ഹോണ്ടയുടെ പുതിയ കരുത്തുറ്റ ബൈക്ക് പുറത്തിറങ്ങി, വില 1.57 ലക്ഷം

ഹോണ്ട ഹോർനെറ്റ് 2.0 പുതിയ OBD2B എഞ്ചിനുമായി വിപണിയിൽ എത്തി. പുതിയ ഫീച്ചറുകൾ, ബ്ലൂടൂത്ത് കണക്റ്റിവിറ്റി, USB-C ചാർജിംഗ് പോർട്ട് എന്നിവ ഇതിന്റെ പ്രധാന ആകർഷണങ്ങളാണ്.

ജാപ്പനീസ് ജനപ്രിയ ടൂവീലർ ബ്രാൻഡായ ഹോണ്ട മോട്ടോർസൈക്കിൾ ആൻഡ് സ്‍കൂട്ടർ ഇന്ത്യ തങ്ങളുടെ മോഡലുകളെ OBD2B എഞ്ചിനുകൾ ഉപയോഗിച്ച് അപ്‌ഡേറ്റ് ചെയ്യുന്നു. ഇപ്പോഴിതാ  ജനപ്രിയ സ്ട്രീറ്റ്ഫൈറ്റർ 2025 ഹോണ്ട ഹോർനെറ്റ് 2.0 പുതിയ അപ്‌ഡേറ്റുകളോടെ ഇന്ത്യൻ വിപണിയിൽ അവതരിപ്പിച്ചു . ഇതിന് 1.57 ലക്ഷം രൂപയാണ് എക്സ്-ഷോറൂം വില, ഇത് മുൻ മോഡലിനേക്കാൾ 14,000 രൂപ കൂടുതലാണ്. എന്നാൽ വില വർദ്ധിപ്പിച്ചതോടെ ബൈക്കിന് നിരവധി പുതിയ സവിശേഷതകളും സാങ്കേതിക നവീകരണങ്ങളും ലഭിച്ചു. അതിന്റെ പ്രത്യേകതകൾ എന്തൊക്കെയാണെന്ന് പരിശോധിക്കാം.

എഞ്ചിനും പ്രകടനവും
എഞ്ചിനെയും പ്രകടനത്തെയും കുറിച്ച് പറയുകയാണെങ്കിൽ, ഇതിന് 184 സിസി സിംഗിൾ സിലിണ്ടർ, എയർ-കൂൾഡ് എഞ്ചിൻ ഉണ്ട്, ഇത് 16.7 bhp പവറും 15.7 Nm ടോർക്കും ഉത്പാദിപ്പിക്കാൻ കഴിയുന്നതാണ്. ഇത് അഞ്ച് സ്‍പീഡ് ഗിയർബോക്‌സുമായി വരുന്നു. ഇതിന് അസിസ്റ്റും സ്ലിപ്പർ ക്ലച്ചും ഉണ്ട്.

എഞ്ചിൻ പരിഷ്‍കരിച്ചു
എഞ്ചിൻ മുമ്പത്തെപ്പോലെ തന്നെ തുടരുന്നു, പക്ഷേ ഇപ്പോൾ അത് OBD2B-മാനദണ്ഡങ്ങളിലേക്ക് അപ്‌ഡേറ്റ് ചെയ്‌തിരിക്കുന്നു. പവറിലും ടോർക്കിലും നേരിയ കുറവ് വന്നിട്ടുണ്ട്, പക്ഷേ പ്രകടനം മുമ്പത്തെപ്പോലെ തന്നെ തുടരുന്നു.

ടിഎഫ്‍ടി സ്ക്രീൻ ആൻഡ് ബ്ലൂടൂത്ത് കണക്റ്റിവിറ്റി
ഇപ്പോൾ ബൈക്കിന് 4.2 ഇഞ്ച് ടിഎഫ്‍ടി ഡിജിറ്റൽ ഡിസ്‌പ്ലേ ഉണ്ട്. അത് ബ്ലൂടൂത്ത് വഴി ബന്ധിപ്പിക്കുന്നു. ഇതിലൂടെ, ഹോണ്ട റോഡ്‌സിങ്ക് ആപ്പിന്റെ സഹായത്തോടെ നിങ്ങൾക്ക് നാവിഗേഷൻ, കോൾ അലേർട്ടുകൾ, എസ്എംഎസ് അറിയിപ്പുകൾ എന്നിവ ആക്‌സസ് ചെയ്യാൻ കഴിയും.

