തോല്‍വിയിലും 'തല' ഉയര്‍ത്തി; ഐപിഎല്ലില്‍ ഈ നേട്ടം കൈവരിക്കുന്ന ആദ്യ ഇന്ത്യന്‍ താരമായി ധോണി

48 പന്തില്‍ 84 റണ്‍സുമായി പുറത്താകാതെ നിന്ന ധോണി ഏഴ് സിക്സര്‍ പറത്തിയിരുന്നു. ഇതില്‍ ഒരെണ്ണം സ്റ്റേഡിയത്തിന് പുറത്താണ് പതിച്ചത്.

ബംഗലൂരു: ഐപിഎല്ലില്‍ അസാധ്യമായ ജയത്തിന് അടുത്തുവരെ ചെന്നൈയെ എത്തിച്ച് അവസാന പന്തില്‍ കാലിടറി വീണെങ്കിലും ചെന്നൈ നായകന്‍ എം എസ് ധോണി മറ്റൊരു റെക്കോര്‍ഡ് കുറിച്ചാണ് ക്രീസ് വിട്ടത്. ഐപിഎല്‍ ചരിത്രത്തില്‍ 200 സിക്സര്‍ നേടുന്ന മൂന്നാമത്തെ മാത്രം ബാറ്റ്സ്മാനെന്ന റെക്കോര്‍ഡാണ് ഇന്നലെ ബാംഗ്ലൂരിനെതിരെ ധോണി സ്വന്തമാക്കിയത്.

48 പന്തില്‍ 84 റണ്‍സുമായി പുറത്താകാതെ നിന്ന ധോണി ഏഴ് സിക്സര്‍ പറത്തിയിരുന്നു. ഇതില്‍ ഒരെണ്ണം സ്റ്റേഡിയത്തിന് പുറത്താണ് പതിച്ചത്. ഇന്നലെ നാലാം സിക്സ് നേടിയപ്പോഴാണ് ധോണി ഐപിഎല്ലില്‍ 200 സിക്സര്‍ നേടുന്ന മൂന്നാമത്തെ താരമെന്ന റെക്കോര്‍ഡ് സ്വന്തമാക്കിയത്. 323 സിക്സര്‍ നേടിയിട്ടുള്ള ക്രിസ് ഗെയിലും 204 സിക്സറുകള്‍ നേടിയിട്ടുള്ള ബാംഗ്ലൂരിന്റെ എ ബി ഡിവില്ലിയേഴ്സും മാത്രമാണ് ധോണിക്ക് മുമ്പ് ഈ ചരിത്രനേട്ടം സ്വന്തമാക്കിയവര്‍.

190 സിക്സറുകള്‍ വീതം നേടിയിട്ടുള്ള രോഹിത് ശര്‍മയും സുരേഷ് റെയ്നയുമാണ് ധോണിക്ക് തൊട്ടുപിന്നിലുള്ളവര്‍. ബാംഗ്ലൂര്‍ നായകന്‍ വിരാട് കോലിയുടെ പേരില്‍ 186 സിക്സറുകളുണ്ട്. ഇന്നലെ ബാംഗ്ലൂരിനെതിരെ അവസാന ഓവറില്‍ 26 റണ്‍സായിരുന്നു ചെന്നൈക്ക് ജയിക്കാന്‍ വേണ്ടിയിരുന്നത്. ഉമേഷ് യാദവ് എറിഞ്ഞ ഓവറില്‍ 24 റണ്‍സാണ് ധോണി നേടിയത്. അവസാന പന്തില്‍ സിംഗിളെടുക്കാന്‍ ശ്രമിച്ചെങ്കിലും ഷര്‍ദ്ദൂല്‍ ഠാക്കൂര്‍ റണ്ണൗട്ടായതോടെ ചെന്നൈ ഒരു റണ്ണിന് തോറ്റു.