TVS Ntorq 125 : ഇന്ത്യൻ നിർമ്മിത ടിവിഎസ് എന്ടോര്ഖ് ഇനി ഫിലിപ്പീൻസിലും
Synopsis
ഫിലിപ്പൈൻസിലെ യുവ ഉപഭോക്താക്കളെ' ലക്ഷ്യമിട്ടാണ് ടിവിഎസിന്റെ നീക്കം എന്ന് ഹിന്ദുസ്ഥാന് ടൈംസ് ഓട്ടോ റിപ്പോര്ട്ട് ചെയ്യുന്നു.
രാജ്യത്തെ പ്രമുഖ ഇരുചക്രവാഹന നിര്മ്മാതാക്കളായ ടിവിഎസ് മോട്ടോഴ്സിന്റെ (TVS Motors) 125 സിസി സ്കൂട്ടര് ശ്രേണിയിലേക്കുള്ള ആദ്യത്തെ ചുവടുവയ്പായിരുന്നു എന്ടോര്ഖ് (TVS Ntorq). ഇപ്പോഴിതാ ടിവിഎസ് മോട്ടോർ കമ്പനി, തങ്ങളുടെ ജനപ്രിയ എൻടോർക്ക് 125 സ്കൂട്ടർ ഫിലിപ്പീൻസ് (Philippines) വിപണിയിൽ അവതരിപ്പിച്ചതായി പ്രഖ്യാപിച്ചു. ഇന്ത്യയിലെ 125 സിസി സെഗ്മെന്റിലെ ഏറ്റവും ജനപ്രിയമായ സ്പോർട്ടി സ്കൂട്ടറുകളിലൊന്നായാണ് എൻടോർഖ് 125 പുറത്തിറങ്ങുന്നത്. ഫിലിപ്പൈൻസിലെ യുവ ഉപഭോക്താക്കളെ' ലക്ഷ്യമിട്ടാണ് ടിവിഎസിന്റെ നീക്കം എന്ന് ഹിന്ദുസ്ഥാന് ടൈംസ് ഓട്ടോ റിപ്പോര്ട്ട് ചെയ്യുന്നു.
എന്ടോര്ഖ് 125 ടിവിഎസ് കമ്പനിയുടെ RT-Fi (റേസ് ട്യൂൺഡ് ഫ്യൂവൽ ഇൻജക്ഷൻ) പ്ലാറ്റ്ഫോം അവതരിപ്പിക്കുന്നു, കൂടാതെ ബ്ലൂടൂത്ത് കണക്റ്റുചെയ്ത സ്പീഡോമീറ്റർ, സ്ട്രീറ്റ്, റൈഡ് സ്ഥിതിവിവരക്കണക്കുകൾക്കായുള്ള മൾട്ടി-മോഡ് ഡിസ്പ്ലേ, നാവിഗേഷൻ അസിസ്റ്റ്, എഞ്ചിൻ ടെമ്പറേച്ചർ ഇൻഡിക്കേറ്റർ, ഫോൺ ബാറ്ററി സ്ട്രെങ്ത് തുടങ്ങിയ സവിശേഷതകളോടെയാണ് ഇത് വരുന്നത്.
തങ്ങളുടെ പുതിയ ഉൽപ്പന്നം ഫിലിപ്പീൻസ് വിപണിയിൽ അവതരിപ്പിക്കുന്നതിൽ ആവേശഭരിതരാണെന്ന് ഹൊസൂർ ആസ്ഥാനമായുള്ള വാഹന നിർമ്മാതാവായ ടിവിഎസ് പറയുന്നു. “ഞങ്ങളുടെ ഫിലിപ്പിനോ ഉപഭോക്താക്കൾക്ക് പ്രവർത്തനത്തിലും സാങ്കേതികവിദ്യയിലും വിട്ടുവീഴ്ച ചെയ്യാതെ അവരുടെ ജീവിതശൈലിക്ക് ഏറ്റവും അനുയോജ്യമായ ഗുണനിലവാരമുള്ള ഇരുചക്രവാഹന ഓഫറുകൾ നൽകാനുള്ള ഞങ്ങളുടെ നിരന്തരമായ ശ്രമമാണിത്. ഫിലിപ്പൈൻസിൽ മികച്ച ഇൻ-ക്ലാസ് ഫീച്ചറുകളും RT-Fi സാങ്കേതികവിദ്യയും ഉള്ള TVS N 125 അവതരിപ്പിക്കുന്നതിൽ ഞങ്ങൾക്ക് അങ്ങേയറ്റം സന്തോഷമുണ്ട്.. " ഇന്തോനേഷ്യയിലെ PT TVS മോട്ടോർ കമ്പനിയുടെ പ്രസിഡന്റ് ഡയറക്ടർ തങ്കരാജൻ പറഞ്ഞു.
2014ലെ ഓട്ടോ എക്സ്പോയില് ടിവിഎസ് അവതരിപ്പിച്ച ഗ്രാഫൈറ്റ് കോണ്സെപ്റ്റ് സ്കൂട്ടറിനെ അടിസ്ഥാനപ്പെടുത്തി ഒരുക്കിയ എന്ടോര്ഖിനെ 2018 ഫെബ്രുവരിയിലായിരുന്നു ടിവിഎസ് വിപണിക്ക് ആദ്യമായി പരിചയപ്പെടുത്തുന്നത്. ഇന്ത്യന് യുവതലമുറയെ ലക്ഷ്യമിട്ടെത്തിയ ഈ വാഹനം നിരത്തിലെത്തി ഏഴ് മാസത്തിനുള്ളില് ഒരുലക്ഷം യൂണിറ്റുകള് വിറ്റഴിച്ച് നിര്ണായക നേട്ടം സ്വന്തമാക്കിയിരുന്നു.
ശ്രേണിയിലെ തന്നെ ആദ്യ എല്സിഡി സ്ക്രീനുമായി എത്തിയ മോഡലാണ് എന്ടോര്ഖ്. ബ്ലൂടൂത്ത് അധിഷ്ഠിതമായ പൂര്ണ ഇന്സ്ട്രുമെന്റ് കണ്സോള്, ടിവിഎസ് സ്മാര്ട്ട് കണക്റ്റ് ബ്ലൂടൂത്ത് സിസ്റ്റം, നാവിഗേഷന് അസിസ്റ്റ്, ഇന്കമിംഗ് കോള് അലേര്ട്ട്, മിസ്ഡ് കോള് അലേര്ട്ട്, ഓട്ടോ എസ്എംഎസ്, റൈഡ് സ്ഥിതി വിവരങ്ങള്, 0-60 കിലോമീറ്റര് / മണിക്കൂര് ആക്സിലറേഷന് ടൈമര്, ലാപ് ടൈമര്, പവര് / ഇക്കോ മോഡ് ഇന്ഡിക്കേറ്റര് തുടങ്ങിയ ഫീച്ചറുകളും എന്ടോര്ഖിനെ വേറിട്ടതാക്കുന്നു.