ശതകോടീശ്വരൻമാരുടെ പട്ടികയിൽ മുകളിലേക്ക് കുതിച്ച് അദാനി; ആസ്തി ഉയർന്നു

ശതകോടീശ്വരൻമാരുടെ പട്ടികയിൽ നാലുപേരെ മറികടന്ന് അദാനി. കമ്പനികളുടെ ഓഹരി വില കുത്തനെ ഉയർന്നതാണ്  ഗൗതം അദാനിക്ക് തുണയായത്.   

മുംബൈ: ഗൗതം അദാനിയുടെ ആസ്തി 39.9 ബില്യൺ ഡോളറായി ഉയർന്നു. ശതകോടീശ്വരൻമാരുടെ പട്ടികയിൽ ഗൗതം അദാനിയുടെ സ്ഥാനം ഇതോടെ ഉയർന്നു. നാലുപേരെ മറികടന്ന് അദാനി 30-ാം സ്ഥാനത്തെത്തി. കമ്പനികളുടെ ഓഹരി വില കുത്തനെ ഉയർന്നതാണ്  ഗൗതം അദാനിക്ക് തുണയായത്. 

 2 ബില്യൺ ഡോളറിലധികം വർദ്ധനയാണ് ഉണ്ടായത്. ഏകദേശം 32 ലക്ഷം കോടി രൂപയാണ് അദാനിയുടെ നിലവിലെ ആസ്തി. യുഎസ് ആസ്ഥാനമായുള്ള ഹിൻഡൻബർഗ് ജനുവരി 24-ന് അദാനി ഗ്രൂപ്പിന് എതിരെയുള്ള റിപ്പോർട്ട് പുറത്തുവിട്ടതിന് ശേഷം അദാനി ഓഹരികളിൽ വൻ ഇടിവാണ് ഉണ്ടായിരുന്നത്. 

മാർച്ച് അവസാനത്തോടെ 690 മില്യൺ മുതൽ 790 മില്യൺ ഡോളർ വരെയുള്ള ഷെയർ-ബാക്ക്ഡ് ലോണുകൾ തിരിച്ചടക്കാനോ തിരികെ നൽകാനോ ഗൗതം അദാനി ഉദ്ദേശിക്കുന്നുവെന്ന വാർത്ത പുറത്തുവന്നതോടെയാണ് അദാനി ഗ്രൂപ്പിന്റെ ഓഹരികൾ ഉയർന്നത്. 

നേരത്തെ, ഹിൻഡൻബർഗ് റിസർച്ചിന്റെ എല്ലാ അവകാശവാദങ്ങളും അദാനി ഗ്രൂപ്പ് തള്ളിയിരുന്നെങ്കിലും ഗ്രൂപ്പിന്റെ ഓഹരി ഓഹരികൾ കുത്തനെ ഇടിഞ്ഞിരുന്നു.

അതേസമയം 2023 ൽ സമ്പത്ത് ഗണ്യമായി കുറയുന്ന ഒരേയൊരു ഇന്ത്യൻ വ്യവസായി അദാനിയല്ല.  ഇന്ത്യയിലെ ഏറ്റവും വലിയ സമ്പന്നനായ മുകേഷ് അംബാനിയുടെ ആസ്തി 5 ബില്യൺ ഡോളറിലധികം കുറഞ്ഞു. വ്യവസായ പ്രമുഖനായ മുകേഷ് അംബാനിയുടെ ആസ്തി 79.7 ബില്യൺ ഡോളറാണ്.