റോഡിൽ ഡ്രൈവറുടെ മനുഷ്യത്വം; വീഡിയോ കാണാം

സമൂഹത്തിൽ പ്രത്യേക പരിഗണന ലഭിക്കേണ്ടവരാണ്​ പ്രായമായവർ. പലപ്പോഴും അത്​ ലഭിക്കാതെ വരുന്നതാണ്​ അനുഭവം. റോഡ്​ മുറിച്ചുകടക്കാൻ പ്രയാസപ്പെടുന്ന പ്രായമായവർ പലപ്പോഴും വാഹനമോടിക്കുന്നവർക്ക്​ അലോസരമായി തോന്നാറുണ്ട്​. ഏറെ നേരം കാത്തിരുന്നിട്ടും ചൈനയിൽ സീബ്രാലൈനിൽ കൂടി റോഡ്​ മുറിച്ചുകടക്കാൻ കഴിയാതെ വിഷമിച്ചുനിൽക്കുന്ന വൃദ്ധക്ക്​ വഴിയൊരുക്കി കൊടുക്കാൻ തയാറായത്​ കാർ ഡ്രൈവറാണ്​.

സ്വന്തം കാർ റോഡിന്​ കുറുകെയിട്ട്​ ഗതാഗതം തടഞ്ഞാണ്​ ഇയാൾ വൃദ്ധക്ക്​ വഴിയൊരുക്കിയത്​. മരിക്കാത്ത മനുഷ്യത്വത്തി​ന്‍റെ ഇൗ വീഡിയോ കാഴ്​ച ഇതിനകം സോഷ്യൽ മീഡിയയിൽ വൈറൽ ആവുകയും ചെയ്​തു. ചൈനയിലെ പീപ്പിൾസ്​ പത്രമാണ്​ ഫെയ്​സ്​ബുക്കിൽ ഇത്​ പോസ്​റ്റ്​ ചെയ്​തത്​. റോഡ്​ മുറിച്ചുകടക്കാൻ കാത്തുനിൽക്കുന്ന വൃദ്ധയെ കണ്ട കാർ ഡ്രൈവർ സ്വന്തം വാഹനം നിർത്തികൊടുത്തു. എന്നാൽ മറ്റ്​ വാഹനങ്ങൾ ഇടതടവില്ലാതെ ഒഴുകിയതോടെയാണ്​ ഇയാൾ കാർ റോഡിന്​ കുറുകെയിട്ട്​ ട്രാഫിക്​ തടഞ്ഞ്​ വൃദ്ധക്ക്​ വഴിയൊരുക്കുന്നത്​.

ചൈനയിലെ ജിൻഹുവയിൽ നിന്നാണ്​ കഴിഞ്ഞ 15ന്​ വീഡിയോ പകർത്തിയത്​. മനുഷ്യത്വത്തിൽ വിശ്വാസം, അഭിവാദ്യങ്ങൾ എന്ന കുറി​പ്പാണ്​ ഫെയ്​സ്​ബുക്ക്​ പോസ്​റ്റിന്​ ഒരാൾ ചേർത്തിരിക്കുന്നത്.