റഷ്യൻ സൈന്യത്തിന് ചൈനയിൽ രഹസ്യ പരിശീലനം; തന്ത്രപരമായ നീക്കത്തിൽ യൂറോപ്പിന് കടുത്ത ആശങ്ക

യുക്രൈൻ യുദ്ധത്തിനിടെ ചൈനറഷ്യൻ സൈന്യത്തിന് രഹസ്യമായി സൈനിക പരിശീലനം നൽകിയതായി റോയിട്ടേഴ്സ് റിപ്പോർട്ട്. കെമിക്കൽ, ബയോളജിക്കൽ യുദ്ധമുറകളിൽ ഉൾപ്പെടെയുള്ള ഈ പരിശീലനം ഇരുരാജ്യങ്ങളും തമ്മിലുള്ള സൈനിക സഹകരണം പുതിയ തലത്തിലെത്തിച്ചതായി റിപ്പോർട്ട് വ്യക്തമാക്കുന്നു. 

ബെയ്ജിങ്/മോസ്കോ: യുക്രൈൻ യുദ്ധത്തിന്റെ പശ്ചാത്തലത്തിൽ റഷ്യയും ചൈനയും തമ്മിലുള്ള സൈനിക സഹകരണം പുതിയ തലത്തിലേക്ക്. കഴിഞ്ഞ വർഷം ചൈനയിലെ സൈനിക കേന്ദ്രങ്ങളിൽ വെച്ച് റഷ്യൻ സൈന്യത്തിന് രഹസ്യമായി തന്ത്രപ്രധാനമായ പരിശീലനം നൽകിയതായി അന്താരാഷ്ട്ര വാർത്താ ഏജൻസിയായ റോയിട്ടേഴ്സ് (Reuters) റിപ്പോർട്ട് ചെയ്തു. റഷ്യൻ പ്രസിഡന്റ് വ്ലാഡിമിർ പുടിന്റെ പ്രതിരോധ മന്ത്രി ആൻഡ്രേ ബെലൂസോവ് വ്യക്തിപരമായി അനുമതി നൽകിയ ഈ രഹസ്യ ദൗത്യത്തിൽ ഇരുരാജ്യങ്ങളിലെയും നാല് മുതിർന്ന ജനറൽമാർ നേരിട്ട് പങ്കാളികളായതായാണ് പുറത്തുവരുന്ന വിവരം.

രണ്ട് യൂറോപ്യൻ ഉദ്യോഗസ്ഥരെയും ഔദ്യോഗിക സൈനിക രേഖകളെയും ഉദ്ധരിച്ചാണ് റിപ്പോർട്ട്. 2025 ഓഗസ്റ്റിൽ പ്രതിരോധ മന്ത്രി ആൻഡ്രേ ബെലൂസോവ് പുറപ്പെടുവിച്ച ആഭ്യന്തര ഉത്തരവ് പ്രകാരം റഷ്യൻ സായുധ സേനയുടെ ഒരു പ്രത്യേക സംഘം പീപ്പിൾസ് ലിബറേഷൻ ആർമിയുടെ (PLA) കേന്ദ്രങ്ങളിൽ പരിശീലനത്തിനായി ചൈനയിലേക്ക് പോയതായി രഹസ്യ രേഖകൾ വ്യക്തമാക്കുന്നു.

കെമിക്കൽ, ബയോളജിക്കൽ യുദ്ധമുറകളിൽ പരിശീലനം

കഴിഞ്ഞ നവംബറിൽ ബെയ്ജിങ്ങിലെയും നാൻജിങ്ങിലെയും സൈനിക കേന്ദ്രങ്ങളിൽ വെച്ച് മൂന്നാഴ്ച നീണ്ടുനിന്ന കടുത്ത പരിശീലനമാണ് റഷ്യൻ സൈനികർക്ക് ലഭിച്ചത്. റേഡിയോളജിക്കൽ, കെമിക്കൽ, ബയോളജിക്കൽ (RCB) സംരക്ഷണത്തിനായിരുന്നു ഇതിൽ മുൻഗണന.

* മാതൃകാ ആണവ റിയാക്ടറുകൾ പരിശോധിക്കൽ

* കെമിക്കൽ റീകണസൻസ് (രാസ നിരീക്ഷണം)

* റേഡിയേഷൻ റീകണസൻസ്

* വായുസഞ്ചാര സംവിധാനങ്ങളെ മലിനീകരണത്തിൽ നിന്ന് സംരക്ഷിക്കൽ

തുടങ്ങിയ തന്ത്രപ്രധാനമായ മേഖലകളിൽ ചൈനീസ് ഇൻസ്ട്രക്ടർമാർ റഷ്യൻ സൈന്യത്തിന് ക്ലാസുകൾ നൽകുന്നതിന്റെ ചിത്രങ്ങളും ദൃശ്യങ്ങളും ഈ രേഖകളിലുണ്ട്. സൈന്യങ്ങളെ സംബന്ധിച്ച് ഏറ്റവും അതീവ രഹസ്യ സ്വഭാവമുള്ള ഇത്തരം വിഷയങ്ങൾ പരിശീലനത്തിൽ ഉൾപ്പെടുത്തിയത് ഇരുരാജ്യങ്ങളും തമ്മിലുള്ള ബന്ധത്തിന്റെ ആഴം വ്യക്തമാക്കുന്നതാണെന്ന് യൂറോപ്യൻ ഇന്റലിജൻസ് ഉദ്യോഗസ്ഥർ വിലയിരുത്തുന്നു.

