ഇന്ത്യൻ ടീമിൽ ഇടം ലഭിച്ചത് ധോണിയുടെ ഇഷ്ടക്കാരനായതുകൊണ്ടല്ലെന്ന് റെയ്ന

ദീർഘകാലം ഇന്ത്യൻ ടീമിൽ കളിച്ച റെയ്നയ്ക്കെതിരെ എതിരാളികൾ ഉന്നയിച്ചിരുന്ന പ്രധാന ആരോപണം ധോണിയുടെ ഇഷ്ടക്കാരനായതുകൊണ്ടാണ് ഇന്ത്യൻ ടീമിൽ ഇടം ലഭിക്കുന്നത് എന്നായിരുന്നു. ഇത് തന്നെ ഏറെ വിഷമിപ്പിച്ചിരുന്നുവെന്ന് തുറന്നുപറയുകയാണ് സുരേഷ് റെയ്ന തന്റെ ആത്മകഥയിൽ.

മീററ്റ്: ഇന്ത്യൻ ക്രിക്കറ്റിൽ ​ഗ്രൗണ്ടിലും പുറത്തും ഏറ്റവും മികച്ച കൂട്ടുകെട്ട് സൃഷ്ടിച്ചവരാണ് എം എസ് ധോണിയും സുരേഷ് റെയ്നയും. ഇന്ത്യൻ ടീമിൽ മാത്രമല്ല ഐപിഎല്ലിൽ ചെന്നൈ സൂപ്പർ കിം​ഗ്സ് ടീമിൽ ധോണി തല ആണെങ്കിൽ  സുരേഷ് റെയ്ന ചിന്ന തലയാണ്. ധോണി വിരമിക്കൽ പ്രഖ്യാപിച്ച ദിവസം തന്നെയാണ് സുരേഷ് റെയ്നയും രാജ്യാന്തര ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചത്.

ദീർഘകാലം ഇന്ത്യൻ ടീമിൽ കളിച്ച റെയ്നയ്ക്കെതിരെ എതിരാളികൾ ഉന്നയിച്ചിരുന്ന പ്രധാന ആരോപണം ധോണിയുടെ ഇഷ്ടക്കാരനായതുകൊണ്ടാണ് ഇന്ത്യൻ ടീമിൽ ഇടം ലഭിക്കുന്നത് എന്നായിരുന്നു. ഇത് തന്നെ ഏറെ വിഷമിപ്പിച്ചിരുന്നുവെന്ന് തുറന്നുപറയുകയാണ് സുരേഷ് റെയ്ന തന്റെ ആത്മകഥയിൽ. സ്പോർട്സ് ലേഖകനായ ഭരത് സുന്ദരേശനാണ് ബിലീവ് എന്ന് പേരിട്ട റെയ്നയുടെ ആത്മകഥ എഴുതിയിരിക്കുന്നത്.

തന്നിലെ ഏറ്റവും മികച്ച പ്രകടനം പുറത്തെടുക്കാൻ ധോണി എപ്പോഴും സഹായിച്ചിട്ടുണ്ടെങ്കിലും അദ്ദേഹത്തിനൊപ്പം ടീമിൽ തുടർന്നകാലത്ത് കേട്ട ആരോപണങ്ങൾ അത്ര സുഖമുള്ളതായിരുന്നില്ലെന്ന് റെയ്ന പറഞ്ഞു. അദ്ദേഹത്തിന്റെ പിന്തുണയിലാണ് ഞാൻ ടീമിൽ തുടരുന്നത് എന്നായിരുന്നു പ്രധാന ആരോപണം. എന്നാൽ ടീമിലെ എന്റെ സ്ഥാനം കഠിനാധ്വാനത്തിലൂടെ ഞാൻ നേടിയെടുത്തതാണ്. പക്ഷേ അതിനെ ഇത്തരത്തിൽ വ്യാഖ്യാനിച്ചപ്പോൾ ശരിക്കും വേദനിച്ചു. തന്റെ കഴിവിൽ ധോണിക്ക് വിശ്വാസമുണ്ടായിരുന്നുവെന്നും റെയ്ന പറഞ്ഞു.