അവിഹിതമെന്ന് സംശയം; ജവാൻ ഭാര്യയുടെ സ്വകാര്യ ഭാ​ഗങ്ങളിൽ വൈദ്യുതി കടത്തിവിട്ട് കൊലപ്പെടുത്തി

ചണ്ഡിഗഡ്​ സായുധ സേനാ വിഭാഗത്തിലെ ജവാൻ സുരേഷ്​ മിരി(33) ആണ്​ ഭാര്യ ലക്ഷ്​മിയെ(27) ക്രൂരമായി കൊലപ്പെടുത്തിയത്​.

റായ്പൂര്‍: അവിഹിതബന്ധമുണ്ടെന്ന സംശയത്തിന്‍റെ പേരിൽ സ്വകാര്യ ഭാ​ഗങ്ങളിൽ ഷോക്കടിപ്പിച്ച് ജവാൻ ഭാര്യയെ കൊലപ്പെടുത്തി. റായ്​പൂരിലെ ഭാലോഡബസാറിലാണ്​ സംഭവം. ചണ്ഡിഗഡ്​ സായുധ സേനാ വിഭാഗത്തിലെ ജവാൻ സുരേഷ്​ മിരി(33) ആണ്​ ഭാര്യ ലക്ഷ്​മിയെ(27) ക്രൂരമായി കൊലപ്പെടുത്തിയത്​.  മിരിയെ സര്‍ഗോണ്‍ പൊലീസ് അറസ്റ്റ് ചെയ്തു. 

ഇയാള്‍ ദന്തേവാഡയിലെ സിഎഎഫില്‍ ആറാം ബറ്റാലിയനില്‍ പാചകകാരനാണ്. ഭാര്യയ്ക്ക് അവിഹിതബന്ധമുണ്ടെന്ന് സംശയം ഇയാളില്‍ ശക്തമായിരുന്നെന്ന് പൊലീസ് പറഞ്ഞു. സംഭവം നടക്കുമ്പോള്‍ തുണി അലക്കുകയായിരുന്നു ലക്ഷ്മി. ഈ സമയം വീട്ടില്‍ എത്തിയ സുരേഷ് മിരി യുവതിയെ മർദ്ദിച്ച്  അബോധാവസ്ഥയിലാക്കിയ ശേഷം വയര്‍ കൊണ്ട് ലക്ഷ്മിയുടെ സ്വകാര്യ ഭാഗങ്ങളില്‍ വൈദ്യുതി കടത്തി വിടുകയായിരുന്നു. സംഭവസ്ഥലത്ത് വച്ച് തന്നെ  ലക്ഷ്മി മരിച്ചു. 

കൊല നടത്തിയ ശേഷം ഇയാൾ ലക്ഷ്​മിയുടെ മൃതദേഹം സ്വന്തം ഗ്രാമമായ ഖാജിരിയിൽ എത്തിച്ചു. ലക്ഷ്​മി അസുഖത്തെ തുടർന്ന്​ മരിച്ചുവെന്നാണ്​ ബന്ധുക്കളെ അറിയിച്ചത്​. എന്നാൽ ലക്ഷ്​മിയുടെ മൃതശരീരം പരിശോധിച്ച മാതാപിതാക്കൾ പരിക്കുകൾ കണ്ട്​ സംശയം തോന്നിയതിനെ തുടർന്ന് പൊലീസിനെ അറിയിക്കുകയും ശവസംസ്​കാരം തടയുകയുമായിരുന്നു.

ഭട്ടാപര ഹൗസിങ്​ ബോർഡ്​ കോളനിയിലാണ്​ രണ്ട്​ മക്കൾക്കൊപ്പം ദമ്പതികൾ താമസിച്ചിരുന്നത്​. പിന്നീട് പൊലീസെത്തി മൃതദേഹം പോസ്​റ്റ്​മോർട്ടത്തിനയ്ക്കുകയും ​ മിരിയെ കസ്​റ്റയിലെടുക്കുകയുമായിരുന്നു. ചോദ്യം ചെയ്യലിൽ ഇയാൾ കുറ്റസമ്മതം നടത്തി.