ലക്ഷ്വറി സാമ്രാജ്യത്തിന്റെ അധിപയായി ബെർണാഡ് അർനോൾട്ടിന്റെ മകൾ

ലോകത്തിലെ ഏറ്റവും വലിയ ധനികനായ ബെർണാഡ് അർനോൾട്ടിന്റെ മകൾ  ഡിയോർ ഫാഷൻ ഹൗസിന്റെ തലപ്പത്തേക്ക്. ലൂയി വിറ്റൺ മേധാവിയുടെ മകളെ കുറിച്ച് അറിയേണ്ടതെല്ലാം 

സാൻഫ്രാൻസിസ്കോ: ഫ്രഞ്ച് ശതകോടീശ്വരൻ ബെർണാഡ് അർനോൾട്ട് തന്റെ മകൾ ഡെൽഫിനെ ഡിയോർ ഫാഷൻ ഹൗസിന്റെ തലപ്പത്തേക്ക് നിയമിച്ചു. 2018 മുതൽ ഡിയോറിന്റെ തലവനായിരുന്ന പിയെട്രോ ബെക്കാരി ലൂയി വിറ്റൺ സിഇഒ മൈക്കൽ ബർക്കിന് പകരക്കാരനാകും. ഫെബ്രുവരി 1 മുതൽ ആയിരിക്കും ചുമതലകൾ മാറുക. 

ഡിയോർ ഫാഷൻ ഹൗസുമായി ബന്ധപ്പെട്ട പ്രവർത്തനങ്ങൾക്ക് മേൽനോട്ടം വഹിക്കുന്ന ഡെൽഫിൻ 2013 മുതൽ ലൂയിസ് വിറ്റണിൽ എക്സിക്യൂട്ടീവ് വൈസ് പ്രസിഡന്റാണ്. മുമ്പ്, ഡെൽഫിൻ  ക്രിസ്റ്റ്യൻ ഡിയർ കോച്ചറിൽ ഡെപ്യൂട്ടി മാനേജിംഗ് ഡയറക്ടറായി സേവനമനുഷ്ഠിച്ചു.

കഴിഞ്ഞ വർഷം അവസാനം ലോക സമ്പന്നരിൽ ഒന്നാം സ്ഥാനം അടക്കി വാണിരുന്ന ഇലോൺ മാസ്കിന്റെ ആസ്തി കുത്തനെ ഇടിഞ്ഞതോടെ 73 കാരനായ ബെർണാഡ് അർനോൾട്ട് ലോകത്തെ ഏറ്റവും വലിയ സമ്പന്നനായി മാറിയിരുന്നു. 

ഡെൽഫിന്റെ ദീർഘവീക്ഷണവും താരതമ്യപ്പെടുത്താനാവാത്ത അനുഭവവും ക്രിസ്റ്റ്യൻ ഡിയോറിന്റെ തുടർ വികസന ത്തിൽ നിർണായക സ്വത്തായിരിക്കും എന്ന് ബെർണാഡ് അർനോൾട്ട് പറഞ്ഞു. കഴിഞ്ഞ അഞ്ച് വർഷമായി ഡിയോറിന്റെ തലവനെന്ന നിലയിൽ ബെക്കാരി നടത്തിയ  പ്രവർത്തനത്തെ ബെർണാഡ് അർനോൾട്ട് പ്രശംസിച്ചു.ലൂയി വിറ്റണിനെ ഇതിലും വലിയ വിജയത്തിലേക്ക് ബെക്കാരി നയിക്കുമെന്ന് ആർക്കും സംശയമില്ലെന്നും അദ്ദേഹം പറഞ്ഞു.

അഞ്ച് മക്കളാണ് ലോകത്തിലെ ഏറ്റവും വലിയ സമ്പന്നനായ ബെർണാഡ് അർനോൾട്ടിന്. മൂത്ത മകൻ അന്റോയിൻ അർനോൾട്ട് ഡിസംബറിൽ എൽവിഎംഎച്ച് നിയന്ത്രിക്കുന്ന ഹോൾഡിംഗ് കമ്പനിയായ ക്രിസ്റ്റ്യൻ ഡിയർ എസ്ഇയുടെ സിഇഒ ആയി തിരഞ്ഞെടുക്കപ്പെട്ടു, രണ്ടാമത്തെ മകൻ അലക്‌സാന്ദ്രെ അർനോൾട്ട് ജ്വല്ലറി ബ്രാൻഡായ ടിഫാനിയുടെ എക്‌സിക്യൂട്ടീവ് വൈസ് പ്രസിഡന്റാണ് അദ്ദേഹം മുമ്പ് ലഗേജ് നിർമ്മാതാവായ റിമോവയുടെ സിഇഒ ആയിരുന്നു. മൂന്നാമത്തെ മകൻ ഫ്രെഡറിക് വാച്ച് മേക്കർ ടാഗ് ഹ്യൂവറിന്റെ സിഇഒയാണ്. 2017-ൽ ചേർന്ന വാച്ച് ലേബലിൽ സ്ട്രാറ്റജിയുടെ തലവനും ഡിജിറ്റൽ ഡയറക്ടറുമായിരുന്നു അദ്ദേഹം. ഫ്രാൻസിലെ ഇക്കോൾ പോളിടെക്നിക്കിൽ നിന്ന് ബിരുദധാരിയാണ് ഫ്രെഡറിക്. മറ്റൊരു മകൻ ജീൻ അർനോൾട്ട്, ലൂയി വിറ്റണിൽ വാച്ച് ഡെവലപ്‌മെന്റ് ആൻഡ് മാർക്കറ്റിംഗ് ഡയറക്ടറാണ്. ജീൻ മസാച്യുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജിയിൽ നിന്ന് സാമ്പത്തിക ഗണിതത്തിലും ലണ്ടനിലെ ഇംപീരിയൽ കോളേജിൽ നിന്ന് മെക്കാനിക്കൽ എഞ്ചിനീയറിംഗിലും ബിരുദാനന്തര ബിരുദം നേടിയിട്ടുണ്ട്.