സഹോദരിയെ മാനഭംഗപ്പെടുത്താൻ ശ്രമം; മനംനൊന്ത്​ യുവാവ്​ ആത്മഹത്യ ചെയ്​തു

ദില്ലി: സഹോദരിക്ക്​ നേരെ നടന്ന പീഡന ശ്രമം തടയാനാവാത്തതിൽ മനം നൊന്ത്​ പതിനെട്ടുകാരൻ ആത്മഹത്യ ചെയ്​തു. ദില്ലിയിലെ ജീവൻപാർക്ക്​ സിർസപൂറിലാണ്​ സംഭവം. ദീപക്​ കുമാർ എന്നയാളാണ്​ ഫാനിൽ തൂങ്ങിമരിച്ചത്​. മോഷണ ആരോപണം ഉന്നയിച്ച്​ കഴിഞ്ഞ ഏഴിന്​ സഹോദരിയെ നാലംഗ ഗുണ്ടാസംഘം പീഡിപ്പിച്ചിരുന്നു. കൂടെയുണ്ടായിരുന്ന ദീപകിന്​ സഹോദരിയെ ഇവരിൽ നിന്ന്​ രക്ഷിക്കാനായില്ല. 

ഇവർ ദീപക്​ കുമാറിനെ അധിക്ഷേപിക്കുകയും ചെയ്​തിരുന്നു. അപമാനിതനായ ഇയാൾ വീട്ടിലെ ഫാനിൽ തൂങ്ങി മരിക്കുകയായിരുന്നുവെന്ന്​ പൊലീസ്​ ഡെപ്യൂട്ടി കമീഷണർ രജനീഷ്​ ഗുപ്​ത പറഞ്ഞു. എന്നാൽ ആത്മഹത്യാകുറിപ്പ്​ കണ്ടെടുക്കാനായിട്ടില്ല. സഹോദരിയെ പീഡിപ്പിക്കാൻ ശ്രമിച്ചതി​ന്‍റെ പേരിൽ പ്രദേശത്തെ യുവാക്കളുമായുണ്ടായ കലഹം കുടുംബാംഗങ്ങൾ പൊലീസിനോട്​ വെളിപ്പെടുത്തി​.

സഹോദരിയുമൊത്ത്​ നടന്നുപോകു​മ്പോള്‍ ആയിരുന്നു മോഷണ ആരോപണം ഉന്നയിച്ച്​ പീഡന ശ്രമം നടന്നതെന്ന്​ ദീപക്​ കുമാറി​ന്‍റെ അമ്മ പൊലീസിന്​ നൽകിയ മൊഴിയിൽ പറയുന്നു. എന്നാൽ ഇൗ സംഭവം പൊലീസിൽ അറിയിക്കുകയോ കേസെടുക്കുകയോ ചെയ്​തിട്ടില്ല. 

സംഭവം പുറത്തുവന്നതോടെ സ്​ത്രീയെ മാനഭംഗപ്പെടുത്താൻ ശ്രമിച്ചതിന്​ ഒരുപറ്റം യുവാക്കൾക്കെതിരെ പൊലീസ്​ കേസെടുത്ത്​ അന്വേഷണം തുടങ്ങി. പോസ്​റ്റ്​മോർട്ടത്തിന്​ ശേഷം ദീപക്​ കുമാറിന്‍റെ മൃതദേഹം ബന്ധുക്കൾക്ക്​ വിട്ടുനൽകി. ദീപകി​ന്‍റെ മരണത്തിൽ ആരോപണ വിധേയരായവരുടെ പങ്ക്​ പൊലീസ്​ പരിശോധിച്ചുവരികയാണ്​.