ചക്രങ്ങള്‍ പുറത്തേക്ക് വന്നില്ല, നാസയുടെ വിമാനത്തിന് ബെല്ലി ലാൻഡിങ്, രക്ഷപ്പെട്ടത് തലനാരിഴക്ക് -വീ‍ഡിയോ

ലാൻഡിംഗ് ഗിയറിലെ മെക്കാനിക്കൽ തകരാർ മൂലം നാസയുടെ WB-57 ഗവേഷണ വിമാനത്തിന് ഹ്യൂസ്റ്റണിലെ എല്ലിംഗ്ടൺ വിമാനത്താവളത്തിൽ ബെല്ലി ലാൻഡിങ് നടത്തേണ്ടി വന്നു. രണ്ട് ജീവനക്കാരും സുരക്ഷിതരായി രക്ഷപ്പെട്ടു. സംഭവത്തിൽ നാസ അന്വേഷണം പ്രഖ്യാപിച്ചിട്ടുണ്ട്.

ന്യൂയോർക്ക്: നാസയുടെ ​ഗവേഷണ വിമാനത്തിന് എമർജൻസി ലാൻഡിങ്. ലാൻഡിംഗ് ഗിയർ വിന്യസിക്കുന്നതിൽ മെക്കാനിക്കൽ തകരാറിനെത്തുടർന്നാണ് അടിയന്തരമായി ലാൻഡിംഗ് നടത്തേണ്ടി വന്നത്. ഹ്യൂസ്റ്റണിനടുത്തുള്ള എല്ലിംഗ്ടൺ വിമാനത്താവളത്തിൽ വിമാനം ലാൻഡ് ചെയ്യുകയും റൺവേയിലൂടെ തെന്നിമാറുകയും ചെയ്തു. സോഷ്യൽ മീഡിയയിൽ പങ്കിട്ട വീഡിയോകളിൽ വിമാനം നിൽക്കുമ്പോൾ അടിയിൽ നിന്ന് തീപ്പൊരികളും തീജ്വാലകളും പുകയും ഉയരുന്നത് കാണാം.

വിമാനത്തിലെ ജീവനക്കാർ സുരക്ഷിതരാണെന്നും ആർക്കും പരിക്കേറ്റിട്ടില്ലെന്നും നാസ അറിയിച്ചു. മെക്കാനിക്കൽ പ്രശ്‌നമുണ്ടെന്നും നാസ സ്ഥിരീകരിച്ചു. അന്വേഷണം നടത്തുമെന്നും അവർ അറിയിച്ചു. രണ്ട് ജീവനക്കാരുള്ള നാസ WB-57 എന്ന ഉയർന്ന ഉയര ഗവേഷണ വിമാനമായിരുന്നു അപകടത്തിൽപ്പെട്ടത്. വളരെ ഉയർന്ന ഉയരത്തിൽ പറക്കാൻ രൂപകൽപ്പന ചെയ്തിട്ടുള്ള ഈ വിമാനത്തിന് ആറ് മണിക്കൂറിലധികം പറക്കാൻ കഴിയും. 

കോക്ക്പിറ്റ് ഹാച്ച് തുറന്ന നിലയിൽ വിമാനം റൺവേയിൽ നിർത്തിയിട്ടിരിക്കുന്നതായി പ്രാദേശിക ടെലിവിഷൻ ദൃശ്യങ്ങൾ കാണിച്ചു. അഗ്നിശമന സേനാംഗങ്ങളും അടിയന്തര സംഘങ്ങളും സ്ഥലത്ത് വിമാനത്തിന് സമീപത്തെത്തി. 1970-കൾ മുതൽ നാസ ഗവേഷണ ദൗത്യങ്ങൾക്കായി WB-57 ഉപയോഗിച്ചുവരുന്നു. ഇപ്പോഴും ഏജൻസിയുടെ പ്രധാന ഭാ​ഗമാണ് ഈ വിമാനം.