ചില്ല, എഴുത്തിന്റെ ചിറകനക്കങ്ങള്‍. ഇന്ന് സുജിത്ത് സുരേന്ദ്രന്‍ എഴുതിയ കവിതകള്‍
ചില്ല. പുതിയൊരു പംക്തി ആരംഭിക്കുന്നു. ചില്ലയിലേക്കുള്ള സൃഷ്ടികള്‍ submissions@asianetnews.in എന്ന വിലാസത്തില്‍ അയക്കൂ. ഒപ്പം ഫോട്ടോയും വിശദമായ വിലാസവും അയക്കണം. എഡിറ്റോറിയല്‍ ബോര്‍ഡ് തെരഞ്ഞെടുക്കുന്ന സൃഷ്ടികള്‍ പ്രസിദ്ധീകരിക്കും.
പച്ചയാകാശം
മഴയുടെ
തൂവലാകും മുന്‍പ്
കെട്ടുപൊട്ടിയൊരാകാശം
പട്ടത്തോട്;
അപ്പുപ്പന്‍ത്താടി
പറഞ്ഞു കൊടുത്ത
ആ രഹസ്യത്തെ-
ക്കുറിച്ചു ചോദിക്കുന്നു,
അല്‍പ്പസമയത്തേ -
ക്കെടുത്തണിഞ്ഞ
ഇലകളുടെ ഉടുപ്പിനെ-
ക്കുറിച്ചന്വേഷിക്കുന്നു,
പറക്കുവാനിടം കൊടുത്ത
കിളികളോട്;
തളരാത്ത
ചിറകുകളെക്കുറിച്ചന്വേഷിക്കുന്നു,
ഇതളുകളോട്
കാറ്റിന്റെ തോളിലെ
തഴമ്പിനെക്കുറിച്ചന്വേഷിക്കുന്നു,
എല്ലാ അറിവുകളും നിറച്ചുവെച്ച്,
ഒടുവിലൊരു
മഴയുടെ ചിറകിനടിയിലൊളിച്ച്
അത്;
മണ്ണിലൊരു
പച്ചയാകാശം വരച്ചിടുന്നു.
............................
Read more: ചെ, സുനിത പി എം എഴുതിയ കവിതകള്‍
............................
ഒരൊറ്റ ടിക്കറ്റ്
മറവിലേക്കുള്ള
ടിക്കറ്റ് എടുത്ത്
ബസിന്റെ
സൈഡ്‌സീറ്റില്‍ തന്നെ
ചെന്നിരുന്നു ;
നിന്നെക്കുറിച്ചുള്ള
ഓര്‍മ്മകളോരോന്നും
കാറ്റിനൊപ്പം എന്നെ
ചുംബിച്ചുകൊണ്ടേയിരുന്നു.
ബസ്;
മറവിലേക്കും,
ഞാന്‍;
ഓര്‍മ്മകളിലേക്കും
നൂറെന്നൂറില്‍ ഓടിക്കൊണ്ടിരുന്നു
കൊഴിഞ്ഞുവീണ
ഇലകള്‍പോലും
എന്റെയൊപ്പം പുറകിലോട്ടുപോന്നു.
ബസ്
മറവിയിലെത്തിയെന്ന്
കണ്ടക്ടര്‍
ഓര്‍മ്മപ്പെടുത്തുമ്പോള്‍ ;
ഞാന്‍
ഓര്‍മ്മകളുടെ കടപ്പുറത്ത്
വറുത്ത കപ്പലണ്ടി കൊറിച്ചുക്കൊണ്ട്
സൂര്യാസ്തമയം കാണുകയായിരുന്നു.
ഒരു കടല്‍
മുഴുവനായി
ചൊകന്ന് തുടുത്ത്,.
ചൊകന്ന് തുടുത്ത്,
ചോര വാര്‍ന്നൊലിച്ച്,
55 പേര്‍
മറവിയുടെ കൊക്കയില്‍
നിന്നിറങ്ങിപ്പോയി !
Read more: ഒരു പെണ്ണ് ബുള്ളറ്റോടിക്കുമ്പോള്‍, ഷീലാ റാണി എഴുതിയ കവിതകള്‍