ചൈനയ്ക്ക് സാങ്കേതിക വിദ്യ, റഷ്യയ്ക്ക് യുദ്ധപരിചയം

ചൈനീസ് സൈന്യം സാങ്കേതികമായി ഏറെ മുന്നിലാണെങ്കിലും പതിറ്റാണ്ടുകളായി അവർക്ക് നേരിട്ടുള്ള യുദ്ധപരിചയമില്ല. എന്നാൽ നാല് വർഷത്തിലേറെയായി യുക്രൈനിൽ തുടരുന്ന യുദ്ധത്തിലൂടെ റഷ്യൻ സൈന്യം വലിയ യുദ്ധപരിചയം നേടിയിട്ടുണ്ട്. നാൻജിങ്ങിൽ നടന്ന പരിശീലനത്തെക്കുറിച്ചുള്ള ആഭ്യന്തര റിപ്പോർട്ടിൽ, ചൈനയുടെ ആധുനിക ഉപകരണങ്ങളെയും ഇൻസ്ട്രക്ടർമാരുടെ അറിവിനെയും പ്രശംസിക്കുമ്പോൾ തന്നെ, ചൈനീസ് സൈന്യത്തിന്റെ യുദ്ധപരിചയക്കുറവിനെക്കുറിച്ച് റഷ്യൻ സൈന്യം പ്രത്യേകം പരാമർശിക്കുന്നുണ്ട്.

റഷ്യൻ ലാൻഡ് ഫോഴ്സസിന്റെ ഡെപ്യൂട്ടി കമാൻഡർ-ഇൻ-ചീഫ് കേണൽ ജനറൽ റുസ്തം മുറാദോവ് ആണ് റഷ്യൻ സംഘത്തെ നയിച്ചത്. ചൈനീസ് മേജർ ജനറൽ ലി ജിൻസൂൻ, റഷ്യൻ മേജർ ജനറൽ വിറ്റാലി ഗെരാസിമോവ്, മേജർ ജനറൽ റുസ്തം ഖുസൈനോവ് തുടങ്ങിയ ഉയർന്ന ഉദ്യോഗസ്ഥർ ഈ കോഴ്സുകളിലും കരാറുകളിലും നേരിട്ട് പങ്കാളികളായി. നവംബറിൽ പരിശീലനം ലഭിച്ച 200-ഓളം റഷ്യൻ സൈനികരിൽ ചിലർ പിന്നീട് യുക്രൈനിലെ യുദ്ധമുഖത്ത് പങ്കെടുത്തതായും ഇന്റലിജൻസ് റിപ്പോർട്ടുകൾ വ്യക്തമാക്കുന്നു.

ആശങ്കയോടെ യൂറോപ്യൻ യൂണിയൻ; നിഷേധിച്ച് ബെയ്ജിങ്

ലോകത്തിലെ രണ്ടാമത്തെ വലിയ സമ്പദ്‌വ്യവസ്ഥയായ ചൈനയുമായി വലിയ വ്യാപാര പങ്കാളിത്തമുള്ള യൂറോപ്യൻ യൂണിയനെ (EU) ഈ വാർത്ത വലിയ രീതിയിൽ ആശങ്കപ്പെടുത്തുന്നുണ്ട്. ചൈനയെ വെറുമൊരു സാമ്പത്തിക പങ്കാളിയായി മാത്രം കാണുന്നത് അവസാനിപ്പിച്ച്, റഷ്യയുടെ യുദ്ധസഹായി എന്ന നിലയിൽ ചൈനയ്ക്കെതിരെ കടുത്ത നടപടികൾ വേണമോ എന്ന ചർച്ച 27 അംഗ രാജ്യങ്ങൾക്കിടയിൽ സജീവമാണ്. ഇതിനകം തന്നെ റഷ്യയെ സഹായിക്കുന്ന ചില ചൈനീസ് കമ്പനികൾക്ക് മേൽ യൂറോപ്യൻ യൂണിയൻ ഉപരോധം ഏർപ്പെടുത്തിയിട്ടുണ്ട്. ജൂൺ 15-ന് യൂറോപ്യൻ യൂണിയൻ വിദേശനയ മേധാവി കാജ കല്ലാസ് ഈ പരിശീലനം സ്ഥിരീകരിച്ചിരുന്നു.

എന്നാൽ ഈ വാർത്തകൾ പൂർണ്ണമായും അടിസ്ഥാനരഹിതമാണെന്നാണ് ചൈനീസ് വിദേശകാര്യ മന്ത്രാലയത്തിന്റെ പ്രതികരണം. യുക്രൈൻ വിഷയത്തിൽ തങ്ങൾ എപ്പോഴും നിഷ്പക്ഷരാണെന്നും സമാധാനത്തിനാണ് നിലകൊള്ളുന്നതെന്നും ബെയ്ജിങ് അവകാശപ്പെടുന്നു. അതേസമയം, പാശ്ചാത്യ രാജ്യങ്ങൾ വ്യാജവിവരങ്ങൾ പ്രചരിപ്പിക്കുകയാണെന്ന് ക്രെംലിൻ കുറ്റപ്പെടുത്തി. ചൈനയിൽ നിന്ന് റഷ്യൻ സൈന്യത്തിന് പുതിയതായി ഒന്നും പഠിക്കാനില്ലെന്നും ഈ റിപ്പോർട്ടുകൾ വെറും അസംബന്ധമാണെന്നും റഷ്യൻ പാർലമെന്റിന്റെ പ്രതിരോധ സമിതി അധ്യക്ഷൻ ആന്ദ്രേ കാർട്ടാപോലോവ് പ്രതികരിച്ചു.