മൂന്നാം ഏകദിനം; വെസ്റ്റ് ഇന്‍ഡീസിനെതിരെ ഇന്ത്യക്ക് ടോസ്, സഞ്ജുവിന് മൂന്നാമൂഴം

ഇന്ത്യന്‍ കുപ്പായത്തില്‍ ഇതാദ്യമായാണ് സഞ്ജുവിന് തുടര്‍ച്ചയായി മൂന്ന് മത്സരങ്ങളില്‍ അവസരം ലഭിക്കുന്നത്. കഴിഞ്ഞ മത്സരത്തില്‍ അര്‍ധസെഞ്ചുറി നേടിയ സഞ്ജു ആദ്യ മത്സരത്തിന്‍റെ അവസാന ഓവറില്‍ വിക്കറ്റിന് പിന്നില്‍ നിര്‍ണായക സേവ് നടത്തിയിരുന്നു.  

പോര്‍ട്ട് ഓഫ് സ്പെയിന്‍: വെസ്റ്റ് ഇന്‍ഡീസിനെതിരായ ഏകദിന പരമ്പരയിലെ മൂന്നാം മത്സരത്തില്‍ ടോസ് നേടിയ ഇന്ത്യ ബാറ്റിംഗ് തെരഞ്ഞെടുത്തു. മലയാളി താരം സഞ്ജു സാംസണ്‍ തുടര്‍ച്ചയായ മൂന്നാം മത്സരത്തിലും ഇന്ത്യന്‍ ഇലവനില്‍ ഇടം നേടി. രണ്ടാം മത്സരം കളിച്ച ടീമില്‍ ഒരു മാറ്റവുമായാണ് ഇന്ത്യ ഇന്നിറങ്ങുന്നത്.  അരങ്ങേറ്റത്തില്‍ നിറം മങ്ങിയ ആവേശ് ഖാന് പകരം പ്രസിദ്ധ് കൃഷ്ണ ടീമില്‍ തിരിച്ചെത്തി. വിന്‍ഡീസ് ടീമില്‍ മൂന്ന് മാറ്റങ്ങളുണ്ട്. ജേസണ്‍ ഹോള്‍ഡറും കീമോ പോളും കീസി കാര്‍ട്ടിയും വിന്‍ഡീസിന്‍റെ അന്തിമ ഇലവനിലെത്തി.

ഇന്ത്യന്‍ കുപ്പായത്തില്‍ ഇതാദ്യമായാണ് സഞ്ജുവിന് തുടര്‍ച്ചയായി മൂന്ന് മത്സരങ്ങളില്‍ അവസരം ലഭിക്കുന്നത്. കഴിഞ്ഞ മത്സരത്തില്‍ അര്‍ധസെഞ്ചുറി നേടിയ സഞ്ജു ആദ്യ മത്സരത്തിന്‍റെ അവസാന ഓവറില്‍ വിക്കറ്റിന് പിന്നില്‍ നിര്‍ണായക സേവ് നടത്തിയിരുന്നു.

ആദ്യ മത്സരത്തില്‍ ശിഖര്‍ ധവാന്‍റെയും ശ്രേയസ് അയ്യരുടെ അര്‍ധസെഞ്ചുറികളാണ് ഇന്ത്യക്ക് മികച്ച സ്കോര്‍ സമ്മാനിച്ചത്. രണ്ടാം മത്സരത്തിലാകട്ടെ ധവാന്‍ നിരാശപ്പെടുത്തിയപ്പോള്‍ അക്സര്‍ പട്ടേലിന്‍റെ വെടിക്കെട്ട് ഇന്നിംഗ്സും സഞ്ജു, ശ്രേയസ് എന്നവരുടെ നിര്‍ണായ അര്‍ധസെഞ്ചുറികളും ഇന്ത്യക്ക് ജയമൊരുക്കി.

ഇന്നും ജയിച്ചാല്‍ വെസ്റ്റ് ഇന്‍ഡീസില്‍ ഏകദിന പരമ്പര തൂത്തുവാരുന്ന ആദ്യ ഇന്ത്യന്‍ ടീമെന്ന റെക്കോര്‍ഡാണ് ക്യാപ്റ്റന്‍ ശിഖര്‍ വാന്‍റെ നേതൃത്വത്തിലറങ്ങുന്ന ടീം ഇന്ത്യക്ക് സ്വന്തമാവുക. മൂന്ന് മത്സര ഏകദിന പരമ്പരക്കുശേഷം നടക്കുന്ന അഞ്ച് മത്സരങ്ങളുടെ ടി20 പരമ്പരയില്‍ സഞ്ജു സാംസണ്‍ ടീമിലില്ല. എന്നാല്‍ ഇന്നത്തെ മത്സരത്തിലും തിളങ്ങിയാല്‍ കൊവിഡ് ബാധിതനായ കെ എല്‍ രാഹുലിന് പകരം സഞ്ജുവിനെ ടി20 ടീമിലേക്ക് പരിഗണിക്കുമെന്ന് സൂചനയുണ്ട്.

ഇന്ത്യ പ്ലേയിംഗ് ഇലവന്‍: Shikhar Dhawan(c), Shubman Gill, Shreyas Iyer, Suryakumar Yadav, Sanju Samson(w), Deepak Hooda, Axar Patel, Shardul Thakur, Mohammed Siraj, Yuzvendra Chahal, Prasidh Krishna.

വെസ്റ്റ് ഇന്‍ഡീസ് പ്ലേയിംഗ് ഇലവന്‍: Shai Hope(w), Brandon King, Keacy Carty, Shamarh Brooks, Nicholas Pooran(c), Kyle Mayers, Jason Holder, Keemo Paul, Akeal Hosein, Hayden Walsh, Jayden Seales.