍ രൂപകല്‍പനയുള്ള ഡിജിറ്റല്‍ ഇന്‍സ്ട്രമെന്റ് പാനലില്‍ നീല ബാക്ക്ലിറ്റ് വെളിച്ചമാണുള്ളത്.  സീറ്റ് തുറക്കാനുള്ള പ്രത്യേക സ്വിച്ച് ഉള്‍പ്പെടുന്ന ഫോര്‍ ഇന്‍ വണ്‍ ലോക്ക് സംവിധാനം, സാധനങ്ങള്‍ കൊളുത്തിയിടാന്‍ ഉപകരിക്കുന്ന മുന്‍ പിന്‍ കൊളുത്തുകള്‍ എന്നിവയും വാഹനത്തെ വേറിട്ടതാക്കുന്നു.

നിലവിലുള്ള ഓര്‍ക്കിഡ് പര്‍പ്പിള്‍ മെറ്റാലിക്, ലഷ് മജെന്ത മെറ്റാലിക്, ഇംപീരിയല്‍ റെഡ് മെറ്റാലിക് നിറങ്ങള്‍ക്ക് പുറമെ പുതിയ മാറ്റ് ആക്സിസ് ഗ്രെയ് മെറ്റാലിക്, ക്യാന്‍ഡി ജാസി ബ്ലൂ നിറങ്ങളിലും സ്‌കൂട്ടര്‍ എത്തും.

109.19 സിസി നാലു-സ്ട്രോക്ക് എയര്‍ കൂള്‍ഡ് എഞ്ചിനാണ് ഹൃദയം. 8 bhp കരുത്തും 8.9 Nm torque ഉം ഈ എഞ്ചിന് പരമാവധി സൃഷ്ടിക്കാനാവും. സിവിടി ഗിയര്‍ബോക്സാണ് ട്രാന്‍സ്മിഷന്‍. മുന്നില്‍ ടെലിസ്‌കോപിക് ഫോര്‍ക്കുകളും പിന്നില്‍ മോണോഷോക്ക് അബ്സോര്‍ബറുമാണ് സസ്പെന്‍ഷന്‍.82 കിലോമീറ്ററാണ് സ്‌കൂട്ടറിന്റെ പരമാവധി വേഗം.