കോണ്‍ഗ്രസ് ഇടത് ഐക്യത്തിന് തടസം നില്‍ക്കുന്നത് കേരളത്തിലെ സിപിഎം നേതാക്കളെന്ന് ആന്റണി

ദില്ലി: ബി ജെ പിക്കെതിരായ കോണ്‍ഗ്രസ് ഇടതു ഐക്യത്തിന് തടസ്സം നില്ക്കുന്നത് കേരളത്തിലെ സി പി ഐ എം നേതാക്കളെന്ന് മുതിര്‍ന്ന കോണ്‍ഗ്രസ് നേതാവ് എ കെ ആന്റണി. കാലത്തിന്റെ ചുവരെഴുത്ത് വായിക്കാന്‍ കേരള ഘടകം തയ്യാറാവണമെന്നും കോടിയേരി ബാലകൃഷ്ണനും പിണറായിക്കും ഒരിക്കല്‍ ഈ നിലപാട് സ്വീകരിക്കേണ്ടി വരുമെന്നും എ കെ ആന്റണി ദില്ലിയില്‍ ഏഷ്യാനെറ്റ് ന്യൂസിനോട് പറഞ്ഞു.

ദേശീയ തലത്തില്‍ പൊതു ശത്രുവിനെ നേരിടുമ്പോള്‍ പ്രാദേശിക തര്‍ക്കങ്ങള്‍ അതിന് തടസ്സമായി നില്‍ക്കരുതെന്ന് ഏ കെ ആന്റണി ചൂണ്ടിക്കാട്ടി. ബംഗാള്‍ ഘടകം ക്ഷയിച്ചതോടെ കേരളഘടകത്തിനാണ് ഇപ്പോള്‍ ദേശീയതലത്തില്‍ വന്‍ സ്വാധീനമുള്ളത്. ഇതാണ് ഐക്യത്തിന് തടസ്സമെന്നും അദ്ദേഹം പറഞ്ഞു.

രാഷ്ട്രപതി തെരഞ്ഞെടുപ്പില്‍ പ്രതിപക്ഷത്തിന് ഒരു സ്ഥാനാര്‍ഥി മാത്രമേ ഉണ്ടാകൂ എന്നും എ കെ ആന്റണി വ്യക്തമാക്കി.