വിപണിയെ പിടിച്ചുകുലുക്കി ടെസറാക്റ്റ് ഇലക്ട്രിക് സ്‍കൂട്ടർ

അൾട്രാവയലറ്റ് ഓട്ടോമോട്ടീവിന്റെ പുതിയ ഇലക്ട്രിക്ക് സ്കൂട്ടർ മോഡലായ ടെസറാക്റ്റ് 70,000ത്തിൽ അധികം ബുക്കിംഗുകൾ നേടി. 2025 മാർച്ചിൽ പുറത്തിറക്കിയ ഈ ഹൈടെക് സ്കൂട്ടറിന് നിരവധി നൂതന സവിശേഷതകളുണ്ട്.

ഇന്ത്യൻ വിപണിയിൽ ഇലക്ട്രിക് വാഹന വിൽപ്പന കുതിക്കുകയാണ്. ഓല, ആതർ തുടങ്ങി നിരവധി കമ്പനികൾ ഇതിനകം തന്നെ വിപണിയിൽ സാന്നിധ്യം അറിയിച്ചിട്ടുണ്ട്. ഇത് ജനങ്ങൾക്ക് ഇലക്ട്രിക് വാഹനങ്ങളിൽ നിരവധി ഓപ്ഷനുകൾ നൽകുന്നു. അൾട്രാവയലറ്റ് ഓട്ടോമോട്ടീവിന്റെ പുതിയ ഇലക്ട്രിക്ക് മോഡലായ ടെസെറാക്റ്റ് ഇപ്പോൾ ടൂവീലർ വിപണിയിൽ ഒരു വിപ്ലവം സൃഷ്‍ടിക്കുകയാണ്. 2025 മാർച്ചിൽ പുറത്തിറക്കിയ ഈ ഹൈടെക് സ്‍കൂട്ടറിന് 70,000ത്തിൽ അധികം ബുക്കിംഗുകൾ ലഭിച്ചു എന്നാണ് റിപ്പോർട്ടുകൾ.

ഈ വർഷം മാർച്ചിലാണ് ആദ്യത്തെ 50,000 ബുക്കിംഗുകൾക്ക് 1.20 ലക്ഷം രൂപ എന്ന പ്രത്യേക വിലയിൽ ടെസറാക്റ്റിനെ കമ്പനി പുറത്തിറക്കിയത്. ലോഞ്ച് ചെയ്ത ആദ്യ മാസത്തിൽ തന്നെ ആ ബുക്കിംഗ് സംഖ്യ സ്‍കൂട്ടർ മറികടന്നു. തുടർന്ന് എക്സ്-ഷോറൂം വിലയിൽ 1.45 ലക്ഷം രൂപ വർദ്ധനവുണ്ടായി. എങ്കിലും, 3.5kWh ബാറ്ററി പായ്ക്ക് ഉള്ള ഏറ്റവും താങ്ങാനാവുന്ന വേരിയന്റിന്റെ പ്രാരംഭ വിലയാണിത്. ഉയർന്ന 5kWh, 6kWh വേരിയന്റുകളുടെ വിലകൾ പിന്നീടുള്ള ഘട്ടത്തിൽ പ്രഖ്യാപിക്കും. ഈ വേരിയന്റുകൾ എൻട്രി ലെവൽ പതിപ്പിനേക്കാൾ വളരെ ചെലവേറിയതായിരിക്കും.

ഓൺബോർഡ് നാവിഗേഷൻ, വയർലെസ് ചാർജിംഗ്, റഡാർ സിസ്റ്റം, ബ്ലൈൻഡ് സ്പോട്ട് ഡിറ്റക്ഷൻ, സ്മാർട്ട് ഡാഷ്‌ക്യാം, ഡ്യുവൽ-ചാനൽ എബിഎസ്, ഹിൽ ഹോൾഡ് അസിസ്റ്റ്, മൾട്ടി-ലെവൽ ട്രാക്ഷൻ, ബ്രേക്കിംഗ് കൺട്രോൾ തുടങ്ങിയ നിരവധി നൂതന സവിശേഷതകൾ ഈ സ്‍കൂട്ടറിൽ ലഭിക്കുന്നു. ഈ സവിശേഷതകളെല്ലാം അതിന്റെ സെഗ്‌മെന്റിൽ ഇതിനെ വളരെ സവിശേഷമാക്കുന്നു.

അൾട്രാവയലറ്റ് ടെസറാക്റ്റിന്‍റെ പരമാവധി വേഗത 125 കിലോമീറ്ററാണ്. ഈ വേഗത അതിന്റെ ഉയർന്ന സ്പെക്ക് വേരിയന്റിൽ ലഭിച്ചേക്കാം. എൻട്രി ലെവൽ പതിപ്പിന് അൽപ്പം ശക്തി കുറവായിരിക്കാൻ സാധ്യതയുണ്ട്. 2026 ന്റെ ആദ്യ പാദം മുതൽ കമ്പനി ഈ സ്‍കൂട്ടറിന്റെ ഡെലിവറി ആരംഭിച്ചേക്കും. അതേസമയം, മറ്റ് വേരിയന്റുകളുടെ വിശദാംശങ്ങൾ 2025 അവസാനത്തോടെ വെളിപ്പെടുത്തും. 2025 അവസാനത്തോടെ ടെസ്സറാക്ടിന്റെ വകഭേദങ്ങൾ തിരിച്ചുള്ള വിലകളും സവിശേഷതകളും അൾട്രാവയലറ്റ് വെളിപ്പെടുത്തും.

അതേസമയം കമ്പനിയിൽ നിന്നുള്ള മറ്റ് വാർത്തകൾ പരിശോധിച്ചാൽ യൂറോപ്പിലേക്കുള്ള കയറ്റുമതി ആരംഭിക്കുന്നതോടെ അൾട്രാവയലറ്റ് F77 വിൽപ്പന ഇരട്ടിയാക്കാനാണ് കമ്പനിയുടെ നീക്കം. ബെംഗളൂരു ആസ്ഥാനമായുള്ള സ്റ്റാർട്ട്-അപ്പ് കമ്പനിയായ അൾട്രാ വയലറ്റ് അടുത്തിടെ 100 അൾട്രാവയലറ്റ് F77-കളുടെ ആദ്യ ബാച്ച് യുകെയിലേക്കും ഫ്രാൻസ്, ജർമ്മനി, ലക്സംബർഗ്, അയർലൻഡ്, ഓസ്ട്രിയ, ഇറ്റലി, സ്വിറ്റ്സർലൻഡ്, ബെൽജിയം, നെതർലാൻഡ്‌സ് ഉൾപ്പെടെ മറ്റ് ഒമ്പത് യൂറോപ്യൻ രാജ്യങ്ങളിലേക്കും അയച്ചിരുന്നു.