റെക്കോര്ഡുകള് വാരിക്കൂട്ടി ലിയോണല് മെസി; പിന്നിലായത് മാള്ഡീനിയും മത്തേയൂസും ഉള്പ്പെടെയുള്ളവര്
Synopsis
മറഞ്ഞുപോയത് ജര്മ്മനിയുടെ ഇതിഹാസതാരം ലോതര് മത്തേയൂസിന്റെ പേര്. 23-ാം മിനുറ്റിലെ പെനാല്റ്റി ഗോളോടെ നോക്കൗട്ടിലെ എല്ലാ മത്സരങ്ങളിലും ഗോള് നേടുന്ന ആദ്യ താരമെന്ന റെക്കോര്ഡും അര്ജന്റൈന് നായകന്.
ദോഹ: ഖത്തര് ലോകകപ്പ് നേട്ടത്തിന് പിന്നാലെ റെക്കോര്ഡുകള് വാരിക്കൂട്ടിയാണ് അര്ജന്റൈന് നായകന് മെസി ലുസൈല് സ്റ്റേഡിയത്തില് നിന്ന് മടങ്ങിയത്. ഇതിഹാസ താരങ്ങളെ പിന്നിലാക്കി പുതിയചരിത്രം രചിച്ചു മെസി. ലുസൈല് സ്റ്റേഡിയത്തില് വിസില് മുഴങ്ങിയപ്പോള് തന്നെ റെക്കോര്ഡ് ബുക്കില് മെസിയുടെ പേര് ഒരിക്കല്കൂടി തെളിഞ്ഞു. 26 മത്സരങ്ങളുമായി ഏറ്റവുമധികം ലോകകപ്പ് മത്സരങ്ങളെന്ന റെക്കോര്ഡ് മെസിക്ക്.
മറഞ്ഞുപോയത് ജര്മ്മനിയുടെ ഇതിഹാസതാരം ലോതര് മത്തേയൂസിന്റെ പേര്. 23-ാം മിനുറ്റിലെ പെനാല്റ്റി ഗോളോടെ നോക്കൗട്ടിലെ എല്ലാ മത്സരങ്ങളിലും ഗോള് നേടുന്ന ആദ്യ താരമെന്ന റെക്കോര്ഡും അര്ജന്റൈന് നായകന്. വീണ്ടും ഗോള് നേടി ടീമിന്റെ രക്ഷകനായ മെസി ഏറ്റവുമധികം സമയം ലോകകപ്പില് കളിച്ച താരവുമായി. 2216 മിനുറ്റുകള് ലോകകപ്പില് കളിച്ച ഇറ്റാലിയന് പ്രതിരോധ താരം പൗളോ മാള്ഡീനിയുടെ റെക്കോര്ഡാണ് മെസിക്ക് മുന്നില് പഴങ്കഥയായത്.
ഗോളടിച്ചും ഗോളടിപ്പിച്ചും ലോകകപ്പിന്റെ താരമായ മെസ്സിക്ക് അപൂര്വമായ മറ്റൊരു റെക്കോര്ഡ് നേട്ടം. രണ്ട് തവണ ഗോള്ഡന് ബോള് പുരസ്കാരം സ്വന്തമാക്കുന്ന ആദ്യ താരവുമായി 35കാരന്. ഫ്രാന്സിനെതിരെ പെനാല്റ്റി ഷൂട്ടൗട്ടിലായിരുന്നു അര്ജന്റീനയുടെ ജയം. നിശ്ചിതസമയത്തും അധികസമയത്തും ഇരു ടീമുകളും മൂന്ന് ഗോളുകള് വീതം നേടി.
ഷൂട്ടൗട്ടിലേക്ക് നീണ്ടപ്പോള് മെസിക്കും പൗളോ ഡിബാലയ്ക്കും ലിയാന്ഡ്രോ പരേഡസിനും ഗോണ്സാലോ മോണ്ടീലിനും ലക്ഷ്യം തെറ്റിയില്ല. മറുവശത്ത് കിലിയന് എംബാപ്പെ, കോളോ മ്വാനി എന്നിവര് ലക്ഷ്യം കണ്ടപ്പോള് കിംഗ്സ്ലി കോമാന്, ഓര്ലിന് ചൗമേനി എന്നിവര്ക്ക് പിഴച്ചു. കൊമാനെ അര്ജന്റൈന് ഗോള് കീപ്പര് എമിലിയാനോ മാര്ട്ടിനെസ് തടഞ്ഞിട്ടപ്പോള് ചൗമേനി പുറത്തേക്കടിച്ചു. അര്ജന്റീനയുടെ മൂന്നാം ലോകകപ്പ് കിരീടമാണിത്. 1986ലായിരുന്നു അവസാനത്തേത്. 2014, ബ്രസീല് ലോകകപ്പില് ടീം ഫൈനലില് കളിച്ചിരുന്നു.
വിജയനിമിഷത്തില് അമ്മക്ക് മുമ്പില് കണ്ണു നിറഞ്ഞ്, അഗ്യൂറോക്കു മുമ്പില് പൊട്ടിക്കരഞ്ഞ് മെസി-വീഡിയോ
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!