വെസ്റ്റ് ബാങ്കിൽ പലസ്തീൻകാരെ ഒഴിപ്പിക്കാൻ ആടുകളേയും ആയുധമാക്കുന്നതായി റിപ്പോർട്ട്, നേതൃത്വം നൽകി ഹിൽ ടോപ്പ് യൂത്ത്

ഇസ്രയേൽ സൈന്യത്തിന്റെയും സർക്കാരിന്റെയും സാമ്പത്തിക പിന്തുണയോടെയാണ് ഈ കയ്യേറ്റങ്ങൾ നടക്കുന്നതെന്ന് ആരോപണമുണ്ട്. സമാധാന പ്രവർത്തകർ ഇതിനെതിരെ പ്രതിരോധിക്കാൻ ശ്രമിക്കുന്നുണ്ടെങ്കിലും അതിക്രമങ്ങൾ തുടരുകയാണ്.

വെസ്റ്റ്ബാങ്ക്: വെസ്റ്റ് ബാങ്കിൽ പലസ്തീൻകാരെ ഒഴിപ്പിക്കാൻ ഇസ്രയേൽകാർ കന്നുകാലികളേയും ആയുധമാക്കുന്നതായി റിപ്പോർട്ട്. വർഷങ്ങളായി ഇടയന്മാർ താമസിക്കുന്ന വെസ്റ്റ് ബാങ്കിലെ കുന്നിൻ പ്രദേശങ്ങളിൽ ആട്ടിൻ കൂട്ടങ്ങളെ മുന്നിൽ നിർത്തി പലസ്തീനുകാരെ തുരത്താൻ ഇസ്രയേൽ കുടിയേറ്റക്കാർ ശ്രമിക്കുന്നതായാണ് സിബിഎസ് ന്യൂസ് റിപ്പോർട്ട് ചെയ്യുന്നത്. ആറ് ദശാബ്ദങ്ങളായി ഇസ്രയേൽ സൈന്യം ഈ മേഖലയിൽ പിടിയുറപ്പിച്ചിട്ടുണ്ട്. ഇസ്രയേലുമായി കൂട്ടിച്ചേർത്തേക്കുമെന്ന വിശ്വാസത്തിൽ വെസ്റ്റ് ബാങ്കിൽ നിരവധി ഇസ്രയേൽ കുടിയേറ്റ സെറ്റിൽമെന്റും നിലവിലുണ്ട്. ഇസ്രായേൽ അതിർത്തികൾ വ്യാപിപ്പിക്കുന്നതിന്റെ ഭാഗമായി സമീപകാലത്തായി ഇരുന്നൂറോളം ആട്ടുഫാമുകളാണ് വെസ്റ്റ് ബാങ്കിൽ ആരംഭിച്ചിട്ടുള്ളത്. ഇത് വെസ്റ്റ് ബാങ്കിന്റെ ഏകദേശം ഇരുപത് ശതമാനത്തോളം ഭാഗം കൈയടക്കിക്കഴിഞ്ഞതായാണ് സിബിഎസ് ന്യൂസ് റിപ്പോർട്ട് വിശദമാക്കുന്നത്. ഈ ഫാമുകളിലെ ആടുകളെ പലസ്തീൻ ഗ്രാമങ്ങളിലേക്കും, അവരുടെ കൃഷിയിടങ്ങളിലേക്കും വീടുകളുടെ മുറ്റങ്ങളിലേക്കും തള്ളിവിടുന്നതാണ് ഇവരുടെ രീതി.