യുഎസ്‍ബി-സി ചാർജിംഗ് പോർട്ടുകൾ
ദീർഘദൂര യാത്രകളിൽ മൊബൈൽ ചാർജ് ചെയ്യേണ്ടതിന്റെ ആശങ്ക ഇപ്പോൾ അവസാനിച്ചു. യാത്രയ്ക്കിടെ ചാർജ് ചെയ്യാൻ അനുവദിക്കുന്ന ഒരു യുഎസ്‍ബി-സി  പോർട്ട് ഇപ്പോൾ ഇതിൽ ഉണ്ട്.

ട്രാക്ഷൻ കൺട്രോളും ഡ്യുവൽ-ചാനൽ എബിഎസും
ഇപ്പോൾ ഈ ബൈക്കിൽ ഹോണ്ടയുടെ ട്രാക്ഷൻ കൺട്രോൾ സിസ്റ്റവും ഡ്യുവൽ-ചാനൽ എബിഎസും സ്റ്റാൻഡേർഡായി നൽകിയിട്ടുണ്ട്, ഇത് റൈഡിംഗ് കൂടുതൽ സുരക്ഷിതമാക്കി.

ഡിസൈൻ, കളർ ഓപ്ഷനുകൾ
ഈ ബൈക്കിന്റെ ബോഡി വർക്കിൽ ഹോണ്ട വലിയ മാറ്റങ്ങളൊന്നും വരുത്തിയിട്ടില്ല, പക്ഷേ പുതിയ ഗ്രാഫിക്സും കളർ ഓപ്ഷനുകളും ഇതിൽ ചേർത്തിട്ടുണ്ട്. പേൾ ഇഗ്നിയസ് ബ്ലാക്ക്, റേഡിയന്റ് റെഡ് മെറ്റാലിക്, അത്‌ലറ്റിക് ബ്ലൂ മെറ്റാലിക്, മാറ്റ് ആക്സിസ് ഗ്രേ മെറ്റാലിക് തുടങ്ങിയ കളർ ഓപ്ഷനുകളിൽ ഇത് ലഭ്യമാണ്.

മാറ്റങ്ങൾ ചുരുക്കത്തിൽ 
2025 ഹോണ്ട ഹോർനെറ്റിൽ പുതിയ ടിഎഫ്‍ടി സ്‌ക്രീനും ബ്ലൂടൂത്ത് കണക്റ്റിവിറ്റിയും ഉണ്ട്. ദീർഘദൂര യാത്രകൾക്ക് അനുയോജ്യമായ ഒരു യുഎസ്ബി-സി ചാർജിംഗ് പോർട്ട് ഇതിലുണ്ട്. ഇതിൽ, ട്രാക്ഷൻ കൺട്രോളും ഡ്യുവൽ-ചാനൽ എബിഎസും സുരക്ഷ വർദ്ധിപ്പിക്കുന്നു. സ്‌പോർട്ടി ലുക്കും പുതിയ ഗ്രാഫിക്സും അതിനെ കൂടുതൽ മനോഹരമാക്കുന്നു. നിങ്ങൾ ശക്തവും, സ്‌പോർട്ടിയും, OBD2B എഞ്ചിൻ ഉള്ളതും ഫീച്ചറുകളാൽ സമ്പന്നവുമായ ഒരു സ്ട്രീറ്റ്ഫൈറ്റർ ബൈക്ക് തിരയുകയാണെങ്കിൽ, ഹോണ്ട ഹോർനെറ്റ് 2.0 ഒരു മികച്ച ഓപ്ഷനായിരിക്കും.