കിം ജോങ് ഉന്നിന്റെ നില ഗുരുതരം; മസ്തിഷ്ക മരണം സംഭവിച്ചുവെന്ന് റിപ്പോര്ട്ട്
Synopsis
അമിതമായ പുകവലിയും മാനസിക സമ്മര്ദ്ദവുമാണ് രോഗം മൂര്ച്ഛിക്കാന് കാരണമെന്നും മൗണ്ട് പിക്ടുവിലേക്കുള്ള നിരന്തര യാത്രകളും കിമ്മിന് തിരിച്ചടിയായെന്ന് ഡെയ്ലി എന്കെ റിപ്പോര്ട്ട് ചെയ്യുന്നു.
ഉത്തരകൊറിയന് ഭരണാധികാരി കിം ജോങ് ഉന്നിന്റെ ആരോഗ്യസ്ഥിതി ഗുരുതരാവസ്ഥയിലെന്ന് റിപ്പോര്ട്ട്. യുഎസ് ഔദ്യോഗിക വൃത്തങ്ങളെ ഉദ്ധരിച്ച് യുഎസ് മാധ്യമങ്ങളാണ് വാര്ത്ത റിപ്പോര്ട്ട് ചെയ്തത്. ചില മാധ്യമങ്ങള് കിമ്മിന് മസ്തിഷ്ക മരണം സംഭവിച്ചതായും റിപ്പോര്ട്ട് ചെയ്തു. കഴിഞ്ഞ ദിവസത്തെ ശസ്ത്രക്രിയക്ക് ശേഷമാണ് സ്ഥിതി മോശമായത്. ഹൃദയസംബന്ധമായ രോഗത്തിന് കിം ചികിത്സയിലായിരുന്നുവെന്ന് ദക്ഷിണ കൊറിയന് മാധ്യമങ്ങള് റിപ്പോര്ട്ട് ചെയ്തിരുന്നു.
ഉത്തരകൊറിയന് വാര്ഷികാഘോഷങ്ങളില് കിമ്മിന്റെ അസാന്നിധ്യം ഏറെ അഭ്യൂഹങ്ങള് സൃഷ്ടിച്ചിരുന്നു.ഉത്തരകൊറിയയുടെ സ്ഥാപകന് കിമ്മിന്റെ മുത്തച്ഛന്റെ ജന്മദിനമാണ് വാര്ഷികമായി ആചരിക്കുക. എന്നാല്, ഇത്തവണത്തെ ചടങ്ങുകള്ക്ക് കിം പങ്കെടുത്തിരുന്നില്ല.
ഏപ്രില് 11ന് വര്ക്കേഴ്സ് പാര്ട്ടി പൊളിറ്റ് ബ്യൂറോയിലാണ് കിം അവസാനമായി പങ്കെടുത്തത്. ഈ യോഗത്തിന് ശേഷമാണ് കിം ചികിത്സക്ക് തിരിച്ചത്. അമിതമായ പുകവലിയും മാനസിക സമ്മര്ദ്ദവുമാണ് രോഗം മൂര്ച്ഛിക്കാന് കാരണമെന്നും മൗണ്ട് പിക്ടുവിലേക്കുള്ള നിരന്തര യാത്രകളും കിമ്മിന് തിരിച്ചടിയായെന്ന് ഡെയ്ലി എന്കെ റിപ്പോര്ട്ട് ചെയ്യുന്നു. എന്നാല് വാര്ത്തകള് സംബന്ധിച്ച് പ്രതികരിക്കാന് ഉത്തരകൊറിയ തയ്യാറായിട്ടില്ല.