തങ്ങൾ ആടുകളെ മേയിക്കുന്ന സ്ഥലം തങ്ങളുടേതാണെന്നും ഇനി മുതൽ പലസ്തീനികൾ അവിടെ കൃഷി ചെയ്യാനോ നിർമ്മാണപ്രവർത്തനങ്ങൾ നടത്താനോ പാടില്ലെന്നും പ്രഖ്യാപിച്ചാണ് ഭൂമി കൈയേറ്റം നടക്കുന്നത്. പതിറ്റാണ്ടുകളായി തങ്ങളുടെ സ്വന്തം ആധാരത്തിലുള്ള ഭൂമിയിൽ ജീവിക്കുന്ന പലസ്തീനികൾക്ക് തങ്ങളുടെ വീടുകളിലേക്ക് പോലും പ്രവേശിക്കാൻ കഴിയാത്ത അവസ്ഥയാണ് ഇതുമൂലമുണ്ടാവുന്നത്. ഇത്തരത്തിലുള്ള നിരന്തരമായ കടന്നുകയറ്റം മൂലം നൂറിലധികം പലസ്തീൻ ഗ്രാമങ്ങളാണ് ഇതിനോടകം വിജനമാക്കപ്പെടുകയോ കുടിയൊഴിപ്പിക്കപ്പെടുകയോ ചെയ്തിട്ടുള്ളത്. ഇത്തരത്തിൽ പലസ്തീനികളെ ഒഴിപ്പിക്കുന്ന അതിക്രമത്തിന് മുന്നിൽ നിൽക്കുന്നത് ഹിൽ ടോപ്പ് യൂത്ത് എന്ന പേരിൽ അറിയപ്പെടുന്ന തീവ്ര ഇസ്രയേൽ നിലപാടുകൾ പുലർത്തുന്ന കൗമാരക്കാരും യുവാക്കളുമാണ്. ഇവർ പലസ്തീനികളുടെ ഒലിവ് മരങ്ങൾ വെട്ടിമാറ്റുകയും, കാറുകൾക്ക് തീയിടുകയും, വീടുകളും സ്വത്തുക്കളും നശിപ്പിക്കുകയും അടക്കം ചെയ്യുന്നതായാണ് റിപ്പോർട്ട് വിശദമാക്കുന്നത്. തങ്ങളുടെ സ്ഥലത്ത് നിന്ന് ഇറങ്ങാൻ തയ്യാറാകാത്ത പലസ്തീനികളെ വെടിവെക്കുന്നതടക്കമുള്ള അക്രമങ്ങളും മേഖലയിൽ നടക്കുന്നുവെന്നാണ് റിപ്പോർട്ട് വിശദമാക്കുന്നത്.

പലസ്തീനികൾക്ക് സംരക്ഷണം നൽകേണ്ട ഇസ്രായേലി സൈന്യം പലപ്പോഴും കുടിയേറ്റക്കാർക്ക് അനുകൂലമായ നിലപാടാണ് സ്വീകരിക്കുന്നത്. സ്വന്തം ഭൂമിയിൽ നിന്ന് ഫലസ്തീനികളെ പുറത്താക്കാൻ സൈനികർ സഹായിക്കുന്നതായി പ്രദേശവാസികൾ ആരോപിക്കുന്നത്. എന്നാൽ ഈ അനീതിക്കെതിരെ പോരാടാൻ സൺസ് ഓഫ് അബ്രഹാം എന്ന പേരിൽ ഒരു കൂട്ടം ഇസ്രായേലി സമാധാന പ്രവർത്തകരും രംഗത്തുണ്ട്. കുടിയേറ്റക്കാരുടെ അതിക്രമങ്ങളിൽ നിന്ന് പലസ്തീനികളെ സംരക്ഷിക്കാൻ ഇവർ മനുഷ്യകവചമായി നിൽക്കുന്നുണ്ടെങ്കിലും അക്രമങ്ങളുടെ തീവ്രത കുറഞ്ഞിട്ടില്ല. ഇസ്രായേലി ഭരണകൂടവും പ്രധാനമന്ത്രി ബെഞ്ചമിൻ നെതന്യാഹുവും ഈ അതിക്രമങ്ങളെ ഔദ്യോഗികമായി തള്ളിക്കളയുമ്പോഴും, ഇത്തരം ആട്ടുഫാമുകൾക്ക് കോടിക്കണക്കിന് രൂപയുടെ സാമ്പത്തിക സഹായവും മറ്റ് ആധുനിക സജ്ജീകരണങ്ങളും നൽകി പിന്തുണയ്ക്കുന്നുണ്ടെന്ന് റിപ്പോർട്ട് വ്യക്തമാക്കുന്നത്.

ഏഷ്യാനെറ്റ് ന്യൂസ് ലൈവ് കാണാം