മെസി അല്ലാതെ ആര്? എട്ടാം തവണയും ബാലണ് ദ് ഓര് തിളക്കത്തില് ഇതിഹാസം; എമി മാര്ട്ടിനെസ് മികച്ച ഗോള് കീപ്പര്
Synopsis
ബാലണ് ദ് ഓര് പുരസ്കാരം ഏറ്റവും കൂടുതല് തവണ സ്വന്തമാക്കിയ താരവും മെസി തന്നെ. അഞ്ച് തവണ നേടിയ ക്രിസ്റ്റ്യാനോ റൊണാള്ഡോയാണ് രണ്ടാമത്.
പാരീസ്: എട്ടാം തവണയും ബാലണ് ദ് ഓര് തിളക്കത്തില് അര്ജന്റൈന് ഇതിഹാസം ലിയോണല് മെസി. മാഞ്ചസ്റ്റര് സിറ്റിയുടെ എര്ലിംഗ് ഹാളണ്ട്, കെവിന് ഡി ബ്രൂയ്ന്, ഫ്രഞ്ച് താരം കിലിയന് എംബാപ്പെ എന്നിവരെ പിന്നിലാക്കിയാണ് മെസി പുരസ്കാരം സ്വന്തമാക്കിയത്. ഖത്തര് ലോകകപ്പില് അര്ജന്റീനയെ ചാംപ്യന്മാരാക്കിയ പ്രകടനമാണ് മെസിയെ റെക്കോര്ഡ് നേട്ടത്തിലേക്ക് നയിച്ചത്. സ്പെയിനെ ലോക ചാംപ്യന്മാരാക്കിയതിനൊപ്പം മികച്ച താരത്തിനുള്ള ഗോള്ഡന് ബൂട്ടും സ്വന്തമാക്കിയ സ്പാനിഷ് താരം ഐറ്റാന ബോണ്മാറ്റിയാണ് വനിത ബലോണ് ദ് ഓര് നേടിയത്. മികച്ച ഗോള് കീപ്പര്ക്കുള്ള യാഷിന് ട്രോഫി അര്ജന്റൈന് താരം എമിലിയാനോ മാര്ട്ടിനെസ് സ്വന്തമാക്കി.
ബാലണ് ദ് ഓര് പുരസ്കാരം ഏറ്റവും കൂടുതല് തവണ സ്വന്തമാക്കിയ താരവും മെസി തന്നെ. അഞ്ച് തവണ നേടിയ ക്രിസ്റ്റ്യാനോ റൊണാള്ഡോയാണ് രണ്ടാമത്. മെസിക്ക് കടുത്ത വെല്ലുവിളിയാവുന്നത് കരുതിയിരുന്നത് മാഞ്ചസ്റ്റര് സിറ്റിക്കൊപ്പം ട്രെബിള് കിരീടത്തിലേക്ക് നയിച്ച നോര്വെ താരം ഹാളണ്ടാണ്. ചാംപ്യന്സ് ലീഗിലേയും പ്രീമിയര് ലീഗിലേയും ടോപ് സ്കോററും ഹാളണ്ടായിരുന്നു. ഫൈനലിലെ ഹാട്രിക് ഉള്പ്പടെ എട്ടു ഗോളുമായി ലോകകപ്പിലെ ഗോള്വേട്ടക്കാരനായതാണ് കിലിയന് എംബാപ്പയെ പുരസ്കാര സാധ്യത പട്ടികയില് മുന്നിലെത്തിച്ചിരുന്നത്.
നിലവിലെ ജേതാവ് കരീം ബെന്സേമ, പോളണ്ട് താരം റോബര്ട്ട് ലെവന്ഡോവ്സ്കി, അര്ജന്റൈന് യുവതാരം ജൂലിയന് അല്വാരസ്, ഫ്രാന്സിന്റെ അന്റോയ്ന് ഗ്രീസ്മാന്, ബ്രസീലിയന് താരം വിനീഷ്യസ് ജൂനിയര് എന്നിവരും സാധ്യതാ പട്ടികയിലുണ്ടായിരുന്നു. മികച്ച യുവതാരത്തിനുള്ള കൊപ ട്രോഫി റയല് മാഡ്രിഡിന്റെ ഇംഗ്ലീഷ് താരം ജൂഡ് ബെല്ലിംഗ്ഹാമിനാണ്. ജമാല് മ്യൂസിയാല, അലജാന്ഡ്രോ ബാള്ഡെ എന്നിവരാണ് പിന്നിലായത്. യാഷിന് ട്രോഫിക്ക് വേണ്ടി എമി മാര്ട്ടിനെസിനൊപ്പം മത്സരിച്ചത് മാഞ്ചസ്റ്റര് സിറ്റിയുടെ ബ്രസീല് താരം എഡേഴ്സണ്. ബാഴ്സലോണ താരം മാര്ക്ക് ആന്ദ്രേ ടെര് സ്റ്റേഗന് എന്നിവരായിരുന്നു.
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!