ധോണിപ്പടയെ തോല്‍പിച്ചതെങ്ങനെ; കാരണം വ്യക്തമാക്കി രോഹിത് ശര്‍മ്മ

ചെന്നൈ സൂപ്പർ കിംഗ്സിന് ആദ്യ തോൽവി സമ്മാനിക്കുകയായിരുന്നു മുംബൈ ഇന്ത്യന്‍സ്. മുംബൈ 37 റൺസിനാണ് ചെന്നൈയെ തോല്‍പിച്ചത്.   

മുംബൈ: ഐ പി എല്ലിൽ ചെന്നൈ സൂപ്പർ കിംഗ്സിന് ആദ്യ തോൽവി സമ്മാനിക്കുകയായിരുന്നു മുംബൈ ഇന്ത്യന്‍സ്. മുംബൈ 37 റൺസിനാണ് ചെന്നൈയെ തോല്‍പിച്ചത്. തുടക്കത്തിലേ ചെന്നൈയുടെ വിക്കറ്റുകൾ നേടാനായതാണ് മത്സരത്തിൽ നിർണായകമായതെന്ന് മുംബൈ ഇന്ത്യൻസ് നായകൻ രോഹിത് ശ‌ർമ്മ പറഞ്ഞു. 170 സുരക്ഷിത സ്കോറായിരുന്നുവെന്നും രോഹിത് ശർമ്മ മത്സര ശേഷം വ്യക്തമാക്കി.

മുംബൈയുടെ 170 റൺസ് പിന്തുടർന്ന ചെന്നൈയ്ക്ക് 133 റൺസെടുക്കാനേ കഴിഞ്ഞുള്ളൂ. 59 റൺസെടുത്ത കേദാർ ജാദവിന് മാത്രമേ പൊരുതാനായുള്ളൂ. റെയ്ന 16 റണ്‍സും ധോണി 12 റണ്‍സും റായ്‌ഡു പൂജ്യത്തിനും പുറത്തായി. മലിംഗയും ഹർദിക് പാണ്ഡ്യയും മൂന്ന് വിക്കറ്റ് വീതം നേടി.

ആദ്യം ബാറ്റ് ചെയ്ത മുംബൈ അഞ്ച് വിക്കറ്റിനാണ് 170 റൺസെടുത്തത്. 43 പന്തിൽ 59 റൺസെടുത്ത സൂര്യകുമാർ യാദവാണ് ടോപ് സ്കോറർ. ക്രുനാൽ പാണ്ഡ്യ 42ഉം ഹർദിക് പാണ്ഡ്യ എട്ട് പന്തിൽ 25 റൺസുമെടുത്തു. ക്യാപ്റ്റൻ രോഹിത് ശർമ്മ 13 റൺസിന് പുറത്തായി. ബാറ്റിംഗിലും ബൗളിംഗിലും തിളങ്ങിയ ഹർദിക്കാണ് മാൻ ഓഫ് ദ മാച്ച്.