Delhi Teachers University : ദില്ലി ടീച്ചേഴ്സ് യൂണിവേഴ്സിറ്റി പ്രഖ്യാപിച്ച് കെജ്‍രിവാൾ; പ്രവേശനം അടുത്ത വർഷം

മികച്ച നിലവാരമുള്ള അധ്യാപകരെ തയ്യാറാക്കുക എന്നതാണ് ലക്ഷ്യം. മാത്രമല്ല, ഈ സ്ഥാപനം മികവിന്റെ കേന്ദ്രമായിരിക്കും. 

ദില്ലി: ദില്ലി ടീച്ചേഴ്സ് യൂണിവേഴ്സിറ്റിക്ക് (Delhi Teachers University) അം​ഗീകാരം ലഭിച്ചതായി ദില്ലി മുഖ്യമന്ത്രി (Arvind Kejriwal) അരവിന്ദ് കെജ്‍രിവാൾ. സർവ്വകലാശാല സ്ഥാപിക്കുന്നതിനുള്ള ബിൽ അടുത്ത നിയമസഭ സമ്മേളനത്തിൽ അവതരിപ്പിക്കുമെന്നും അദ്ദേഹം അറിയിച്ചു. ഇൻസ്റ്റിറ്റ്യൂട്ട് ഒരു മൾട്ടി ഡിസിപ്ലിനറി അക്കാദമിയെന്ന രീതിയിൽ പ്രവർത്തിക്കുമെന്നും സ്ഥാപനത്തിലെ വൈസ് ചാൻസലർ, പ്രൊഫസർമാർ എന്നിവർ ആ​ഗോള തലത്തിൽ പ്രശസ്തരായിരിക്കുമെന്നും കെജ്‍രിവാൾ കൂട്ടിച്ചേർത്തു. 

മികച്ച നിലവാരമുള്ള അധ്യാപകരെ തയ്യാറാക്കുക എന്നതാണ് ലക്ഷ്യം. മാത്രമല്ല, ഈ സ്ഥാപനം മികവിന്റെ കേന്ദ്രമായിരിക്കും. ലോകമെമ്പാടുമുള്ള മികച്ച സ്ഥാപനങ്ങളുമായി ദേശീയ അന്തർദേശീയ തലത്തിലുള്ള സഹകരണം ക്രമീകരിക്കും. കെജ്‍രിവാൾ പറഞ്ഞു. സർവ്വകലാശാലക്ക് നാലുവർഷത്തെ സംയോജിത അധ്യാപക വിദ്യാഭ്യാസ സമ്പ്രദായം ഉണ്ടായിരിക്കും. ബിഎ-ബിഎഡ്, ബിഎസ് സി -ബിഎഡ്, കൂടാതം ബികോം-ബിഎഡ് എന്നീ കോഴ്സുകളാണ് ഉള്ളത്. 12ാം ക്ലാസിന് ശേഷം വിദ്യാർത്ഥികൾക്ക് സർവ്വകലാശാലയിൽ പ്രവേശനം നേടാം. 2022-23 അധ്യയന വർഷത്തിൽ പ്രവേശന നടപടികൾ ആരംഭിക്കും. സർവ്വകലാശാലയിലെ വിദ്യാർത്ഥികൾക്ക് ദില്ലി സർക്കാർ സ്കൂളുകളിൽ പ്രായോ​ഗിക പരിശീലനം ലഭിക്കുമെന്നും അദ്ദേഹം വ്യക്തമാക്കി. 

“ഈ സർവ്വകലാശാലയിലെ വിദ്യാർത്ഥികൾക്ക് അവരുടെ കോഴ്‌സിന്റെ മുഴുവൻ സമയവും ദില്ലി സർക്കാർ സ്‌കൂളുകളുമായി ബന്ധപ്പെട്ട് പ്രവർത്തന-ഗവേഷണത്തിന് അവസരമൊരുക്കും. സൈദ്ധാന്തിക പരിജ്ഞാനത്തിനൊപ്പം മികച്ച പ്രായോഗിക പരിജ്ഞാനവും നേടാൻ ഇത് വിദ്യാർത്ഥികളെ സഹായിക്കും," കെജ്രിവാൾ പറഞ്ഞു.