വീണ്ടും ഓസ്‌ട്രേലിയന്‍ നായിക! വനിതാ ഐപിഎല്ലില്‍ ഗുജറാത്ത് ജയന്റ്‌സിനെ ബേത് മൂണി നയിക്കും

വനിതാ ലീഗില്‍ ക്യാപ്റ്റനാക്കുന്ന മൂന്നാമത്തെ ഓസ്‌ട്രേലിയന്‍ താരമാണ് മൂണി. നേരത്തെ, അഷ്‌ലി ഗാര്‍ഡ്‌നറെ ഗുജറാത്ത് ജയന്റ്‌സിന്റെ ക്യാപ്റ്റനായി പ്രഖ്യാപിച്ചിരുന്നു. യുപി വാരിയേഴ്‌സിനെ നയിക്കുന്നത് അലീസ ഹീലിയാണ്.

അഹമ്മദാബാദ്: വനിതാ പ്രീമിയര്‍ ലീഗില്‍ ഗുജറാത്ത് ജയന്റ്‌സിനെ ഓസ്‌ട്രേലിയന്‍ ഓപ്പണര്‍ ബേത് മൂണി നയിക്കും. വനിതാ ട്വന്റി 20 ലോകകപ്പ് ഫൈനലില്‍ ബേത് മൂണിയുടെ ബാറ്റിംഗ് മികവിലാണ് ഓസ്‌ട്രേലിയ ദക്ഷിണാഫ്രിക്കയെ തോല്‍പ്പിച്ച് ചാംപ്യന്മാരായത്. ഇന്ത്യന്‍ ഓള്‍റൗണ്ടര്‍ സ്‌നേഹ് റാണയാണ് വൈസ് ക്യാപ്റ്റന്‍. ട്വന്റി 20യില്‍ മൂന്ന് ലോകകപ്പ് കിരീടങ്ങളും കഴിഞ്ഞ വര്‍ഷം ഏകദിന ലോകകപ്പും കോമണ്‍വെല്‍ത്ത് ഗെയിംസ് സ്വര്‍ണവും നേടിയ ടീമിലും അംഗമായിരുന്നു ബേത് മൂണി.

വനിതാ ലീഗില്‍ ക്യാപ്റ്റനാക്കുന്ന മൂന്നാമത്തെ ഓസ്‌ട്രേലിയന്‍ താരമാണ് മൂണി. നേരത്തെ, അഷ്‌ലി ഗാര്‍ഡ്‌നറെ ഗുജറാത്ത് ജയന്റ്‌സിന്റെ ക്യാപ്റ്റനായി പ്രഖ്യാപിച്ചിരുന്നു. യുപി വാരിയേഴ്‌സിനെ നയിക്കുന്നത് അലീസ ഹീലിയാണ്. വനിതാ ടി20 ലോകകപ്പില്‍ ഓസ്‌ട്രേലിയ കിരീടം നേടുമ്പോള്‍ മൂണിയാണ് തകര്‍പ്പന്‍ പ്രകടനം പുറത്തെടുത്തത്. 53 പന്തുകള്‍ നേരിട്ട  താരം പുറത്താവാതെ 74 റണ്‍സ് നേടിയിരുന്നു. മൂണിയുടെ കരുത്തില്‍ ഓസീസ് 157 റണ്‍സ് നേടിയിരുന്നു. മറുപടി ബാറ്റിംഗില്‍ ദക്ഷിണാഫ്രിക്കയ്ക്ക് ആറ് വിക്കറ്റ് നഷ്ടത്തില്‍ 137 റണ്‍സെടുക്കാനാണ് സാധിച്ചത്. 

ടി20 ക്രിക്കറ്റില്‍ മികച്ച റെക്കോര്‍ഡുള്ള താരമാണ് മൂണി. 83 മത്സരങ്ങളില്‍ 2350 റണ്‍സാണ് 29കാരിയുടെ സമ്പാദ്യം. 40.51 ശരാശരിയിലാണ് മൂണിയുടെ നേട്ടം. 124.60 സ്‌ട്രൈക്ക് റേറ്റുണ്ട് മൂണിക്ക്. ടി20യില്‍ രണ്ട് സെഞ്ചുറികളും താരം സ്വന്തം പേരില്‍ ചേര്‍ത്തു. 18 അര്‍ധ സെഞ്ചുറികളും മൂണിക്കുണ്ട്. ഇത്തരത്തിലൊരു വലിയ ഉത്തരവാദിത്തം ഏല്‍പ്പിച്ചതില്‍ സന്തോഷമുണ്ടെന്ന് മൂണി പ്രസ്താവനയില്‍ വ്യക്തമാക്കി. 

29കാരിയായ വൈസ് ക്യാപ്റ്റന്‍ സ്‌നേഹ് റാണ ഇന്ത്യക്കായി 25 ടി20 മത്സരങ്ങള്‍ കളിച്ചു. 24 വിക്കറ്റുകള്‍ സ്വന്തം പേരിലാക്കി. 6.21 എക്കണോമി റേറ്റിലാണ് നേട്ടം. ഗുജറാത്ത് മാര്‍ച്ച് നാലിന് ഉദ്ഘാടന മത്സരത്തില്‍ കളിക്കുന്നുണ്ട്. മുംബൈ ഇന്ത്യന്‍സിനെയാണ് ഗുജറാത്ത് ജയന്റ്‌സ് കളിക്കുക.

ഗുജറാത്ത് ജയന്റ്‌സ് ടീം: ബേത് മൂണി, സ്‌നേഹ് റാണ, അഷ്‌ലി ഗാര്‍ഡ്‌നര്‍, സോഫിയ ഡങ്ക്‌ലി, അന്നാബെല്‍ സതര്‍ലാന്‍ഡ്, ഹര്‍ലീന്‍ ഡിയോള്‍, ഡിയേന്ദ്ര ഡോട്ടിന്‍, സബിനേനി മേഘ്‌ന, ജോര്‍ജിയ വറേഹം, മന്‍സി ജോഷി, ദയാലന്‍ ഹേമലത, മോണിക്ക പട്ടേല്‍, തനുജ് കന്‍വര്‍, സുഷ്മ വര്‍മ, ഹര്‍ലി ഗല, അശ്വനി കുമാരി, പരുനിക സിസോദിയ, ഷബ്‌നം ഷകീല്‍.