ഇനി ആക്രമണം നടത്തുന്ന രാജ്യം വെറും മരുഭൂമിയാകും, മുന്നറിയിപ്പുമായി ഇറാൻ; പശ്ചിമേഷ്യയിൽ പൗരന്മാർക്ക് ജാഗ്രതാ മുന്നറിയിപ്പ് നൽകി അമേരിക്ക; സംഘർഷ സൂചനയോ?

സുരക്ഷ സ്ഥിതി സങ്കീർണമാണെന്നും, ഉയർന്ന ജാഗ്രത വേണമെന്നുമാണ് പൗരന്മാർക്കുള്ള അമേരിക്കയുടെ നിർദേശം. തങ്ങൾക്കെതിരെ ആക്രമണം നടക്കുന്ന പക്ഷം എതിരാളികളുടെ രാജ്യം വെറും മരുഭൂമിയായി മാറുമെന്നാണ് ഇറാന്റെ മറുപടി ഭീഷണി

വാഷിംഗ്ടൺ: മിഡിൽ ഈസ്റ്റ് മേഖലയിലാകെ പൗരന്മാർക്ക് ജാഗ്രതാ മുന്നറിയിപ്പ് നൽകി അമേരിക്ക. സുരക്ഷ സ്ഥിതി സങ്കീർണമാണെന്നും, ഉയർന്ന ജാഗ്രത വേണമെന്നുമാണ് നിർദേശം. സൗദി - ഹൂത്തി സംഘർഷം കാരണം സൗദി, യെമൻ മേഖലകളിലും വ്യോമപാതയിലുമുള്ള സുരക്ഷാ മുന്നറിയിപ്പുകൾക്ക് പുറമെയാണ് മേഖലയിലാകെ ജാഗ്രത മുൻകരുതൽ ഉയർത്തണമെന്ന നിർദേശം പൗരന്മാർക്ക് അമേരിക്ക നൽകിയിരിക്കുന്നത്. പശ്ചിമേഷ്യൻ മേഖലയിലാകെ വിമാനങ്ങൾ റദ്ദാക്കാനും യാത്രകൾ മുടങ്ങാനും സാധ്യതയുണ്ട്. ഇറാൻ ബന്ധമുള്ള ഗ്രൂപ്പുകൾ, അമേരിക്കൻ ബന്ധമുള്ള കമ്പനികൾക്കും സ്ഥാപനങ്ങൾക്കും നേരെ ആക്രമണം നടത്താനുള്ള സാധ്യതയെ കരുതിയിരിക്കണമെന്നും നിർദേശമുണ്ട്. പുതിയ സംഘർഷം ഉടലെടുക്കുമെന്ന ചർച്ചകൾക്കും ഇത് തിരികൊളുത്തി. തങ്ങൾക്കെതിരെ ആക്രമണം നടക്കുന്ന പക്ഷം എതിരാളികളുടെ രാജ്യം വെറും മരുഭൂമിയായി മാറുമെന്നാണ് ഇറാന്റെ മറുപടി ഭീഷണി.

മുന്നറിയിപ്പുമായി ഇറാൻ സ്പീക്കർ

അതിനിടെ മേഖലയിലെ രാജ്യങ്ങൾക്കും എ ഐ കമ്പനികൾക്കും എതിരെ മുന്നറിയിപ്പുമായി ഇറാൻ പാർലമെന്റ് സ്പീക്കർ രംഗത്തെത്തി. അമേരിക്കൻ - ഇസ്രയേൽ ബന്ധമുള്ള എ ഐ കമ്പനികൾക്ക് ഭൂമിയോ വൈദ്യുതിയോ സാമ്പത്തിക ഇടപാടുകളോ നടത്തരുതെന്നാണ് നിർദേശം. നൽകിയാൽ പ്രത്യാഘാതം ഉണ്ടാകുമെന്നും മുന്നറിയിപ്പുണ്ട്. ഇറാന്റെ നേതൃത്വത്തിൽ പേർഷ്യൻ ഗൾഫ് ഡാറ്റാ അതോറിറ്റി രൂപീകരിക്കുമെന്നും എം ബി ഗാലിബാഫ് പറഞ്ഞു. എ ഐ കമ്പനികൾക്ക് യുദ്ധത്തിൽ പങ്കുണ്ടെന്നത് ഇറാന്റെ നേരത്തെയുള്ള ആരോപണമാണ്. ഹോർമൂസിൽ കൂടുതൽ കപ്പലുകൾ തകർന്നതായും ഇറാന്റെ സേനകൾ അവകാശപ്പെട്ടു.