ദില്ലിയില്‍ പതിനേഴുകാരന്‍റെ കഴുത്തറുത്ത സംഭവം: അഞ്ച്​ സ്​കൂൾ വിദ്യാർഥികൾ ജുവനൈൽ ബോർഡിൽ

ദില്ലി: പതിനേഴുകാരനെ ബസിൽ വെട്ടി കൊലപ്പെടുത്തിയ സംഭവത്തിൽ അഞ്ച്​ സ്​കൂൾ വിദ്യാർഥികളെ ജുവനൈൽ ജസ്​റ്റിസ്​ ബോർഡ്​ മുമ്പാകെ ഹാജരാക്കി. സംഭവത്തെ തുടർന്ന്​ അധ്യാപകർക്കെതിരെ തുറന്നടിച്ച്​ കുട്ടികളുടെ രക്ഷിതാക്കൾ രംഗത്തുവരികയും അവരുടെ പിഴവാണ്​ സംഭവങ്ങൾക്ക്​ കാരണമെന്ന്​ കുറ്റപ്പെടുത്തുകയും ചെയ്​തു. പഠനത്തിൽ കുട്ടികൾ ഒരു താൽപര്യവും കാണിക്കാറില്ലെന്നും ഇവർ പറയുന്നു. 

മിക്ക കുട്ടികളുടെയും രക്ഷിതാക്കൾ ഫാക്​ടറി തൊഴിലാളികളാണ്​. സംഭവത്തെക്കുറിച്ച്​ ഇതുവരെ ത​ങ്ങളോട്​ പറഞ്ഞിട്ടില്ലെന്നും രക്ഷിതാക്കൾ പറയുന്നു. അഞ്ചിൽ മൂന്ന്​ കുട്ടികൾ ബദർപൂർ സർക്കാർ സ്​കൂളിലും മറ്റുള്ളവർ സരിത വിഹാറിലെ സ്​കൂളിലുമാണ്​ പഠിക്കുന്നത്​. അഞ്ച്​ പേരും ഉച്ചക്ക്​ ഒരു മണി മുതൽ ആറ്​ വരെയുള്ള സായാഹ്​ന സ്​കൂളിലാണ്​ പഠിക്കുന്നത്​. കൊലപാതകത്തിന്​ ശേഷം അടുത്ത ദിവസം അഞ്ച്​ പേരും സ്​കൂളിൽ ഹാജരായില്ല. ഏതാനും വർഷം മുമ്പ്​ ഭർത്താവ്​ മരിച്ചതിനാൽ തനിക്ക്​ മക​ന്‍റെ കാര്യത്തിൽ ശ്രദ്ധിക്കാനാകുന്നില്ലെന്ന്​ ആരോപണ വിധേയാനായ 13കാര​ന്‍റെ അമ്മ പറയുന്നു. ഇവർ നൂൽ ഫാക്​ടറി ജീവനക്കാരിയാണ്​. 

മക്കളെ പഠിക്കാനാണ്​ സ്​കൂളിൽ വിടുന്നതെങ്കിലും അധ്യാപകർ അവധിയായതിനാൽ അവിടെ ക്ലാസുകൾ നടക്കാറില്ല. അധ്യാപകർ ശ്രദ്ധിക്കാത്തതിനാൽ സ്​കൂളിൽ​ പോകി​ല്ലെന്ന്​ മകൻ പലപ്പോഴും പറഞ്ഞിട്ടുണ്ടെന്ന്​ മറ്റൊരു കുട്ടിയുടെ അമ്മ പറഞ്ഞു​.   കുട്ടി എങ്ങനെ പഠിക്കുന്നുവെന്ന്​ അറിയാൻ ​​ശ്രമിച്ചെങ്കിലും സ്​കൂളില്‍ നിന്ന്​ പ്രതികരണം ഇല്ലായിരുന്നു. രക്ഷിതാക്കളെ പോലും അറിയിക്കാതെ കുട്ടികളെ സ്​കൂളിൽ നിന്ന്​ സസ്​പെന്‍റ്​ ചെയ്​തുവെന്നും മറ്റൊരു കുട്ടിയുടെ അമ്മ പറയുന്നു. മറ്റ്​ കുട്ടികളുടെ രക്ഷിതാക്കളും അധ്യാപകരുടെ വീഴ്​ചയെയാണ്​ കുറ്റപ്പെടുത്തുന്നത്​.