Share Market Today: അഞ്ചാം ദിനവും നേട്ടം; സെൻസെക്സ് 284 പോയിന്റ് ഉയർന്നു, നിഫ്റ്റി 16,600 ന് മുകളിൽ

ഓഹരി വിപണി തുടർച്ചയായ അഞ്ചാം ദിനവും നേട്ടത്തിൽ വ്യാപാരം അവസാനിപ്പിച്ചു.  നിഫ്റ്റി 16,600 ന് മുകളിലാണ്. നേട്ടത്തിലുള്ള ഓഹരികൾ അറിയാം

മുംബൈ: രാവിലെ നഷ്ടത്തിൽ വ്യാപാരം ആരംഭിച്ച ഓഹരി വിപണി നേട്ടത്തിൽ വ്യാപാരം അവസാനിപ്പിച്ചു. തുടർച്ചയായ അഞ്ചാം ദിവസമാണ് സൂചികകൾ ഉയർന്നു നിൽക്കവേ വ്യാപാരം അവസാനിപ്പിക്കുന്നത്. ബിഎസ്ഇ സെൻസെക്‌സ് 284 പോയിന്റ് അഥവാ 0.5 ശതമാനം ഉയർന്ന് 55,682ലും എൻഎസ്ഇ നിഫ്റ്റി 50 89 പോയിന്റ് അഥവാ 0.54 ശതമാനം ഉയർന്ന് 16,610ലും ക്ലോസ് ചെയ്തു. 

നിഫ്റ്റി പിഎസ്ബി സൂചിക 1.56 ശതമാനം ഉയർന്നപ്പോൾ നിഫ്റ്റി ഫാർമ 0.4 ശതമാനം ഇടിഞ്ഞു. ബിഎസ്‌ഇ മിഡ്‌ക്യാപ്, സ്‌മോൾക്യാപ് സൂചികകൾ 1.3  ശതമാനം വരെ ഉയർന്നു.

ഇൻഡസ്ഇൻഡ് ബാങ്ക്, എൽ ആൻഡ് ടി, ബജാജ് ഫിനാൻസ്, ടാറ്റ കൺസ്യൂമർ പ്രോഡക്ട്‌സ്, യുപിഎൽ, എൽ ആൻഡ് ടി, ബജാജ് ഫിൻസെർവ്, ഏഷ്യൻ പെയിന്റ്‌സ്, ഹിൻഡാൽകോ, ബിപിസിഎൽ എന്നിവ 2 മുതൽ 8 ശതമാനം വരെ ഉയർന്നു. കൂടാതെ, ടെക് എം, ഗ്രാസിം, ദിവിസ് ലാബ്‌സ്, ആക്‌സിസ് ബാങ്ക്, അദാനി പോർട്ട്‌സ്, ഹിൻഡാൽകോ, ഇൻഫോസിസ്, ബജാജ് ഓട്ടോ, പവർ ഗ്രിഡ് എന്നിവ 2 ശതമാനം വരെ ഉയർന്നു. കോട്ടക് ബാങ്ക്, ഡോ.റെഡ്ഡീസ് ലാബ്സ്, എസ്ബിഐ ലൈഫ്, സിപ്ല, റിലയൻസ് ഇൻഡസ്ട്രീസ് എന്നീ ഓഹരികൾ നഷ്ടത്തിലാണ്. രണ്ട് ശതമാനം വരെ ഇവ ഇടിഞ്ഞു. 

രാവിലെ 80 കടന്ന രൂപയുടെ വിനിമയ നിരക്ക് ഇന്ന് വ്യാപാരം അവസാനിക്കുമ്പോൾ ഡോളറിന് 79.95 എന്ന നിലയിലാണ്. ഇന്നലെ വ്യാപാരം അവസാനിക്കുമ്പോൾ രൂപയുടെ മൂല്യം 79.98 ആയിരുന്നു. ജൂലൈ 26 ന് യു എസ് ഫെഡ് നിരക്കുകൾ ഉയർത്തുമ്പോൾ രൂപയുടെ മൂല്യം വീണ്ടും റെക്കോർഡ് ഇടിവിലേക്ക് എത്താനുള്ള സാധ്യത ഉണ്ട്.